໖. ສຸຣາປານວຄ຺ໂຄ

໑. ສຸຣາປານສິກ຺ຂາປທວຓ຺ຓນາ

໓໒໖. ສຸຣາປານວຄ຺ຄສ຺ສ ປຐມສິກ຺ຂາປເທ – ຠທ຺ທວຕິກາຕິ ເອໂກ ຄາໂມ, ໂສ ຠທ຺ທິກາຍ ວຕິຍາ ສມນ຺ນາຄຕຕ຺ຕາ ເອຕໍ ນາມ ລຠິ. ປຖາວິໂນຕິ ອທ຺ຘິກາ. ເຕຊສາ ເຕຊນ຺ຕິ ອຕ຺ຕໂນ ເຕຊສາ ອານຸຠາເວນ ນາຄສ຺ສ ເຕຊໍ. ກາໂປຕິກາຕິ ກໂປຕປາທສມວຓ຺ຓຣຕ຺ໂຕຠາສາ. ປສນ຺ນາຕິ ສຸຣາມຓ຺ຑສ຺ເສຕໍ ອຘິວຈນໍ. ອນນຸຈ຺ຉວິຍໍ ຠິກ຺ຂເວ ສາຄຕສ຺ສາຕິ ປຎ຺ຈາຠິຎ຺ຎສ຺ສ ສໂຕ ມຊ຺ຊປານໍ ນາມ ນ ອນຸຈ຺ຉວິຍນ຺ຕິ ວຸຕ຺ຕໍ ໂຫຕິ.

໓໒໘. ປຸປ຺ຜາສໂວ ນາມ ມຘຸກປຸປ຺ຜາທີນໍ ຣເສນ ກໂຕ. ຜລາສໂວ ນາມ ມຸທ຺ທິກຜລາທີນິ ມທ຺ທິຕ຺ວາ ເຕສໍ ຣເສນ ກໂຕ. ມຘ຺ວາສໂວ ນາມ ມຸທ຺ທິການໍ ຊາຕິຣເສນ ກໂຕ; ມກ຺ຂິກມຘຸນາປິ ກຣິຍຕີຕິ ວທນ຺ຕິ. ຄຸຬາສໂວ ນາມ ອຸຈ຺ຉຸຣສາທີຫິ ກຣິຍຕິ. ສຸຣາ ນາມ ປິຏ຺ຐກິຓ຺ຓປກ຺ຂິຕ຺ຕາ; ນາຬິເກຣາທີນມ຺ປິ ຣເສນ ກຕາ ສຸຣາຕ຺ເວວ ສງ຺ຂ຺ຍໍ ຄຈ຺ຉຕິ, ຕສ຺ສາເຍວ ກິຓ຺ຓປກ຺ຂິຕ຺ຕາຍ ມຓ຺ເຑ ຄຫິເຕ ເມຣໂຍຕ຺ເວວ ສງ຺ຂ຺ຍໍ ຄຈ຺ຉຕີຕິ ວທນ຺ຕິ. ອນ຺ຕມໂສ ກຸສຄ຺ເຄນປິ ປິວຕີຕິ ເອຕໍ ສຸຣໍ ວາ ເມຣຍໍ ວາ ພີຊໂຕ ປຏ຺ຐາຍ ກຸສຄ຺ເຄນ ປິວໂຕປິ ປາຈິຕ຺ຕິຍນ຺ຕິ ອຕ຺ໂຖ. ເອເກນ ປນ ປໂຍເຄນ ພຫຸມ຺ປິ ປິວນ຺ຕສ຺ສ ເອກາ ອາປຕ຺ຕິ. ວິຈ຺ຉິນ຺ທິຕ຺ວາ ວິຈ຺ຉິນ຺ທິຕ຺ວາ ປິວໂຕ ປໂຍຄຄຓນາຍ ອາປຕ຺ຕິໂຍ.

໓໒໙. ອມຊ຺ຊຎ຺ຈ ໂຫຕິ ມຊ຺ຊວຓ຺ຓໍ ມຊ຺ຊຄນ຺ຘໍ ມຊ຺ຊຣສນ຺ຕິ ໂລຓໂສວີຣກໍ ວາ ສຸຕ຺ຕໍ ວາ ໂຫຕິ. ສູປສມ຺ປາເກຕິ ວາສຄາຫາປນຕ຺ຖໍ ອີສກໍ ມຊ຺ຊໍ ປກ຺ຂິປິຕ຺ວາ ສູປໍ ປຈນ຺ຕິ, ຕສ຺ມິໍ ອນາປຕ຺ຕິ. ມໍສສມ຺ປາເກປິ ເອເສວ ນໂຍ. ເຕລໍ ປນ ວາຕເຠສຊ຺ຊຕ຺ຖໍ ມຊ຺ເຊນ ສທ຺ຘິໍ ປຈນ຺ຕິ, ຕສ຺ມິມ຺ປິ ອນຕິກ຺ຂິຕ຺ຕມຊ຺ເຊເຍວ ອນາປຕ຺ຕິ, ຍໍ ປນ ອຕິກ຺ຂິຕ຺ຕມຊ຺ຊໍ ໂຫຕິ, ເອຕ຺ຖ ມຊ຺ຊສ຺ສ ວຓ຺ຓຄນ຺ຘຣສາ ປຎ຺ຎາຍນ຺ຕິ, ຕສ຺ມິໍ ອາປຕ຺ຕິເຍວ. ອມຊ຺ຊໍ ອຣິຏ຺ຐນ຺ຕິ ໂຍ ອຣິຏ຺ໂຐ ມຊ຺ຊໍ ນ ໂຫຕິ, ຕສ຺ມິໍ ອນາປຕ຺ຕິ. ອາມລກາທີນໍເຍວ ກິຣ ຣເສນ ອຣິຏ຺ຐໍ ກໂຣນ຺ຕິ, ໂສ ມຊ຺ຊວຓ຺ຓຄນ຺ຘຣໂສເຍວ ໂຫຕິ, ນ ຈ ມຊ຺ຊໍ; ຕໍ ສນ຺ຘາເຍຕໍ ວຸຕ຺ຕໍ. ໂຍ ປນ ສມ຺ຠາຣປກ຺ຂິຕ຺ໂຕ, ໂສ ມຊ຺ຊໍ ໂຫຕິ, ພີຊໂຕ ປຏ຺ຐາຍ ນ ວຏ຺ຏຕິ. ເສສເມຕ຺ຖ ອຸຕ຺ຕານເມວ. ເອຬກໂລມສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ໂລກວຊ຺ຊໍ, ກາຍກມ຺ມໍ ອກຸສລຈິຕ຺ຕໍ, ຕິເວທນນ຺ຕິ. ວຕ຺ຖຸອຊານນຕາຍ ເຈຕ຺ຖ ອຈິຕ຺ຕກຕາ ເວທິຕພ຺ພາ, ອກຸສເລເນວ ປາຕພ຺ພຕາຍ ໂລກວຊ຺ຊຕາຕິ.

ສຸຣາປານສິກ຺ຂາປທໍ ປຐມໍ.

໒. ອງ຺ຄຸລິປໂຕທກສິກ຺ຂາປທວຓ຺ຓນາ

໓໓໐. ທຸຕິເຍ – ອງ຺ຄຸລິປໂຕທເກນາຕິ ອງ຺ຄຸລີຫິ ອຸປກຈ຺ຉກາທິຆຏ຺ຏນໍ ວຸຈ຺ຈຕິ. ອຸຕ຺ຕສນ຺ໂຕຕິ ອຕິຫາເສນ ກິລມນ຺ໂຕ. ອນສ຺ສາສໂກຕິ ອຸປຈ຺ຉິນ຺ນອສ຺ສາສປສ຺ສາສສຎ຺ຈາໂຣ ຫຸຕ຺ວາ. ອນຸປສມ຺ປນ຺ນໍ ກາເຍນ ກາຍນ຺ຕິ ເອຕ຺ຖ ຠິກ຺ຂຸນີປິ ອນຸປສມ຺ປນ຺ນຏ຺ຐາເນ ຐິຕາ, ຕມ຺ປິ ຂິຑ຺ຑາຘິປ຺ປາເຍນ ຜຸສນ຺ຕສ຺ສ ທຸກ຺ກຏໍ. ເສສເມຕ຺ຖ ອຸຕ຺ຕານເມວ.

ປຐມປາຣາຊິກສມຸຏ຺ຐານໍ – ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ອກຸສລຈິຕ຺ຕໍ, ທ຺ວິເວທນນ຺ຕິ.

ອງ຺ຄຸລິປໂຕທກສິກ຺ຂາປທໍ ທຸຕິຍໍ.

໓. ຫສຘມ຺ມສິກ຺ຂາປທວຓ຺ຓນາ

໓໓໕. ຕຕິເຍ – ອປ຺ປກຕຎ຺ຎຸໂນຕິ ຍໍ ຠຄວຕາ ປກຕໍ ປຎ຺ຎຕ຺ຕໍ, ຕໍ ນ ຊານນ຺ຕີຕິ ອຕ຺ໂຖ.

໓໓໖. ອຸທເກ ຫສຘມ຺ເມຕິ ອຸທກກີຬິກາ ວຸຈ຺ຈຕິ. ອຸປຣິໂຄປ຺ຜເກຕິ ໂຄປ຺ຜການໍ ອຸປຣິຠາຄປ຺ປມາເຓ. ຫສາຘິປ຺ປາໂຍຕິ ກີຬາຘິປ຺ປາໂຍ. ນິມຸຊ຺ຊຕິ ວາຕິອາທີສຸ ນິມຸຊ຺ຊນຕ຺ຖາຍ ໂອໂຣຫນ຺ຕສ຺ສ ປທວາເຣ ປທວາເຣ ທຸກ຺ກຏໍ. ນິມຸຊ຺ຊນຸມ຺ມຸຊ຺ຊເນສຸ ປໂຍເຄ ປໂຍເຄ ປາຈິຕ຺ຕິຍໍ. ນິມຸຊ຺ຊິຕ຺ວາ ອນ຺ໂຕອຸທເກເຍວ ຄຈ຺ຉນ຺ຕສ຺ສ ຫຕ຺ຖວາຣປທວາເຣສຸ ສພ຺ພຕ຺ຖ ປາຈິຕ຺ຕິຍໍ. ປລວຕີຕິ ຕຣຕິ. ຫຕ຺ເຖຫິ ຕຣນ຺ຕສ຺ສ ຫຕ຺ຖວາເຣ ຫຕ຺ຖວາເຣ ປາຈິຕ຺ຕິຍໍ. ປາເທສຸປິ ເອເສວ ນໂຍ. ເຍນ ເຍນ ອງ຺ເຄນ ຕຣຕິ, ຕສ຺ສ ຕສ຺ສ ປໂຍເຄ ປໂຍເຄ ປາຈິຕ຺ຕິຍໍ. ຕີຣໂຕ ວາ ຣຸກ຺ຂໂຕ ວາ ອຸທເກ ປຕຕິ, ປາຈິຕ຺ຕິຍເມວ. ນາວາຍ ກີຬຕີຕິ ຜິຍາຣິຕ຺ຕາທີຫິ ນາວໍ ປາເຊນ຺ໂຕ ວາ ຕີເຣ ອຸສ຺ສາເຣນ຺ໂຕ ວາ ນາວາຍ ກີຬຕິ, ທຸກ຺ກຏໍ.

ຫຕ຺ເຖນ ວາຕິອາທີສຸປິ ປໂຍເຄ ປໂຍເຄ ທຸກ຺ກຏໍ. ເກຈິ ຫຕ຺ເຖນ ອຸທເກ ຂິຕ຺ຕາຍ ກຖລາຍ ປຕນຸປ຺ປຕນວາເຣສຸ ທຸກ຺ກຏໍ ວທນ຺ຕິ, ຕໍ ນ ຄເຫຕພ຺ພໍ. ຕຕ຺ຖ ຫິ ເອກປໂຍຄຕ຺ຕາ ເອກເມວ ທຸກ຺ກຏໍ, ອປິຈ ອຸປຣິໂຄປ຺ຜເກ ວຸຕ຺ຕານິ ອຸມ຺ມຸຊ຺ຊນາທີນິ ຐເປຕ຺ວາ ອຎ຺ເຎນ ເຍນ ເກນຈິ ອາກາເຣນ ອຸທກໍ ໂອຕຣິຕ຺ວາ ວາ ອໂນຕຣິຕ຺ວາ ວາ ຍຕ຺ຖ ກຕ຺ຖຈິ ຐິຕໍ ອຸທກໍ ອນ຺ຕມໂສ ພິນ຺ທຸໍ ຄເຫຕ຺ວາ ຂິປນກີຬາຍປິ ກີຬນ຺ຕສ຺ສ ທຸກ຺ກຏເມວ, ອຕ຺ຖໂຊຕກໍ ປນ ອກ຺ຂຣໍ ລິຂິຕຸໍ ວຏ຺ຏຕິ, ອຍເມຕ຺ຖ ວິນິຈ຺ຉໂຍ. ເສສເມຕ຺ຖ ອຸຕ຺ຕານເມວ.

ປຐມປາຣາຊິກສມຸຏ຺ຐານໍ – ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ອກຸສລຈິຕ຺ຕໍ, ຕິເວທນນ຺ຕິ.

ຫສຘມ຺ມສິກ຺ຂາປທໍ ຕຕິຍໍ.

໔. ອນາທຣິຍສິກ຺ຂາປທວຓ຺ຓນາ

໓໔໒. ຈຕຸຕ຺ເຖ – ກຖາຍໍ ນສ຺ເສຍ຺ຍາຕິ ກຖໍ ອຍໍ ຘມ຺ໂມ ຕນ຺ຕິ ປເວຓີ ນສ຺ເສຍ຺ຍ. ຕໍ ວາ ນ ສິກ຺ຂິຕຸກາໂມຕິ ເຍນ ປຎ຺ຎຕ຺ເຕນ ວຸຈ຺ຈຕິ, ຕໍ ປຎ຺ຎຕ຺ຕໍ ນ ສິກ຺ຂິຕຸກາໂມ. ອປຎ຺ຎຕ຺ເຕນາຕິ ສຸຕ຺ເຕ ວາ ອຠິຘມ຺ເມ ວາ ອາຄເຕນ.

໓໔໔. ເອວໍ ອມ຺ຫາກໍ ອາຈຣິຍານໍ ອຸຄ຺ຄໂຫຕິ ເອຕ຺ຖ ຄາຣຍ຺ໂຫ ອາຈຣິຍຸຄ຺ຄໂຫ ນ ຄເຫຕພ຺ໂພ; ປເວຓິຍາ ອາຄໂຕ ອາຈຣິຍຸຄ຺ຄໂຫວ ຄເຫຕພ຺ໂພ. ກຸຣຸນ຺ທິຍໍ ປນ ‘‘ໂລກວຊ຺ເຊ ອາຈຣິຍຸຄ຺ຄໂຫ ນ ວຏ຺ຏຕິ, ປຓ຺ຓຕ຺ຕິວຊ຺ເຊ ປນ ວຏ຺ຏຕີ’’ຕິ ວຸຕ຺ຕໍ. ມຫາປຈ຺ຈຣິຍໍ ‘‘ສຸຕ຺ຕໍ ສຸຕ຺ຕານຸໂລມຎ຺ຈ ອຸຄ຺ຄຫິຕການໍເຍວ ອາຈຣິຍານໍ ອຸຄ຺ຄໂຫ ປມາຓໍ, ອຊານນ຺ຕານໍ ກຖາ ອປ຺ປມາຓນ຺ຕິ ວຸຕ຺ຕໍ. ຕໍ ສພ຺ພໍ ປເວຓິຍາ ອາຄເຕສໂມຘານໍ ຄຈ຺ຉຕິ. ເສສໍ ອຸຕ຺ຕານເມວາຕິ.

ຕິສມຸຏ຺ຐານໍ – ກາຍຈິຕ຺ຕໂຕ ວາຈາຈິຕ຺ຕໂຕ ກາຍວາຈາຈິຕ຺ຕໂຕ ຈ ສມຸຏ຺ຐາຕິ, ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ທຸກ຺ຂເວທນນ຺ຕິ.

ອນາທຣິຍສິກ຺ຂາປທໍ ຈຕຸຕ຺ຖໍ.

໕. ຠິໍສາປນສິກ຺ຂາປທວຓ຺ຓນາ

໓໔໕. ປຎ຺ຈເມ – ຣູປູປຫາຣາທໂຍ ມນຸສ຺ສວິຄ຺ຄເຫ ວຸຕ຺ຕນເຍເນວ ເວທິຕພ຺ພາ. ເສສໍ ອຸຕ຺ຕານເມວ. ສມຸຏ຺ຐານາທີນິ ອນາທຣິຍສທິສາເນວາຕິ.

ຠິໍສາປນສິກ຺ຂາປທໍ ປຎ຺ຈມໍ.

໖. ໂຊຕິສິກ຺ຂາປທວຓ຺ຓນາ

໓໕໐. ຉຏ຺ເຐ – ຠຄ຺ຄາຕິ ຊນປທສ຺ສ ນາມໍ. ສໍສຸມາຣຄິຣນ຺ຕິ ນຄຣສ຺ສ. ເຠສກຬາວນນ຺ຕິ ຕນ຺ນິສ຺ສິຕວນສ຺ສ. ຕໍ ປນ ມິຄານໍ ຜາສຸວິຫາຣຕ຺ຖາຍ ທິນ຺ນຕ຺ຕາ ມິຄທາໂຍຕິ ວຸຈ຺ຈຕິ. ສມາທຫິຕ຺ວາຕິ ຊາເລຕ຺ວາ. ປຣິປາເຕສີຕິ ອນຸພນ຺ຘິ.

໓໕໒. ປທີເປປີຕິ ປທີປຸຊ຺ຊລເນປິ. ໂຊຕິເກປີຕິ ປຕ຺ຕປຈນເສທກມ຺ມາທີສຸ ໂຊຕິກຣເຓ. ຕຖາຣູປປຈ຺ຈຍາຕິ ປທີປາທິປຈ຺ຈຍາ.

໓໕໔-໕. ສຍໍ ສມາທຫຕີຕິ ເອຕ຺ຖ ໂຊຕິໍ ສມາທຫິຕຸກາມຕາຍ ອຣຓິສຓ຺ຐປນໂຕ ປຏ຺ຐາຍ ຍາວ ຊາລາ ນ ອຸຏ຺ຐຫຕິ, ຕາວ ສພ຺ພປໂຍເຄສຸ ທຸກ຺ກຏໍ. ປຏິລາຕໍ ອຸກ຺ຂິປຕີຕິ ທຍ຺ຫມານໍ ອລາຕໍ ປຕິຕໍ ອຸກ຺ຂິປຕິ, ປຸນ ຍຖາຐາເນ ຐເປຕີຕິ ອຕ຺ໂຖ. ເອວໍ ອວິຊ຺ຌາຕໍ ອຸກ຺ຂິປິຕ຺ວາ ປກ຺ຂິປນ຺ຕສ຺ເສວ ທຸກ຺ກຏໍ, ວິຊ຺ຌາຕໍ ປຸນ ຊາລາເປນ຺ຕສ຺ສ ປາຈິຕ຺ຕິຍເມວ.

໓໕໖. ຕຖາຣູປປຈ຺ຈຍາຕິ ຐເປຕ຺ວາ ປທີປາທີນິ ອຎ຺ເຎນປິ ຕຖາຣູເປນ ປຈ຺ຈເຍນ ສມາທຫນ຺ຕສ຺ສ ອນາປຕ຺ຕິ. ອາປທາສູຕິ ທຸຏ຺ຐວາຬມິຄອມນຸສ຺ເສຫິ ອຸປທ຺ທໂວ ໂຫຕິ, ຕຕ຺ຖ ສມາທຫນ຺ຕສ຺ສາປິ ອນາປຕ຺ຕິ. ເສສໍ ອຸຕ຺ຕານເມວາຕິ. ຉສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ໂຊຕິສິກ຺ຂາປທໍ ຉຏ຺ຐໍ.

໗. ນຫານສິກ຺ຂາປທວຓ຺ຓນາ

໓໖໔. ສຕ຺ຕເມ – ຈຸຓ຺ເຓນ ວາ ມຕ຺ຕິກາຍ ວາຕິ ເອຕ຺ຖ ຈຸຓ຺ຓມຕ຺ຕິການໍ ອຠິສງ຺ຂຣຓກາລໂຕ ປຏ຺ຐາຍ ສພ຺ພປໂຍເຄສຸ ທຸກ຺ກຏໍ.

໓໖໖. ປາຣໍ ຄຈ຺ຉນ຺ໂຕ ນ຺ຫາຍຕີຕິ ເອຕ຺ຖ ສຸກ຺ຂາຍ ນທິຍາ ວາລິກໍ ອຸກ຺ກິຣິຕ຺ວາ ກຕອາວາຏເກສຸປິ ນ຺ຫາຍິຕຸໍ ວຏ຺ຏຕິ. ອາປທາສູຕິ ຠມຣາທີຫິ ອນຸພທ຺ຘສ຺ສ ອຸທເກ ນິມຸຊ຺ຊິຕຸໍ ວຏ຺ຏຕີຕິ. ເສສເມຕ຺ຖ ອຸຕ຺ຕານເມວ. ເອຬກໂລມສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ນຫານສິກ຺ຂາປທໍ ສຕ຺ຕມໍ.

໘. ທຸພ຺ພຓ຺ຓກຣຓສິກ຺ຂາປທວຓ຺ຓນາ

໓໖໘-໙. ອຏ຺ຐເມ – ນວໍ ປນ ຠິກ຺ຂຸນາ ຈີວຣລາເຠນາຕິ ເອຕ຺ຖ ອລຠີຕິ ລໂຠ; ລໂຠເຍວ ລາໂຠ. ກິໍ ອລຠິ? ຈີວຣໍ. ກີທິສໍ? ນວໍ. ອິຕິ ‘‘ນວຈີວຣລາເຠນາ’’ຕິ ວຕ຺ຕພ຺ເພ ອນຸນາສິກໂລປໍ ອກຕ຺ວາ ‘‘ນວຈີວຣລາເຠນາ’’ຕິ ວຸຕ຺ຕໍ; ປຏິລທ຺ຘນວຈີວເຣນາຕິ ອຕ຺ໂຖ. ມຊ຺ເຌ ຐິຕປທທ຺ວເຍ ປນາຕິ ນິປາໂຕ. ຠິກ຺ຂຸນາຕິ ເຍນ ລທ຺ຘໍ ຕສ຺ສ ນິທສ຺ສນໍ. ປທຠາຊເນ ປນ ພ຺ຍຎ຺ຊນໍ ອນາທິຍິຕ຺ວາ ຍໍ ລທ຺ຘໍ ຕໍ ທສ຺ເສຕຸໍ ‘‘ຈີວຣໍ ນາມ ຉນ຺ນໍ ຈີວຣານ’’ນ຺ຕິອາທິ ວຸຕ຺ຕໍ. ຈີວຣນ຺ຕິ ເອຕ຺ຖ ຍໍ ນິວາເສຕຸໍ ວາ ປາຣຸປິຕຸໍ ວາ ສກ຺ກາ ໂຫຕິ, ຕເທວ ເວທິຕພ຺ພໍ. ເຕເນວ ‘‘ວິກປ຺ປນຸປຄປຈ຺ຉິມ’’ນ຺ຕິ ນ ວຸຕ຺ຕໍ. ກໍສນີລນ຺ຕິ ຈມ຺ມກາຣນີລໍ. ມຫາປຈ຺ຈຣິຍໍ ປນ ‘‘ອໂຍມລໍ ໂລຫມລໍ ເອຕໍ ກໍສນີລໍ ນາມາ’’ຕິ ວຸຕ຺ຕໍ. ປລາສນີລນ຺ຕິ ໂຍ ໂກຈິ ນີລວຓ຺ໂຓ ປຓ຺ຓຣໂສ. ທຸພ຺ພຓ຺ຓກຣຓໍ ອາທາຕພ຺ພນ຺ຕິ ເອຕໍ ກປ຺ປພິນ຺ທຸໍ ສນ຺ຘາຍ ວຸຕ຺ຕໍ; ນ ນີລາທີຫິ ສກລຈີວຣສ຺ສ ທຸພ຺ພຓ຺ຓກຣຓໍ. ຕຎ຺ຈ ປນ ກປ຺ປໍ ອາທິຍນ຺ເຕນ ຈີວຣໍ ຣຊິຕ຺ວາ ຈຕູສຸ ວາ ໂກເຓສຸ ຕີສຸ ວາ ທ຺ວີສຸ ວາ ເອກສ຺ມິໍ ວາ ໂກເຓ ໂມຣສ຺ສ ອກ຺ຂິມຓ຺ຑລມຕ຺ຕໍ ວາ ມງ຺ກຸລປິຏ຺ຐິມຕ຺ຕໍ ວາ ອາທາຕພ຺ພໍ. ມຫາປຈ຺ຈຣິຍໍ ‘‘ປຕ຺ເຕ ວາ ຄຓ຺ຐິຍໍ ວາ ນ ວຏ຺ຏຕີ’’ຕິ ວຸຕ຺ຕໍ. ມຫາອຏ຺ຐກຖາຍໍ ປນ ‘‘ວຏ຺ຏຕິເຍວາ’’ຕິ ວຸຕ຺ຕໍ. ປາຬິກປ຺ປກຓ຺ຓິກກປ຺ປາທໂຍ ປນ ສພ຺ພຕ຺ຖ ປຏິສິທ຺ຘາ, ຕສ຺ມາ ຐເປຕ຺ວາ ເອກໍ ວຏ຺ຏພິນ຺ທຸໍ ອຎ຺ເຎນ ເກນຈິປິ ວິກາເຣນ ກປ຺ໂປ ນ ກາຕພ຺ໂພ.

໓໗໑. ອຄ຺ຄເຬຕິອາທີສຸ ເອຕານິ ອຄ຺ຄຬາທີນິ ກປ຺ປກຕຈີວເຣ ປຈ຺ຉາ ອາໂຣເປຕ຺ວາ ກປ຺ປກຣຓກິຈ຺ຈໍ ນຕ຺ຖິ. ເສສໍ ອຸຕ຺ຕານເມວ. ເອຬກໂລມສມຸຏ຺ຐານໍ – ກິຣິຍາກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ; ກາຍກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ທຸພ຺ພຓ຺ຓກຣຓສິກ຺ຂາປທໍ ອຏ຺ຐມໍ.

໙. ວິກປ຺ປນສິກ຺ຂາປທວຓ຺ຓນາ

໓໗໔. ນວເມ – ຕສ຺ສ ວາ ອທິນ຺ນນ຺ຕິ ຈີວຣສາມິກສ຺ສ ‘‘ປຣິຠຸຎ຺ຊ ວາ ວິສ຺ສຊ຺ເຊຫິ ວາ ຍຖາປຈ຺ຈຍໍ ວາ ກໂຣຫີ’’ຕິ ເອວໍ ວຕ຺ວາ ອທິນ຺ນໍ. ຕສ຺ສ ວາ ອວິສ຺ສສນ຺ໂຕຕິ ເຍນ ວິນຍກມ຺ມໍ ກຕໍ, ຕສ຺ສ ອວິສ຺ສາເສນ ວາ. ເຕນ ປນ ທິນ຺ນໍ ວາ ຕສ຺ສ ວິສ຺ສາເສນ ວາ ປຣິຠຸຎ຺ຊນ຺ຕສ຺ສ ອນາປຕ຺ຕິ. ເສສເມຕ຺ຖ ຕິໍສກວຓ຺ຓນາຍໍ ວຸຕ຺ຕນຍຕ຺ຕາ ອຸຕ຺ຕານເມວາຕິ. ກຖິນສມຸຏ຺ຐານໍ – ກາຍວາຈໂຕ ກາຍວາຈາຈິຕ຺ຕໂຕ ຈ ສມຸຏ຺ຐາຕິ, ກິຣິຍາກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ວິກປ຺ປນສິກ຺ຂາປທໍ ນວມໍ.

໑໐. ຈີວຣາປນິຘານສິກ຺ຂາປທວຓ຺ຓນາ

໓໗໗-໘໑. ທສເມ – ອປນິເຘນ຺ຕີຕິ ອປເນຕ຺ວາ ນິເຘນ຺ຕິ. ຫສາເປກ຺ໂຂຕິ ຫສາຘິປ຺ປາໂຍ. ອຎ຺ຎໍ ປຣິກ຺ຂາຣນ຺ຕິ ປາຬິຍາ ອນາຄຕໍ ປຕ຺ຕຕ຺ຖວິກາທິໍ. ຘມ຺ມິໍ ກຖໍ ກຕ຺ວາຕິ ‘‘ສມເຓນ ນາມ ອນິຫິຕປຣິກ຺ຂາເຣນ ຠວິຕຸໍ ນ ວຏ຺ຏຕີ’’ຕິ ເອວໍ ຘມ຺ມກຖໍ ກເຖຕ຺ວາ ທສ຺ສາມີຕິ ນິກ຺ຂິປໂຕ ອນາປຕ຺ຕິ. ເສສເມຕ຺ຖ ອຸຕ຺ຕານເມວ. ຕິສມຸຏ຺ຐານໍ – ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ຕິເວທນນ຺ຕິ.

ຈີວຣາປນິຘານສິກ຺ຂາປທໍ ທສມໍ.

ສມຕ຺ໂຕ ວຓ຺ຓນາກ຺ກເມນ ສຸຣາປານວຄ຺ໂຄ ຉຏ຺ໂຐ.