໙. ປາຕິໂມກ຺ຂຏ຺ຐປນກ຺ຂນ຺ຘກໍ

ປາຕິໂມກ຺ຂຸທ຺ເທສຍາຈນກຖາ

໓໘໓. ປາຕິໂມກ຺ຂຏ຺ຐປນກ຺ຂນ຺ຘເກ – (ນນ຺ທິມຸຂິຍາ ຣຕ຺ຕິຍາຕິ ອຣຸຓຸຏ຺ຐິຕກາເລປິ ຫິ ນນ຺ທິມຸຂາ ວິຍ ຣຕ຺ຕິ ຂາຍຕິ. ເຕນາຫ ‘‘ນນ຺ທິມຸຂິຍາ ຣຕ຺ຕິຍາ’’ຕິ. ອນ຺ໂຕປູຕິນ຺ຕິ ອຕ຺ຕຈິຕ຺ຕສນ຺ຕາເນ ກິເລສປູຕິຠາເວນ ອນ຺ໂຕປູຕິໍ. ອວສ຺ສຸຕນ຺ຕິ ກິເລສວສ຺ສນວເສນ ອວສ຺ສຸຕໍ. ກສມ຺ພຸກຊາຕນ຺ຕິ ອາກິຓ຺ຓໂທສຕາຍ ສໍກິລິຏ຺ຐຊາຕໍ.) ຍາວ ພາຫາຄຫຓາປິ ນາມາຕິ ‘‘ອປຣິສຸທ຺ຘາ ອານນ຺ທ ປຣິສາ’’ຕິ ວຈນໍ ສຸຕ຺ວາເຍວ ຫິ ເຕນ ປກ຺ກມິຕພ຺ພໍ ສິຍາ, ເອວໍ ອປກ຺ກມິຕ຺ວາ ຍາວ ພາຫາຄຫຓາປິ ນາມ ໂສ ໂມຆປຸຣິໂສ ອາຄເມສ຺ສຕິ, ອຈ຺ຉຣິຍມິທນ຺ຕິ ທສ຺ເສຕິ.

໓໘໔. ນ ອາຍຕເກເນວ ປປາໂຕຕິ ນ ປຐມເມວ ຄມ຺ຠີໂຣ; ອນຸປຸພ຺ເພນ ຄມ຺ຠີໂຣຕິ ອຕ຺ໂຖ. ຐິຕຘມ຺ໂມ ເວລໍ ນາຕິວຕ຺ຕຕີຕິ ວີຈີນໍ ໂອສກ຺ກນກນ຺ທຣໍ ມຣິຍາທເວລໍ ນາຕິກ຺ກມຕິ. ຕີຣໍ ວາເຫຕີຕິ ຕີຣໂຕ ອປ຺ເປຕິ; ອຸສ຺ສາເຣຕີຕິ ອຕ຺ໂຖ. ອຎ຺ຎາປຏິເວໂຘຕິ ອຣຫຕ຺ຕປ຺ປຕ຺ຕິ.

໓໘໕. ຉນ຺ນມຕິວສ຺ສຕີຕິ ອາປຕ຺ຕິໍ ອາປຊ຺ຊິຕ຺ວາ ປຏິຈ຺ຉາເທນ຺ໂຕ ອຎ຺ຎໍ ນວໍ ອາປຕ຺ຕິໍ ອາປຊ຺ຊຕິ ອິທເມຕໍ ສນ຺ຘາຍ ວຸຕ຺ຕໍ. ວິວຏໍ ນາຕິວສ຺ສຕີຕິ ອາປຕ຺ຕິໍ ອາປຊ຺ຊິຕ຺ວາ ວິວຣນ຺ໂຕ ອຎ຺ຎໍ ນາປຊ຺ຊຕິ ອິທເມຕໍ ສນ຺ຘາຍ ວຸຕ຺ຕໍ.

ປາຕິໂມກ຺ຂຸທ຺ເທສຍາຈນກຖາ ນິຏ຺ຐິຕາ.

ປາຕິໂມກ຺ຂສວນາຣຫກຖາ

໓໘໖. ຐປິຕໍ ໂຫຕິ ປາຕິໂມກ຺ຂນ຺ຕິ ເອຕ຺ຖ ປຸເຣ ວາ ປຈ຺ຉາ ວາ ຐປິຕມ຺ປິ ອຏ຺ຐປິຕໍ ໂຫຕິ, ເຂຕ຺ເຕ ຐປິຕເມວ ປນ ຐປິຕໍ ນາມ ໂຫຕິ. ຕສ຺ມາ ‘‘ສຸຓາຕຸ ເມ, ຠນ຺ເຕ ສງ຺ໂຆ, ອຊ຺ຊຸໂປສໂຖ ປນ຺ນຣໂສ, ຍທິ ສງ຺ຆສ຺ສ ປຕ຺ຕກລ຺ລໍ, ສງ຺ໂຆ ອຸໂປສຖໍ ກເຣຍ຺ຍາ’’ຕິ ເອຕ຺ຖ ຍາວ ເຣ-ກາຣໍ ຠຓຕິ, ຕາວ ຐເປຕພ຺ພໍ, ອິທຎ຺ຫິ ເຂຕ຺ຕໍ. ຍ຺ຍ-ກາເຣ ປນ ວຸຕ຺ເຕ ຐເປນ຺ເຕນ ປຈ຺ຉາ ຐປິຕໍ ນາມ ໂຫຕິ. ‘‘ສຸຓາຕຸ ເມ’’ຕິ ອນາຣທ຺ເຘເຍວ ຐເປນ຺ເຕນ ປຸເຣ ຐປິຕໍ ໂຫຕິ.

ປາຕິໂມກ຺ຂສວນາຣຫກຖາ ນິຏ຺ຐິຕາ.

ຘມ຺ມິກາຘມ຺ມິກປາຕິໂມກ຺ຂຏ຺ຐປນກຖາ

໓໘໗. ອມູລິກາຍ ສີລວິປຕ຺ຕິຍາ ປາຕິໂມກ຺ຂໍ ຐເປຕິ ອກຕາຍາຕິ ເຕນ ປຸຄ຺ຄເລນ ສາ ວິປຕ຺ຕິ ກຕາ ວາ ໂຫຕຸ ອກຕາ ວາ, ປາຕິໂມກ຺ຂຏ຺ຐປນກສ຺ສ ສຎ຺ຎາອມູລິກວເສນ ອມູລິກາ ໂຫຕິ. ກຕາກຕາຍາຕິ ກຕຎ຺ຈ ອກຕຎ຺ຈ ອຸຠຍໍ ຄເຫຕ຺ວາ ວຸຕ຺ຕໍ.

ຘມ຺ມິກໍ ສາມຄ຺ຄິໍ ນ ອຸເປຕີຕິ ກມ຺ມໍ ໂກເປຕຸກາມຕາຍ ສງ຺ຆສ຺ສ ກມ຺ເມ ກຣີຍມາເນ ເນວ ອາຄຈ຺ຉຕິ, ນ ຉນ຺ທໍ ເທຕິ, ສມ຺ມຸຂີຠູໂຕວ ປຏິກ຺ໂກສຕິ, ເຕນ ທຸກ຺ກຏໍ ອາປຊ຺ຊຕິ. ອິຈ຺ຈສ຺ສາປິ ສາປຕ຺ຕິກສ຺ເສວ ປາຕິໂມກ຺ຂໍ ຐປິຕໍ ໂຫຕິ. ປຈ຺ຈາທິຍຕີຕິ ‘‘ປຸນ ກາຕພ຺ພໍ ກມ຺ມ’’ນ຺ຕິ ປຈ຺ຈາທິຍຕິ, ເຕນ ອຸກ຺ໂກຏນເກນ ປາຈິຕ຺ຕິຍໍ ອາປຊ຺ຊຕິ. ອິຈ຺ຈສ຺ສາປິ ສາປຕ຺ຕິກສ຺ເສວ ປາຕິໂມກ຺ຂໍ ຐປິຕໍ ໂຫຕິ.

ຘມ຺ມິກາຘມ຺ມິກປາຕິໂມກ຺ຂຏ຺ຐປນກຖາ ນິຏ຺ຐິຕາ.

ຘມ຺ມິກປາຕິໂມກ຺ຂຏ຺ຐປນກຖາ

໓໘໘. ເຍຫິ ອາກາເຣຫິ ເຍຫິ ລິງ຺ເຄຫິ ເຍຫິ ນິມິຕ຺ເຕຫີຕິ ເອຕ຺ຖ ມຄ຺ເຄນມຄ຺ຄປຏິປາທນາທີສຸ ອາກາຣາທິສຎ຺ຎາ ເວທິຕພ຺ພາ. ເຕນ ທິຏ຺ເຐນ ເຕນ ສຸເຕນ ຕາຍ ປຣິສງ຺ກາຍາຕິ ເອຕ຺ຖ ທິຏ຺ຐຎ຺ຈ ສຸຕຎ຺ຈ ປາຬິຍໍ ອາຄຕເມວ. ສເຈ ປນ ເຕຫິ ທິຏ຺ຐສຸເຕຫິ ປຣິສງ຺ກໍ ອຸປ຺ປາເທຍ຺ຍ, ຕໍ ສນ຺ຘາຍ ວຸຕ຺ຕໍ ‘‘ຕາຍ ປຣິສງ຺ກາຍາ’’ຕິ.

ຘມ຺ມິກປາຕິໂມກ຺ຂຏ຺ຐປນກຖາ ນິຏ຺ຐິຕາ.

ອຕ຺ຕາທານອງ຺ຄກຖາ

໓໙໘. ອຕ຺ຕາທານໍ ອາທາຕຸກາເມນາຕິ ເອຕ຺ຖ ສາສນໍ ໂສເຘຕຸກາໂມ ຠິກ຺ຂຸ ຍໍ ອຘິກຣຓໍ ອຕ຺ຕນາ ອາທິຍຕິ, ຕໍ ອຕ຺ຕາທານນ຺ຕິ ວຸຈ຺ຈຕິ. ອກາໂລ ອິມໍ ອຕ຺ຕາທານໍ ອາທາຕຸນ຺ຕິ ເອຕ຺ຖ ຣາຊຠຍໍ ໂຈຣຠຍໍ ທຸພ຺ຠິກ຺ຂຠຍໍ ວສ຺ສາຣຕ຺ໂຕຕິ ອຍໍ ອກາໂລ, ວິປຣີໂຕ ກາໂລ.

ອຠູຕໍ ອິທໍ ອຕ຺ຕາທານນ຺ຕິ ອສນ຺ຕມິທໍ, ມຍາ ອຘມ຺ໂມ ວາ ຘມ຺ໂມຕິ, ຘມ຺ໂມ ວາ ອຘມ຺ໂມຕິ, ອວິນໂຍ ວາ ວິນໂຍຕິ, ວິນໂຍ ວາ ອວິນໂຍຕິ, ທຸສ຺ສີໂລ ວາ ປຸຄ຺ຄໂລ ສີລວາຕິ, ສີລວາ ວາ ທຸສ຺ສີໂລຕິ ຄຫິໂຕຕິ ອຕ຺ໂຖ; ວິປຣິຍາເຍນ ຠູຕໍ ເວທິຕພ຺ພໍ. ອນຕ຺ຖສໍຫິຕໍ ອິທໍ ອຕ຺ຕາທານນ຺ຕິ ເອຕ຺ຖ ຍໍ ຊີວິຕນ຺ຕຣາຍາຍ ວາ ພ຺ຣຫ຺ມຈຣິຍນ຺ຕຣາຍາຍ ວາ ສໍວຕ຺ຕຕິ, ອິທໍ ອນຕ຺ຖສໍຫິຕໍ, ວິປຣີຕໍ ອຕ຺ຖສໍຫິຕໍ ນາມ.

ນ ລຠິສ຺ສາມິ ສນ຺ທິຏ຺ເຐ ສມ຺ຠຕ຺ເຕ ຠິກ຺ຂູຕິ ອປ຺ເປກທາ ຫິ ຣາຊຠຍາທີສຸ ເອວຣູປາ ອຕ຺ຕໂນ ປກ຺ຂສ຺ສ ອຸປຕ຺ຖມ຺ຠກາ ຠິກ຺ຂູ ລທ຺ຘຸໍ ນ ສກ຺ກາ ໂຫນ຺ຕິ, ຕໍ ສນ຺ຘາຍ ວຸຕ຺ຕໍ ‘‘ນ ລຠິສ຺ສາມີ’’ຕິ. ອປ຺ເປກທາ ປນ ເຂມສຸຠິກ຺ຂາທີສຸ ລທ຺ຘຸໍ ສກ຺ກາ ໂຫນ຺ຕິ, ຕໍ ສນ຺ຘາຍ ‘‘ລຠິສ຺ສາມີ’’ຕິ ວຸຕ຺ຕໍ.

ຠວິສ຺ສຕິ ສງ຺ຆສ຺ສ ຕໂຕນິທານໍ ຠຓ຺ຑນນ຺ຕິ ໂກສມ຺ພການໍ ວິຍ ຠຓ຺ຑນໍ ກລໂຫ ວິຄ຺ຄໂຫ ວິວາໂທ ສງ຺ຆເຠໂທ ຈ ຠວິສ຺ສຕີຕິ. ປຈ຺ຉາປິ ອວິປ຺ປຏິສາຣກຣໍ ຠວິສ຺ສຕີຕິ ສຸຠທ຺ທໍ ວຸຑ຺ຒປພ຺ພຊິຕໍ ນິຄ຺ຄເຫຕ຺ວາ ປຎ຺ຈສຕິກສງ຺ຄີຕິໍ ກໂຣນ຺ຕສ຺ສ ມຫາກສ຺ສປຕ຺ເຖຣສ຺ເສວ, ທສວຕ຺ຖຸເກ ອຘິກຣເຓ ທສຠິກ຺ຂຸສຫສ຺ສານິ ນິຄ຺ຄເຫຕ຺ວາ ສຕ຺ຕສຕິກສງ຺ຄີຕິໍ ກໂຣນ຺ຕສ຺ສ ອາຍສ຺ມໂຕ ຍສສ຺ເສວ, ສຏ຺ຐິຠິກ຺ຂຸສຫສ຺ສານິ ນິຄ຺ຄເຫຕ຺ວາ ສຫສ຺ສິກສງ຺ຄີຕິໍ ກໂຣນ຺ຕສ຺ສ ໂມຄ຺ຄລິປຸຕ຺ຕຕິສ຺ສຕ຺ເຖຣສ຺ເສວ ຈ ປຈ຺ຉາ ສມນຸສ຺ສຣຓກຣຓໍ ໂຫຕິ, ສາສນສ຺ສ ຈ ວິຄຕຸປກ຺ກິເລສຈນ຺ທິມສູຣິຍສສ຺ສິຣິກຕາຍ ສໍວຕ຺ຕຕິ.

ອຕ຺ຕາທານອງ຺ຄກຖາ ນິຏ຺ຐິຕາ.

ໂຈທເກນປຈ຺ຈເວກ຺ຂິຕພ຺ພຘມ຺ມກຖາ

໓໙໙. ອຈ຺ຉິທ຺ເທນ ອປ຺ປຏິມໍເສນາຕິອາທີສຸ ເຍນ ຄຫຏ຺ຐປພ຺ພຊິເຕສຸ ໂຍ ໂກຈິ ປຫໂຏ ວາ ໂຫຕິ, ຄິຫີນໍ ຄຓ຺ຑຜາລນາທີນິ ເວຊ຺ຊກມ຺ມານິ ວາ ກຕານິ, ຕສ຺ສ ກາຍສມາຈາໂຣ ອຸປຈິກາຫິ ຂາຍິຕຕາລປຓ຺ຓມິວ ຉິທ຺ໂທ ຈ ປຏິມາສິຕຸໍ ຍຕ຺ຖ ກຕ຺ຖຈິ ຄເຫຕ຺ວາ ອາກຑ຺ຒິຕຸໍ ສກ຺ກຸເຓຍ຺ຍຕາຍ ສປ຺ປຏິມໍໂສ ຈ ໂຫຕິ, ວິປຣີໂຕ ອຈ຺ຉິທ຺ໂທ ອປ຺ປຏິມໍໂສຕິ ເວທິຕພ຺ໂພຕິ. ວຈີສມາຈາໂຣ ປນ ມຸສາວາທໂອມສວາທເປສຸຎ຺ຎອມູລການຸທ຺ຘໍສນາທີຫິ ຉິທ຺ໂທ ຈ ສປ຺ປຏິມໍໂສ ຈ ໂຫຕິ, ວິປຣີໂຕ ອຈ຺ຉິທ຺ໂທ ອປ຺ປຏິມໍໂສ.

ເມຕ຺ຕໍ ນຸ ໂຂ ເມ ຈິຕ຺ຕນ຺ຕິ ປລິໂພເຘ ຉິນ຺ທິຕ຺ວາ ກມ຺ມຏ຺ຐານຠາວນານຸໂຍເຄນ ອຘິຄຕໍ ເມຕ຺ຕຈິຕ຺ຕໍ. ອນາຆາຕນ຺ຕິ ອາຆາຕວິຣຫິຕໍ, ວິກ຺ຂມ຺ຠນວເສນ ວິຫຕາຆາຕນ຺ຕິ ອຕ຺ໂຖ. ອິທໍ ປນາວຸໂສ ກຕ຺ຖ ວຸຕ຺ຕໍ ຠຄວຕາຕິ ອິທໍ ສິກ຺ຂາປທໍ ກຕຣສ຺ມິໍ ນຄເຣ ວຸຕ຺ຕນ຺ຕິ ອຕ຺ໂຖ.

ໂຈທເກນປຈ຺ຈເວກ຺ຂິຕພ຺ພຘມ຺ມກຖາ ນິຏ຺ຐິຕາ.

ໂຈທເກນອຸປຏ຺ຐາເປຕພ຺ພກຖາ

໔໐໐. ກາເລນ ວກ຺ຂາມີຕິອາທີສຸ ເອໂກ ເອກໍ ໂອກາສໍ ກາເຣຕ຺ວາ ໂຈເທນ຺ໂຕ ກາເລນ ວທຕິ ນາມ. ສງ຺ຆມຊ຺ຌຄຓມຊ຺ຌສລາກຄ຺ຄຍາຄຸອຄ຺ຄວິຕກ຺ກມາຬກຠິກ຺ຂາຈາຣມຄ຺ຄອາສນສາລາທີສຸ ອຸປຏ຺ຐາເກຫິ ປຣິວາຣິຕກ຺ຂເຓ ວາ ໂຈເທນ຺ໂຕ ອກາເລນ ວທຕິ ນາມ. ຕຈ຺ເຉນ ວທນ຺ໂຕ ຠູເຕນ ວທຕິ ນາມ. ‘‘ອມ຺ໂຠ ມຫລ຺ລກ, ປຣິສາວຈຣ, ປໍສຸກູລິກ, ຘມ຺ມກຖິກ, ປຕິຣູປໍ ຕວ ອິທ’’ນ຺ຕິ ວທນ຺ໂຕ ຜຣຸເສນ ວທຕິ ນາມ. ກາຣຓນິສ຺ສິຕໍ ປນ ກຕ຺ວາ ‘‘ຠນ຺ເຕ ມຫລ຺ລກຕ຺ຖ, ປຣິສາວຈຣາ, ປໍສຸກູລິກາ, ຘມ຺ມກຖິກຕ຺ຖ, ປຕິຣູປໍ ຕຸມ຺ຫາກໍ ອິທ’’ນ຺ຕິ ວທນ຺ໂຕ ສຓ຺ເຫນ ວທຕິ ນາມ. ກາຣຓນິສ຺ສິຕໍ ກຕ຺ວາ ວທນ຺ໂຕ ອຕ຺ຖສໍຫິເຕນ ວທຕິ ນາມ. ເມຕ຺ຕຈິຕ຺ໂຕ ວກ຺ຂາມິ ໂນ ໂທສນ຺ຕໂຣຕິ ເມຕ຺ຕຈິຕ຺ຕໍ ອຸປຏ຺ຐເປຕ຺ວາ ວກ຺ຂາມິ, ນ ທຸຏ຺ຐຈິຕ຺ໂຕ ຫຸຕ຺ວາ.

ໂຈທເກນອຸປຏ຺ຐາເປຕພ຺ພກຖາ ນິຏ຺ຐິຕາ.

ໂຈທກຈຸທິຕກປຏິສໍຍຸຕ຺ຕກຖາ

໔໐໑. ອຊ຺ຌຕ຺ຕໍ ມນສິກຣິຕ຺ວາຕິ ອຕ຺ຕໂນ ຈິຕ຺ເຕ ອຸປ຺ປາເທຕ຺ວາ. ກາຣຸຎ຺ຎຕາຕິ ກຣຸຓາຠາໂວ. ອິມິນາ ກຣຸຓຎ຺ຈ ກຣຸຓາປຸພ຺ພຠາຄຎ຺ຈ ທສ຺ເສຕິ. ຫິເຕສິຕາຕິ ຫິຕຄເວສນຕາ. ອນຸກມ຺ປິຕາຕິ ເຕນ ຫິເຕນ ສໍໂຍຊນຕາ. ທ຺ວີຫິປິ ເມຕ຺ຕຎ຺ຈ ເມຕ຺ຕາປຸພ຺ພຠາຄຎ຺ຈ ທສ຺ເສຕິ. ອາປຕ຺ຕິວຸຏ຺ຐານຕາຕິ ອາປຕ຺ຕິໂຕ ວຸຏ຺ຐາເປຕ຺ວາ ສຸທ຺ຘນ຺ເຕ ປຕິຏ຺ຐາປນາ. ວຕ຺ຖຸໍ ໂຈເທຕ຺ວາ ສາເຣຕ຺ວາ ປຏິຎ຺ຎໍ ອາໂຣເປຕ຺ວາ ຍຖາປຏິຎ຺ຎາຍ ກມ຺ມກຣຓໍ ວິນຍປຸເຣກ຺ຂາຣຕາ ນາມ. ອິເມ ປຎ຺ຈ ຘມ຺ເມຕິ ເຍ ເອເຕ ກາຣຸຎ຺ຎຕາຕິອາທິນາ ນເຍນ ວຸຕ຺ຕາ, ອິເມ ປຎ຺ຈ ຘມ຺ເມ ອຊ຺ຌຕ຺ຕໍ ມນສິ ກຣິຕ຺ວາ ປໂຣ ໂຈເທຕພ຺ໂພຕິ.

ສຈ຺ເຈ ຈ ອກຸປ຺ເປ ຈາຕິ ວຈີສຈ຺ເຈ ຈ ອກຸປ຺ປນຕາຍ ຈ. ຈຸທິຕເກນ ຫິ ສຈ຺ຈຎ຺ຈ ວຕ຺ຕພ຺ພໍ, ໂກໂປ ຈ ນ ກາຕພ຺ໂພ. ເນວ ອຕ຺ຕນາ ກຸຊ຺ຌິຕພ຺ໂພ, ນ ປໂຣ ຆຏ຺ເຏຕພ຺ໂພຕິ ອຕ຺ໂຖ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ໂຈທກຈຸທິຕກປຏິສໍຍຸຕ຺ຕກຖາ ນິຏ຺ຐິຕາ.

ປາຕິໂມກ຺ຂຏ຺ຐປນກ຺ຂນ຺ຘກວຓ຺ຓນາ ນິຏ຺ຐິຕາ.