ສນ຺ຖຕຈຕຸກ຺ກເຠທກຖາ

໖໑-໖໒. ເອວໍ ຠຄວາ ປຏິປນ຺ນກສ຺ສ ຠິກ຺ຂຸໂນ ຣກ຺ຂຓຕ຺ຖໍ ສຕ຺ຕຕິທ຺ວິສຕຈຕຸກ຺ການິ ນີຫຣິຕ຺ວາ ‘‘ອິທານິ ເຍ ອນາຄເຕ ປາປຠິກ຺ຂູ ‘ສນ຺ຖຕໍ ອິມໍ ນ ກິຎ຺ຈິ ອຸປາທິນ຺ນກໍ ອຸປາທິນ຺ນເກນ ຜຸສຕິ, ໂກ ເອຕ຺ຖ ໂທໂສ’ຕິ ສຎ຺ຈິຈ຺ຈ ເລສໍ ໂອຑ຺ເຑສ຺ສນ຺ຕິ, ເຕສໍ ສາສເນ ປຕິຏ຺ຐາ ເອວ ນ ຠວິສ຺ສຕີ’’ຕິ ທິສ຺ວາ ເຕສຸ ສຕ຺ຕຕິທ຺ວິສຕຈຕຸກ຺ເກສຸ ເອກເມກໍ ຈຕຸກ຺ກໍ ຈຕູຫິ ສນ຺ຖຕາທິເຠເທຫິ ຠິນ຺ທິຕ຺ວາ ທສ຺ເສນ຺ໂຕ ຠິກ຺ຂຸປຈ຺ຈຕ຺ຖິກາ ມນຸສ຺ສິຕ຺ຖິໍ ຠິກ຺ຂຸສ຺ສ ສນ຺ຕິເກ ອາເນຕ຺ວາ ວຈ຺ຈມຄ຺ເຄນ ປສ຺ສາວມຄ຺ເຄນ ມຸເຂນ ອງ຺ຄຊາຕໍ ອຠິນິສີເທນ຺ຕິ ສນ຺ຖຕາຍ ອສນ຺ຖຕສ຺ສາຕິອາທິມາຫ.

ຕຕ຺ຖ ສນ຺ຖຕາຍ ອສນ຺ຖຕສ຺ສາຕິອາທີສຸ ສນ຺ຖຕາຍ ອິຕ຺ຖິຍາ ວຈ຺ຈມຄ຺ເຄນ ປສ຺ສາວມຄ຺ເຄນ ມຸເຂນ ອສນ຺ຖຕສ຺ສ ຠິກ຺ຂຸສ຺ສ ອງ຺ຄຊາຕໍ ອຠິນິສີເທນ຺ຕີຕິ ອິມິນາ ນເຍນ ໂຍຊນາ ເວທິຕພ຺ພາ. ຕຕ຺ຖ ສນ຺ຖຕາ ນາມ ຍສ຺ສາ ຕີສຸ ມຄ຺ເຄສຸ ໂຍ ໂກຈິ ມຄ຺ໂຄ ປລິເວເຐຕ຺ວາ ວາ ອນ຺ໂຕ ວາ ປເວເສຕ຺ວາ ເຍນ ເກນຈິ ວຕ຺ເຖນ ວາ ປຓ຺ເຓນ ວາ ວາກປຏ຺ເຏນ ວາ ຈມ຺ເມນ ວາ ຕິປຸສີສາທີນໍ ປຏ຺ເຏນ ວາ ປຏິຈ຺ຉນ຺ໂນ. ສນ຺ຖໂຕ ນາມ ຍສ຺ສ ອງ຺ຄຊາຕໍ ເຕສໍເຍວ ວຕ຺ຖາທີນໍ ເຍນ ເກນຈິ ປຏິຈ຺ຉນ຺ນໍ. ຕຕ຺ຖ ອຸປາທິນ຺ນເກນ ວາ ອນຸປາທິນ຺ນກໍ ຆຏ຺ຏິຍຕຸ, ອນຸປາທິນ຺ນເກນ ວາ ອຸປາທິນ຺ນກໍ, ອນຸປາທິນ຺ນເກນ ວາ ອນຸປາທິນ຺ນກໍ, ອຸປາທິນ຺ນເກນ ວາ ອຸປາທິນ຺ນກໍ, ສເຈ ຍຕ຺ຕເກ ປວິຏ຺ເຐ ປາຣາຊິກໍ ໂຫຕີຕິ ວຸຕ຺ຕໍ, ຕຕ຺ຕກໍ ປວິສຕິ, ສພ຺ພຕ຺ຖ ສາທິຍນ຺ຕສ຺ສ ປາຣາຊິກກ຺ເຂຕ຺ເຕ ປາຣາຊິກໍ; ຖຸລ຺ລຈ຺ຈຍກ຺ເຂຕ຺ເຕ ຖຸລ຺ລຈ຺ຈຍໍ, ທຸກ຺ກຏກ຺ເຂຕ຺ເຕ ທຸກ຺ກຏເມວ ໂຫຕິ. ສເຈ ອິຕ຺ຖິນິມິຕ຺ຕໍ ຂາຓຸໍ ກຕ຺ວາ ສນ຺ຖຕໍ, ຂາຓຸໍ ຆຏ຺ເຏນ຺ຕສ຺ສ ທຸກ຺ກຏໍ. ສເຈ ປຸຣິສນິມິຕ຺ຕໍ ຂາຓຸໍ ກຕ຺ວາ ສນ຺ຖຕໍ, ຂາຓຸໍ ປເວເສນ຺ຕສ຺ສ ທຸກ຺ກຏໍ. ສເຈ ອຸຠຍໍ ຂາຓຸໍ ກຕ຺ວາ ສນ຺ຖຕໍ, ຂາຓຸນາ ຂາຓຸໍ ຆຏ຺ເຏນ຺ຕສ຺ສ ທຸກ຺ກຏໍ. ສເຈ ອິຕ຺ຖິນິມິຕ຺ເຕ ເວຬຸນຬປພ຺ພາທີນໍ ກິຎ຺ຈິ ປກ຺ຂິຕ຺ຕໍ, ຕສ຺ສ ເຫຏ຺ຐາຠາຄໍ ເຈປິ ຜຸສນ຺ໂຕ ຕິລຜລມຕ຺ຕໍ ປເວເສຕິ, ປາຣາຊິກໍ. ອຸປຣິຠາຄໍ ເຈປິ ອຸໂຠສຸ ປສ຺ເສສຸ ເອກປສ຺ສໍ ເຈປິ ຜຸສນ຺ໂຕ ປເວເສຕິ, ປາຣາຊິກໍ. ຈຕ຺ຕາຣິປິ ປສ຺ສານິ ອຜຸສນ຺ໂຕ ປເວເສຕ຺ວາ ຕສ຺ສ ຕລໍ ເຈປິ ຜຸສຕິ, ປາຣາຊິກໍ. ຍທິ ປນ ປສ຺ເສສຸ ວາ ຕເລ ວາ ອຜຸສນ຺ໂຕ ອາກາສຄຕເມວ ກຕ຺ວາ ປເວເສຕ຺ວາ ນີຫຣຕິ, ທຸກ຺ກຏໍ. ພຫິທ຺ຘາ ຂາຓຸເກ ຜຸສຕິ ທຸກ຺ກຏເມວ. ຍຖາ ຈ ອິຕ຺ຖິນິມິຕ຺ເຕ ວຸຕ຺ຕໍ, ເອວໍ ສພ຺ພຕ຺ຖ ລກ຺ຂຓໍ ເວທິຕພ຺ພນ຺ຕິ.

ສນ຺ຖຕຈຕຸກ຺ກເຠທກຖາ ນິຏ຺ຐິຕາ.