໔. ອນາທຣິຍສິກ຺ຂາປທວຓ຺ຓນາ

໓໔໒. ຈຕຸຕ຺ເຖ – ກຖາຍໍ ນສ຺ເສຍ຺ຍາຕິ ກຖໍ ອຍໍ ຘມ຺ໂມ ຕນ຺ຕິ ປເວຓີ ນສ຺ເສຍ຺ຍ. ຕໍ ວາ ນ ສິກ຺ຂິຕຸກາໂມຕິ ເຍນ ປຎ຺ຎຕ຺ເຕນ ວຸຈ຺ຈຕິ, ຕໍ ປຎ຺ຎຕ຺ຕໍ ນ ສິກ຺ຂິຕຸກາໂມ. ອປຎ຺ຎຕ຺ເຕນາຕິ ສຸຕ຺ເຕ ວາ ອຠິຘມ຺ເມ ວາ ອາຄເຕນ.

໓໔໔. ເອວໍ ອມ຺ຫາກໍ ອາຈຣິຍານໍ ອຸຄ຺ຄໂຫຕິ ເອຕ຺ຖ ຄາຣຍ຺ໂຫ ອາຈຣິຍຸຄ຺ຄໂຫ ນ ຄເຫຕພ຺ໂພ; ປເວຓິຍາ ອາຄໂຕ ອາຈຣິຍຸຄ຺ຄໂຫວ ຄເຫຕພ຺ໂພ. ກຸຣຸນ຺ທິຍໍ ປນ ‘‘ໂລກວຊ຺ເຊ ອາຈຣິຍຸຄ຺ຄໂຫ ນ ວຏ຺ຏຕິ, ປຓ຺ຓຕ຺ຕິວຊ຺ເຊ ປນ ວຏ຺ຏຕີ’’ຕິ ວຸຕ຺ຕໍ. ມຫາປຈ຺ຈຣິຍໍ ‘‘ສຸຕ຺ຕໍ ສຸຕ຺ຕານຸໂລມຎ຺ຈ ອຸຄ຺ຄຫິຕການໍເຍວ ອາຈຣິຍານໍ ອຸຄ຺ຄໂຫ ປມາຓໍ, ອຊານນ຺ຕານໍ ກຖາ ອປ຺ປມາຓນ຺ຕິ ວຸຕ຺ຕໍ. ຕໍ ສພ຺ພໍ ປເວຓິຍາ ອາຄເຕສໂມຘານໍ ຄຈ຺ຉຕິ. ເສສໍ ອຸຕ຺ຕານເມວາຕິ.

ຕິສມຸຏ຺ຐານໍ – ກາຍຈິຕ຺ຕໂຕ ວາຈາຈິຕ຺ຕໂຕ ກາຍວາຈາຈິຕ຺ຕໂຕ ຈ ສມຸຏ຺ຐາຕິ, ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ທຸກ຺ຂເວທນນ຺ຕິ.

ອນາທຣິຍສິກ຺ຂາປທໍ ຈຕຸຕ຺ຖໍ.