໙. ຈມ຺ເປຍ຺ຍກ຺ຂນ຺ຘກໍ

ກສ຺ສປໂຄຕ຺ຕຠິກ຺ຂຸວຕ຺ຖຸກຖາ

໓໘໐. ຈມ຺ເປຍ຺ຍກ຺ຂນ຺ຘເກ – ຄຄ຺ຄຣາຍ ໂປກ຺ຂຣຓິຍາ ຕີເຣຕິ ຄຄ຺ຄຣານາມິກາຍ ອິຕ຺ຖິຍາ ກາຣິຕໂປກ຺ຂຣຓິຍາ ຕີເຣ. ຕນ຺ຕິພທ຺ໂຘຕິ ຕສ຺ມິໍ ອາວາເສ ກຕ຺ຕພ຺ພຕາຕນ຺ຕິປຏິພທ຺ໂຘ. ອຸສ຺ສຸກ຺ກມ຺ປິ ອກາສິ ຍາຄຸຍາຕິອາທີສຸ ມນຸສ຺ເສຫິ ອາຄນ຺ຕຸເກສຸ ອາຄເຕສຸ ອາຈິກ຺ເຂຍ຺ຍາຖາຕິ ວຸຕ຺ຕຏ຺ຐາເນເຍວ ອຸສ຺ສຸກ຺ກໍ ກາຕຸໍ ວຏ຺ຏຕິ; ນ ອວຸຕ຺ຕຏ຺ຐາເນ. ຄຈ຺ຉ ຕ຺ວໍ ຠິກ຺ຂູຕິ ສຕ຺ຖາ ຕສ຺ສ ຠິກ຺ຂຸໂນ ຕຕ຺ເຖວ ເສນາສນໍ ສປ຺ປາຍນ຺ຕິ ອທ຺ທສ, ເຕເນວມາຫ.

໓໘໒. ອຘມ຺ເມນ ວຄ຺ຄກມ຺ມໍ ກໂຣນ຺ຕີຕິອາທີນໍ ປຣໂຕ ປາຬິຍໍເຍວ ນານາກຣຓໍ ອາຄມິສ຺ສຕິ.

໓໘໕. ອຎ຺ຎຕ຺ຣາປິ ຘມ຺ມາ ກມ຺ມໍ ກໂຣນ຺ຕີຕິ ອຎ຺ຎຕ຺ຣາປິ ຘມ຺ມໍ ກມ຺ມໍ ກໂຣນ຺ຕິ, ອຍເມວ ວາ ປາໂຐ. ຠູເຕນ ວຕ຺ຖຸນາ ກຕໍ ຘມ຺ເມນ ກຕໍ ນາມ ໂຫຕິ, ຕຖາ ນ ກໂຣນ຺ຕີຕິ ອຕ຺ໂຖ. ອຎ຺ຎຕ຺ຣາປິ ວິນຍາ ກມ຺ມໍ, ອຎ຺ຎຕ຺ຣາປິ ສຕ຺ຖຸສາສນາ ກມ຺ມນ຺ຕິ ເອເຕສຸປິ ເອເສວ ນໂຍ. ເອຕ຺ຖ ປນ ວິນໂຍຕິ ໂຈທນາ ຈ ສາຣຓາ ຈ. ສຕ຺ຖຸສາສນນ຺ຕິ ຎຕ຺ຕິສມ຺ປທາ ອນຸສ຺ສາວນສມ຺ປທາ ຈ; ຕາຫິ ວິນາ ກມ຺ມໍ ກໂຣນ຺ຕີຕິ ອຕ຺ໂຖ. ປຏິກຸຏ຺ຐກຕນ຺ຕິ ປຏິກຸຏ຺ຐຎ຺ເຈວ ກຕຎ຺ຈ; ຍໍ ອຎ຺ເຎສຸ ປຏິກ຺ໂກສນ຺ເຕສຸ ກຕໍ ຕໍ ປຏິກຸຏ຺ຐຎ຺ເຈວ ໂຫຕິ ກຕຎ຺ຈ; ຕາທິສມ຺ປິ ກມ຺ມໍ ກໂຣນ຺ຕີຕິ ອຕ຺ໂຖ.

໓໘໗. ຉຍິມານິ ຠິກ຺ຂເວ ກມ຺ມານິ ອຘມ຺ມກມ຺ມນ຺ຕິອາທີສຸ ປນ ‘‘ຘມ຺ໂມ’’ຕິ ປາຬິຍາ ອຘິວຈນໍ. ຕສ຺ມາ ຍໍ ຍຖາວຸຕ຺ຕາຍ ປາຬິຍາ ນ ກຣິຍຕິ, ຕໍ ອຘມ຺ມກມ຺ມນ຺ຕິ ເວທິຕພ຺ພໍ. ອຍເມຕ຺ຖ ສງ຺ເຂໂປ, ວິຕ຺ຖາໂຣ ປນ ປາຬິຍໍເຍວ ອາຄໂຕ. ໂສ ຈ ໂຂ ຎຕ຺ຕິທຸຕິຍຎຕ຺ຕິຈຕຸຕ຺ຖກມ຺ມານໍເຍວ ວເສນ. ຍສ຺ມາ ປນ ຎຕ຺ຕິກມ຺ເມ ຎຕ຺ຕິທຸຕິຍຎຕ຺ຕິຈຕຸຕ຺ເຖສຸ ວິຍ ຫາປນໍ ວາ ອຎ຺ຎຖາ ກຣຓໍ ວາ ນຕ຺ຖິ, ອປໂລກນກມ຺ມຎ຺ຈ ສາເວຕ຺ວາວ ກຣິຍຕິ, ຕສ຺ມາ ຕານິ ປາຬິຍໍ ນ ທສ຺ສິຕານິ, ເຕສໍ ສພ຺ເພສມ຺ປິ ກມ຺ມານໍ ວິນິຈ຺ຉຍໍ ປຣໂຕ ວຓ຺ຓຍິສ຺ສາມ.

ຈຕຸວຄ຺ຄກຣຓາທິກຖາ

໓໘໘. ອິທານິ ຍທິທໍ ຉຏ຺ຐໍ ຘມ຺ເມນ ສມຄ຺ຄກມ຺ມໍ ນາມ, ຕໍ ເຍຫິ ສງ຺ເຆຫິ ກາຕພ຺ພໍ, ເຕສໍ ປເຠທໍ ທສ຺ເສຕຸໍ ‘‘ປຎ຺ຈ ສງ຺ຆາ’’ຕິອາທິ ວຸຕ຺ຕໍ. ກມ຺ມປ຺ປຕ຺ໂຕຕິ ກມ຺ມໍ ປຕ຺ໂຕ, ກມ຺ມຍຸຕ຺ໂຕ ກມ຺ມາຣໂຫ; ນ ກິຎ຺ຈິ ກມ຺ມໍ ກາຕຸໍ ນາຣຫຕີຕິ ອຕ຺ໂຖ.

໓໘໙. ຈຕຸວຄ຺ຄກຣຓຎ຺ເຈ ຠິກ຺ຂເວ ກມ຺ມໍ ຠິກ຺ຂຸນິຈຕຸຕ຺ໂຖຕິອາທິ ປຣິສໂຕ ກມ຺ມວິປຕ຺ຕິທສ຺ສນຕ຺ຖໍ ວຸຕ຺ຕໍ. ຕຕ຺ຖ ອຸກ຺ຂິຕ຺ຕກຄ຺ຄຫເຓນ ກມ຺ມນານາສໍວາສໂກ ຄຫິໂຕ, ນານາສໍວາສກຄ຺ຄຫເຓນ ລທ຺ຘິນານາສໍວາສໂກ. ນານາສີມາຍ ຐິຕຈຕຸຕ຺ໂຖຕິ ສີມນ຺ຕຣິກາຍ ວາ ພຫິສີມາຍ ວາ ຫຕ຺ຖປາເສ ຐິເຕນາປິ ສທ຺ຘິໍ ຈຕຸວຄ຺ໂຄ ຫຸຕ຺ວາຕິ ອຕ຺ໂຖ.

໓໙໓. ປາຣິວາສິກຈຕຸຕ຺ໂຖຕິອາທິ ປຣິວາສາທິກມ຺ມານໍເຍວ ປຣິສໂຕ ວິປຕ຺ຕິທສ຺ສນຕ຺ຖໍ ວຸຕ຺ຕໍ, ເຕສໍ ວິນິຈ຺ຉຍໍ ປຣໂຕ ວຓ຺ຓຍິສ຺ສາມ.

໓໙໔. ເອກຈ຺ຈສ຺ສ ຠິກ຺ຂເວ ສງ຺ຆມຊ຺ເຌ ປຏິກ຺ໂກສນາ ຣຸຫຕີຕິອາທິ ປຏິກຸຏ຺ຐກຕກມ຺ມສ຺ສ ກຸປ຺ປາກຸປ຺ປຠາວທສ຺ສນຕ຺ຖໍ ວຸຕ຺ຕໍ. ປກຕຕ຺ຕສ຺ສາຕິ ອວິປນ຺ນສີລສ຺ສ ປາຣາຊິກໍ ອນຊ຺ຌາປນ຺ນສ຺ສ. ອານນ຺ຕຣິກສ຺ສາຕິ ອຕ຺ຕໂນ ອນນ຺ຕຣໍ ນິສິນ຺ນສ຺ສ.

ທ຺ເວນິສ຺ສາຣຓາທິກຖາ

໓໙໕. ທ຺ເວມາ ຠິກ຺ຂເວ ນິສ຺ສາຣຓາຕິອາທິ ວຕ຺ຖຸໂຕ ກມ຺ມານໍ ກຸປ຺ປາກຸປ຺ປຠາວທສ຺ສນຕ຺ຖໍ ວຸຕ຺ຕໍ. ຕຕ຺ຖ ‘‘ອປ຺ປຕ຺ໂຕ ນິສ຺ສາຣຓໍ, ຕຎ຺ເຈ ສງ຺ໂຆ ນິສ຺ສາເຣຕິ, ສຸນິສ຺ສາຣິໂຕ’’ຕິ ອິທໍ ປພ຺ພາຊນີຍກມ຺ມໍ ສນ຺ຘາຍ ວຸຕ຺ຕໍ. ປພ຺ພາຊນີຍກມ຺ເມນ ຫິ ວິຫາຣໂຕ ນິສ຺ສາເຣນ຺ຕິ, ຕສ຺ມາ ຕໍ ‘‘ນິສ຺ສາຣຓາ’’ຕິ ວຸຈ຺ຈຕິ. ຕຎ຺ເຈສ ຍສ຺ມາ ກຸລທູສໂກ ນ ໂຫຕິ, ຕສ຺ມາ ອາເວຓິເກນ ລກ຺ຂເຓນ ອປ຺ປຕ຺ໂຕ. ຍສ຺ມາ ປນສ຺ສ ອາກງ຺ຂມາໂນ ສງ຺ໂຆ ປພ຺ພາຊນີຍກມ຺ມໍ ກເຣຍ຺ຍາຕິ ວຸຕ຺ຕໍ, ຕສ຺ມາ ສຸນິສ຺ສາຣິໂຕ ໂຫຕິ. ຕຎ຺ເຈ ສງ຺ໂຆ ນິສ຺ສາເຣຕີຕິ ສເຈ ສງ຺ໂຆ ຕຊ຺ຊນີຍກມ຺ມາທິວເສນ ນິສ຺ສາເຣຕິ, ໂສ ຍສ຺ມາ ຕຕ຺ຖ ‘‘ຕິຓ຺ຓໍ ຠິກ຺ຂເວ ຠິກ຺ຂູນໍ ອາກງ຺ຂມາໂນ ສງ຺ໂຆ ຕຊ຺ຊນີຍກມ຺ມໍ ກເຣຍ຺ຍ – ເອໂກ ຠຓ຺ຑນກາຣໂກ ໂຫຕິ ກລຫກາຣໂກ ວິວາທກາຣໂກ ຠສ຺ສກາຣໂກ ສງ຺ເຆ ອຘິກຣຓກາຣໂກ, ເອໂກ ພາໂລ ໂຫຕິ ອພ຺ຍຕ຺ໂຕ ອາປຕ຺ຕິພຫຸໂລ ອນປທາໂນ, ເອໂກ ຄິຫິສໍສຏ຺ໂຐ ວິຫຣຕິ ອນນຸໂລມິເກຫິ ຄິຫິສໍສຄ຺ເຄຫີ’’ຕິ (ຈູຬວ. ໓໙໕) ເອວໍ ເອເກເກນປິ ອງ຺ເຄນ ນິສ຺ສາຣຓາ ອນຸຎ຺ຎາຕາ, ຕສ຺ມາ ສຸນິສ຺ສາຣິໂຕ.

໓໙໖. ໂອສາຣຓາຕິ ປເວສນາ. ຕຕ຺ຖ ຕຎ຺ເຈ ສງ຺ໂຆ ໂອສາເຣຕີຕິ ອຸປສມ຺ປທກມ຺ມວເສນ ປເວເສຕິ. ໂທສາຣິໂຕຕິ ທຸໂອສາຣິໂຕ. ສຫສ຺ສກ຺ຂຕ຺ຕຸມ຺ປິ ອຸປສມ຺ປາທິໂຕ ອນຸປສມ຺ປນ຺ໂນວ ໂຫຕິ ອາຈຣິຍຸປຊ຺ຌາຍາ ຈ ສາຕິສາຣາ, ຕຖາ ເສໂສ ກາຣກສງ຺ໂຆ, ນ ໂກຈິ ອາປຕ຺ຕິໂຕ ມຸຈ຺ຈຕິ. ອິຕິ ອິເມ ເອກາທສ ອຠພ຺ພປຸຄ຺ຄລາ ໂທສາຣິຕາ. ຫຕ຺ຖຈ຺ຉິນ຺ນາທໂຍ ປນ ທ຺ວຕ຺ຕິໍສ ສຸໂອສາຣິຕາ, ອຸປສມ຺ປາທິຕາ ອຸປສມ຺ປນ຺ນາວ ໂຫນ຺ຕິ, ນ ເຕ ລພ຺ຠາ ກິຎ຺ຈິ ວຕ຺ຕຸໍ. ອາຈຣິຍຸປຊ຺ຌາຍາ ປນ ກາຣກສງ຺ໂຆ ຈ ສາຕິສາຣາ, ນ ໂກຈິ ອາປຕ຺ຕິໂຕ ມຸຈ຺ຈຕິ.

໓໙໗. ອິຘ ປນ ຠິກ຺ຂເວ ຠິກ຺ຂຸສ຺ສ ນ ໂຫຕິ ອາປຕ຺ຕິ ທຏ຺ຐພ຺ພາຕິອາທິ ອຠູຕວຕ຺ຖຸວເສນ ອຘມ຺ມກມ຺ມໍ, ຠູຕວຕ຺ຖຸວເສນ ຘມ຺ມກມ຺ມຎ຺ຈ ທສ຺ເສຕຸໍ ວຸຕ຺ຕໍ. ຕຕ຺ຖ ປຏິນິສ຺ສຊ຺ຊິຕາຕິ ປຏິນິສ຺ສຊ຺ຊິຕພ຺ພາ.

ອຸປາລິປຸຈ຺ຉາກຖາ

໔໐໐. ອຸປາລິປຎ຺ເຫສຸປິ ວຕ຺ຖຸວເສເນວ ຘມ຺ມາຘມ຺ມກມ຺ມໍ ວິຠຕ຺ຕໍ. ຕຕ຺ຖ ທ຺ເວ ນຍາ – ເອກມູລໂກ ຈ ທ຺ວິມູລໂກ ຈ. ເອກມູລໂກ ອຸຕ຺ຕາໂນເຍວ. ທ຺ວິມູລເກ ຍຖາ ສຕິວິນໂຍ ອມູຬ຺ຫວິນເຍນ ສທ຺ຘິໍ ເອກາ ປຸຈ຺ຉາ ກຕາ, ເອວໍ ອມູຬ຺ຫວິນຍາທໂຍປິ ຕສ຺ສປາປິຍ຺ຍສິກາທີຫິ. ອວສາເນ ປນ ອຸປສມ຺ປທາຣຫໍ ອຸປສມ຺ປາເທຕີຕິ ເອກເມວ ປທໍ ໂຫຕິ. ປຣໂຕ ຠິກ຺ຂູນມ຺ປິ ສຕິວິນຍໍ ອາທິໍ ກຕ຺ວາ ເອເກເກນ ສທ຺ຘິໍ ເສສປທານິ ໂຍເຊຕພ຺ພານິ.

ຕຊ຺ຊນີຍກມ຺ມກຖາ

໔໐໗. ອິຘ ປນ ຠິກ຺ຂເວ ຠິກ຺ຂຸ ຠຓ຺ຑນກາຣໂກຕິອາທິ ‘‘ອຘມ຺ເມນວຄ຺ຄໍ, ອຘມ຺ເມນສມຄ຺ຄໍ; ຘມ຺ເມນວຄ຺ຄໍ, ຘມ຺ມປຕິຣູປເກນວຄ຺ຄໍ, ຘມ຺ມປຕິຣູປເກນສມຄ຺ຄ’’ນ຺ຕິ ອິເມສໍ ວເສນ ຈກ຺ກໍ ພນ຺ຘິຕ຺ວາ ຕຊ຺ຊນີຍາທີສຸ ສຕ຺ຕສຸ ກມ຺ເມສຸ ປຏິປສ຺ສທ຺ຘີສຸ ຈ ວິປຕ຺ຕິທສ຺ສນຕ຺ຖໍ ວຸຕ຺ຕໍ. ຕຕ຺ຖ ອນປທາໂນຕິ ອປທານວິຣຫິໂຕ. ອປທານໍ ວຸຈ຺ຈຕິ ປຣິຈ຺ເຉໂທ; ອາປຕ຺ຕິປຣິຈ຺ເຉທວິຣຫິໂຕຕິ ອຕ຺ໂຖ. ຕໂຕ ປຣໍ ປຏິກຸຏ຺ຐກຕກມ຺ມປ຺ປເຠທໍ ທສ຺ເສຕຸໍ ສາເຍວ ປາຬິ ‘‘ອກຕໍ ກມ຺ມ’’ນ຺ຕິອາທີຫິ ສໍສນ຺ທິຕ຺ວາ ວຸຕ຺ຕາ. ຕຕ຺ຖ ນ ກິຎ຺ຈິ ປາຬິອນຸສາເຣນ ນ ສກ຺ກາ ວິທິຕຸໍ, ຕສ຺ມາ ວຓ຺ຓນໍ ນ ວິຕ຺ຖາຣຍິມ຺ຫາຕິ.

ຈມ຺ເປຍ຺ຍກ຺ຂນ຺ຘກວຓ຺ຓນາ ນິຏ຺ຐິຕາ.