໗. ນິສີທນສິກ຺ຂາປທວຓ຺ຓນາ

໕໓໑-໔. ສຕ຺ຕເມ – ນິສີທນໍ ອນຸຎ຺ຎາຕໍ ໂຫຕີຕິ ກຕ຺ຖ ອນຸຎ຺ຎາຕໍ? ຈີວຣກ຺ຂນ຺ຘເກ ປຓີຕໂຠຊນວຕ຺ຖຸສ຺ມິໍ. ວຸຕ຺ຕຎ຺ຫິ ຕຕ຺ຖ – ‘‘ອນຸຊານາມິ, ຠິກ຺ຂເວ, ກາຍຄຸຕ຺ຕິຍາ ຈີວຣຄຸຕ຺ຕິຍາ ເສນາສນຄຸຕ຺ຕິຍາ ນິສີທນ’’ນ຺ຕິ (ມຫາວ. ໓໕໓). ເສຍ຺ຍຖາປິ ປຸຣາຓາສິໂກຏ຺ໂຐຕິ ຍຖາ ນາມ ປຸຣາຓຈມ຺ມກາໂຣຕິ ອຕ຺ໂຖ. ຍຖາ ຫິ ຈມ຺ມກາໂຣ ຈມ຺ມໍ ວິຕ຺ຖຕໍ ກຣິສ຺ສາມີຕິ ອິໂຕ ຈິໂຕ ຈ ສມຎ຺ຉຕິ, ກຑ຺ຒຕິ; ເອວໍ ໂສປິ ຕໍ ນິສີທນໍ. ເຕນ ຕໍ ຠຄວາ ເອວມາຫ – ‘‘ນິສີທນໍ ນາມ ສທສໍ ວຸຈ຺ຈຕີ’’ຕິ ສນ຺ຖຕສທິສໍ ສນ຺ຖຣິຕ຺ວາ ເອກສ຺ມິໍ ອນ຺ເຕ ສຸຄຕວິທຕ຺ຖິຍາ ວິທຕ຺ຖິມຕ຺ເຕ ປເທເສ ທ຺ວີສຸ ຐາເນສຸ ຜາເລຕ຺ວາ ຕິສ຺ໂສ ທສາ ກຣິຍນ຺ຕິ, ຕາຫິ ທສາຫິ ສທສໍ ນາມ ວຸຈ຺ຈຕິ. ເສສເມຕ຺ຖ ອຸຕ຺ຕານເມວ. ຉສມຸຏ຺ຐານໍ.

ນິສີທນສິກ຺ຂາປທໍ ສຕ຺ຕມໍ.