໗. ສງ຺ຆເຠທກກ຺ຂນ຺ຘກໍ

ຉສກ຺ຍປພ຺ພຊ຺ຊາກຖາ

໓໓໐. ສງ຺ຆເຠທກກ຺ຂນ຺ຘເກ ອຠິຎ຺ຎາຕາ ອຠິຎ຺ຎາຕາຕິ ປາກຏາ ປາກຏາ. ສກ຺ຍກຸມາຣາ ນາມ ກາຬຸທາຍິປ຺ປຠຸຕໂຍ ທສ ທູຕາ ສທ຺ຘິໍ ປຣິວາເຣຫິ ອຎ຺ເຎ ຈ ພຫູ ຊນາ. ອມ຺ຫາກນ຺ຕິ ອມ຺ເຫສຸ; ອມ຺ຫາກໍ ກຸລໂຕຕິ ວາ ວຸຕ຺ຕໍ ໂຫຕິ. ຆຣາວາສຕ຺ຖໍ ອນຸສາສິສ຺ສາມີຕິ ຆຣາວາເສ ຍໍ ກຕ຺ຕພ຺ພໍ, ຕໍ ຊານາເປສ຺ສາມິ. ອຸທກໍ ນິນ຺ເນຕພ຺ພນ຺ຕິ ຍຖາ ອຸທກໍ ສພ຺ພຏ຺ຐາເນ ສມໍ ໂຫຕິ, ເອວໍ ກາຕພ຺ພໍ. ນິທ຺ຘາເປຕພ຺ພນ຺ຕິ ຕິຓານິ ອຸທ຺ຘຣິຕພ຺ພານິ. ຠຸສິກາ ອຸທ຺ຘຣາເປຕພ຺ພາຕິ ສຸຂຸມປລາລມິສ຺ສຘຎ຺ຎາ ປລາລິກາ ປລາເປຕພ຺ພາ. ໂອປຸນາເປຕພ຺ພນ຺ຕິ ສຸຂຸມປລາລໍ ອປເນຕພ຺ພໍ. ຕ຺ວຎ຺ເຎວ ຆຣາວາສຕ຺ເຖນ ອຸປຊານາຫີຕິ ຕ຺ວຎ຺ເຎວ ຆຣາວາສຕ຺ຖໍ ຊານາຫິ. ອຫໍ ຕຍາ ຍຖາສຸຂໍ ປພ຺ພຊາຫີຕິ ເອຕ຺ຖ ອຫໍ ຕຍາ ສທ຺ຘິໍ ປພ຺ພຊິສ຺ສາມີຕິ ສຫາຍສິເນເຫນ ສຫສາ ວຕ຺ຕຸກາໂມ ຫຸຕ຺ວາ ປຸນ ຣຊ຺ຊສິຣິໂລເຠນ ປຣິກຑ຺ຒິຍມານຫທໂຍ ‘‘ອຫໍ ຕຍາ’’ຕິ ເອຕ຺ຕກເມວ ວຕ຺ວາ ເສສໍ ວຕ຺ຕຸໍ ນາສກ຺ຂີຕິ ເອວມຕ຺ໂຖ ເວທິຕພ຺ໂພ.

໓໓໑. ນິປ຺ປາຕິຕາຕິ ນິກ຺ຂມິຕາ. ມານສ຺ສິໂນຕິ ມານສ຺ສຍິໂນ; ມານນິສ຺ສິຕາຕິ ວຸຕ຺ຕໍ ໂຫຕິ.

໓໓໒. ຍສ຺ສນ຺ຕຣໂຕ ນ ສນ຺ຕິ ໂກປາຕິ ຕຕິຍມຄ຺ເຄນ ສມູຫຕຕ຺ຕາ ຍສ຺ສ ຈິຕ຺ເຕ ໂກປາ ນ ສນ຺ຕິ. ຍສ຺ມາ ປນ ຠໂວຕິ ສມ຺ປຕ຺ຕິ, ວິຠໂວຕິ ວິປຕ຺ຕິ; ຕຖາ ຠໂວຕິ ວຸຑ຺ຒິ, ວິຠໂວຕິ ຫານິ; ຠໂວຕິ ສສ຺ສຕໍ, ວິຠໂວຕິ ອຸຈ຺ເຉໂທ; ຠໂວຕິ ປຸຎ຺ຎໍ, ວິຠໂວຕິ ປາປໍ; ວິຠໂວຕິ ຈ ອຠໂວຕິ ຈ ອຕ຺ຖໂຕ ເອກເມວ, ຕສ຺ມາ ອິຕິຠວາຠວຕຎ຺ຈ ວີຕິວຕ຺ໂຕຕິ ເອຕ຺ຖ ຍາ ເອສາ ສມ຺ປຕ຺ຕິວິປຕ຺ຕິວຸຑ຺ຒິຫານິສສ຺ສຕຸຈ຺ເຉທປຸຎ຺ຎປາປວເສນ ອິຕິ ອເນກປ຺ປກາຣາ ຠວາຠວຕາ ວຸຈ຺ຈຕິ; ຈຕູຫິປິ ມຄ຺ເຄຫິ ຍຖາສມ຺ຠວໍ ເຕນ ເຕນ ນເຍນ ຕໍ ອິຕິຠວາຠວຕຎ຺ຈ ວີຕິວຕ຺ໂຕຕິ ເອວມຕ຺ໂຖ ທຏ຺ຐພ຺ໂພ. ນານຸຠວນ຺ຕີຕິ ນ ສມ຺ປາປຸຓນ຺ຕິ; ຕສ຺ສ ທສ຺ສນໍ ເທວານມ຺ປິ ທຸລ຺ລຠນ຺ຕິ ອຘິປ຺ປາໂຍ.

໓໓໓. ອຫິເມຂລິກາຕິ ອຫິໍ ກຏິຍໍ ພນ຺ຘິຕ຺ວາ. ອຸຈ຺ຉງ຺ເຄຕິ ອງ຺ເກ.

໓໓໔. ສມ຺ມນ຺ນຕີຕິ ສມ຺ມາເນຕິ. ຍໍ ຕຸໂມ ກຣິສ຺ສຕີຕິ ຍໍ ໂສ ກຣິສ຺ສຕິ.

ຉສກ຺ຍປພ຺ພຊ຺ຊາກຖາ ນິຏ຺ຐິຕາ.

ປກາສນີຍກມ຺ມາທິກຖາ

໓໓໖. ເຂຬາສກສ຺ສາຕິ ເອຕ຺ຖ ມິຈ຺ຉາຊີເວນ ອຸປ຺ປນ຺ນປຈ຺ຈຍາ ອຣິເຍຫິ ວນ຺ຕພ຺ພາ ເຂຬສທິສາ, ຕຖາຣູເປ ປຈ຺ຈເຍ ອຍໍ ອຊ຺ໂຌຫຣຕີຕິ ກຕ຺ວາ ເຂຬາສໂກຕິ ຠຄວຕາ ວຸຕ຺ໂຕ.

໓໔໐. ປຕ຺ຖທ຺ເຘນ ກາເຍນາຕິ ໂປຕ຺ຖກຣູປສທິເສນ ນິຈ຺ຈເລນ ກາເຍນ.

໓໔໒. ມຍໍ ໂຂ ຠເຓ ຣາຊຎາຕກາ ນາມາຕິ ຣາຊາ ອມ຺ເຫ ຊານາຕີຕິ ຣາຊຎາຕກສ຺ສ ຠາເວນ ອຕ຺ຕານໍ ອຸກ຺ກໍສນ຺ໂຕ ອາຫ. ປຫຏ຺ຐກຓ຺ຓວາໂລຕິ ພນ຺ຘເນ ນິຈ຺ຈເລ ກຕ຺ວາ.

ທຸກ຺ຂຎ຺ຫິ ກຸຎ຺ຊຣ ນາຄມາສໂທຕິ ໂຠ ກຸຎ຺ຊຣ ພຸທ຺ຘນາຄໍ ອາສາທນໍ ວຘກຈິຕ຺ເຕນ ອຸປຄມນໍ ນາມ ທຸກ຺ຂໍ. ນາຄຫຕສ຺ສາຕິ ພຸທ຺ຘນາຄໍ ຆາຕກສ຺ສ.

ປຏິກຸຏິໂຍວ ໂອສກ຺ກີຕິ ຕຖາຄຕາຠິມຸໂຂເຍວ ປິຏ຺ຐິເມຫິ ປາເທຫິ ອວສກ຺ກິ. ອລກ຺ຂິໂກຕິ ເອຕ຺ຖ ນ ລກ຺ເຂຕີຕິ ອລກ຺ຂິໂກ; ນ ຊານາຕີຕິ ອຕ຺ໂຖ, ອຫໍ ປາປກມ຺ມໍ ກໂຣມີຕິ ນ ຊານາຕິ. ນ ລກ຺ຂິຕພ຺ໂພຕິ ວາ ອລກ຺ຂິໂກ; ນ ປສ຺ສິຕພ຺ໂພຕິ ອຕ຺ໂຖ.

໓໔໓. ຕິກໂຠຊນນ຺ຕິ ເອຕ຺ຖ ຕີຫິ ຊເນຫິ ຠຸຎ຺ຊິຕພ຺ພໂຠຊນໍ. ຕໍ ປຎ຺ຎາເປສ຺ສາມີຕິ ຕໍ ອນຸຊານິສ຺ສາມິ. ຄຓໂຠຊເນ ປນ ຍຖາຘມ຺ໂມ ກາເຣຕພ຺ໂພຕິ. ປຎ຺ຈວຕ຺ຖຸຍາຈນກຖາ ສງ຺ຆາທິເສສວຓ຺ຓນາຍໍ ວຸຕ຺ຕາ. ກປ຺ປນ຺ຕິ ອາຍຸກປ຺ປໍ. ພ຺ຣຫ຺ມໍ ປຸຎ຺ຎນ຺ຕິ ເສຏ຺ຐໍ ປຸຎ຺ຎໍ. ກປ຺ປໍ ສຄ຺ຄມ຺ຫີຕິ ອາຍຸກປ຺ປເມວ.

ປກາສນີຍກມ຺ມາທິກຖາ ນິຏ຺ຐິຕາ.

ສງ຺ຆເຠທກກຖາ

໓໔໔. ອຖ ໂຂ ເທວທຕ຺ໂຕ ສງ຺ຆໍ ຠິນ຺ທິຕ຺ວາຕິ ໂສ ກິຣ ເອວໍ ສລາກໍ ຄາເຫຕ຺ວາ ຕຕ຺ເຖວ ອາເວຓິກໍ ອຸໂປສຖໍ ກຕ຺ວາ ຄໂຕ, ເຕເນຕໍ ວຸຕ຺ຕໍ.

໓໔໕. ປິຏ຺ຐິ ເມ ອາຄິລາຍຕີຕິ ຈິຣນິສຊ຺ຊາຍ ເວທນາຠິຠູຕາ ພາຘຕິ. ຕມຫໍ ອາຍມິສ຺ສາມີຕິ ຕໍ ອຫໍ ປສາເຣສ຺ສາມິ. ອາເທສນາປາຏິຫາຣິຍານຸສາສນີ ນາມ ‘‘ເອວມ຺ປິ ເຕ ມໂນ, ຕຖາປິ ເຕ ມໂນ’’ຕິ ເອວໍ ປຣສ຺ສ ຈິຕ຺ຕໍ ຊານິຕ຺ວາ ຕທນຸຣູປາ ຘມ຺ມເທສນາ.

໓໔໖. ມມານຸກຸພ຺ພນ຺ຕິ ມມານຸກິຣິຍໍ ກຸຣຸມາໂນ. ກປໂຓຕິ ທຸກ຺ຂິໂຕ. ມຫາວຣາຫສ຺ສາຕິ ມຫານາຄສ຺ສ. ມຫິໍ ວິກຸພ຺ພໂຕຕິ ປຖວິໍ ປທາເລນ຺ຕສ຺ສ. ຠິສໍ ຆສມານສ຺ສາຕິ ຠິສໍ ຂາທນ຺ຕສ຺ສ. ນທີສຸ ຊຄ຺ຄໂຕຕິ ເອຕ຺ຖ ໂສ ກິຣ ຫຕ຺ຖິນາໂຄ ສາຍນ຺ຫສມຍໍ ຕໍ ນທິນາມກໍ ໂປກ຺ຂຣຓິໍ ໂອຄາເຫຕ຺ວາ ກິລນ຺ໂຕ ສພ຺ພຣຕ຺ຕິໍ ວີຕິນາເມສິ, ຊາລິກໍ ກໂຣຕິ, ເຕນ ວຸຕ຺ຕໍ ‘‘ນທີສຸ ຊຄ຺ຄໂຕ’’ຕິ.

໓໔໗. ສຸຕາຕິ ໂສຕາ. ອສນ຺ທິທ຺ໂຘ ຈ ອກ຺ຂາຕີຕິ ນິສ຺ສນ຺ເທໂຫ ຫຸຕ຺ວາ ອກ຺ຂາຕິ ອນຸສນ຺ຘິວເສນ ໂຍເຊຕ຺ວາ ໂຍເຊຕ຺ວາ.

໓໕໐. ອປາເຍ ນິພ຺ພຕ຺ຕິສ຺ສຕີຕິ ອາປາຍິໂກ. ເອວໍ ເນຣຍິໂກ. ກປ຺ປໍ ຐສ຺ສຕີຕິ ກປ຺ປຏ຺ໂຐ. ອິທານິ ພຸທ຺ຘສຫສ຺ເສນາປິ ຕິກິຈ຺ຉິຕຸໍ ນ ສກ຺ກາຕິ ອເຕກິຈ຺ໂຉ.

ມາ ຊາຕຸ ໂກຈິ ໂລກສ຺ມິນ຺ຕິ ມາ ກທາຈິປິ ໂກຈິ ສຕ຺ໂຕ ໂລກສ຺ມິໍ. ອຸທປຊ຺ຊຖາຕິ ອຸປປຊ຺ຊຖ. ຊລໍວ ຍສສາ ອຏ຺ຐາຕິ ຍສສາ ຊລນ຺ໂຕ ວິຍ ຐິໂຕ. ເທວທຕ຺ໂຕຕິ ເມ ສຸຕນ຺ຕິ ‘‘ອີທິໂສ ເທວທຕ຺ໂຕ’’ຕິ ຠຄວຕາ ສຸຕມ຺ປິ ອຕ຺ຖິ, ຕເທວ ຄເຫຕ຺ວາ ອິທໍ ວຸຕ຺ຕໍ. ໂສ ປມາທມນຸຈິຓ຺ໂຓຕິ ເອຕ຺ຖ ປມາທໍ ອນຸຈິນາຕີຕິ ອນຸຈິຓ຺ໂຓ, ປມາໂທ ອປ຺ປຫີໂນຕິ ອຕ຺ໂຖ. ອາສຊ຺ຊ ນນ຺ຕິ ປາປເກນ ຈິຕ຺ເຕນ ປຕ຺ວາ, ວິໂສເສຕ຺ວາຕິ ວາ ອຕ຺ໂຖ. ອວີຈິນິຣຍໍ ປຕ຺ໂຕຕິ ອິທໍ ປນ ອາສີສາຍໍ ອຕີຕວຈນໍ. ເຠສ຺ມາຕິ ຠຍານໂກ.

ສງ຺ຆເຠທກກຖາ ນິຏ຺ຐິຕາ.

ອຸປາລິປຎ຺ຫາກຖາ

໓໕໑. ເອກໂຕ ອຸປາລິ ເອໂກຕິ ຘມ຺ມວາທິປກ຺ເຂ ເອໂກ. ເອກໂຕ ທ຺ເວຕິ ອຘມ຺ມວາທິປກ຺ເຂ ທ຺ເວ. ຈຕຸຕ຺ໂຖ ອນຸສ຺ສາເວຕີຕິ ສງ຺ຆໍ ຠິນ຺ທິສ຺ສາມີຕິ ອຘມ຺ມວາທິຈຕຸຕ຺ໂຖ ຫຸຕ຺ວາ ອນຸສ຺ສາເວຕິ; ອນຸນຍນ຺ໂຕ ສາເວຕິ ‘‘ນ ຕຸມ຺ຫາກໍເຍວ ນຣກຠຍໍ ອຕ຺ຖິ, ອມ຺ຫາກມ຺ປິ ອຕ຺ຖິ, ນ ອມ຺ຫາກໍ ອວີຈິມຄ຺ໂຄ ປິຫິໂຕ, ນ ມຍໍ ອກຸສລາ ນ ຠາຍາມ. ຍທິ ຫິ ອຍໍ ອຘມ຺ໂມ ອວິນໂຍ ອສຕ຺ຖຸສາສນໍ ວາ ຠເວຍ຺ຍ, ນ ມຍໍ ຄຓ຺ເຫຍ຺ຍາມາ’’ຕິອາທິນາ ນເຍນ ‘‘ອຘມ຺ມໍ ຘມ຺ໂມ’’ຕິ ເອວໍ ອຏ຺ຐາຣສ ເຠທກຣວຕ຺ຖູນິ ໂພເຘຕີຕິ ອຕ຺ໂຖ. ສລາກໍ ຄາເຫຕີຕິ ເອວໍ ອນຸສ຺ສາເວຕ຺ວາ ປນ ‘‘ອິທໍ ຄຓ຺ຫຖ, ອິທໍ ໂຣເຈຖາ’’ຕິ ວທນ຺ໂຕ ສລາກໍ ຄາເຫຕິ.

ເອກໂຕ ອຸປາລິ ທ຺ເວ ໂຫນ຺ຕີຕິອາທີສຸປິ ເອເສວ ນໂຍ. ເອວໍ ໂຂ ອຸປາລິ ສງ຺ຆຣາຊິ ເຈວ ໂຫຕິ ສງ຺ຆເຠໂທ ຈາຕິ ເອວໍ ໂຫຕິ; ນ ປນ ເອຕ຺ຕາວຕາ ສງ຺ໂຆ ຠິນ຺ໂນ ໂຫຕິ.

ຠິກ຺ຂຸ ໂຂ ອຸປາລິ ປກຕຕ຺ໂຕ ສມານສໍວາສໂກ ສມານສີມາຍໍ ຐິໂຕ ສງ຺ຆໍ ຠິນ຺ທຕີຕິ ເອຕ຺ຖ ສິຍາ ເອວໍ ‘‘ເທວທຕ຺ໂຕ ກຖໍ ປກຕຕ຺ໂຕ’’ຕິ. ກຖໍ ຕາວ ນ ປກຕຕ຺ໂຕ, ຣຎ຺ໂຎ ຆາຕາປິຕຕ຺ຕາ ຣຸຫິຣຸປ຺ປາທສ຺ສ ຈ ກຕຕ຺ຕາຕິ? ຕຕ຺ຖ ວທາມ – ອາຓຕ຺ຕິຍາ ຕາວ ວິຣທ຺ຘຕ຺ຕາ ຣຎ຺ໂຎ ຆາຕາປນໍ ນຕ຺ຖິ. ‘‘ເຕນ ຫິ ຕ຺ວໍ, ກຸມາຣ, ປິຕຣໍ ຫນ຺ຕ຺ວາ ຣາຊາ ໂຫຫິ, ອຫໍ ຠຄວນ຺ຕໍ ຫນ຺ຕ຺ວາ ພຸທ຺ໂຘ ຠວິສ຺ສາມີ’’ຕິ ເອວຎ຺ຫິ ຕສ຺ສ ອາຓຕ຺ຕິ. ກຸມາໂຣ ປນ ຣາຊາ ຫຸຕ຺ວາ ປຈ຺ຉາ ປິຕຣໍ ມາເຣສິ; ເອວໍ ຕາວ ອາຓຕ຺ຕິຍາ ວິຣທ຺ຘຕ຺ຕາ ຣຎ຺ໂຎ ຆາຕາປນໍ ນຕ຺ຖິ. ຣຸຫິຣຸປ຺ປາເທ ປນ ກຕມຕ຺ເຕເຍວ ຣຸຫິຣຸປ຺ປາທປຈ຺ຈຍາ ຠຄວຕາ ອຠພ຺ພຕາ ນ ວຸຕ຺ຕາ, ນ ຈ ສກ຺ກາ ຠຄວໂຕ ວຈນໍ ວິນາເຍວ ຕສ຺ສ ອຠພ຺ພຕາ ອາໂຣເປຕຸໍ.

‘‘ຣຸຫິຣຸປ຺ປາທໂກ, ຠິກ຺ຂເວ, ອນຸປສມ຺ປນ຺ໂນ ນ ອຸປສມ຺ປາເທຕພ຺ໂພ, ອຸປສມ຺ປນ຺ໂນ ນາເສຕພ຺ໂພ’’ຕິ –

ອິທໍ ປນ ຠຄວຕາ ສງ຺ຆເຠທໂຕ ປຈ຺ຉາ ວຸຕ຺ຕໍ, ຕສ຺ມາ ປກຕຕ຺ເຕເນວ ເຕນ ສງ຺ໂຆ ຠິນ຺ໂນຕິ.

ອຘມ຺ມໍ ຘມ຺ໂມຕິ ທີເປນ຺ຕີຕິອາທີສຸ ອຏ຺ຐາຣສສຸ ເຠທກຣວຕ຺ຖູສຸ ສຸຕ຺ຕນ຺ຕປຣິຍາເຍນ ຕາວ ທສ ກຸສລກມ຺ມປຖາ ຘມ຺ໂມ, ທສ ອກຸສລກມ຺ມປຖາ ອຘມ຺ໂມ. ຕຖາ ຈຕ຺ຕາໂຣ ສຕິປຏ຺ຐານາ, ຈຕ຺ຕາໂຣ ສມ຺ມປ຺ປຘານາ, ຈຕ຺ຕາໂຣ ອິທ຺ຘິປາທາ, ປຎ຺ຈິນ຺ທ຺ຣິຍານິ, ປຎ຺ຈ ພລານິ, ສຕ຺ຕ ໂພຊ຺ຌງ຺ຄາ, ອຣິໂຍ ອຏ຺ຐງ຺ຄິໂກ ມຄ຺ໂຄຕິ ສຕ຺ຕຕິໍສ ໂພຘິປກ຺ຂິຍຘມ຺ມາ ຘມ຺ໂມ ນາມ; ຕໂຍ ສຕິປຏ຺ຐານາ, ຕໂຍ ສມ຺ມປ຺ປຘານາ, ຕໂຍ ອິທ຺ຘິປາທາ, ຉ ອິນ຺ທ຺ຣິຍານິ, ຉ ພລານິ, ອຏ຺ຐ ໂພຊ຺ຌງ຺ຄາ, ນວງ຺ຄິໂກ ມຄ຺ໂຄຕິ ຈ ຈຕ຺ຕາໂຣ ອຸປາທານາ, ປຎ຺ຈ ນີວຣຓາ, ສຕ຺ຕ ອນຸສຍາ, ອຏ຺ຐ ມິຈ຺ຉຕ຺ຕາຕິ ຈ ອຍໍ ອຘມ຺ໂມ.

ຕຕ຺ຖ ຍໍກິຎ຺ຈິ ເອກໍ ອຘມ຺ມໂກຏ຺ຐາສໍ ຄເຫຕ຺ວາ ‘‘ອິມໍ ອຘມ຺ມໍ ຘມ຺ໂມຕິ ກຣິສ຺ສາມ; ເອວໍ ອມ຺ຫາກໍ ອາຈຣິຍກຸລໍ ນິສ຺ສາຍ ນິຍ຺ຍານິກໍ ຠວິສ຺ສຕິ, ມຍຎ຺ຈ ໂລເກ ປາກຏາ ຠວິສ຺ສາມາ’’ຕິ ຕໍ ອຘມ຺ມໍ ‘‘ຘມ຺ໂມ ອຍ’’ນ຺ຕິ ກຖຍນ຺ຕາ ອຘມ຺ມໍ ຘມ຺ໂມຕິ ທີເປນ຺ຕິ ນາມ. ຕເຖວ ຘມ຺ມໂກຏ຺ຐາເສສຸ ຈ ເອກໍ ຄເຫຕ຺ວາ ອຍໍ ອຘມ຺ໂມຕິ ກເຖນ຺ຕາ ຘມ຺ມໍ ອຘມ຺ໂມຕິ ທີເປນ຺ຕິ ນາມ. ວິນຍປຣິຍາເຍນ ປນ ຠູເຕນ ວຕ຺ຖຸນາ ໂຈເທຕ຺ວາ ສາເຣຕ຺ວາ ຍຖາປຏິຎ຺ຎາຍ ກາຕພ຺ພໍ ກມ຺ມໍ ຘມ຺ໂມ ນາມ, ອຠູເຕນ ວຕ຺ຖຸນາ ອໂຈເທຕ຺ວາ ອສາເຣຕ຺ວາ ອປຏິຎ຺ຎາຍ ກາຕພ຺ພໍ ກມ຺ມໍ ອຘມ຺ໂມ ນາມ.

ສຸຕ຺ຕນ຺ຕປຣິຍາເຍນ ຣາຄວິນໂຍ ໂທສວິນໂຍ ໂມຫວິນໂຍ ສໍວໂຣ ປຫານໍ ປຏິສງ຺ຂາຕິ ອຍໍ ວິນໂຍ ນາມ, ຣາຄາທີນໍ ອວິນໂຍ ອສໍວໂຣ ອປ຺ປຫານໍ ອປ຺ປຏິສງ຺ຂາຕິ ອຍໍ ອວິນໂຍ ນາມ. ວິນຍປຣິຍາເຍນ ວຕ຺ຖຸສມ຺ປຕ຺ຕິ ຎຕ຺ຕິສມ຺ປຕ຺ຕິ ອນຸສ຺ສາວນສມ຺ປຕ຺ຕິ ສີມາສມ຺ປຕ຺ຕິ ປຣິສາສມ຺ປຕ຺ຕີຕິ ອຍໍ ວິນໂຍ ນາມ, ວຕ຺ຖຸວິປຕ຺ຕິ…ເປ… ປຣິສາວິປຕ຺ຕີຕິ ອຍໍ ອວິນໂຍ ນາມ.

ສຸຕ຺ຕນ຺ຕປຣິຍາເຍນ ຈຕ຺ຕາໂຣ ສຕິປຏ຺ຐານາ… ອຏ຺ຐງ຺ຄິໂກ ມຄ຺ໂຄຕິ ອິທໍ ຠາສິຕໍ ລປິຕໍ ຕຖາຄເຕນ; ຕໂຍ ສຕິປຏ຺ຐານາ, ຕໂຍ ສມ຺ມປ຺ປຘານາ, ຕໂຍ ອິທ຺ຘິປາທາ, ຉ ອິນ຺ທ຺ຣິຍານິ, ຉ ພລານິ, ອຏ຺ຐ ໂພຊ຺ຌງ຺ຄາ, ນວງ຺ຄິໂກ ມຄ຺ໂຄຕິ ອິທໍ ອຠາສິຕໍ ອລປິຕໍ ຕຖາຄເຕນ. ວິນຍປຣິຍາເຍນ ຈຕ຺ຕາໂຣ ປາຣາຊິກາ, ເຕຣສ ສງ຺ຆາທິເສສາ, ທ຺ເວ ອນິຍຕາ, ຕິໍສ ນິສ຺ສຄ຺ຄິຍາ ປາຈິຕ຺ຕິຍາຕິ ອິທໍ ຠາສິຕໍ ລປິຕໍ ຕຖາຄເຕນ; ຕໂຍ ປາຣາຊິກາ, ຈຸທ຺ທສ ສງ຺ຆາທິເສສາ, ຕໂຍ ອນິຍຕາ, ເອກຕ຺ຕິໍສ ນິສ຺ສຄ຺ຄິຍາ ປາຈິຕ຺ຕິຍາຕິ ອິທໍ ອຠາສິຕໍ ອລປິຕໍ ຕຖາຄເຕນ.

ສຸຕ຺ຕນ຺ຕປຣິຍາເຍນ ເທວສິກໍ ຜລສມາປຕ຺ຕິສມາປຊ຺ຊນໍ, ມຫາກຣຸຓາສມາປຕ຺ຕິສມາປຊ຺ຊນໍ, ພຸທ຺ຘຈກ຺ຂຸນາ ໂລກໂວໂລກນໍ, ອຏ຺ຐຸປ຺ປຕ຺ຕິວເສນ ສຸຕ຺ຕນ຺ຕເທສນາ, ຊາຕກກຖາຕິ ອິທໍ ອາຈິຓ຺ຓໍ; ນ ເທວສິກໍ ຜລສມາປຕ຺ຕິສມາປຊ຺ຊນໍ…ເປ… ນ ຊາຕກກຖາຕິ ອິທໍ ອນາຈິຓ຺ຓໍ. ວິນຍປຣິຍາເຍນ ນິມນ຺ຕິຕສ຺ສ ວສ຺ສາວາສໍ ວສິຕ຺ວາ ອປໂລເກຕ຺ວາ ຈາຣິຍປກ຺ກມນໍ, ປວາເຣຕ຺ວາ ຈາຣິຍປກ຺ກມນໍ, ອາຄນ຺ຕຸເກຫິ ສທ຺ຘິໍ ປຐມໍ ປຏິສນ຺ຖາຣກຣຓນ຺ຕິ ອິທໍ ອາຈິຓ຺ຓໍ; ຕສ຺ເສວ ອາຈິຓ຺ຓສ຺ສ ອກຣຓໍ ອນາຈິຓ຺ຓໍ ນາມ.

ສຸຕ຺ຕນ຺ຕປຣິຍາເຍນ ຈຕ຺ຕາໂຣ ສຕິປຏ຺ຐານາ…ເປ… ອຏ຺ຐງ຺ຄິໂກ ມຄ຺ໂຄຕິ ອິທໍ ປຎ຺ຎຕ຺ຕໍ ນາມ; ຕໂຍ ສຕິປຏ຺ຐານາ…ເປ… ນວງ຺ຄິໂກ ມຄ຺ໂຄຕິ ອິທໍ ອປຎ຺ຎຕ຺ຕໍ ນາມ. ວິນຍປຣິຍາເຍນ ຈຕ຺ຕາໂຣ ປາຣາຊິກາ…ເປ… ຕິໍສ ນິສ຺ສຄ຺ຄິຍາ ປາຈິຕ຺ຕິຍາຕິ ອິທໍ ປຎ຺ຎຕ຺ຕໍ ນາມ; ຕໂຍ ປາຣາຊິກາ…ເປ… ເອກຕ຺ຕິໍສ ນິສ຺ສຄ຺ຄິຍາ ປາຈິຕ຺ຕິຍາຕິ ອິທໍ ອປຎ຺ຎຕ຺ຕໍ ນາມ.

‘‘ອນາປຕ຺ຕິ ອຊານນ຺ຕສ຺ສ, ອເຖຍ຺ຍຈິຕ຺ຕສ຺ສ, ນ ມຣຓາຘິປ຺ປາຍສ຺ສ, ອນຸລ຺ລປນາຘິປ຺ປາຍສ຺ສ, ນ ໂມຈນາຘິປ຺ປາຍສ຺ສາ’’ຕິ ຕຕ຺ຖ ຕຕ຺ຖ ວຸຕ຺ຕາ ອນາປຕ຺ຕິ ອນາປຕ຺ຕິ ນາມ. ‘‘ຊານນ຺ຕສ຺ສ, ເຖຍ຺ຍຈິຕ຺ຕສ຺ສາ’’ຕິອາທິນາ ນເຍນ ວຸຕ຺ຕາ ອາປຕ຺ຕິ ອາປຕ຺ຕິ ນາມ. ປຎ຺ຈາປຕ຺ຕິກ຺ຂນ຺ຘາ ລຫຸກາປຕ຺ຕິ ນາມ, ທ຺ເວ ອາປຕ຺ຕິກ຺ຂນ຺ຘາ ຄຣຸກາປຕ຺ຕິ ນາມ. ຉ ອາປຕ຺ຕິກ຺ຂນ຺ຘາ ສາວເສສາປຕ຺ຕິ ນາມ, ເອໂກ ປາຣາຊິກາປຕ຺ຕິກ຺ຂນ຺ໂຘ ອນວເສສາປຕ຺ຕິ ນາມ. ທ຺ເວ ອາປຕ຺ຕິກ຺ຂນ຺ຘາ ທຸຏ຺ຐຸລ຺ລາປຕ຺ຕິ ນາມ, ປຎ຺ຈາປຕ຺ຕິກ຺ຂນ຺ຘາ ອທຸຏ຺ຐຸລ຺ລາປຕ຺ຕິ ນາມ.

ປຸຣິມນເຍເນວ ປເນຕ຺ຖ ວຸຕ຺ຕປ຺ປກາຣໍ ຘມ຺ມໍ ‘‘ອຘມ຺ໂມ ອຍ’’ນ຺ຕິ ກຖຍນ຺ຕາ ‘‘ຘມ຺ມໍ ອຘມ຺ໂມ’’ຕິ ທີເປນ຺ຕິ ນາມ. ອວິນຍໍ ‘‘ວິນໂຍ ອຍ’’ນ຺ຕິ…ເປ… ອທຸຏ຺ຐຸລ຺ລາປຕ຺ຕິໍ ‘‘ທຸຏ຺ຐຸລ຺ລາປຕ຺ຕິ ອຍ’’ນ຺ຕິ ກຖຍນ຺ຕາ ‘‘ອທຸຏ຺ຐຸລ຺ລາປຕ຺ຕິໍ ທຸຏ຺ຐຸລ຺ລາປຕ຺ຕີ’’ຕິ ທີເປນ຺ຕິ ນາມ. ເອວໍ ‘‘ອຘມ຺ມໍ ຘມ຺ໂມ’’ຕິ ວາ…ເປ… ‘‘ອທຸຏ຺ຐຸລ຺ລາປຕ຺ຕິໍ ທຸຏ຺ຐຸລ຺ລາປຕ຺ຕີ’’ຕິ ວາ ທີເປຕ຺ວາ ປກ຺ຂໍ ລຠິຕ຺ວາ ຈຕຸນ຺ນໍ ສງ຺ຆກມ຺ມານໍ ອຎ຺ຎຕຣໍ ສງ຺ຆກມ຺ມໍ ເອກສີມາຍໍ ວິສຸໍ ກໂຣນ຺ເຕຫິ ສງ຺ໂຆ ຠິນ຺ໂນ ນາມ ໂຫຕິ. ເຕນ ວຸຕ຺ຕໍ – ‘‘ເຕ ອິເມຫິ ອຏ຺ຐາຣສຫິ ວຕ຺ຖູຫິ ອປກສ຺ສນ຺ຕີ’’ຕິອາທິ.

ຕຕ຺ຖ ອປກສ຺ສນ຺ຕີຕິ ປຣິສໍ ອາກຑ຺ຒນ຺ຕິ, ວິຊເຏນ຺ຕິ, ເອກມນ຺ຕໍ ອຸສ຺ສາເຣນ຺ຕິ ຈ. ອວປກາສນ຺ຕີຕິ ອຕິ ວິຍ ປກາເສນ຺ຕິ ຍຖາ ວິສໍສຏ຺ຐາວ ໂຫນ຺ຕິ, ເອວໍ ກໂຣນ຺ຕິ. ອາເວນິນ຺ຕິ ວິສຸໍ. ເອຕ຺ຕາວຕາ ໂຂ ອຸປາລິ ສງ຺ໂຆ ຠິນ຺ໂນ ໂຫຕີຕິ ເອວໍ ອຏ຺ຐາຣສສຸ ເຠທກຣວຕ຺ຖູສຸ ຍໍກິຎ຺ຈິ ເອກມ຺ປິ ວຕ຺ຖຸໍ ທີເປຕ຺ວາ ເຕນ ເຕນ ກາຣເຓນ ‘‘ອິມໍ ຄຓ຺ຫຖ, ອິມໍ ໂຣເຈຖາ’’ຕິ ສຎ຺ຎາເປຕ຺ວາ ສລາກໍ ຄາຫາເປຕ຺ວາ ວິສຸໍ ສງ຺ຆກມ຺ເມ ກເຕ ສງ຺ໂຆ ຠິນ຺ໂນ ໂຫຕິ. ປຣິວາເຣ ປນ ‘‘ປຎ຺ຈຫິ ອຸປາລິ ອາກາເຣຫິ ສງ຺ໂຆ ຠິຊ຺ຊຕີ’’ຕິອາທິ ວຸຕ຺ຕໍ, ຕສ຺ສ ອິມິນາ ອິຘ ວຸຕ຺ເຕນ ສງ຺ຆເຠທລກ຺ຂເຓນ ອຕ຺ຖໂຕ ນານາກຣຓໍ ນຕ຺ຖິ. ຕໍ ປນສ຺ສ ນານາກຣຓາຠາວໍ ຕຕ຺ເຖວ ປກາສຍິສ຺ສາມ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ອຸປາລິປຎ຺ຫາກຖາ ນິຏ຺ຐິຕາ.

ສງ຺ຆເຠທກກ຺ຂນ຺ຘກວຓ຺ຓນາ ນິຏ຺ຐິຕາ.