ປຐມຈຕຸກ຺ກກຖາວຓ຺ຓນາ

໕໗. ອາປຊ຺ຊນ຺ໂຕ ປນ ຍສ຺ມາ ເສວນຈິຕ຺ເຕເນວ ອາປຊ຺ຊຕິ, ນ ວິນາ ເຕນ; ຕສ຺ມາ ຕໍ ລກ຺ຂຓໍ ທສ຺ເສນ຺ໂຕ ຠຄວາ ‘‘ຠິກ຺ຂຸສ຺ສ ເສວນຈິຕ຺ຕໍ ອຸປຏ຺ຐິເຕ’’ຕິອາທິມາຫ. ຕຕ຺ຖ ຠິກ຺ຂຸສ຺ສາຕິ ເມຖຸນເສວນກສ຺ສ ຠິກ຺ຂຸສ຺ສ. ເສວນຈິຕ຺ຕໍ ອຸປຏ຺ຐິເຕຕິ ຠຸມ຺ມຕ຺ເຖ ປຈ຺ຈຕ຺ຕວຈນໍ, ເສວນຈິຕ຺ເຕ ປຈ຺ຈຸປຏ຺ຐິເຕຕິ ອຕ຺ໂຖ. ວຈ຺ຈມຄ຺ຄໍ ອງ຺ຄຊາຕໍ ປເວເສນ຺ຕສ຺ສາຕິ ເຍນ ມຄ຺ເຄນ ວຈ຺ຈໍ ນິກ຺ຂມຕິ ຕໍ ມຄ຺ຄໍ ອຕ຺ຕໂນ ອງ຺ຄຊາຕໍ ປຸຣິສນິມິຕ຺ຕໍ ຕິລຜລມຕ຺ຕມ຺ປິ ປເວເສນ຺ຕສ຺ສ. ອາປຕ຺ຕິ ປາຣາຊິກສ຺ສາຕິ ອາປຕ຺ຕິ ປາຣາຊິກາ ອສ຺ສ ໂຫຕີຕິ ອຕ຺ໂຖ. ອຖ ວາ ອາປຕ຺ຕີຕິ ອາປຊ຺ຊນໍ ໂຫຕິ. ປາຣາຊິກສ຺ສາຕິ ປາຣາຊິກຘມ຺ມສ຺ສ. ເອສ ນໂຍ ສພ຺ພຕ຺ຖ.

໕໘. ເອວໍ ເສວນຈິຕ຺ເຕເນວ ປເວເສນ຺ຕສ຺ສ ອາປຕ຺ຕິໍ ທສ຺ເສຕ຺ວາ ອິທານິ ຍສ຺ມາ ຕໍ ປເວສນໍ ນາມ ນ ເກວລໍ ອຕ຺ຕູປກ຺ກເມເນວ, ປຣູປກ຺ກເມນາປິ ໂຫຕິ. ຕຕ຺ຣາປິ ຈ ສາທິຍນ຺ຕສ຺ເສວ ອາປຕ຺ຕິ ປຏິເສວນຈິຕ຺ຕສມງ຺ຄິສ຺ສ, ນ ອິຕຣສ຺ສ. ຕສ຺ມາ ເຍ ສທ຺ຘາປພ຺ພຊິຕາ ກຸລປຸຕ຺ຕາ ສມ຺ມາປຏິປນ຺ນກາ ປຣູປກ຺ກເມນ ປເວສເນປິ ສຕິ ນ ສາທິຍນ຺ຕິ, ເຕສໍ ຣກ຺ຂຓຕ຺ຖໍ ‘‘ຠິກ຺ຂຸປຈ຺ຈຕ຺ຖິກາ ມນຸສ຺ສິຕ຺ຖິ’’ນ຺ຕິອາທິມາຫ.

ຕຕ຺ຖ ປຏິປກ຺ຂໍ ອຕ຺ຖຍນ຺ຕິ ອິຈ຺ຉນ຺ຕີຕິ ປຈ຺ຈຕ຺ຖິກາ, ຠິກ຺ຂູ ເອວ ປຈ຺ຈຕ຺ຖິກາ ຠິກ຺ຂຸປຈ຺ຈຕ຺ຖິກາ; ວິສຠາຄານໍ ເວຣິຠິກ຺ຂູນເມຕໍ ອຘິວຈນໍ. ມນຸສ຺ສິຕ຺ຖິໍ ຠິກ຺ຂຸສ຺ສ ສນ຺ຕິເກ ອາເນຕ຺ວາຕິ ອິສ຺ສາປກຕາ ຕໍ ຠິກ຺ຂຸໍ ນາເສຕຸກາມາ ອາມິເສນ ວາ ອຸປລາເປຕ຺ວາ ມິຕ຺ຕສນ຺ຖວວເສນ ວາ ‘‘ອິທໍ ອມ຺ຫາກໍ ກິຈ຺ຈໍ ກໂຣຫີ’’ຕິ ວຕ຺ວາ ກຎ຺ຈິ ມນຸສ຺ສິຕ຺ຖິໍ ຣຕ຺ຕິຠາເຄ ຕສ຺ສ ຠິກ຺ຂຸສ຺ສ ວສໂນກາສໍ ອາເນຕ຺ວາ. ວຈ຺ຈມຄ຺ເຄນ ອງ຺ຄຊາຕໍ ອຠິນິສີເທນ຺ຕີຕິ ຕໍ ຠິກ຺ຂຸໍ ຫຕ຺ຖປາທສີສາທີສຸ ສຸຄ຺ຄຫິຕໍ ນິປ຺ປຣິປ຺ຜນ຺ທໍ ຄເຫຕ຺ວາ ອິຕ຺ຖິຍາ ວຈ຺ຈມຄ຺ເຄນ ຕສ຺ສ ຠິກ຺ຂຸໂນ ອງ຺ຄຊາຕໍ ອຠິນິສີເທນ຺ຕິ; ສມ຺ປໂຍເຊນ຺ຕີຕິ ອຕ຺ໂຖ.

ໂສ ເຈຕິອາທີສຸ ໂສ ເຈ ຠິກ຺ຂຸ ວຈ຺ຈມຄ຺ຄພ຺ຠນ຺ຕຣໍ ອຕ຺ຕໂນ ອງ຺ຄຊາຕສ຺ສ ປເວສນໍ ສາທິຍຕິ ອຘິວາເສຕິ ຕສ຺ມິໍ ຂເຓ ເສວນຈິຕ຺ຕໍ ອຸປຏ຺ຐາເປຕິ. ປວິຏ຺ຐໍ ສາທິຍຕິ ອຘິວາເສຕິ, ປວິຏ຺ຐກາເລ ເສວນຈິຕ຺ຕໍ ອຸປຏ຺ຐາເປຕິ. ຐິຕໍ ສາທິຍຕິ ອຘິວາເສຕິ, ຐານປ຺ປຕ຺ຕກາເລ ສຸກ຺ກວິສ຺ສຏ຺ຐິສມເຍ ເສວນຈິຕ຺ຕໍ ອຸປຏ຺ຐາເປຕິ. ອຸທ຺ຘຣຓໍ ສາທິຍຕິ ອຘິວາເສຕິ, ນີຫຣຓກາເລ ປຏິເສວນຈິຕ຺ຕໍ ອຸປຏ຺ຐາເປຕິ. ເອວໍ ຈຕູສຸ ຐາເນສຸ ສາທິຍນ຺ໂຕ ‘‘ມມ ເວຣິສມເຓຫິ ອິທໍ ກຕ’’ນ຺ຕິ ວຕ຺ຕຸໍ ນ ລຠຕິ, ປາຣາຊິກາປຕ຺ຕິເມວ ອາປຊ຺ຊຕິ. ຍຖາ ຈ ອິມານິ ຈຕ຺ຕາຣິ ສາທິຍນ຺ໂຕ ອາປຊ຺ຊຕິ; ເອວໍ ປຸຣິມໍ ເອກໍ ອສາທິຍິຕ຺ວາ ຕີຓິ ສາທິຍນ຺ໂຕປິ, ທ຺ເວ ອສາທິຍິຕ຺ວາ ທ຺ເວ ສາທິຍນ຺ໂຕປິ, ຕີຓິ ອສາທິຍິຕ຺ວາ ເອກໍ ສາທິຍນ຺ໂຕປິ ອາປຊ຺ຊຕິເຍວ. ສພ຺ພໂສ ປນ ອສາທິຍນ຺ໂຕ ອາສີວິສມຸຂໍ ວິຍ ອງ຺ຄາຣກາສຸໍ ວິຍ ຈ ປວິຏ຺ຐໍ ອງ຺ຄຊາຕໍ ມຎ຺ຎມາໂນ ນາປຊ຺ຊຕິ. ເຕນ ວຸຕ຺ຕໍ – ‘‘ປເວສນໍ ນ ສາທິຍຕິ…ເປ… ອຸທ຺ຘຣຓໍ ນ ສາທິຍຕິ, ອນາປຕ຺ຕີ’’ຕິ. ອິມຎ຺ຫິ ເອວຣູປໍ ອາຣທ຺ຘວິປສ຺ສກໍ ກາເຍ ຈ ຊີວິເຕ ຈ ອນເປກ຺ຂໍ ເອກາທສຫິ ອຄ຺ຄີຫິ ສມ຺ປຊ຺ຊລິຕານິ ຈ ສພ຺ພາຍຕນານິ ອຸກ຺ຂິຕ຺ຕາສິເກ ວິຍ ຈ ວຘເກ ປຎ຺ຈ ກາມຄຸເຓ ປສ຺ສນ຺ຕໍ ປຸຄ຺ຄລໍ ຣກ຺ຂນ຺ໂຕ ຠຄວາ ປຈ຺ຈຕ຺ຖິການຎ຺ຈສ຺ສ ມໂນຣຖວິຆາຕໍ ກໂຣນ຺ໂຕ ອິມໍ ‘‘ປເວສນໍ ນ ສາທິຍຕີ’’ຕິອາທິກໍ ຈຕຸກ຺ກໍ ນີຫຣິຕ຺ວາ ຐເປສີຕິ.

ປຐມຈຕຸກ຺ກກຖາ ນິຏ຺ຐິຕາ.