໕. ອເຈລກວຄ຺ໂຄ

໑. ອເຈລກສິກ຺ຂາປທວຓ຺ຓນາ

໒໖໙. ອເຈລກວຄ຺ຄສ຺ສ ໙ ປຐມສິກ຺ຂາປເທ – ປຣິເວສນນ຺ຕິ ປຣິວິສນຏ຺ຐານໍ. ປຣິພ຺ພາຊກສມາປນ຺ໂນຕິ ປພ຺ພຊ຺ຊໍ ສມາປນ຺ໂນ. ເທຕິ ອາປຕ຺ຕິ ປາຈິຕ຺ຕິຍສ຺ສາຕິ ສມຕິຕ຺ຕິກໍ ຍາຄຸປຕ຺ຕໍ ເອກປໂຍເຄນ ເທຕິ, ເອກໍ ປາຈິຕ຺ຕິຍໍ. ອວຈ຺ຉິນ຺ທິຕ຺ວາ ອວຈ຺ຉິນ຺ທິຕ຺ວາ ເທຕິ, ປໂຍເຄ ປໂຍເຄ ປາຈິຕ຺ຕິຍໍ. ເອເສວ ນໂຍ ປູວຠຕ຺ຕາທີສຸ. ຕິຕ຺ຖິເຍ ອຕິຕ຺ຖິຍສຎ຺ຎີຕິ ມາຕາ ວາ ປິຕາ ວາ ຕິຕ຺ຖິເຍສຸ ປພ຺ພຊຕິ, ເຕສໍ ມາຕາປິຕຸສຎ຺ຎາຍ ເທນ຺ຕສ຺ສາປິ ປາຈິຕ຺ຕິຍເມວ ໂຫຕິ. ທາເປຕີຕິ ອນຸປສມ຺ປນ຺ເນນ ທາເປຕິ.

໒໗໓. ອຸປນິກ຺ຂິປິຕ຺ວາ ເທຕີຕິ ຕຖາຣູເປ ຠາຊເນ ຐເປຕ຺ວາ ຕໍ ຠາຊນໍ ເຕສໍ ສນ຺ຕິເກ ຠູມິຍໍ ນິກ຺ຂິປິຕ຺ວາ ເທຕິ, ເຕສໍ ວາ ຠາຊນໍ ນິກ຺ຂິປາເປຕ຺ວາ ຕຕ຺ຖ ເທຕິ, ປຕ຺ຕໍ ອາຘາຣເກ ວາ ຠູມິຍໍ ວາ ຐເປຕ຺ວາປິ ‘‘ອິໂຕ ຄຓ຺ຫຖາ’’ຕິ ວຕ຺ຕຸໍ ວຏ຺ຏຕິ. ສເຈ ຕິຕ຺ຖິໂຍ ວທຕິ ‘‘ມຍ຺ຫໍ ນາມ ອິທໍ ສນ຺ຕກໍ, ອິຘ ນ ອາກິຣຖາ’’ຕິ ອາກິຣິຕພ຺ພໍ. ຕສ຺ສ ສນ຺ຕກຕ຺ຕາ ສຫຕ຺ຖາ ທານໍ ນາມ ນ ໂຫຕິ. ເສສເມຕ຺ຖ ອຸຕ຺ຕານເມວ.

ເອຬກໂລມສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ອເຈລກສິກ຺ຂາປທໍ ປຐມໍ.

໒. ອຸຍ຺ໂຍຊນສິກ຺ຂາປທວຓ຺ຓນາ

໒໗໔. ທຸຕິຍສິກ຺ຂາປເທ – ປຏິກ຺ກມເນປີຕິ ອາສນສາລາຍມ຺ປິ. ຠຕ຺ຕວິສ຺ສຄ຺ຄນ຺ຕິ ຠຕ຺ຕກິຈ຺ຈໍ. ນ ສມ຺ຠາເວສີຕິ ນ ປາປຸຓິ.

໒໗໖. ອນາຈາຣນ຺ຕິ ວຸຕ຺ຕາວເສສໍ ກາຍວຈີທ຺ວາຣວີຕິກ຺ກມໍ. ທສ຺ສນູປຈາຣໍ ວາ ສວນູປຈາຣໍ ວາ ວິຊຫນ຺ຕສ຺ສາຕິ ເອຕ຺ຖ ຍທິ ຐິໂຕ ວາ ນິສິນ຺ໂນ ວາ ອຸຍ຺ໂຍເຊຕິ; ໂຍ ອຸຍ຺ໂຍຊິໂຕ, ໂສ ວິຊຫຕິ, ຕສ຺ສ ຈ ອາປຕ຺ຕິ ນາມ ນຕ຺ຖິ. ຕສ຺ມິໍ ປນ ວິຊຫນ຺ເຕປິ ອຕ຺ຖໂຕ ອິຕເຣນ ວິຊຫິຕເມວ ໂຫຕິ. ຕສ຺ມາ ໂຍ ອຸຍ຺ໂຍເຊຕິ, ຕສ຺ເສວາຍໍ ອາປຕ຺ຕິ. ຕຕ຺ຖ ສເຈ ອຸປຈາຣພ຺ຠນ຺ຕເຣ ເອໂກ ປາໂທ ໂຫຕິ, ທຸກ຺ກຏໍ. ສີມາຕິກ຺ກເມ ປາຈິຕ຺ຕິຍໍ. ເອຕ຺ຖ ຈ ທສ຺ສນູປຈາຣສ຺ສ ອພ຺ໂຠກາເສ ທ຺ວາທສຫຕ຺ຖປ຺ປມາຓໍ, ຕຖາ ສວນູປຈາຣສ຺ສ. ສເຈ ປນ ອນ຺ຕຣາ ກຸຏ຺ຏທ຺ວາຣປາກາຣາທໂຍ ໂຫນ຺ຕິ, ເຕຫິ ອນ຺ຕຣິຕຠາໂວ ທສ຺ສນູປຈາຣາຕິກ຺ກໂມ, ຕສ຺ສ ວເສນ ອາປຕ຺ຕິ ເວທິຕພ຺ພາ. ນ ອຎ຺ໂຎ ໂກຈິ ປຈ຺ຈໂຍ ໂຫຕີຕິ ຐເປຕ຺ວາ ວຸຕ຺ຕປ຺ປກາຣມນາຈາຣໍ ອຎ຺ຎໍ ກິຎ຺ຈິ ກາຣຓໍ ນ ໂຫຕິ.

໒໗໗. ກລິສາສນໍ ອາໂຣເປຕີຕິ ‘‘ກລີ’’ຕິ ໂກໂຘ; ຕສ຺ສ ສາສນໍ ອາໂຣເປຕິ; ໂກຘສ຺ສ ອາຓໍ ອາໂຣເປຕິ; ໂກຘວເສນ ຐານນິສຊ຺ຊາທີສຸ ໂທສໍ ທສ຺ເສຕ຺ວາ ‘‘ປສ຺ສຖ ໂຠ ອິມສ຺ສ ຐານໍ, ນິສຊ຺ຊໍ ອາໂລກິຕໍ ວິໂລກິຕໍ ຂາຓຸໂກ ວິຍ ຕິຏ຺ຐຕິ, ສຸນໂຂ ວິຍ ນິສີທຕິ, ມກ຺ກໂຏ ວິຍ ອິໂຕ ຈິໂຕ ຈ ວິໂລເກຕີ’’ຕິ ເອວໍ ອມນາປວຈນໍ ວທຕິ ‘‘ອປ຺ເປວ ນາມ ອິມິນາປິ ອຸພ຺ພາຬ຺ໂຫ ປກ຺ກເມຍ຺ຍາ’’ຕິ. ເສສໍ ອຸຕ຺ຕານເມວ.

ຕິສມຸຏ຺ຐານໍ – ກາຍຈິຕ຺ຕໂຕ ວາຈາຈິຕ຺ຕໂຕ ກາຍວາຈາຈິຕ຺ຕໂຕ ຈ ສມຸຏ຺ຐາຕິ, ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ວຈີກມ຺ມໍ, ອກຸສລຈິຕ຺ຕໍ, ຕິເວທນນ຺ຕິ.

ອຸຍ຺ໂຍຊນສິກ຺ຂາປທໍ ທຸຕິຍໍ.

໓. ສໂຠຊນສິກ຺ຂາປທວຓ຺ຓນາ

໒໗໙. ຕຕິຍສິກ຺ຂາປເທ – ສຍນິຆເຣຕິ ສຍນິຍຆເຣ. ຍໂຕ ອຍ຺ຍສ຺ສ ຠິກ຺ຂາ ທິນ຺ນາຕິ ຍສ຺ມາ ຠິກ຺ຂາ ທິນ຺ນາ, ຍໍ ອາຄເຕນ ລທ຺ຘພ຺ພໍ ຕໍ ໂວ ລທ຺ຘໍ; ຄຈ຺ຉຖາຕິ ອຘິປ຺ປາໂຍ. ປຣິຍຸຏ຺ຐິໂຕຕິ ຣາຄປຣິຍຸຏ຺ຐິໂຕ; ເມຖຸນາຘິປ຺ປາໂຍຕິ ອຕ຺ໂຖ.

໒໘໐. ສຫ ອຸໂຠຫິ ຊເນຫີຕິ ສໂຠຊນໍ; ຕສ຺ມິໍ ສໂຠຊເນ. ອຖ ວາ ສໂຠຊເນຕິ ສໂຠເຄ. ຣາຄປຣິຍຸຏ຺ຐິຕສ຺ສ ຫິ ປຸຣິສສ຺ສ ອິຕ຺ຖີ ໂຠໂຄ ອິຕ຺ຖິຍາ ຈ ປຸຣິໂສ. ເຕເນວສ຺ສ ປທຠາຊເນ – ‘‘ອິຕ຺ຖີ ເຈວ ໂຫຕິ ປຸຣິໂສ ຈາ’’ຕິອາທິ ວຸຕ຺ຕໍ. ມຫລ຺ລເກ ຆເຣຕິ ມຫລ຺ລເກ ສຍນິຆເຣ. ປິຏ຺ຐສງ຺ຆາຏສ຺ສ ຫຕ຺ຖປາສໍ ວິຊຫິຕ຺ວາຕິ ຕສ຺ສ ສຍນິຆເຣ ຄພ຺ຠສ຺ສ ໂຍ ປິຏ຺ຐສງ຺ຆາໂຏ, ຕສ຺ສ ຫຕ຺ຖປາສໍ ວິຊຫິຕ຺ວາ; ອນ຺ໂຕສຍນສ຺ສ ອາສນ຺ເນ ຐາເນ ນິສີທຕີຕິ ອຕ຺ໂຖ. ອີທິສຎ຺ຈ ສຍນິຆຣໍ ມຫາຈຕຸສ຺ສາລາທີສຸ ໂຫຕິ. ປິຏ຺ຐິວໍສໍ ອຕິກ຺ກມິຕ຺ວາຕິ ອິມິນາ ມຊ຺ຌາຕິກ຺ກມໍ ທສ຺ເສຕິ. ຕສ຺ມາ ຍຖາ ວາ ຕຖາ ວາ ກຕສ຺ສ ຂຸທ຺ທກສ຺ສ ສຍນິຆຣສ຺ສ ມຊ຺ຌາຕິກ຺ກເມ ອາປຕ຺ຕິ ເວທິຕພ຺ພາ. ເສສເມຕ຺ຖ ອຸຕ຺ຕານເມວ.

ປຐມປາຣາຊິກສມຸຏ຺ຐານໍ – ກິຣິຍໍ, ສຎ຺ຎາວິໂມກ຺ຂໍ, ສຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ອກຸສລຈິຕ຺ຕໍ, ທ຺ວິເວທນນ຺ຕິ.

ສໂຠຊນສິກ຺ຂາປທໍ ຕຕິຍໍ.

໒໘໔. ຈຕຸຕ຺ຖປຎ຺ຈມສິກ຺ຂາປເທສຸ ຍໍ ວຕ຺ຕພ຺ພໍ ສິຍາ, ຕໍ ສພ຺ພໍ ອນິຍຕທ຺ວເຍ ວຸຕ຺ຕນຍເມວ. ຍຖາ ຈ ສໂຠຊນສິກ຺ຂາປທໍ, ເອວເມຕານິປິ ປຐມປາຣາຊິກສມຸຏ຺ຐານາເນວາຕິ.

ຣໂຫປຏິຈ຺ຉນ຺ນສິກ຺ຂາປທໍ ຈຕຸຕ຺ຖໍ, ຣໂຫນິສຊ຺ຊສິກ຺ຂາປທໍ ປຎ຺ຈມໍ.

໖. ຈາຣິຕ຺ຕສິກ຺ຂາປທວຓ຺ຓນາ

໒໙໔. ຉຏ຺ຐສິກ຺ຂາປເທ – ເທຖາວຸໂສ ຠຕ຺ຕນ຺ຕິ ເອຕ຺ຖ ຕໍ ກິຣ ຠຕ຺ຕໍ ອຠິຫຏໍ ອໂຫສິ, ຕສ຺ມາ ເອວມາຫໍສຸ. ອນຠິຫເຏ ປນ ເອວໍ ວຕ຺ຕຸໍ ນ ລພ຺ຠຕິ, ປຍຸຕ຺ຕວາຈາ ໂຫຕິ.

໒໙໕. ເຕນ ຫິ ຠິກ຺ຂເວ ປຏິຄ຺ຄເຫຕ຺ວາ ນິກ຺ຂິປຖາຕິ ອິທໍ ປນ ຠຄວາ ກຸລສ຺ສ ສທ຺ຘານຸຣກ຺ຂຓຕ຺ຖາຍ ອາຫ. ຍທິ ‘‘ຠາເຊຕ຺ວາ ຂາທຖາ’’ຕິ ວເທຍ຺ຍ, ມນຸສ຺ສານໍ ປສາທຎ຺ຎຖຕ຺ຕໍ ສິຍາ. ອຸສ຺ສາຣິຍິຕ຺ຖາຕິ ປຏິຫຣິຍິຕ຺ຖ; ຆຣໍເຍວ ນໍ ຄເຫຕ຺ວາ ອຄມໍສູຕິ ວຸຕ຺ຕໍ ໂຫຕິ.

໒໙໘. ສນ຺ຕໍ ຠິກ຺ຂຸນ຺ຕິ ເອຕ຺ຖ ກິຕ຺ຕາວຕາ ສນ຺ໂຕ ໂຫຕິ, ກິຕ຺ຕາວຕາ ອສນ຺ໂຕຕິ? ອນ຺ໂຕວິຫາເຣ ຍຕ຺ຖ ຐິຕສ຺ສ ກຸລານິ ປຍິຣຸປາສນຈິຕ຺ຕໍ ອຸປ຺ປນ຺ນໍ, ຕໂຕ ປຏ຺ຐາຍ ຍໍ ປສ຺ເສ ວາ ອຠິມຸເຂ ວາ ປສ຺ສຕິ, ຍສ຺ສ ສກ຺ກາ ໂຫຕິ ປກຕິວຈເນນ ອາໂຣເຈຕຸໍ, ອຍໍ ສນ຺ໂຕ ນາມ. ອິໂຕ ຈິໂຕ ຈ ປຣິເຍສິຕ຺ວາ ອາໂຣຈນກິຈ຺ຈໍ ນາມ ນຕ຺ຖິ. ໂຍ ຫິ ເອວໍ ປຣິເຍສິຕພ຺ໂພ, ໂສ ອສນ຺ໂຕເຍວ. ອປິຈ ອນ຺ໂຕອຸປຈາຣສີມາຍ ຠິກ຺ຂຸໍ ທິສ຺ວາ ອາປຸຈ຺ຉິສ຺ສາມີຕິ ຄນ຺ຕ຺ວາ ຕຕ຺ຖ ຍໍ ປສ຺ສຕິ, ໂສ ອາປຸຈ຺ຉິຕພ຺ໂພ. ໂນ ເຈ ປສ຺ສຕິ, ອສນ຺ຕໍ ຠິກ຺ຂຸໍ ອນາປຸຈ຺ຉາ ປວິຏ຺ໂຐ ນາມ ໂຫຕິ.

໓໐໒. ອນ຺ຕຣາຣາມນ຺ຕິ ອນ຺ໂຕຄາເມ ວິຫາໂຣ ໂຫຕິ, ຕໍ ຄຈ຺ຉຕິ. ຠຕ຺ຕິຍຆຣນ຺ຕິ ນິມນ຺ຕິຕຆຣໍ ວາ ສລາກຠຕ຺ຕາທິທາຍການໍ ວາ ຆຣໍ. ອາປທາສູຕິ ຊີວິຕພ຺ຣຫ຺ມຈຣິຍນ຺ຕຣາເຍສຸ ສຕິ ຄນ຺ຕຸໍ ວຏ຺ຏຕິ. ເສສເມຕ຺ຖ ອຸຕ຺ຕານເມວ.

ກຖິນສມຸຏ຺ຐານໍ – ກາຍວາຈໂຕ ກາຍວາຈາຈິຕ຺ຕໂຕ ຈ ສມຸຏ຺ຐາຕິ, ກິຣິຍາກິຣຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ຈາຣິຕ຺ຕສິກ຺ຂາປທໍ ຉຏ຺ຐໍ.

໗. ມຫານາມສິກ຺ຂາປທວຓ຺ຓນາ

໓໐໓. ສຕ຺ຕມສິກ຺ຂາປເທ – ມຫານາໂມ ນາມ ຠຄວໂຕ ຈູຬປິຕຸປຸຕ຺ໂຕ ມາສມຕ຺ເຕນ ມຫລ຺ລກຕໂຣ ທ຺ວີສຸ ຜເລສຸ ປຕິຏ຺ຐິໂຕ ອຣິຍສາວໂກ. ເຠສຊ຺ຊໍ ອຸສ຺ສນ຺ນໍ ໂຫຕີຕິ ວຊໂຕ ອາຫຣິຕ຺ວາ ຐປິຕສປ຺ປິ ພຫຸ ໂຫຕິ.

໓໐໖. ສາທິຕພ຺ພາຕິ ຕສ຺ມິໍ ສມເຍ ໂຣໂຄ ນຕ຺ຖີຕິ ນ ປຏິກ຺ຂິປິຕພ຺ພາ; ໂຣເຄ ສຕິ ວິຎ຺ຎາເປສ຺ສາມີຕິ ອຘິວາເສຕພ຺ພາ. ເອຕ຺ຕເກຫິ ເຠສຊ຺ເຊຫິ ປວາເຣມີຕິ ນາມວເສນ ສປ຺ປິເຕລາທີສຸ ທ຺ວີຫິ ຕີຫິ ວາ ປຣິມາຓວເສນ ປຕ຺ເຖນ ນາຬິຍາ ອາຬ຺ຫເກນາຕິ ວາ.ອຎ຺ຎໍ ເຠສຊ຺ຊໍ ວິຎ຺ຎາເປຕີຕິ ສປ຺ປິນາ ປວາຣິໂຕ ເຕລໍ ວິຎ຺ຎາເປຕິ, ອາຬ຺ຫເກນ ປວາຣິໂຕ ໂທຓໍ. ນ ເຠສຊ຺ເຊນ ກຣຓີເຍນາຕິ ມິສ຺ສກຠຕ຺ເຕນປິ ເຈ ຍາເປຕຸໍ ສກ຺ໂກຕິ, ນ ເຠສຊ຺ຊກຣຓີຍໍ ນາມ ໂຫຕິ.

໓໑໐. ປວາຣິຕານນ຺ຕິ ເຍ ອຕ຺ຕໂນ ປຸຄ຺ຄລິກາຍ ປວາຣຓາຍ ປວາຣິຕາ; ເຕສໍ ປວາຣິຕານຸຣູເປນ ວິຎ຺ຎຕ຺ຕິຍາ ອນາປຕ຺ຕິ. ສງ຺ຆວເສນ ປວາຣິເຕສຸ ປນ ປມາຓໍ ສລ຺ລກ຺ເຂຕພ຺ພເມວາຕິ. ເສສໍ ອຸຕ຺ຕານເມວ.

ຉສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ວຈີກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ມຫານາມສິກ຺ຂາປທໍ ສຕ຺ຕມໍ.

໘. ອຸຍ຺ຍຸຕ຺ຕເສນາສິກ຺ຂາປທວຓ຺ຓນາ

໓໑໑. ອຏ຺ຐເມ – ອພ຺ຠຸຍ຺ຍາໂຕຕິ ອຠິອຸຍ຺ຍາໂຕ; ປຣເສນໍ ອຠິມຸໂຂ ຄມິສ຺ສາມີຕິ ນຄຣໂຕ ນິຄ຺ຄໂຕຕິ ອຕ຺ໂຖ. ອຸຍ຺ຍຸຕ຺ຕນ຺ຕິ ກຕອຸຍ຺ໂຍຄໍ; ຄາມໂຕ ນິກ຺ຂນ຺ຕນ຺ຕິ ອຕ຺ໂຖ.

໓໑໔. ທ຺ວາທສປຸຣິໂສ ຫຕ຺ຖີຕິ ຈຕ຺ຕາໂຣ ອາໂຣຫກາ ເອເກກປາທຣກ຺ຂກາ ທ຺ເວ ທ຺ເວຕິ ເອວໍ ທ຺ວາທສປຸຣິໂສ ໂຫຕິ. ຕິປຸຣິໂສ ອສ຺ໂສຕິ ເອໂກ ອາໂຣຫໂກ ທ຺ເວ ປາທຣກ຺ຂກາຕິ ເອວໍ ຕິປຸຣິໂສ ໂຫຕິ. ຈຕຸປຸຣິໂສ ຣໂຖຕິ ເອໂກ ສາຣຖິ ເອໂກ ໂຍໂຘ ທ຺ເວ ອາຓິຣກ຺ຂກາຕິ ເອວໍ ຈຕຸປຸຣິໂສ ໂຫຕິ. ຈຕ຺ຕາໂຣ ປຸຣິສາ ສຣຫຕ຺ຖາຕິ ອາວຸຘຫຕ຺ຖາ ຈຕ຺ຕາໂຣ ປຸຣິສາຕິ ອຍໍ ປຈ຺ຉິມໂກຏິຍາ ຈຕຸຣງ຺ຄສມນ຺ນາຄຕາ ເສນາ ນາມ. ອີທິສໍ ເສນໍ ທສ຺ສນາຍ ຄຈ຺ຉໂຕ ປເທ ປເທ ທຸກ຺ກຏໍ. ທສ຺ສນູປຈາຣໍ ວິຊຫິຕ຺ວາຕິ ເກນຈິ ອນ຺ຕຣິຕາ ວາ ນິນ຺ນໍ ໂອຣຸຬ຺ຫາ ວາ ນ ທິສ຺ສຕິ; ອິຘ ຐຕ຺ວາ ນ ສກ຺ກາ ທຏ຺ຐຸນ຺ຕິ ອຎ຺ຎໍ ຐານໍ ຄນ຺ຕ຺ວາ ປສ຺ສໂຕ ປໂຍເຄ ປໂຍເຄ ປາຈິຕ຺ຕິຍນ຺ຕິ ອຕ຺ໂຖ.

໓໑໕. ເອກເມກນ຺ຕິ ຫຕ຺ຖິອາທີສຸ ຈຕູສຸ ອງ຺ເຄສຸ ເອກເມກໍ; ອນ຺ຕມໂສ ເອກປຸຣິສາຣຸຬ຺ຫກຫຕ຺ຖິມ຺ປິ ເອກມ຺ປິ ສຣຫຕ຺ຖໍ ປຸຣິສໍ. ອນຸຍ຺ຍຸຕ຺ຕາ ນາມ ຣາຊາ ອຸຍ຺ຍານໍ ວາ ນທິໍ ວາ ຄຈ຺ຉຕິ; ເອວໍ ອນຸຍ຺ຍຸຕ຺ຕາ ໂຫຕິ.

໓໑໖. ອາປທາສູຕິ ຊີວິຕພ຺ຣຫ຺ມຈຣິຍນ຺ຕຣາເຍສຸ ສຕິ ເອຕ຺ຖ ຄໂຕ ມຸຎ຺ຈິສ຺ສາມີຕິ ຄຈ຺ຉໂຕ ອນາປຕ຺ຕິ. ເສສເມຕ຺ຖ ອຸຕ຺ຕານເມວ. ເອຬກໂລມສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ໂລກວຊ຺ຊໍ, ກາຍກມ຺ມໍ, ອກຸສລຈິຕ຺ຕໍ, ຕິເວທນນ຺ຕິ.

ອຸຍ຺ຍຸຕ຺ຕເສນາສິກ຺ຂາປທໍ ອຏ຺ຐມໍ.

໙. ເສນາວາສສິກ຺ຂາປທວຓ຺ຓນາ

໓໑໙. ນວເມ – ອຕ຺ຖງ຺ຄເຕ ສູຣິເຍ ເສນາຍ ວສຕີຕິ ຕິຏ຺ຐຕຸ ວາ ນິສີທຕຸ ວາ ສຍຕຸ ວາ ສເຈປິ ອາກາເສ ອິທ຺ຘິຍາ ກຎ຺ຈິ ອິຣິຍາປຖໍ ກປ຺ເປຕິ, ປາຈິຕ຺ຕິຍເມວ. ເສນາ ວາ ປຏິເສນາຍ ຣຸທ຺ຘາ ໂຫຕີຕິ ຍຖາ ສຎ຺ຈາໂຣ ຉິຊ຺ຊຕິ; ເອວໍ ຣຸທ຺ຘາ ໂຫຕິ. ປລິພຸທ຺ໂຘຕິ ເວຣິເກນ ວາ ອິສ຺ສເຣນ ວາ ຣຸທ຺ໂຘ. ເສສໍ ອຸຕ຺ຕານເມວ. ເອຬກໂລມສມຸຏ຺ຐານໍ – ກິຣິຍໍ, ໂນສຎ຺ຎາວິໂມກ຺ຂໍ, ອຈິຕ຺ຕກໍ, ປຓ຺ຓຕ຺ຕິວຊ຺ຊໍ, ກາຍກມ຺ມໍ, ຕິຈິຕ຺ຕໍ, ຕິເວທນນ຺ຕິ.

ເສນາວາສສິກ຺ຂາປທໍ ນວມໍ.

໑໐. ອຸຍ຺ໂຍຘິກສິກ຺ຂາປທວຓ຺ຓນາ

໓໒໒. ທສເມ – ອຸຄ຺ຄນ຺ຕ຺ວາ ອຸຄ຺ຄນ຺ຕ຺ວາ ເອຕ຺ຖ ຍຸຊ຺ຌນ຺ຕີຕິ ອຸຍ຺ໂຍຘິກໍ; ສມ຺ປຫາຣຏ຺ຐານສ຺ເສຕໍ ອຘິວຈນໍ. ພລສ຺ສ ອຄ຺ຄໍ ຊານນ຺ຕິ ເອຕ຺ຖາຕິ ພລຄ຺ຄໍ; ພລຄຓນຏ຺ຐານນ຺ຕິ ອຕ຺ໂຖ. ເສນາຍ ວິຍູຫໍ ເສນາພ຺ຍູຫໍ; ເສນານິເວສສ຺ເສຕໍ ອຘິວຈນໍ. ຕໂຍ ຫຕ຺ຖີ ປຈ຺ຉິມໍ ຫຕ຺ຖານີກນ຺ຕິ ໂຍ ປຸພ຺ເພ ວຸຕ຺ໂຕ ທ຺ວາທສປຸຣິໂສ ຫຕ຺ຖີຕິ ເຕນ ຫຕ຺ຖິນາ ຕໂຍ ຫຕ຺ຖີ. ເສເສສຸປິ ເອເສວ ນໂຍ. ເສສໍ ອຸຍ຺ຍຸຕ຺ຕເສນາສິກ຺ຂາປເທ ວຸຕ຺ຕນເຍເນວ ເວທິຕພ຺ພໍ ສທ຺ຘິໍ ສມຸຏ຺ຐານາທີຫີຕິ.

ອຸຍ຺ໂຍຘິກສິກ຺ຂາປທໍ ທສມໍ.

ສມຕ຺ໂຕ ວຓ຺ຓນາກ຺ກເມນ ອເຈລກວຄ຺ໂຄ ປຎ຺ຈໂມ.