໑໑. ທຸຕິຍສງ຺ຆເຠທສິກ຺ຂາປທວຓ຺ຓນາ

໔໑໗-໘. ເຕນ ສມເຍນ ພຸທ຺ໂຘ ຠຄວາຕິ ທຸຕິຍສງ຺ຆເຠທສິກ຺ຂາປທໍ. ຕຕ຺ຖ ອນຸວຕ຺ຕກາຕິ ຕສ຺ສ ທິຏ຺ຐິຂນ຺ຕິຣຸຈິຄ຺ຄຫເຓນ ອນຸປຏິປຊ຺ຊນກາ. ວຄ຺ຄໍ ອສາມຄ຺ຄິປກ຺ຂິຍວຈນໍ ວທນ຺ຕີຕິ ວຄ຺ຄວາທກາ. ປທຠາຊເນ ປນ ‘‘ຕສ຺ສ ວຓ຺ຓາຍ ປກ຺ຂາຍ ຐິຕາ ໂຫນ຺ຕີ’’ຕິ ວຸຕ຺ຕໍ, ຕສ຺ສ ສງ຺ຆເຠທາຍ ປຣກ຺ກມນ຺ຕສ຺ສ ວຓ຺ຓຕ຺ຖາຍ ຈ ປກ຺ຂວຸຑ຺ຒິອຕ຺ຖາຍ ຈ ຐິຕາຕິ ອຕ຺ໂຖ. ເຍ ຫິ ວຄ຺ຄວາທກາ, ເຕ ນິຍເມນ ອີທິສາ ໂຫນ຺ຕິ, ຕສ຺ມາ ເອວໍ ວຸຕ຺ຕໍ. ຍສ຺ມາ ປນ ຕິຓ຺ຓໍ ອຸທ຺ຘໍ ກມ຺ມາຣຫາ ນ ໂຫນ຺ຕິ, ນ ຫິ ສງ຺ໂຆ ສງ຺ຆສ຺ສ ກມ຺ມໍ ກໂຣຕິ, ຕສ຺ມາ ເອໂກ ວາ ທ຺ເວ ວາ ຕໂຍ ວາຕິ ວຸຕ຺ຕໍ.

ຊານາຕິ ໂນຕິ ອມ຺ຫາກໍ ຉນ຺ທາທີນິ ຊານາຕິ. ຠາສຕີຕິ ‘‘ເອວໍ ກໂຣມາ’’ຕິ ອມ຺ເຫຫິ ສທ຺ຘິໍ ຠາສຕິ. ອມ຺ຫາກມ຺ເປຕໍ ຂມຕີຕິ ຍໍ ໂສ ກໂຣຕິ, ເອຕໍ ອມ຺ຫາກມ຺ປິ ຣຸຈ຺ຈຕິ.

ສເມຕາຍສ຺ມນ຺ຕານໍ ສງ຺ເຆນາຕິ ອາຍສ຺ມນ຺ຕານໍ ຈິຕ຺ຕໍ ສງ຺ເຆນ ສທ຺ຘິໍ ສເມຕຸ ສມາຄຈ຺ຉຕຸ, ເອກີຠາວໍ ຍາຕູຕິ ວຸຕ຺ຕໍ ໂຫຕິ. ເສສເມຕ຺ຖ ປຐມສິກ຺ຂາປເທ ວຸຕ຺ຕນຍຕ຺ຕາ ອຸຕ຺ຕານຕ຺ຖຕ຺ຕາ ຈ ປາກຏເມວ.

ສມຸຏ຺ຐານາທີນິປິ ປຐມສິກ຺ຂາປທສທິສາເນວາຕິ.

ທຸຕິຍສງ຺ຆເຠທສິກ຺ຂາປທວຓ຺ຓນາ ນິຏ຺ຐິຕາ.