ເອກູນສຕ຺ຕຕິທ຺ວິສຕຈຕຸກ຺ກກຖາ

໕໙-໖໐. ເອວໍ ປຐມຈຕຸກ຺ກໍ ທສ຺ເສຕ຺ວາ ອິທານິ ຍສ຺ມາ ຠິກ຺ຂຸປຈ຺ຈຕ຺ຖິກາ ອິຕ຺ຖິໍ ອາເນຕ຺ວາ ນ ເກວລໍ ວຈ຺ຈມຄ຺ເຄເນວ ອຠິນິສີເທນ຺ຕິ, ອຖ ໂຂ ປສ຺ສາວມຄ຺ເຄນປິ ມຸເຂນປິ. ອິຕ຺ຖິໍ ອາເນຕ຺ວາປິ ຈ ເກຈິ ຊາຄຣນ຺ຕິໍ ອາເນນ຺ຕິ, ເກຈິ ສຸຕ຺ຕໍ, ເກຈິ ມຕ຺ຕໍ, ເກຈິ ອຸມ຺ມຕ຺ຕໍ, ເກຈິ ປມຕ຺ຕໍ ອຎ຺ຎວິຫິຕໍ ວິກ຺ຂິຕ຺ຕຈິຕ຺ຕນ຺ຕິ ອຕ຺ໂຖ. ເກຈິ ມຕໍ ອກ຺ຂາຍິຕໍ, ໂສຓສິງ຺ຄາລາທີຫິ ອກ຺ຂາຍິຕນິມິຕ຺ຕນ຺ຕິ ອຕ຺ໂຖ. ເກຈິ ມຕໍ ເຍຠຸຍ຺ເຍນ ອກ຺ຂາຍິຕໍ, ເຍຠຸຍ຺ເຍນ ອກ຺ຂາຍິຕາ ນາມ ຍສ຺ສາ ນິມິຕ຺ເຕ ວຈ຺ຈມຄ຺ເຄ ປສ຺ສາວມຄ຺ເຄ ມຸເຂ ວາ ພຫຸຕໂຣ ໂອກາໂສ ອກ຺ຂາຍິໂຕ ໂຫຕິ. ເກຈິ ມຕໍ ເຍຠຸຍ຺ເຍນ ຂາຍິຕໍ, ເຍຠຸຍ຺ເຍນ ຂາຍິຕາ ນາມ ຍສ຺ສາ ວຈ຺ຈມຄ຺ຄາທິເກ ນິມິຕ຺ເຕ ພຫຸໍ ຂາຍິຕໍ ໂຫຕິ, ອປ຺ປໍ ອກ຺ຂາຍິຕໍ. ນ ເກວລຎ຺ຈ ມນຸສ຺ສິຕ຺ຖິເມວ ອາເນນ຺ຕິ, ອຖ ໂຂ ອມນຸສ຺ສິຕ຺ຖິມ຺ປິ ຕິຣຈ຺ຉານຄຕິຕ຺ຖິມ຺ປິ. ນ ເກວລຎ຺ຈ ວຸຕ຺ຕປ຺ປກາຣໍ ອິຕ຺ຖິເມວ, ອຸຠໂຕພ຺ຍຎ຺ຊນກມ຺ປິ ປຓ຺ຑກມ຺ປິ ປຸຣິສມ຺ປິ ອາເນນ຺ຕິ. ຕສ຺ມາ ເຕສໍ ວເສນ ອຎ຺ຎານິປິ ຈຕຸກ຺ການິ ທສ຺ເສນ຺ໂຕ ‘‘ຠິກ຺ຂຸປຈ຺ຈຕ຺ຖິກາ ມນຸສ຺ສິຕ຺ຖິໍ ຊາຄຣນ຺ຕິ’’ນ຺ຕິອາທິມາຫ.

ຕຕ຺ຖ ປາຬິຍາ ອສມ຺ໂມຫຕ຺ຖໍ ວຸຕ຺ຕຈຕຸກ຺ການິ ເອວໍ ສງ຺ຂ຺ຍາໂຕ ເວທິຕພ຺ພານິ – ມນຸສ຺ສິຕ຺ຖິຍາ ຕິຓ຺ຓໍ ມຄ຺ຄານໍ ວເສນ ຕີຓິ ສຸທ຺ຘິກຈຕຸກ຺ການິ, ຕີຓິ ຊາຄຣນ຺ຕີຈຕຸກ຺ການິ, ຕີຓິ ສຸຕ຺ຕຈຕຸກ຺ການິ, ຕີຓິ ມຕ຺ຕຈຕຸກ຺ການິ, ຕີຓິ ອຸມ຺ມຕ຺ຕຈຕຸກ຺ການິ, ຕີຓິ ປມຕ຺ຕຈຕຸກ຺ການິ, ຕີຓິ ມຕອກ຺ຂາຍິຕຈຕຸກ຺ການິ, ຕີຓິ ເຍຠຸຍ຺ເຍນ ອກ຺ຂາຍິຕຈຕຸກ຺ການິ, ຕີຓິ ເຍຠຸຍ຺ເຍນ ຂາຍິຕຈຕຸກ຺ການີຕິ ສຕ຺ຕວີສຕິ ຈຕຸກ຺ການິ. ຕຖາ ອມນຸສ຺ສິຕ຺ຖິຍາ; ຕຖາ ຕິຣຈ຺ຉານຄຕິຕ຺ຖິຍາຕິ ອິຕ຺ຖິວາເຣ ເອກາສີຕິ ຈຕຸກ຺ການິ. ຍຖາ ຈ ອິຕ຺ຖິວາເຣ ເອວໍ ອຸຠໂຕພ຺ຍຎ຺ຊນກວາເຣ. ປຓ຺ຑກປຸຣິສວາເຣສຸ ປນ ທ຺ວິນ຺ນໍ ມຄ຺ຄານໍ ວເສນ ຈຕຸປຓ຺ຓາສ ຈຕຸປຓ຺ຓາສ ໂຫນ຺ຕິ. ເອວໍ ສພ຺ພານິປິ ທ຺ເວສຕານິ, ສຕ຺ຕຕິ ຈ ຈຕຸກ຺ການິ ໂຫນ຺ຕິ, ຕານິ ອຸຕ຺ຕານຕ຺ຖານິເຍວ.

ສພ຺ພວາເຣສຸ ປເນຕ຺ຖ ‘‘ມຕໍ ເຍຠຸຍ຺ເຍນ ອກ຺ຂາຍິຕໍ ຂາຍິຕ’’ນ຺ຕິ ເອຕສ຺ມິໍ ຐາເນ ອຍໍ ວິນິຈ຺ຉໂຍ – ຕມ຺ພປຓ຺ຓິທີເປ ກິຣ ທ຺ເວ ວິນຍຘຣາ ສມານາຈຣິຍກາ ເຖຣາ ອເຫສຸໍ – ອຸປຕິສ຺ສຕ຺ເຖໂຣ ຈ, ຜຸສ຺ສເທວຕ຺ເຖໂຣ ຈ. ເຕ ມຫາຠເຍ ອຸປ຺ປນ຺ເນ ວິນຍປິຏກໍ ປຣິຫຣນ຺ຕາ ຣກ຺ຂິໍສຸ. ເຕສຸ ອຸປຕິສ຺ສຕ຺ເຖໂຣ ພ຺ຍຕ຺ຕຕໂຣ. ຕສ຺ສາປິ ທ຺ເວ ອນ຺ເຕວາສິກາ ອເຫສຸໍ – ມຫາປທຸມຕ຺ເຖໂຣ ຈ ມຫາສຸມຕ຺ເຖໂຣ ຈ. ເຕສຸ ມຫາສຸມຕ຺ເຖໂຣ ນກ຺ຂຕ຺ຕຸໍ ວິນຍປິຏກໍ ອສ຺ໂສສິ, ມຫາປທຸມຕ຺ເຖໂຣ ເຕນ ສທ຺ຘິໍ ນວກ຺ຂຕ຺ຕຸໍ, ວິສຸຎ຺ຈ ເອກໂກວ ນວກ຺ຂຕ຺ຕຸນ຺ຕິ ອຏ຺ຐາຣສກ຺ຂຕ຺ຕຸໍ ອສ຺ໂສສິ; ອຍເມວ ເຕສຸ ພ຺ຍຕ຺ຕຕໂຣ. ເຕສຸ ມຫາສຸມຕ຺ເຖໂຣ ນວກ຺ຂຕ຺ຕຸໍ ວິນຍປິຏກໍ ສຸຕ຺ວາ ອາຈຣິຍໍ ມຸຎ຺ຈິຕ຺ວາ ອປຣຄງ຺ຄໍ ອຄມາສິ. ຕໂຕ ມຫາປທຸມຕ຺ເຖໂຣ ອາຫ – ‘‘ສູໂຣ ວຕ, ເຣ, ເອສ ວິນຍຘໂຣ ໂຍ ຘຣມານກໍເຍວ ອາຈຣິຍໍ ມຸຎ຺ຈິຕ຺ວາ ອຎ຺ຎຕ຺ຖ ວສິຕພ຺ພໍ ມຎ຺ຎຕິ. ນນຸ ອາຈຣິເຍ ຘຣມາເນ ວິນຍປິຏກຎ຺ຈ ອຏ຺ຐກຖາ ຈ ອເນກກ຺ຂຕ຺ຕຸໍ ຄເຫຕ຺ວາປິ ນ ວິສ຺ສຊ຺ເຊຕພ຺ພໍ, ນິຈ຺ຈກາລໍ ໂສຕພ຺ພໍ, ອນຸສໍວຈ຺ຉຣໍ ສຊ຺ຌາຍິຕພ຺ພ’’ນ຺ຕິ.

ເອວໍ ວິນຍຄຣຸການໍ ຠິກ຺ຂູນໍ ກາເລ ເອກທິວສໍ ອຸປຕິສ຺ສຕ຺ເຖໂຣ ມຫາປທຸມຕ຺ເຖຣປ຺ປມຸຂານໍ ປຎ຺ຈນ຺ນໍ ອນ຺ເຕວາສິກສຕານໍ ປຐມປາຣາຊິກສິກ຺ຂາປເທ ອິມໍ ປເທສໍ ວຓ຺ເຓນ຺ໂຕ ນິສິນ຺ໂນ ໂຫຕິ. ຕໍ ອນ຺ເຕວາສິກາ ປຸຈ຺ຉິໍສຸ – ‘‘ຠນ຺ເຕ, ເຍຠຸຍ຺ເຍນ ອກ຺ຂາຍິເຕ ປາຣາຊິກໍ, ເຍຠຸຍ຺ເຍນ ຂາຍິເຕ ຖຸລ຺ລຈ຺ຈຍໍ, ອຸປຑ຺ຒກ຺ຂາຍິເຕ ເກນ ຠວິຕພ຺ພ’’ນ຺ຕິ? ເຖໂຣ ອາຫ – ‘‘ອາວຸໂສ, ພຸທ຺ຘາ ນາມ ປາຣາຊິກໍ ປຎ຺ຎເປນ຺ຕາ ນ ສາວເສສໍ ກຕ຺ວາ ປຎ຺ຎເປນ຺ຕິ, ອນວເສສໍເຍວ ກຕ຺ວາ ສພ຺ພໍ ປຣິຍາທິຍິຕ຺ວາ ໂສຕໍ ຉິນ຺ທິຕ຺ວາ ປາຣາຊິກວຕ຺ຖຸສ຺ມິໍ ປາຣາຊິກເມວ ປຎ຺ຎເປນ຺ຕິ. ອິທຎ຺ຫິ ສິກ຺ຂາປທໍ ໂລກວຊ຺ຊໍ, ນ ປຓ຺ຓຕ຺ຕິວຊ຺ຊໍ. ຕສ຺ມາ ຍທິ ອຸປຑ຺ຒກ຺ຂາຍິເຕ ປາຣາຊິກໍ ຠເວຍ຺ຍ, ປຎ຺ຎເປຍ຺ຍ ສມ຺ມາສມ຺ພຸທ຺ໂຘ. ປາຣາຊິກຈ຺ຉາຍາ ປເນຕ຺ຖ ນ ທິສ຺ສຕິ, ຖຸລ຺ລຈ຺ຈຍເມວ ທິສ຺ສຕີ’’ຕິ.

ອປິຈ ມຕສຣີເຣ ປາຣາຊິກໍ ປຎ຺ຎເປນ຺ໂຕ ຠຄວາ ເຍຠຸຍ຺ເຍນ ອກ຺ຂາຍິເຕ ຐເປສິ ‘‘ຕໂຕ ປຣໍ ປາຣາຊິກໍ ນຕ຺ຖີ’’ຕິ ທສ຺ເສຕຸໍ. ຖຸລ຺ລຈ຺ຈຍໍ ປຎ຺ຎເປນ຺ໂຕ ເຍຠຸຍ຺ເຍນ ຂາຍິເຕ ຐເປສິ ‘‘ຕໂຕ ປຣໍ ຖຸລ຺ລຈ຺ຈຍໍ ນຕ຺ຖີ’’ຕິ ທສ຺ເສຕຸນ຺ຕິປິ ເວທິຕພ຺ພໍ. ຂາຍິຕາຂາຍິຕຎ຺ຈ ນາເມຕໍ ມຕສຣີຣສ຺ມິໍເຍວ ເວທິຕພ຺ພໍ, ນ ຊີວມາເນ. ຊີວມາເນ ຫິ ນຂປິຏ຺ຐິປ຺ປມາເຓປິ ຉວິມໍເສ ວາ ນ຺ຫາຣຸມ຺ຫິ ວາ ສຕິ ປາຣາຊິກເມວ ໂຫຕິ. ຍທິປິ ນິມິຕ຺ຕໍ ສພ຺ພໂສ ຂາຍິຕໍ ຉວິຈມ຺ມໍ ນຕ຺ຖິ, ນິມິຕ຺ຕສຓ຺ຐານໍ ປຎ຺ຎາຍຕິ, ປເວສນໍ ຊາຍຕິ, ປາຣາຊິກເມວ. ນິມິຕ຺ຕສຓ຺ຐານໍ ປນ ອນວເສເສຕ຺ວາ ສພ຺ພສ຺ມິໍ ນິມິຕ຺ເຕ ຉິນ຺ທິຕ຺ວາ ສມນ຺ຕໂຕ ຕຈ຺ເຉຕ຺ວາ ອຸປ຺ປາຏິເຕ ວຓສງ຺ເຂປວເສນ ຖຸລ຺ລຈ຺ຈຍໍ. ນິມິຕ຺ຕໂຕ ປຕິຕາຍ ມໍສເປສິຍາ ອຸປກ຺ກມນ຺ຕສ຺ສ ທຸກ຺ກຏໍ. ມຕສຣີເຣ ປນ ຍທິປິ ສພ຺ພໍ ສຣີຣໍ ຂາຍິຕໍ ໂຫຕິ, ຍທິປິ ອກ຺ຂາຍິຕໍ, ຕໂຍ ປນ ມຄ຺ຄາ ອກ຺ຂາຍິຕາ, ເຕສຸ ອຸປກ຺ກມນ຺ຕສ຺ສ ປາຣາຊິກໍ. ເຍຠຸຍ຺ເຍນ ອກ຺ຂາຍິເຕ ປາຣາຊິກເມວ. ອຸປຑ຺ຒກ຺ຂາຍິເຕ ຈ ເຍຠຸຍ຺ເຍນ ຂາຍິເຕ ຈ ຖຸລ຺ລຈ຺ຈຍໍ.

ມນຸສ຺ສານໍ ຊີວມານກສຣີເຣ ອກ຺ຂິນາສກຓ຺ຓຈ຺ຉິທ຺ທວຕ຺ຖິໂກເສສຸ ສຕ຺ຖກາທີຫິ ກຕວເຓ ວາ ເມຖຸນຣາເຄນ ຕິລຜລມຕ຺ຕມ຺ປິ ອງ຺ຄຊາຕໍ ປເວເສນ຺ຕສ຺ສ ຖຸລ຺ລຈ຺ຈຍເມວ. ອວເສສສຣີເຣ ອຸປກຈ຺ຉກາທີສຸ ທຸກ຺ກຏໍ. ມເຕ ອລ຺ລສຣີເຣ ປາຣາຊິກກ຺ເຂຕ຺ເຕ ປາຣາຊິກໍ, ຖຸລ຺ລຈ຺ຈຍກ຺ເຂຕ຺ເຕ ຖຸລ຺ລຈ຺ຈຍໍ, ທຸກ຺ກຏກ຺ເຂຕ຺ເຕ ທຸກ຺ກຏໍ. ຍທາ ປນ ສຣີຣໍ ອຸທ຺ຘຸມາຕກໍ ໂຫຕິ ກຸຖິຕໍ ນີລມກ຺ຂິກສມາກິຓ຺ຓໍ ກິມິກຸລສມາກຸລໍ ນວຫິ ວຓມຸເຂຫິ ປຄ຺ຄຬິຕປຸພ຺ພກຸຓປຠາເວນ ອຸປຄນ຺ຕຸມ຺ປິ ອສກ຺ກຸເຓຍ຺ຍໍ, ຕທາ ປາຣາຊິກວຕ຺ຖຸຎ຺ຈ ຖຸລ຺ລຈ຺ຈຍວຕ຺ຖຸຎ຺ຈ ວິຊຫຕິ; ຕາທິເສ ສຣີເຣ ຍຕ຺ຖ ກຕ຺ຖຈິ ອຸປກ຺ກມໂຕ ທຸກ຺ກຏເມວ. ຕິຣຈ຺ຉານຄຕານໍ ຫຕ຺ຖິ-ອສ຺ສ-ໂຄຓ-ຄທ຺ຣຠ-ໂອຏ຺ຐມຫິໍສາທີນໍ ນາສາຍ ຖຸລ຺ລຈ຺ຈຍໍ. ວຕ຺ຖິໂກເສ ຖຸລ຺ລຈ຺ຈຍເມວ. ສພ຺ເພສມ຺ປິ ຕິຣຈ຺ຉານຄຕານໍ ອກ຺ຂິກຓ຺ຓວເຓສຸ ທຸກ຺ກຏໍ, ອວເສສສຣີເຣປິ ທຸກ຺ກຏເມວ. ມຕານໍ ອລ຺ລສຣີເຣ ປາຣາຊິກກ຺ເຂຕ຺ເຕ ປາຣາຊິກໍ, ຖຸລ຺ລຈ຺ຈຍກ຺ເຂຕ຺ເຕ ຖຸລ຺ລຈ຺ຈຍໍ, ທຸກ຺ກຏກ຺ເຂຕ຺ເຕ ທຸກ຺ກຏໍ.

ກຸຖິຕກຸຓເປ ປນ ປຸພ຺ເພ ວຸຕ຺ຕນເຍເນວ ສພ຺ພຕ຺ຖ ທຸກ຺ກຏໍ. ກາຍສໍສຄ຺ຄຣາເຄນ ວາ ເມຖຸນຣາເຄນ ວາ ຊີວມານກປຸຣິສສ຺ສ ວຕ຺ຖິໂກສໍ ອປ຺ປເວເສນ຺ໂຕ ນິມິຕ຺ເຕນ ນິມິຕ຺ຕໍ ຉຸປຕິ, ທຸກ຺ກຏໍ. ເມຖຸນຣາເຄນ ອິຕ຺ຖິຍາ ອປ຺ປເວເສນ຺ໂຕ ນິມິຕ຺ເຕນ ນິມິຕ຺ຕໍ ຉຸປຕິ, ຖຸລ຺ລຈ຺ຈຍໍ. ມຫາອຏ຺ຐກຖາຍໍ ປນ ‘‘ອິຕ຺ຖິນິມິຕ຺ຕໍ ເມຖຸນຣາເຄນ ມຸເຂນ ຉຸປຕິ ຖຸລ຺ລຈ຺ຈຍ’’ນ຺ຕິ ວຸຕ຺ຕໍ. ຈມ຺ມກ຺ຂນ຺ຘເກ ‘‘ຉພ຺ພຄ຺ຄິຍາ ຠິກ຺ຂູ ອຈິຣວຕິຍາ ນທິຍາ ຄາວີນໍ ຕຣນ຺ຕີນໍ ວິສາເຓສຸປິ ຄຓ຺ຫນ຺ຕິ, ກຓ຺ເຓສຸປິ ຄຓ຺ຫນ຺ຕິ, ຄີວາຍປິ ຄຓ຺ຫນ຺ຕິ, ເຉປ຺ປາຍປິ ຄຓ຺ຫນ຺ຕິ, ປິຏ຺ຐິມ຺ປິ ອຠິຣຸຫນ຺ຕິ, ຣຕ຺ຕຈິຕ຺ຕາປິ ອງ຺ຄຊາຕໍ ຉຸປນ຺ຕີ’’ຕິ (ມຫາວ. ໒໕໒) ອິມິສ຺ສາ ອຏ຺ຐຸປ຺ປຕ຺ຕິຍາ ອວິເສເສນ ວຸຕ຺ຕໍ – ‘‘ນ ຈ, ຠິກ຺ຂເວ, ຣຕ຺ຕຈິຕ຺ເຕນ ອງ຺ຄຊາຕໍ ຉຸປິຕພ຺ພໍ, ໂຍ ຉຸເປຍ຺ຍ, ອາປຕ຺ຕິ ຖຸລ຺ລຈ຺ຈຍສ຺ສາ’’ຕິ (ມຫາວ. ໒໕໒). ຕໍ ສພ຺ພມ຺ປິ ສໍສນ຺ທິຕ຺ວາ ຍຖາ ນ ວິຣຸຊ຺ຌຕິ ຕຖາ ຄເຫຕພ຺ພໍ. ກຖຎ຺ຈ ນ ວິຣຸຊ຺ຌຕິ? ຍໍ ຕາວ ມຫາອຏ຺ຐກຖາຍໍ ວຸຕ຺ຕໍ ‘‘ເມຖຸນຣາເຄນ ມຸເຂນ ຉຸປຕີ’’ຕິ. ຕຕ຺ຣ ກິຣ ນິມິຕ຺ຕມຸຂໍ ມຸຂນ຺ຕິ ອຘິປ຺ເປຕໍ. ‘‘ເມຖຸນຣາເຄນາ’’ຕິ ຈ ວຸຕ຺ຕຕ຺ຕາປິ ອຍເມວ ຕຕ຺ຖ ອຘິປ຺ປາໂຍຕິ ເວທິຕພ຺ໂພ. ນ ຫິ ອິຕ຺ຖິນິມິຕ຺ເຕ ປກຕິມຸເຂນ ເມຖຸນຸປກ຺ກໂມ ໂຫຕິ. ຂນ຺ຘເກປິ ເຍ ປິຏ຺ຐິໍ ອຠິຣຸຫນ຺ຕາ ເມຖຸນຣາເຄນ ອງ຺ຄຊາເຕນ ອງ຺ຄຊາຕໍ ຉຸປິໍສຸ, ເຕ ສນ຺ຘາຍ ຖຸລ຺ລຈ຺ຈຍໍ ວຸຕ຺ຕນ຺ຕິ ເວທິຕພ຺ພໍ. ອິຕຣຖາ ຫິ ທຸກ຺ກຏໍ ສິຍາ. ເກຈິ ປນາຫຸ ‘‘ຂນ຺ຘເກປິ ມຸເຂເນວ ຉຸປນໍ ສນ຺ຘາຍ ໂອຬາຣິກຕ຺ຕາ ກມ຺ມສ຺ສ ຖຸລ຺ລຈ຺ຈຍໍ ວຸຕ຺ຕໍ. ອຏ຺ຐກຖາຍມ຺ປິ ຕໍ ສນ຺ຘາຍຠາສິຕໍ ຄເຫຕ຺ວາວ ເມຖຸນຣາເຄນ ມຸເຂນ ຉຸປຕິ ຖຸລ຺ລຈ຺ຈຍນ຺ຕິ ວຸຕ຺ຕ’’ນ຺ຕິ. ຕສ຺ມາ ສຸຏ຺ຐຸ ສລ຺ລກ຺ເຂຕ຺ວາ ອຸໂຠສຸ ວິນິຈ຺ຉເຍສຸ ໂຍ ຍຸຕ຺ຕຕໂຣ ໂສ ຄເຫຕພ຺ໂພ. ວິນຍຎ຺ຎູ ປນ ປຸຣິມໍ ປສໍສນ຺ຕິ. ກາຍສໍສຄ຺ຄຣາເຄນ ປນ ປກຕິມຸເຂນ ວາ ນິມິຕ຺ຕມຸເຂນ ວາ ອິຕ຺ຖິນິມິຕ຺ຕໍ ຉຸປນ຺ຕສ຺ສ ສງ຺ຆາທິເສໂສ. ຕິຣຈ຺ຉານຄຕິຕ຺ຖິຍາ ປສ຺ສາວມຄ຺ຄໍ ນິມິຕ຺ຕມຸເຂນ ຉຸປນ຺ຕສ຺ສ ວຸຕ຺ຕນເຍເນວ ຖຸລ຺ລຈ຺ຈຍໍ. ກາຍສໍສຄ຺ຄຣາເຄນ ທຸກ຺ກຏນ຺ຕິ.

ເອກູນສຕ຺ຕຕິທ຺ວິສຕຈຕຸກ຺ກກຖາ ນິຏ຺ຐິຕາ.