໕. ຂຸທ຺ທກວຕ຺ຖຸກ຺ຂນ຺ຘກໍ

ຂຸທ຺ທກວຕ຺ຖຸກຖາ

໒໔໓. ຂຸທ຺ທກວຕ຺ຖຸກ຺ຂນ຺ຘເກ – ມລ຺ລມຸຏ຺ຐິກາຕິ ມຸຏ຺ຐິກມລ຺ລາ. ຄາມມຸທ຺ທວາຕິ ຉວິຣາຄມຓ຺ຑນານຸຍຸຕ຺ຕາ ນາຄຣິກມນຸສ຺ສາ. ຄາມໂມທ຺ທວາຕິປິ ປາໂຐ; ເອເສວຕ຺ໂຖ. ຖມ຺ເຠຕິ ນ຺ຫານຕິຕ຺ເຖ ນິຂຓິຕ຺ວາ ຐປິຕຕ຺ຖມ຺ເຠ.

ກຸຏ຺ເຏຕິ ອິຏ຺ຐກາສິລາທາຣຸກຸຏ຺ຏານໍ ອຎ຺ຎຕຣສ຺ມິໍ. ອຏ຺ຏາເນ ນ຺ຫາຍນ຺ຕີຕິ ເອຕ຺ຖ ອຏ຺ຏານໍ ນາມ ຣຸກ຺ຂໍ ຜລກໍ ວິຍ ຕຈ຺ເຉຕ຺ວາ ອຏ຺ຐປທາກາເຣນ ຣາຊິໂຍ ຉິນ຺ທິຕ຺ວາ ນ຺ຫານຕິຕ຺ເຖ ນິຂຓນ຺ຕິ, ຕຕ຺ຖ ຈຸຓ຺ຓານິ ອາກິຣິຕ຺ວາ ມນຸສ຺ສາ ກາຍໍ ຆໍສນ຺ຕິ. ຄນ຺ຘພ຺ພຫຕ຺ຖເກນາຕິ ນ຺ຫານຕິຕ຺ເຖ ຐປິເຕນ ທາຣຸມຍຫຕ຺ເຖນ, ເຕນ ກິຣ ຈຸຓ຺ຓານິ ຄເຫຕ຺ວາ ມນຸສ຺ສາ ສຣີຣໍ ຆໍສນ຺ຕິ. ກຸຣຸວິນ຺ທກສຸຕ຺ຕິຍາຕິ ກຸຣຸວິນ຺ທກປາສາຓຈຸຓ຺ຓານິ ລາຂາຍ ພນ຺ຘິຕ຺ວາ ກຕຄຸຬິກກລາປໂກ ວຸຈ຺ຈຕິ, ຕໍ ອຸໂຠສຸ ອນ຺ເຕສຸ ຄເຫຕ຺ວາ ສຣີຣໍ ຆໍສນ຺ຕິ. ວິຄ຺ຄຍ຺ຫ ປຣິກມ຺ມໍ ກາຣາເປນ຺ຕີຕິ ອຎ຺ຎມຎ຺ຎໍ ສຣີເຣນ ສຣີຣໍ ຆໍສນ຺ຕິ. ມລ຺ລກໍ ນາມ ມກຣທນ຺ຕເກ ຉິນ຺ທິຕ຺ວາ ມລ຺ລກມູລສຓ຺ຐາເນນ ກຕໍ ມລ຺ລກນ຺ຕິ ວຸຈ຺ຈຕິ, ອິທໍ ຄິລານສ຺ສາປິ ນ ວຏ຺ຏຕິ.

໒໔໔. ອກຕມລ຺ລກໍ ນາມ ທນ຺ເຕ ອຈ຺ຉິນ຺ທິຕ຺ວາ ກຕໍ, ອິທໍ ອຄິລານສ຺ເສວ ນ ວຏ຺ຏຕິ; ອິຏ຺ຐກາຂຓ຺ຑໍ ປນ ກປາລຂຓ຺ຑໍ ວາ ວຏ຺ຏຕິ. ອຸກ຺ກາສິກນ຺ຕິ ວຕ຺ຖວຏ຺ຏິໍ; ຕສ຺ມາ ນ຺ຫາຍນ຺ຕສ຺ສ ຍສ຺ສ ກສ຺ສຈິ ນ຺ຫານສາຏກວຏ຺ຏິຍາ ປິຏ຺ຐິໍ ຆໍສິຕຸໍ ວຏ຺ຏຕິ. ປຸຖຸປາຓິກນ຺ຕິ ຫຕ຺ຖປຣິກມ຺ມໍ ວຸຈ຺ຈຕິ, ຕສ຺ມາ ສພ຺ເພສໍ ຫຕ຺ເຖນ ປິຏ຺ຐິປຣິກມ຺ມໍ ກາຕຸໍ ວຏ຺ຏຕິ.

໒໔໕. ວລ຺ລິກາຕິ ກຓ຺ຓໂຕ ນິກ຺ຂນ຺ຕມຸຕ຺ໂຕລມ຺ພກາທີນໍ ເອຕໍ ອຘິວຈນໍ; ນ ເກວລຎ຺ຈ ວລ຺ລິກາ ເອວ, ຍໍກິຎ຺ຈິ ກຓ຺ຓປິຬນ຺ຘນໍ ອນ຺ຕມໂສ ຕາລປຓ຺ຓມ຺ປິ ນ ວຏ຺ຏຕິ. ປາມງ຺ຄນ຺ຕິ ຍໍກິຎ຺ຈິ ປລມ຺ພກສຸຕ຺ຕໍ. ກຓ຺ຐສຸຕ຺ຕກນ຺ຕິ ຍໍກິຎ຺ຈິ ຄີວູປຄອາຠຣຓໍ. ກຏິສຸຕ຺ຕກນ຺ຕິ ຍໍກິຎ຺ຈິ ກຏິປິຬນ຺ຘນໍ ອນ຺ຕມໂສ ສຸຕ຺ຕຕນ຺ຕຸມຕ຺ຕມ຺ປິ. ໂອວຏ຺ຏິກນ຺ຕິ ວລຍໍ. ກາຍູຣາທີນິ ປາກຏາເນວ, ອກ຺ຂການໍ ເຫຏ຺ຐາ ພາຫາຠຣຓໍ ຍໍກິຎ຺ຈິ ອາຠຣຓໍ ນ ວຏ຺ຏຕິ.

໒໔໖. ທຸມາສິກໍ ວາ ທຸວງ຺ຄຸລໍ ວາຕິ ເອຕ຺ຖ ສເຈ ເກສາ ອນ຺ໂຕທ຺ເວມາເສ ທ຺ວງ຺ຄຸລໍ ປາປຸຓນ຺ຕິ, ອນ຺ໂຕທ຺ເວມາເສວ ຉິນ຺ທິຕພ຺ພາ. ທ຺ວງ຺ຄຸເລຫິ ອຕິກ຺ກາເມຕຸໍ ນ ວຏ຺ຏຕິ. ສເຈປິ ນ ທີຆາ, ທ຺ເວມາສໂຕ ເອກທິວສມ຺ປິ ອຕິກ຺ກາເມຕຸໍ ນ ວຏ຺ຏຕິເຍວ; ເອວມຍໍ ອຸຠເຍນປິ ອຸກ຺ກຏ຺ຐປຣິຈ຺ເຉໂທວ ວຸຕ຺ໂຕ, ຕໂຕ ໂອຣໍ ປນ ນວຏ຺ຏນຠາໂວ ນາມ ນຕ຺ຖິ.

ໂກຈ຺ເຉນ ໂອສຓ຺ເຐນ຺ຕີຕິ ໂກຈ຺ເຉນ ໂອລິຂິຕ຺ວາ ສນ຺ນິສີທາເປນ຺ຕິ. ຜຓເກນາຕິ ທນ຺ຕມຍາທີສຸ ເຍນ ເກນຈິ. ຫຕ຺ຖຜຓເກນາຕິ ຫຕ຺ເຖເນວ ຜຓກິຈ຺ຈໍ ກໂຣນ຺ຕາ ອງ຺ຄຸລີຫິ ໂອສຓ຺ເຐນ຺ຕິ. ສິຕ຺ຖເຕລເກນາຕິ ມຘຸສິຕ຺ຖກນິຍ຺ຍາສາທີສຸ ເຍນ ເກນຈິ ຈິກ຺ກເລນ. ອຸທກເຕລເກນາຕິ ອຸທກມິສ຺ສເກນ ເຕເລນ. ມຓ຺ຑນຕ຺ຖາຍ ສພ຺ພຕ຺ຖ ທຸກ຺ກຏໍ, ອຸທ຺ຘໂລເມນ ປນ ອນຸໂລມນິປາຕນຕ຺ຖໍ ຫຕ຺ຖໍ ເຕເມຕ຺ວາ ສີສໍ ປຸຎ຺ຉິຕພ຺ພໍ. ອຸຓ຺ຫາຠິຕຕ຺ຕຣຊສິຣານມ຺ປິ ອລ຺ລຫຕ຺ເຖນ ປຸຎ຺ຉິຕຸໍ ວຏ຺ຏຕິ.

໒໔໗. ນ ຠິກ຺ຂເວ ອາທາເສ ວາ ອຸທກປຕ຺ເຕ ວາຕິ ເອຕ຺ຖ ກໍສປຕ຺ຕາທີນິປິ ເຍສຸ ມຸຂນິມິຕ຺ຕໍ ປຎ຺ຎາຍຕິ, ສພ຺ພານິ ອາທາສສງ຺ຂເມວ ຄຈ຺ຉນ຺ຕິ. ກຎ຺ຊິຍາທີນິປິ ຈ ອຸທກປຕ຺ຕສງ຺ຂເມວ. ຕສ຺ມາ ຍຕ຺ຖ ກຕ຺ຖຈິ ໂອໂລເກນ຺ຕສ຺ສ ທຸກ຺ກຏໍ. ອາພາຘປຈ຺ຈຍາຕິ ‘‘ສຎ຺ຉວິ ນຸ ໂຂ ເມ ວໂຓ, ອຸທາຫຸ ນ ຕາວາ’’ຕິ ຊານນຕ຺ຖໍ; ‘‘ຊິຓ຺ໂຓ ນຸ ໂຂມ຺ຫິ ໂນ’’ຕິ ເອວໍ ອາຍຸສງ຺ຂາຣໍ ໂອໂລກນຕ຺ຖມ຺ປິ ວຏ຺ຏຕີຕິ ວຸຕ຺ຕໍ.

ມຸຂໍ ອາລິມ຺ປນ຺ຕີຕິ ວິປ຺ປສນ຺ນຉວິຣາຄກເຣຫິ ມຸຂາເລປເນຫິ ອາລິມ຺ປນ຺ຕິ. ອຸມ຺ມທ຺ເທນ຺ຕີຕິ ນານາອຸມ຺ມທ຺ທເນຫິ ອຸມ຺ມທ຺ເທນ຺ຕິ. ຈຸຓ຺ເຓນ຺ຕີຕິ ມຸຂຈຸຓ຺ຓເກນ ມກ຺ເຂນ຺ຕິ. ມໂນສິລິກາຍ ມຸຂໍ ລຎ຺ເຉນ຺ຕີຕິ ມໂນສິລາຍ ຕິລກາທີນິ ລຎ຺ຉນານິ ກໂຣນ຺ຕິ, ຕານິ ຫຣິຕາລາທີຫິປິ ນ ວຏ຺ຏນ຺ຕິເຍວ. ອງ຺ຄຣາຄາທໂຍ ປາກຏາເຍວ. ສພ຺ພຕ຺ຖ ທຸກ຺ກຏໍ.

໒໔໘. ນ ຠິກ຺ຂເວ ນຈ຺ຈໍ ວາຕິອາທີສຸ ຍໍກິຎ຺ຈິ ນຈ຺ຈໍ ອນ຺ຕມໂສ ໂມຣນຈ຺ຈມ຺ປິ ທສ຺ສນາຍ ຄຈ຺ຉນ຺ຕສ຺ສ ທຸກ຺ກຏໍ. ສຍມ຺ປິ ນຈ຺ຈນ຺ຕສ຺ສ ວາ ນຈ຺ຈາເປນ຺ຕສ຺ສ ວາ ທຸກ຺ກຏເມວ. ຄີຕມ຺ປິ ຍໍກິຎ຺ຈິ ນຏຄີຕໍ ວາ ສາຘຸຄີຕໍ ວາ ອນ຺ຕມໂສ ທນ຺ຕຄີຕມ຺ປິ ‘‘ຍໍ ຄາຍິສ຺ສາມາ’’ຕິ ປຸພ຺ພຠາເຄ ໂອກູຊນ຺ຕາ ກໂຣນ຺ຕິ, ເອຕມ຺ປິ ນ ວຏ຺ຏຕິ. ສຍໍ ຄາຍນ຺ຕສ຺ສາປິ ຄາຍາເປນ຺ຕສ຺ສາປິ ທຸກ຺ກຏເມວ. ວາທິຕມ຺ປິ ຍໍກິຎ຺ຈິ ນ ວຏ຺ຏຕິ. ຍໍ ປນ ນິຏ຺ຐຸຠນ຺ໂຕ ວາ ສາສງ຺ເກ ວາ ຐິໂຕ ອຈ຺ຉຣິກໍ ວາ ໂຜເຏຕິ, ປາຓິໍ ວາ ປຫຣຕິ, ຕຕ຺ຖ ອນາປຕ຺ຕິ. ສພ຺ພໍ ອນ຺ຕຣາຣາເມ ຐິຕສ຺ສ ປສ຺ສໂຕ ອນາປຕ຺ຕິ. ‘‘ປສ຺ສິສ຺ສາມີ’’ຕິ ວິຫາຣໂຕ ວິຫາຣໍ ຄຈ຺ຉນ຺ຕສ຺ສ ອາປຕ຺ຕິເຍວ. ອາສນສາລາຍ ນິສິນ຺ໂນ ປສ຺ສຕິ, ອນາປຕ຺ຕິ. ‘‘ປສ຺ສິສ຺ສາມີ’’ຕິ ອຸຏ຺ຐຫິຕ຺ວາ ຄຈ຺ຉໂຕ ອາປຕ຺ຕິ. ວີຖິຍໍ ຐຕ຺ວາ ຄີວໍ ປຣິວຕ຺ເຕຕ຺ວາ ປສ຺ສໂຕປິ ອາປຕ຺ຕິເຍວ.

໒໔໙. ສຣກຸຕ຺ຕິນ຺ຕິ ສຣກິຣິຍໍ. ຠງ຺ໂຄ ໂຫຕີຕິ ອລທ຺ຘໍ ອຸປ຺ປາເທຕຸໍ ນ ສກ຺ໂກຕິ; ລທ຺ຘໍ ສມາປຊ຺ຊິຕຸໍ. ປຈ຺ຉິມາ ຊນຕາຕິ ອມ຺ຫາກໍ ອາຈຣິຍາປິ ອຸປຊ຺ຌາຍາປິ ເອວໍ ຄາຍິໍສູຕິ ປຈ຺ຉິໂມ ຊໂນ ທິຏ຺ຐານຸຄຕິໍ ອາປຊ຺ຊຕິ; ຕເຖວ ຄາຍຕິ. ນ ຠິກ຺ຂເວ ອາຍຕເກນາຕິ ເອຕ຺ຖ ອາຍຕໂກ ນາມ ຕໍ ຕໍ ວຕ຺ຕໍ ຠິນ຺ທິຕ຺ວາ ອກ຺ຂຣານິ ວິນາເສຕ຺ວາ ປວຕ຺ໂຕ. ຘມ຺ເມ ປນ ສຸຕ຺ຕນ຺ຕວຕ຺ຕໍ ນາມ ອຕ຺ຖິ, ຊາຕກວຕ຺ຕໍ ນາມ ອຕ຺ຖິ, ຄາຖາວຕ຺ຕໍ ນາມ ອຕ຺ຖິ, ຕໍ ວິນາເສຕ຺ວາ ອຕິທີຆໍ ກາຕຸໍ ນ ວຏ຺ຏຕິ. ຈຕຸຣສ຺ເສນ ວຕ຺ເຕນ ປຣິມຓ຺ຑລານິ ປທພ຺ຍຎ຺ຊນານິ ທສ຺ເສຕພ຺ພານິ. ສຣຠຎ຺ຎນ຺ຕິ ສເຣນ ຠຓນໍ. ສຣຠຎ຺ເຎ ກິຣ ຕຣງ຺ຄວຕ຺ຕໂຘຕກວຕ຺ຕຄລິຕວຕ຺ຕາທີນິ ທ຺ວຕ຺ຕິໍສ ວຕ຺ຕານິ ອຕ຺ຖິ. ເຕສຸ ຍໍ ອິຈ຺ຉຕິ, ຕໍ ກາຕຸໍ ລຠຕິ. ສພ຺ເພສໍ ປທພ຺ຍຎ຺ຊນໍ ອວິນາເສຕ຺ວາ ວິກາຣໍ ອກຕ຺ວາ ສມຓສາຣຸປ຺ເປນ ຈຕຸຣສ຺ເສນ ນເຍນ ປວຕ຺ຕນໍເຍວ ລກ຺ຂຓໍ.

ພາຫິຣໂລມິໍ ອຸຓ຺ຓິນ຺ຕິ ອຸຓ຺ຓໂລມານິ ພຫິ ກຕ຺ວາ ອຸຓ຺ຓປາວາຣໍ ປາຣຸປນ຺ຕິ; ຕຖາ ຘາເຣນ຺ຕສ຺ສ ທຸກ຺ກຏໍ. ໂລມານິ ອນ຺ໂຕ ກຕ຺ວາ ປາຣຸປິຕຸໍ ວຏ຺ຏຕິ. ສມຓກປ຺ປກຖາ ຠູຕຄາມສິກ຺ຂາປທວຓ຺ຓນາຍໍ ວຸຕ຺ຕາ.

໒໕໑. ນ ຠິກ຺ຂເວ ອຕ຺ຕໂນ ອງ຺ຄຊາຕນ຺ຕິ ອງ຺ຄຊາຕໍ ຉິນ຺ທນ຺ຕສ຺ເສວ ຖຸລ຺ລຈ຺ຈຍໍ. ອຎ຺ຎໍ ປນ ກຓ຺ຓນາສາອງ຺ຄຸລິອາທິໍ ຍໍກິຎ຺ຈິ ຉິນ຺ທນ຺ຕສ຺ສ ຕາທິສໍ ວາ ທຸກ຺ຂໍ ອຸປ຺ປາເທນ຺ຕສ຺ສ ທຸກ຺ກຏໍ. ອຫິກີຏທຏ຺ຐາທີສຸ ປນ ອຎ຺ຎອາພາຘປຈ຺ຈຍາ ວາ ໂລຫິຕໍ ວາ ໂມເຈນ຺ຕສ຺ສ ຉິນ຺ທນ຺ຕສ຺ສ ວາ ອນາປຕ຺ຕິ.

໒໕໒. ຈນ຺ທນຄຓ຺ຐິ ອຸປ຺ປນ຺ນາ ໂຫຕີຕິ ຈນ຺ທນຆຏິກາ ອຸປ຺ປນ຺ນາ ໂຫຕິ. ໂສ ກິຣ ອຸທ຺ຘຎ຺ຈ ອໂຘ ຈ ຊາລານິ ປຣິກ຺ຂິປາເປຕ຺ວາ ຄງ຺ຄາຍ ນທິຍາ ກີຬຕິ, ຕສ຺ສ ນທີໂສເຕນ ວຸຍ຺ຫມານາ ຈນ຺ທນຄຓ຺ຐິ ອາຄນ຺ຕ຺ວາ ຊາເລ ລຄ຺ຄາ, ຕມສ຺ສ ປຸຣິສາ ອາຫຣິຕ຺ວາ ອທໍສຸ; ເອວໍ ສາ ອຸປ຺ປນ຺ນາ ໂຫຕິ. ອິທ຺ຘິປາຏິຫາຣິຍນ຺ຕິ ເອຕ຺ຖ ວິກຸພ຺ພນິທ຺ຘິປາຏິຫາຣິຍໍ ປຏິກ຺ຂິຕ຺ຕໍ, ອຘິຏ຺ຐານິທ຺ຘິ ປນ ອປ຺ປຏິກ຺ຂິຕ຺ຕາຕິ ເວທິຕພ຺ພາ.

ນ ຠິກ຺ຂເວ ໂສວຓ຺ຓມໂຍ ປຕ຺ໂຕຕິອາທີສຸ ສເຈປິ ຄິຫີ ຠຕ຺ຕຄ຺ເຄ ສຸວຓ຺ຓຕຏ຺ຏິກາທີສຸ ພ຺ຍຎ຺ຊນໍ ກຕ຺ວາ ອຸປນາເມນ຺ຕິ, ອາມສິຕຸມ຺ປິ ນ ວຏ຺ຏຕິ. ຜລິກມຍກາຈມຍກໍສມຍານິ ປນ ຕຏ຺ຏິກາທີນິ ຠາຊນານິ ປຸຄ຺ຄລິກປຣິໂຠເຄເນວ ນ ວຏ຺ຏນ຺ຕິ, ສງ຺ຆິກປຣິໂຠເຄນ ວາ ຄິຫິວິກຏານິ ວາ ວຏ຺ຏນ຺ຕິ. ‘‘ຕມ຺ພໂລຫມໂຍປິ ປຕ຺ໂຕວ ນ ວຏ຺ຏຕິ, ຖາລກໍ ປນ ວຏ຺ຏຕີ’’ຕິ ອິທໍ ສພ຺ພໍ ກຸຣຸນ຺ທິຍໍ ວຸຕ຺ຕໍ. ມຓິມໂຍຕິ ເອຕ຺ຖ ປນ ອິນ຺ທນີລາທິມຓິມໂຍ ວຸຕ຺ໂຕ. ກໍສມໂຍຕິ ເອຕ຺ຖ ວຏ຺ຏໂລຫມໂຍປິ ສງ຺ຄຫິໂຕ.

໒໕໓. ລິຂິຕຸນ຺ຕິ ຕນຸກຣຓຕ຺ຖາເຍຕໍ ວຸຕ຺ຕໍ. ປກຕິມຓ຺ຑລນ຺ຕິ ມກຣທນ຺ຕຈ຺ຉິນ຺ນກມຓ຺ຑລເມວ.

໒໕໔. ອາວຏ຺ຏິຕ຺ວາຕິ ອຎ຺ຎມຎ຺ຎໍ ປຫຣິຕ຺ວາ. ປຕ຺ຕາຘາຣກນ຺ຕິ ເອຕ຺ຖ ‘‘ທນ຺ຕວລ຺ລິເວຕ຺ຕາທີຫິ ກເຕ ຠູມິອາຘາຣເກ ຕໂຍ, ທາຣຸອາຘາຣເກ ທ຺ເວ ປຕ຺ເຕ ອຸປຣູປຣິ ຐເປຕຸໍ ວຏ຺ຏຕີ’’ຕິ ກຸຣຸນ຺ທິຍໍ ວຸຕ຺ຕໍ. ມຫາອຏ຺ຐກຖາຍໍ ປນ ວຸຕ຺ຕໍ – ‘‘ຠູມິອາຘາຣເກ ຕິຓ຺ຓໍ ປຕ຺ຕານໍ ອໂນກາໂສ, ທ຺ເວ ຐເປຕຸໍ ວຏ຺ຏຕິ. ທາຣຸອາຘາຣກທຓ຺ຑາຘາຣເກສຸປິ ສຸສຊ຺ຊິເຕສຸ ເອເສວ ນໂຍ. ຠມໂກຏິສທິໂສ ປນ ທາຣຸອາຘາຣໂກ ຕີຫິ ທຓ຺ຑເກຫິ ພທ຺ໂຘ ທຓ຺ຑກາຘາໂຣ ຈ ເອກສ຺ສປິ ປຕ຺ຕສ຺ສ ອໂນກາໂສ, ຕຕ຺ຖ ຐເປຕ຺ວາປິ ຫຕ຺ເຖນ ຄເຫຕ຺ວາ ເອວ ນິສີທິຕພ຺ພໍ. ຠູມິຍໍ ປນ ນິກ຺ກຸຊ຺ຊິຕ຺ວາ ເອກເມວ ຐເປຕພ຺ພ’’ນ຺ຕິ.

ມິຑ຺ຒນ຺ເຕຕິ ອາລິນ຺ທກມິຑ຺ຒິກາທີນໍ ອນ຺ເຕ. ສເຈ ປນ ປຣິວຕ຺ເຕຕ຺ວາ ຕຕ຺ເຖວ ປຕິຏ຺ຐາຕິ, ເອວຣູປາຍ ວິຕ຺ຖິຓ຺ຓາຍ ມິຑ຺ຒິຍາ ຐເປຕຸໍ ວຏ຺ຏຕິ. ປຣິຠຓ຺ຑນ຺ເຕຕິ ພາຫິຣປສ຺ເສ ກຕາຍ ຕນຸກມິຑ຺ຒິກາຍ ອນ຺ເຕ. ມິຑ຺ຒິຍໍ ວຸຕ຺ຕນເຍເນເວຕ຺ຖາປິ ວິນິຈ຺ຉໂຍ ເວທິຕພ຺ໂພ.

ໂຈຬກນ຺ຕິ ຍໍ ປຕ຺ຖຣິຕ຺ວາ ປຕ຺ໂຕ ຐປີຍຕິ; ຕສ຺ມິໍ ປນ ອສຕິ ກຏສາຣເກ ວາ ຕຏ຺ຏິກາຍ ວາ ມຕ຺ຕິກາປຣິຠຓ຺ຑກຕາຍ ຠູມິຍາ ວາ ຍຕ຺ຖ ນ ທຸສ຺ສຕິ, ຕຖາຣູປາຍ ວາລິກາຍ ວາ ຐເປຕຸໍ ວຏ຺ຏຕິ. ປໍສຸຣຊາທີສຸ ປນ ຂຣຠູມິຍໍ ວາ ຐເປນ຺ຕສ຺ສ ທຸກ຺ກຏໍ. ປຕ຺ຕມາຬກໍ ອິຏ຺ຐກາຫິ ວາ ທາຣູຫິ ວາ ກາຕຸໍ ວຏ຺ຏຕິ. ປຕ຺ຕກຸຓ຺ໂຑລິກາຕິ ມຫາມຸຂກຸຓ຺ຑສຓ຺ຐານາ ຠຓ຺ຑກຸກ຺ຂລິກາ ວຸຈ຺ຈຕິ. ໂຍ ລຄ຺ເຄຍ຺ຍາຕິ ຍຕ຺ຖ ກຕ຺ຖຈິ ລຄ຺ເຄນ຺ຕສ຺ສ ທຸກ຺ກຏເມວ. ຈີວຣວໍເສປິ ພນ຺ຘິຕ຺ວາ ຐເປຕຸໍ ນ ວຏ຺ຏຕິ. ຠຓ຺ຑກຏ຺ຐປນຕ຺ຖເມວ ວາ ກຕໍ ໂຫຕຸ ນິສີທນສຍນຕ຺ຖໍ ວາ ຍຕ຺ຖ ກຕ຺ຖຈິ ມຎ຺ເຈ ວາ ປີເຐ ວາ ຐເປນ຺ຕສ຺ສ ທຸກ຺ກຏໍ, ອຎ຺ເຎນ ປນ ຠຓ຺ຑເກນ ສທ຺ຘິໍ ພນ຺ຘິຕ຺ວາ ຐເປຕຸໍ ວຏ຺ຏຕິ. ອຏນິຍໍ ພນ຺ຘິຕ຺ວາ ໂອລມ຺ເພຕຸໍ ວາ ວຏ຺ຏຕິ, ພນ຺ຘິຕ຺ວາປິ ອຸປຣິ ຐເປຕຸໍ ນ ວຏ຺ຏຕິເຍວ. ສເຈ ປນ ມຎ຺ໂຈ ວາ ປີຐໍ ວາ ອຸກ຺ຂິປິຕ຺ວາ ຈີວຣວໍສາທີສຸ ອຏ຺ຏກຉນ຺ເນນ ຐປິຕໍ ໂຫຕິ, ຕຕ຺ຖ ຐເປຕຸໍ ວຏ຺ຏຕິ. ອໍສວທ຺ຘນເກນ ອໍສກູເຏ ລຄ຺ເຄຕ຺ວາ ອງ຺ເກ ຐເປຕຸໍ ວຏ຺ຏຕິ. ຉຕ຺ເຕ ຠຕ຺ຕປູໂຣປິ ອໍສກູເຏ ລຄ຺ຄິຕປຕ຺ໂຕປິ ຐເປຕຸໍ ນ ວຏ຺ຏຕິ, ຠຓ຺ຑເກນ ປນ ສທ຺ຘິໍ ພນ຺ຘິຕ຺ວາ ວາ ອຏ຺ຏກໍ ກຕ຺ວາ ວາ ຐປິເຕ ໂຍ ໂກຈິ ຐເປຕຸໍ ວຏ຺ຏຕິ.

໒໕໕. ປຕ຺ຕຫຕ຺ເຖນາຕິ ເອຕ຺ຖ ນ ເກວລໍ ຍສ຺ສ ປຕ຺ໂຕ ຫຕ຺ເຖ, ໂສ ເອວ ປຕ຺ຕຫຕ຺ໂຖ, ນ ເກວລຎ຺ຈ ກວາຏເມວ ປຓາເມຕຸໍ ນ ລຠຕິ; ອປິຈ ໂຂ ປນ ຫຕ຺ເຖ ວາ ປິຏ຺ຐິປາເທ ວາ ຍຕ຺ຖ ກຕ຺ຖຈິ ສຣີຣາວຍເວ ປຕ຺ຕສ຺ມິໍ ສຕິ ຫຕ຺ເຖນ ວາ ປາເທນ ວາ ສີເສນ ວາ ເຍນ ເກນຈິ ສຣີຣາວຍເວນ ກວາຏໍ ວາ ປຓາເມຕຸໍ ຆຏິກໍ ວາ ອຸກ຺ຂິປິຕຸໍ ສູຈິໍ ວາ ກຸຎ຺ຈິກາຍ ອປາປຸຣິຕຸໍ ນ ລຠຕິ. ອໍສກູເຏ ປນ ປຕ຺ຕໍ ລຄ຺ເຄຕ຺ວາ ຍຖາສຸຂໍ ອວາປຸຣິຕຸໍ ລຠຕິ.

ຕຸມ຺ພກຏາຫນ຺ຕິ ລາພຸກຏາຫໍ ວຸຈ຺ຈຕິ, ຕໍ ປຣິຫຣິຕຸໍ ນ ວຏ຺ຏຕິ. ລຠິຕ຺ວາ ປນ ຕາວກາລິກໍ ປຣິຠຸຎ຺ຊິຕຸໍ ວຏ຺ຏຕິ. ຆຏິກຏາເຫປິ ເອເສວ ນໂຍ. ຆຏິກຏາຫນ຺ຕິ ຆຏິກປາລໍ. ອຠຸໍ ເມຕິ ອຸຕ຺ຣາສວຈນເມຕໍ. ສພ຺ພປໍສຸກູລິເກນາຕິ ເອຕ຺ຖ ຈີວຣຎ຺ຈ ມຎ຺ຈປີຐຎ຺ຈ ປໍສຸກູລໍ ວຏ຺ຏຕິ, ອຊ຺ໂຌຫຣຓີຍໍ ປນ ທິນ຺ນກເມວ ຄເຫຕພ຺ພໍ.

ຈລການີຕິ ຈພ຺ເພຕ຺ວາ ອປວິທ຺ຘາມິສານິ. ອຏ຺ຐິການີຕິ ມຈ຺ຉມໍສອຏ຺ຐິການິ. ອຸຈ຺ຉິຏ຺ໂຐທກນ຺ຕິ ມຸຂວິກ຺ຂາລໂນທກໍ. ເອເຕສຸ ຍໍກິຎ຺ຈິ ປຕ຺ເຕນ ນີຫຣນ຺ຕສ຺ສ ທຸກ຺ກຏໍ. ປຕ຺ຕໍ ປຏິຄ຺ຄຫໍ ກຕ຺ວາ ຫຕ຺ຖໍ ໂຘວິຕຸມ຺ປິ ນ ລຠຕິ. ຫຕ຺ຖໂຘຕປາທໂຘຕອຸທກມ຺ປິ ປຕ຺ເຕ ອາກິຣິຕ຺ວາ ນີຫຣິຕຸໍ ນ ວຏ຺ຏຕິ. ອນຸຈ຺ຉິຏ຺ຐໍ ສຸທ຺ຘປຕ຺ຕໍ ອຸຈ຺ຉິຏ຺ຐຫຕ຺ເຖນ ຄຓ຺ຫິຕຸໍ ນ ວຏ຺ຏຕິ, ວາມຫຕ຺ເຖນ ປເນຕ຺ຖ ອຸທກໍ ອາສິຎ຺ຈິຕ຺ວາ ເອກໍ ອຸທກຄຓ຺ຑຸສໍ ຄເຫຕ຺ວາ ອຸຈ຺ຉິຏ຺ຐຫຕ຺ເຖນ ຄຓ຺ຫິຕຸໍ ວຏ຺ຏຕິ. ເອຕ຺ຕາວຕາປິ ຫິ ໂສ ອຸຈ຺ຉິຏ຺ຐປຕ຺ໂຕ ໂຫຕິ, ຫຕ຺ຖໍ ປນ ພຫິ ອຸທເກນ ວິກ຺ຂາເລຕ຺ວາ ຄເຫຕຸໍ ວຏ຺ຏຕິ. ມຈ຺ຉມໍສຜລາຜລາທີນິ ຂາທນ຺ໂຕ ຍໍ ຕຕ຺ຖ ອຏ຺ຐິໍ ວາ ຈລກໍ ວາ ຉຑ຺ເຑຕຸກາໂມ ໂຫຕິ, ຕໍ ປຕ຺ເຕ ຐເປຕຸໍ ນ ລຠຕິ. ຍໍ ປນ ປຏິຂາທິຕຸກາໂມ ໂຫຕິ, ຕໍ ປຕ຺ເຕ ຐເປຕຸໍ ລຠຕິ. ອຏ຺ຐິກກຓ຺ຏກາທີນິ ຕຕ຺ເຖວ ກຕ຺ວາ ຫຕ຺ເຖນ ລຸຎ຺ຈິຕ຺ວາ ຂາທິຕຸໍ ວຏ຺ຏຕິ. ມຸຂໂຕ ນີຫຏໍ ປນ ຍໍກິຎ຺ຈິ ປຸນ ຂາທິຕຸກາໂມ ໂຫຕິ, ຕໍ ປຕ຺ເຕ ຐເປຕຸໍ ນ ລຠຕິ. ສິງ຺ຄິເວຣນາຬິເກຣຂຓ຺ຑານິ ຑໍສິຕ຺ວາ ປຸນ ຐເປຕຸໍ ລຠຕິ.

໒໕໖. ນມຕກນ຺ຕິ ສຕ຺ຖກເວຐນກໍ ປິໂລຕິກຂຓ຺ຑໍ. ທຓ຺ຑສຕ຺ຖກນ຺ຕິ ປິປ຺ຜລກໍ ວາ ອຎ຺ຎມ຺ປິ ວາ ຍໍກິຎ຺ຈິ ທຓ຺ຑໍ ໂຍເຊຕ຺ວາ ກຕສຕ຺ຖກໍ.

ກຓ຺ຓກິຕາ ໂຫນ຺ຕີຕິ ມລຄ຺ຄຫິຕາ ໂຫນ຺ຕິ. ກິຓ຺ເຓນ ປູເຣຕຸນ຺ຕິ ກິຓ຺ຓຈຸຓ຺ເຓນ ປູເຣຕຸໍ. ສຕ຺ຕຸຍາຕິ ຫລິທ຺ທິມິສ຺ສເກນ ປິຏ຺ຐຈຸຓ຺ເຓນ. ສຣິຕກນ຺ຕິ ປາສາຓຈຸຓ຺ຓໍ ວຸຈ຺ຈຕິ; ເຕນ ປູເຣຕຸໍ ອນຸຊານາມີຕິ ອຕ຺ໂຖ. ມຘຸສິຕ຺ຖເກນ ສາເຣຕຸນ຺ຕິ ມຘຸສິຕ຺ຖເກນ ມກ຺ເຂຕຸໍ. ສຣິຕກໍ ປຣິຠິຊ຺ຊຕີຕິ ຕໍ ມກ຺ຂິຕມຘຸສິຕ຺ຖກໍ ຠິຊ຺ຊຕິ. ສຣິຕສິປາຏິກນ຺ຕິ ມຘຸສິຕ຺ຖກປິໂລຕິກໍ; ສຕ຺ຖໂກສກສິປາຏິຍາ ປນ ສຣິຕສິປາຏິກາຍ ອນຸໂລມາຕິ ກຸຣຸນ຺ທິຍໍ ວຸຕ຺ຕໍ. ກຖິນນ຺ຕິ ນິສ຺ເສຓິມ຺ປິ ຕຕ຺ຖ ອຕ຺ຖຣິຕພ຺ພກຏສາຣກກິລຎ຺ຊານໍ ອຎ຺ຎຕຣມ຺ປິ. ກຖິນຣຊ຺ຊຸນ຺ຕິ ຍາຍ ທຸປຏ຺ຏຈີວຣໍ ສິພ຺ພນ຺ຕາ ກຖິເນ ຈີວຣມ຺ປິ ພນ຺ຘນ຺ຕິ. ກຖິນໍ ນປ຺ປໂຫຕີຕິ ທີຆສ຺ສ ຠິກ຺ຂຸໂນ ປມາເຓນ ກຕໍ ກຖິນໍ; ຕຕ຺ຖ ຣສ຺ສສ຺ສ ຠິກ຺ຂຸໂນ ຈີວຣໍ ປຕ຺ຖຣິຍມານໍ ນປ຺ປໂຫຕິ, ອນ຺ໂຕເຍວ ໂຫຕິ; ທຓ຺ຑເກ ນ ປາປຸຓາຕີຕິ ອຕ຺ໂຖ. ທຓ຺ຑກຖິນນ຺ຕິ ຕສ຺ສ ມຊ຺ເຌ ອິຕຣສ຺ສ ຠິກ຺ຂຸໂນ ປມາເຓນ ອຎ຺ຎໍ ນິສ຺ເສຓິໍ ພນ຺ຘິຕຸໍ ອນຸຊານາມີຕິ ອຕ຺ໂຖ.

ພິທລກນ຺ຕິ ທຓ຺ຑກຖິນປ຺ປມາເຓນ ກຏສາຣກສ຺ສ ປຣິຍນ຺ເຕ ປຏິສໍຫຣິຕ຺ວາ ທຸຄຸຓກຣຓໍ. ສລາກນ຺ຕິ ທຸປຏ຺ຏຈີວຣສ຺ສ ອນ຺ຕເຣ ປເວສນສລາກໍ. ວິນນ຺ຘນຣຊ຺ຊຸນ຺ຕິ ມຫານິສ຺ເສຓິຍາ ສທ຺ຘິໍ ຂຸທ຺ທກໍ ນິສ຺ເສຓິໍ ວິນນ຺ຘິຕຸໍ ຣຊ຺ຊຸໍ. ວິນນ຺ຘນສຸຕ຺ຕນ຺ຕິ ຂຸທ຺ທກນິສ຺ເສຓິຍາ ຈີວຣໍ ວິນນ຺ຘິຕຸໍ ສຸຕ຺ຕກໍ. ວິນນ຺ຘິຕ຺ວາ ຈີວຣໍ ສິພ຺ເພຕຸນ຺ຕິ ເຕນ ສຸຕ຺ຕເກນ ຕຕ຺ຖ ຈີວຣໍ ວິນນ຺ຘິຕ຺ວາ ສິພ຺ພິຕຸໍ. ວິສມາ ໂຫນ຺ຕີຕິ ກາຈິ ຂຸທ຺ທກາ ໂຫນ຺ຕິ, ກາຈິ ມຫນ຺ຕາ. ກຬິມ຺ຠກນ຺ຕິ ປມາຓສຎ຺ຎາກຣຓໍ ຍໍກິຎ຺ຈິ ຕາລປຓ຺ຓາທິໍ. ໂມຆສຸຕ຺ຕກນ຺ຕິ ວຑ຺ຒກີນໍ ທາຣູສຸ ກາຬສຸຕ຺ເຕນ ວິຍ ຫລິທ຺ທິສຸຕ຺ເຕນ ສຎ຺ຎາກຣຓໍ. ອງ຺ຄຸລິຍາ ປຏິຄ຺ຄຓ຺ຫນ຺ຕີຕິ ສູຈິມຸຂໍ ອງ຺ຄຸລິຍາ ປຏິຈ຺ຉນ຺ຕິ. ປຏິຄ຺ຄຫນ຺ຕິ ອງ຺ຄຸລິໂກສກໍ.

໒໕໗. ອາເວສນວິຕ຺ຖກໍ ນາມ ຍໍກິຎ຺ຈິ ປາຕິຈງ຺ໂກຏກາທິ. ອຸຈ຺ຈວຕ຺ຖຸກນ຺ຕິ ປໍສຸໍ ອາກິຣິຕ຺ວາ ອຸຈ຺ຈວຕ຺ຖຸກໍ ກາຕຸໍ ອນຸຊານາມີຕິ ອຕ຺ໂຖ. ໂອຄຸມ຺ເຜຕ຺ວາ ອຸລ຺ລິຕ຺ຕາວລິຕ຺ຕໍ ກາຕຸນ຺ຕິ ຉທນໍ ໂອຘຸນິຕ຺ວາ ຆນທຓ຺ຑກໍ ກຕ຺ວາ ອນ຺ໂຕ ເຈວ ພຫິ ຈ ມຕ຺ຕິກາຍ ລິມ຺ປິຕຸນ຺ຕິ ອຕ຺ໂຖ. ໂຄຆໍສິກາຍາຕິ ເວຬຸໍ ວາ ຣຸກ຺ຂທຓ຺ຑໍ ວາ ອນ຺ໂຕກຕ຺ວາ ເຕນ ສທ຺ຘິໍ ສງ຺ຆຣິຕຸນ຺ຕິ ອຕ຺ໂຖ. ພນ຺ຘນຣຊ຺ຊຸນ຺ຕິ ຕຖາ ສງ຺ຆຣິຕສ຺ສ ພນ຺ຘນຣຊ຺ຊຸໍ.

໒໕໘. ກຏຈ຺ຉຸປຣິສ຺ສາວນໍ ນາມ ຕີສຸ ທຓ຺ຑເກສຸ ວິນນ຺ຘິຕ຺ວາ ກຕໍ.

໒໕໙. ໂຍ ນ ທເທຍ຺ຍາຕິ ອປຣິສ຺ສາວນກສ຺ເສວ ໂຍ ນ ທທາຕິ, ຕສ຺ສ ອາປຕ຺ຕິ. ໂຍ ປນ ອຕ຺ຕໂນ ຫຕ຺ເຖ ປຣິສ຺ສາວເນ ວິຊ຺ຊມາເນປິ ຍາຈຕິ, ຕສ຺ສ ນ ອກາມາ ທາຕພ຺ພໍ. ທຓ຺ຑປຣິສ຺ສາວນນ຺ຕິ ຣຊການໍ ຂາຣປຣິສ຺ສາວນໍ ວິຍ ຈຕູສຸ ປາເທສຸ ພທ຺ຘນິສ຺ເສຓິກາຍ ສາຏກໍ ພນ຺ຘິຕ຺ວາ ມຊ຺ເຌທຓ຺ຑເກ ອຸທກໍ ອາສິຎ຺ຈິຕພ຺ພໍ, ຕໍ ອຸໂຠປິ ໂກຏ຺ຐາເສ ປູເຣຕ຺ວາ ປຣິສ຺ສວຕິ. ໂອຕ຺ຖຣກໍ ນາມ ຍໍ ອຸທເກ ໂອຕ຺ຖຣິຕ຺ວາ ຆຏເກນ ອຸທກໍ ຄຓ຺ຫນ຺ຕິ, ຕຎ຺ຫິ ຈຕູສຸ ທຓ຺ຑເກສຸ ວຕ຺ຖໍ ພນ຺ຘິຕ຺ວາ ອຸທເກ ຈຕ຺ຕາໂຣ ຂາຓຸເກ ນິຂຓິຕ຺ວາ ເຕສຸ ພນ຺ຘິຕ຺ວາ ສພ຺ພປຣິຍນ຺ເຕ ອຸທກໂຕ ໂມເຈຕ຺ວາ ມຊ຺ເຌ ໂອຕ຺ຖຣິຕ຺ວາ ຆເຏນ ອຸທກໍ ຄຓ຺ຫນ຺ຕິ. ມກສກຸຏິກາຕິ ຈີວຣກຸຏິກາ ວຸຈ຺ຈຕິ.

໒໖໐. ອຠິສນ຺ນກາຍາຕິ ເສມ຺ຫາທິໂທສຸສ຺ສນ຺ນກາຍາ. ອຄ຺ຄຬວຏ຺ຏິ ນາມ ທ຺ວາຣພາຫາຍ ສມປ຺ປມາໂຓເຍວ ອຄ຺ຄຬຕ຺ຖມ຺ໂຠ ວຸຈ຺ຈຕິ, ຍຕ຺ຖ ຕີຓິ ຈຕ຺ຕາຣິ ຉິທ຺ທານິ ກຕ຺ວາ ສູຈິໂຍ ເທນ຺ຕິ. ກປິສີສກໍ ນາມ ທ຺ວາຣພາຫໍ ວິຊ຺ຌິຕ຺ວາ ຕຕ຺ຖ ປເວສິໂຕ ອຄ຺ຄຬປາສໂກ ວຸຈ຺ຈຕິ. ສູຈິກາຕິ ຕຕ຺ຖ ມຊ຺ເຌ ຉິທ຺ທໍ ກຕ຺ວາ ປເວສິຕາ. ຆຏິກາຕິ ອຸປຣິ ໂຍຊິຕາ. ມຓ຺ຑລິກໍ ກາຕຸນ຺ຕິ ນີຈວຕ຺ຖຸກໍ ຈິນິຕຸໍ. ຘູມເນຕ຺ຕນ຺ຕິ ຘູມນິກ຺ຂມນຉິທ຺ທໍ. ວາເສຕຸນ຺ຕິ ຄນ຺ເຘນ ວາເສຕຸໍ. ອຸທກຏ຺ຐານນ຺ຕິ ອຸທກຕ຺ຖປນຏ຺ຐານໍ. ຕຕ຺ຖ ຆເຏນ ອຸທກໍ ຐເປຕ຺ວາ ສຣາວເກນ ວຬຎ຺ເຊຕພ຺ພໍ. ໂກຏ຺ຐໂກຕິ ທ຺ວາຣໂກຏ຺ຐໂກ.

໒໖໑. ຕິສ຺ໂສ ປຏິຈ຺ຉາທິໂຍຕິ ເອຕ຺ຖ ຊນ຺ຕາຆຣປຏິຈ຺ຉາທິ ຈ ອຸທກປຏິຈ຺ຉາທິ ຈ ປຣິກມ຺ມໍ ກໂຣນ຺ຕສ຺ເສວ ວຏ຺ຏຕິ, ເສເສສຸ ອຠິວາທນາທີສຸ ນ ວຏ຺ຏຕິ. ວຕ຺ຖປຏິຈ຺ຉາທິ ສພ຺ພກມ຺ເມສຸ ວຏ຺ຏຕິ. ອຸທກໍ ນ ໂຫຕີຕິ ນ຺ຫາໂນທກໍ ນ ໂຫຕິ.

໒໖໒. ຕຸລນ຺ຕິ ປຓ຺ຓິການໍ ວິຍ ອຸທກອຸພ຺ພາຫນກຕຸລໍ. ກຣກຏໂກ ວຸຈ຺ຈຕິ ໂຄເຓ ວາ ໂຍເຊຕ຺ວາ ຫຕ຺ເຖຫິ ວາ ຄເຫຕ຺ວາ ທີຆວຣຕ຺ຕາທີຫິ ອາກຑ຺ຒນຍນ຺ຕໍ. ຈກ຺ກວຏ຺ຏກນ຺ຕິ ອຣຫຏຆຏິຍນ຺ຕໍ. ຈມ຺ມຂຓ຺ຑໍ ນາມ ຕຸລາຍ ວາ ກຣກຏເກ ວາ ໂຍເຊຕພ຺ພກໍ ຈມ຺ມຠາຊນໍ. ປາກຏາ ໂຫຕີຕິ ອປຣິກ຺ຂິຕ຺ຕາ ໂຫຕິ. ອຸທກປຸຎ຺ຉນີຕິ ທຓ຺ຑມຍາປິ ວິສາຓມຍາປິ ທາຣຸມຍາປິ ວຏ຺ຏຕິ, ຕສ຺ສາ ອສຕິ ໂຈຬເກນາປິ ອຸທກໍ ປຈ຺ຈຸທ຺ຘຣິຕຸໍ ວຏ຺ຏຕິ.

໒໖໓. ອຸທກມາຕິກນ຺ຕິ ອຸທກສ຺ສ ອາຄມນມາຕິກໍ. ນິລ຺ເລຂຊນ຺ຕາຆຣໍ ນາມ ອາວິທ຺ຘປກ຺ຂປາສກໍ ວຸຈ຺ຈຕິ, ໂຄປານສີນໍ ອຸປຣິ ມຓ຺ຑເລ ປກ຺ຂປາສເກ ຐເປຕ຺ວາ ກຕກູຏຈ຺ຉທນສ຺ເສຕໍ ນາມໍ. ຈາຕຸມາສໍ ນິສີທເນນາຕິ ນິສີທເນນ ຈຕ຺ຕາໂຣ ມາເສ ນ ວິປ຺ປວສິຕພ຺ພນ຺ຕິ ອຕ຺ໂຖ.

໒໖໔. ປຸປ຺ຜາຠິກິຓ຺ເຓສູຕິ ປຸປ຺ເຜຫິ ສນ຺ຖເຕສຸ. ນມຕກໍ ນາມ ເອຬກໂລເມຫິ ກຕໍ ອວາຍິມໍ ຈມ຺ມຂຓ຺ຑປຣິຫາເຣນ ປຣິຠຸຎ຺ຊິຕພ຺ພໍ. ອາສິຕ຺ຕກູປຘານໍ ນາມ ຕມ຺ພໂລເຫນ ວາ ຣຊເຕນ ວາ ກຕາຍ ເປຬາຍ ເອຕໍ ອຘິວຈນໍ, ປຏິກ຺ຂິຕ຺ຕຕ຺ຕາ ປນ ທາຣຸມຍາປິ ນ ວຏ຺ຏຕິ. ມໂຬຣິກາຕິ ທຓ຺ຑຘາຣໂກ ວຸຈ຺ຈຕິ. ຍຏ຺ຐິອາຘາຣກປຓ຺ຓາຘາຣກປຈ຺ຉິກປິຏ຺ຐານິປິ ເອຕ຺ເຖວ ປວິຏ຺ຐານິ. ອາຘາຣກສງ຺ເຂປຄມນໂຕ ຫິ ປຏ຺ຐາຍ ຉິທ຺ທໍ ວິທ຺ຘມ຺ປິ ອວິທ຺ຘມ຺ປິ ວຏ຺ຏຕິເຍວ. ເອກຠາຊເນຕິ ເອຕ຺ຖ ສເຈ ເອໂກ ຠິກ຺ຂຸ ຠາຊນໂຕ ຜລໍ ວາ ປູວໍ ວາ ຄເຫຕ຺ວາ ຄຈ຺ຉຕິ, ຕສ຺ມິໍ ອປຄເຕ ອິຕຣສ຺ສ ເສສກໍ ຠຸຎ຺ຊິຕຸໍ ວຏ຺ຏຕິ. ອິຕຣສ຺ສາປິ ຕສ຺ມິໍ ຂີເຓ ປຸນ ຄເຫຕຸໍ ວຏ຺ຏຕິ.

໒໖໕. ອຏ຺ຐຫງ຺ເຄຫີຕິ ເອຕ຺ຖ ເອເກເກນປິ ອງ຺ເຄນ ສມນ຺ນາຄຕສ຺ສ ອນ຺ໂຕສີມາຍ ວາ ນິສ຺ສີມໍ ຄນ຺ຕ຺ວາ ນທີອາທີສຸ ວາ ນິກ຺ກຸຊ຺ຊິຕຸໍ ວຏ຺ຏຕິເຍວ. ເອວໍ ນິກ຺ກຸຊ຺ຊິເຕ ປນ ປຕ຺ເຕ ຕສ຺ສ ເຄເຫ ໂກຈິ ເທຍ຺ຍຘມ຺ໂມ ນ ຄເຫຕພ຺ໂພ – ‘‘ອສຸກສ຺ສ ເຄເຫ ຠິກ຺ຂໍ ມາ ຄຓ຺ຫິຕ຺ຖາ’’ຕິ ອຎ຺ເຎສຸ ວິຫາເຣສຸປິ ເປເສຕພ຺ພໍ. ອຸກ຺ກຸຊ຺ຊນກາເລ ປນ ຍາວຕຕິຍໍ ຍາຈາເປຕ຺ວາ ຫຕ຺ຖປາສໍ ວິຊຫາເປຕ຺ວາ ຎຕ຺ຕິທຸຕິຍກມ຺ເມນ ອຸກ຺ກຸຊ຺ຊິຕພ຺ໂພ.

໒໖໘. ປຸຣກ຺ຂຕ຺ວາຕິ ອຄ຺ຄໂຕ ກຕ຺ວາ. ສໍຫຣນ຺ຕູຕິ ສໍຫຣິຍນ຺ຕຸ. ເຈລປຏິກນ຺ຕິ ເຈລສນ຺ຖຣໍ. ໂສ ກິຣ ‘‘ສເຈ ອຫໍ ປຸຕ຺ຕໍ ລຈ຺ຉາມິ, ອກ຺ກມິສ຺ສຕິ ເມ ຠຄວາ ເຈລປຏິກ’’ນ຺ຕິ ອິມິນາ ອຊ຺ຌາສເຍນ ສນ຺ຖຣິ, ອຠພ຺ໂພ ເຈສ ປຸຕ຺ຕລາຠາຍ; ຕສ຺ມາ ຠຄວາ ນ ອກ຺ກມິ. ຍທິ ອກ຺ກເມຍ຺ຍ, ປຈ຺ຉາ ປຸຕ຺ຕໍ ອລຠນ຺ໂຕ ‘‘ນາຍໍ ສພ຺ພຎ຺ຎູ’’ຕິ ທິຏ຺ຐິໍ ຄຓ຺ເຫຍ຺ຍ. ອິທໍ ຕາວ ຠຄວໂຕ ອນກ຺ກມເນ ກາຣຓໍ. ຍສ຺ມາ ປນ ຠິກ຺ຂູປິ ເຍ ອຊານນ຺ຕາ ອກ຺ກເມຍ຺ຍຸໍ, ເຕ ຄິຫີນໍ ປຣິຠູຕາ ຠເວຍ຺ຍຸໍ; ຕສ຺ມາ ຠິກ຺ຂູ ປຣິຠວໂຕ ໂມເຈຕຸໍ ສິກ຺ຂາປທໍ ປຎ຺ຎເປສິ. ອິທໍ ສິກ຺ຂາປທປຎ຺ຎາປເນ ກາຣຓໍ.

ມງ຺ຄລຕ຺ຖາຍ ຍາຈິຍມາເນນາຕິ ອປຄຕຄພ຺ຠາ ວາ ໂຫຕຸ ຄຣຸຄພ຺ຠາ ວາ, ເອວຣູເປສຸ ຐາເນສຸ ມງ຺ຄລຕ຺ຖາຍ ຍາຈິຍມາເນນ ອກ຺ກມິຕຸໍ ວຏ຺ຏຕິ. ໂຘຕປາທກໍ ນາມ ປາທໂຘວນຏ຺ຐາເນ ໂຘເຕຫິ ປາເທຫິ ອກ຺ກມນຕ຺ຖາຍ ປຈ຺ຈຕ຺ຖຣຓໍ ອຕ຺ຖຕໍ ໂຫຕິ, ຕໍ ອກ຺ກມິຕຸໍ ວຏ຺ຏຕິ.

໒໖໙. ກຕກໍ ນາມ ປທຸມກຓ຺ຓິກາກາຣໍ ປາທຆໍສນຕ຺ຖໍ ກຓ຺ຏເກ ອຸຏ຺ຐາເປຕ຺ວາ ກຕໍ. ຕໍ ວຏ຺ຏໍ ວາ ໂຫຕຸ ຈຕຸຣສ຺ສາທິເຠທໍ ວາ, ພາຫຸລິການຸໂຍຄຕ຺ຕາ ປຏິກ຺ຂິຕ຺ຕເມວ, ເນວ ປຏິຄ຺ຄເຫຕຸໍ ນ ປຣິຠຸຎ຺ຊິຕຸໍ ວຏ຺ຏຕິ. ສກ຺ຂຣາຕິ ປາສາໂຓ ວຸຈ຺ຈຕິ; ປາສາຓເຜຓໂກປິ ວຏ຺ຏຕິ. ວິຘູປນນ຺ຕິ ວີຊນີ ວຸຈ຺ຈຕິ. ຕາລວຓ຺ຏໍ ປນ ຕາລປຓ຺ເຓຫິ ວາ ກຕໍ ໂຫຕຸ ເວຬຸທນ຺ຕວິລີເວຫິ ວາ ໂມຣປິຎ຺ເຉຫິ ວາ ຈມ຺ມວິກຕີຫິ ວາ ສພ຺ພໍ ວຏ຺ຏຕິ. ມກສພີຊນີ ທນ຺ຕມຍວິສາຓມຍທຓ຺ຑກາປິ ວຏ຺ຏຕິ, ວາກມຍພີຊນິຍາ ເກຕກປາໂຣຫກຸນ຺ຕາລປຓ຺ຓາທິມຍາປິ ສງ຺ຄຫິຕາ.

໒໗໐. ຄິລານສ຺ສ ຉຕ຺ຕນ຺ຕິ ເອຕ຺ຖ ຍສ຺ສ ກາຍຑາໂຫ ວາ ປິຕ຺ຕໂກໂປ ວາ ໂຫຕິ, ຈກ຺ຂຸ ວາ ທຸພ຺ພລໍ, ອຎ຺ໂຎ ວາ ໂກຈິ ອາພາໂຘ ວິນາ ຉຕ຺ເຕນ ອຸປ຺ປຊ຺ຊຕິ, ຕສ຺ສ ຄາເມ ວາ ອຣຎ຺ເຎ ວາ ຉຕ຺ຕໍ ວຏ຺ຏຕິ. ວສ຺ເສ ປນ ຈີວຣຄຸຕ຺ຕຕ຺ຖໍ ວາຬມິຄໂຈຣຠເຍສຸ ຈ ອຕ຺ຕຄຸຕ຺ຕຕ຺ຖມ຺ປິ ວຏ຺ຏຕິ. ເອກປຓ຺ຓຈ຺ຉຕ຺ຕໍ ປນ ສພ຺ພຕ຺ເຖວ ວຏ຺ຏຕິ.

ອສິສ຺ສາຕິ ອສິ ອສ຺ສ. ວິຊ຺ໂຊຕລຕີຕິ ວິຊ຺ໂຊຕຕິ. ທຓ຺ຑສມ຺ມຸຕິນ຺ຕິ ເອຕ຺ຖ ປມາຓຍຸຕ຺ໂຕ ຈຕຸຫຕ຺ໂຖເຍວ ທຓ຺ໂຑ ສມ຺ມນ຺ນິຕ຺ວາ ທາຕພ຺ໂພ. ຕໂຕ ອູນາຕິຣິຕ຺ໂຕ ວິນາປິ ສມ຺ມຸຕິຍາ ສພ຺ເພສໍ ວຏ຺ຏຕິ. ສິກ຺ກາ ປນ ອຄິລານສ຺ສ ນ ວຏ຺ຏຕິ, ຄິລານສ຺ສາປິ ສມ຺ມນ຺ນິຕ຺ວາວ ທາຕພ຺ພາ.

໒໗໓. ໂຣມນ຺ຖກສ຺ສາຕິ ເອຕ຺ຖ ຐເປຕ຺ວາ ໂຣມນ຺ຖກໍ ເສສານໍ ອາຄຕໍ ອຸຄ຺ຄາຣໍ ມຸເຂ ສນ຺ຘາເຣຕ຺ວາ ຄິລນ຺ຕານໍ ອາປຕ຺ຕິ. ສເຈ ປນ ອສນ຺ຘາຣິຕເມວ ປຣຄລໍ ຄຈ຺ຉຕິ, ວຏ຺ຏຕິ.

ຍໍ ທິຍ຺ຍມານນ຺ຕິ ຍໍ ທາຍເກຫິ ທິຍ຺ຍມານໍ ປຏິຄ຺ຄຫິຕຠາຊນໂຕ ພຫິ ປຕິຕໍ, ຕໍ ຠິກ຺ຂຸນາ ສາມໍ ຄເຫຕ຺ວາ ປຣິຠຸຎ຺ຊິຕຸໍ ອນຸຊານາມີຕິ ອຕ຺ໂຖ. ອິທໍ ໂຠຊນວຄ຺ເຄ ວຓ຺ຓິຕເມວ.

໒໗໔. ກຸປ຺ປໍ ກຣິສ຺ສາມີຕິ ສທ຺ທໍ ກຣິສ຺ສາມິ. ນຂາທີຫິ ນຂຈ຺ເຉທເນ ອາປຕ຺ຕິ ນຕ຺ຖິ, ອນຸຣກ຺ຂຓຕ຺ຖໍ ປນ ນຂຈ຺ເຉທນໍ ອນຸຎ຺ຎາຕໍ. ວີສຕິມຏ຺ຐນ຺ຕິ ວີສຕິປິ ນເຂ ລິຂິຕມຏ຺ເຐ ກາຣາເປນ຺ຕິ. ມລມຕ຺ຕນ຺ຕິ ນຂໂຕ ມລມຕ຺ຕໍ ອປກຑ຺ຒິຕຸໍ ອນຸຊານາມີຕິ ອຕ຺ໂຖ.

໒໗໕. ຂຸຣສິປາຏິກນ຺ຕິ ຂຸຣໂກສກໍ. ມສ຺ສຸໍ ກປ຺ປາເປນ຺ຕີຕິ ກຕ຺ຕຣິຍາ ມສ຺ສຸໍ ເຉທາເປນ຺ຕິ. ມສ຺ສຸໍ ວຑ຺ຒາເປນ຺ຕີຕິ ມສ຺ສຸໍ ທີຆໍ ກາເຣນ຺ຕິ. ໂຄໂລມິກນ຺ຕິ ຫນຸກມ຺ຫິ ທີຆໍ ກຕ຺ວາ ຐປິຕໍ ເອຬກມສ຺ສຸ ວຸຈ຺ຈຕິ. ຈຕຸຣສ຺ສກນ຺ຕິ ຈຕຸໂກຓໍ. ປຣິມຸຂນ຺ຕິ ອຸເຣ ໂລມສໍຫຣຓໍ. ອຑ຺ຒທຸກນ຺ຕິ ອຸທເຣ ໂລມຣາຊິຏ຺ຐປນໍ. ອາປຕ຺ຕິ ທຸກ຺ກຏສ຺ສາຕິ ມສ຺ສຸກປ຺ປາປນາທີສຸ ສພ຺ພຕ຺ຖ ອາປຕ຺ຕິ ທຸກ຺ກຏສ຺ສ. ອາພາຘປ຺ປຈ຺ຈຍາ ສມ຺ພາເຘ ໂລມນ຺ຕິ ຄຓ຺ຑວຓຣຸຘິອາທິອາພາຘປ຺ປຈ຺ຈຍາ. ກຕ຺ຕຣິກາຍາຕິ ຄຓ຺ຑວຓຣຸຘິສີສໂຣຄາພາຘປ຺ປຈ຺ຈຍາ. ສກ຺ຂຣາທີຫິ ນາສິກາໂລມຄ຺ຄາຫາປເນ ອາປຕ຺ຕິ ນຕ຺ຖິ. ອນຸຣກ຺ຂຓຕ຺ຖໍ ປນ ສຓ຺ຑາໂສ ອນຸຎ຺ຎາໂຕ. ນ ຠິກ຺ຂເວ ປລິຕໍ ຄາຫາເປຕພ຺ພນ຺ຕິ ເອຕ຺ຖ ຍໍ ຠມຸກາຍ ວາ ນລາເຏ ວາ ທາຐິກາຍ ວາ ອຸຄ຺ຄນ຺ຕ຺ວາ ພີຠຈ຺ຉໍ ຐິຕໍ, ຕາທິສໍ ໂລມໍ ປລິຕໍ ວາ ອປລິຕໍ ວາ ຄາຫາເປຕຸໍ ວຏ຺ຏຕິ.

໒໗໗. ກໍສປຕ຺ຖຣິກາຕິ ກໍສຠຓ຺ຑວາຓິຊາ. ພນ຺ຘນມຕ຺ຕນ຺ຕິ ວາສິກຕ຺ຕຣຍຏ຺ຐິອາທີນໍ ພນ຺ຘນມຕ຺ຕໍ.

໒໗໘. ນ ຠິກ຺ຂເວ ອກາຍພນ຺ຘເນນາຕິ ເອຕ຺ຖ ອພນ຺ຘິຕ຺ວາ ນິກ຺ຂມນ຺ເຕນ ຍຕ຺ຖ ສຣຕິ, ຕຕ຺ຖ ພນ຺ຘິຕພ຺ພໍ. ອາສນສາລາຍ ພນ຺ຘິສ຺ສາມີຕິ ຄນ຺ຕຸໍ ວຏ຺ຏຕິ. ສຣິຕ຺ວາ ຍາວ ນ ພນ຺ຘຕິ, ນ ຕາວ ປິຓ຺ຑາຍ ຈຣິຕພ຺ພໍ. ກລາພຸກໍ ນາມ ພຫຸຣຊ຺ຊຸກໍ. ເທຑ຺ຑຸຠກໍ ນາມ ອຸທກສປ຺ປສີສສທິສໍ. ມຸຣຊໍ ນາມ ມຸຣຊວຏ຺ຏິສຓ຺ຐານໍ ເວເຐຕ຺ວາ ກຕໍ. ມທ຺ທວີຓໍ ນາມ ປາມງ຺ຄສຓ຺ຐານໍ. ອີທິສຎ຺ຫິ ເອກມ຺ປິ ນ ວຏ຺ຏຕິ, ປເຄວ ພຫູນິ. ປຏ຺ຏິກໍ ສູກຣນ຺ຕກນ຺ຕິ ເອຕ຺ຖ ປກຕິວີຕາ ວາ ມຈ຺ຉກຓ຺ຏກວາຍິມາ ວາ ປຏ຺ຏິກາ ວຏ຺ຏຕິ, ເສສາ ກຸຎ຺ຊຣຈ຺ຉິກາທິເຠທາ ນ ວຏ຺ຏນ຺ຕິ. ສູກຣນ຺ຕກໍ ນາມ ກຸຎ຺ຊິກາໂກສກສຓ຺ຐານໍ ໂຫຕິ. ເອກຣຊ຺ຊຸກໍ ປນ ມຸທ຺ທິກກາຍພນ຺ຘນຎ຺ຈ ສູກຣນ຺ຕກໍ ອນຸໂລເມຕິ. ອນຸຊານາມິ ຠິກ຺ຂເວ ມຸຣຊໍ ມທ຺ທວີຓນ຺ຕິ ອິທໍ ທສາສຸເຍວ ອນຸຎ຺ຎາຕໍ. ປາມງ຺ຄທສາ ເຈຕ຺ຖ ຈຕຸນ຺ນໍ ອຸປຣິ ນ ວຏ຺ຏຕິ. ໂສຠຓໍ ນາມ ເວເຐຕ຺ວາ ມຸຂວຏ຺ຏິສິພ຺ພນໍ. ຄຸຓກໍ ນາມ ມຸທິງ຺ຄສຓ຺ຐາເນນ ສິພ຺ພນໍ; ເອວໍ ສິພ຺ພິຕາ ຫິ ອນ຺ຕາ ຖິຣາ ໂຫນ຺ຕິ. ປວນນ຺ໂຕຕິ ປາສນ຺ໂຕ ວຸຈ຺ຈຕິ.

໒໘໐. ຫຕ຺ຖິໂສຓ຺ຑກໍ ນາມ ນາຠິມູລໂຕ ຫຕ຺ຖິໂສຓ຺ຑສຓ຺ຐານໍ ໂອລມ຺ພກໍ ກຕ຺ວາ ນິວຕ຺ຖໍ ໂຈຬິກອິຕ຺ຖີນໍ ນິວາສນໍ ວິຍ. ມຈ຺ຉວາຬກໍ ນາມ ເອກໂຕ ທສນ຺ຕໍ ເອກໂຕ ປາສນ຺ຕໍ ໂອລມ຺ເພຕ຺ວາ ນິວຕ຺ຖໍ. ຈຕຸກຓ຺ຓກໍ ນາມ ອຸປຣິ ທ຺ເວ, ເຫຏ຺ຐໂຕ ທ຺ເວຕິ ເອວໍ ຈຕ຺ຕາໂຣ ກຓ຺ເຓ ທສ຺ເສຕ຺ວາ ນິວຕ຺ຖໍ. ຕາລວຓ຺ຏກໍ ນາມ ຕາລວຓ຺ຏາກາເຣນ ສາຏກໍ ໂອລມ຺ເພຕ຺ວາ ນິວາສນໍ. ສຕວລິກໍ ນາມ ທີຆສາຏກໍ ອເນກກ຺ຂຕ຺ຕຸໍ ໂອຠຎ຺ຊິຕ຺ວາ ໂອວຏ຺ຏິກໍ ກໂຣນ຺ເຕນ ນິວຕ຺ຖໍ, ວາມທກ຺ຂິຓປສ຺ເສສຸ ວາ ນິຣນ຺ຕຣໍ ວລິໂຍ ທສ຺ເສຕ຺ວາ ນິວຕ຺ຖໍ. ສເຈ ປນ ຊາຓຸໂຕ ປຏ຺ຐາຍ ເອກາ ວາ ທ຺ເວ ວາ ວລິໂຍ ປຎ຺ຎາຍນ຺ຕິ, ວຏ຺ຏຕິ.

ສໍເວລ຺ລິຍໍ ນິວາເສນ຺ຕີຕິ ມລ຺ລກມ຺ມກາຣາທໂຍ ວິຍ ກຈ຺ຉໍ ພນ຺ຘິຕ຺ວາ ນິວາເສນ຺ຕິ; ເອວໍ ນິວາເສຕຸໍ ຄິລານສ຺ສປິ ມຄ຺ຄປ຺ປຏິປນ຺ນສ຺ສປິ ນ ວຏ຺ຏຕິ. ຍມ຺ປິ ມຄ຺ຄໍ ຄຈ຺ຉນ຺ຕາ ເອກໍ ວາ ທ຺ເວ ວາ ໂກເຓ ອຸກ຺ຂິປິຕ຺ວາ ອນ຺ຕຣວາສກສ຺ສ ອຸປຣິ ລຄ຺ເຄນ຺ຕິ, ອນ຺ໂຕ ວາ ເອກໍ ກາສາວໍ ຕຖາ ນິວາເສຕ຺ວາ ພຫິ ອປຣໍ ນິວາເສນ຺ຕິ, ສພ຺ພໍ ນ ວຏ຺ຏຕິ. ຄິລາໂນ ປນ ອນ຺ໂຕ ກາສາວສ຺ສ ໂອວຏ຺ຏິກໍ ທສ຺ເສຕ຺ວາ ອປຣໍ ອຸປຣິ ນິວາເສຕຸໍ ລຠຕິ. ອຄິລາເນນ ທ຺ເວ ນິວາເສນ຺ເຕນ ສຄຸຓໍ ກຕ຺ວາ ນິວາເສຕພ຺ພານິ. ອິຕິ ຍຎ຺ຈ ອິຘ ປຏິກ຺ຂິຕ຺ຕໍ, ຍຎ຺ຈ ເສຂິຍວຓ຺ຓນາຍໍ; ຕໍ ສພ຺ພໍ ວຊ຺ເຊຕ຺ວາ ນິພ຺ພິກາຣໍ ຕິມຓ຺ຑລໍ ປຏິຈ຺ຉາເທນ຺ເຕນ ປຣິມຓ຺ຑລໍ ນິວາເສຕພ຺ພໍ. ຍໍກິຎ຺ຈິ ວິກາຣໍ ກໂຣນ຺ໂຕ ທຸກ຺ກຏາ ນ ມຸຈ຺ຈຕິ. ນ ຠິກ຺ຂເວ ຄິຫິປາຣຸຕໍ ປາຣຸປິຕພ຺ພນ຺ຕິ ເອວໍ ປຏິກ຺ຂິຕ຺ຕໍ ຄິຫິປາຣຸຕໍ ອປາຣຸປິຕ຺ວາ, ອຸໂຠ ກຓ຺ເຓ ສມໍ ກຕ຺ວາ ປາຣຸປນໍ ປຣິມຓ຺ຑລປາຣຸປນໍ ນາມ, ຕໍ ປາຣຸປິຕພ຺ພໍ.

ຕຕ຺ຖ ຍໍກິຎ຺ຈິ ເສຕປຏປາຣຸຕໍ ປຣິພ຺ພາຊກປາຣຸຕໍ ເອກສາຏກປາຣຸຕໍ ໂສຓ຺ຑປາຣຸຕໍ ອນ຺ເຕປຸຣິກປາຣຸຕໍ ມຫາເຊຏ຺ຐກປາຣຸຕໍ ກຸຏິປເວສກປາຣຸຕໍ ພ຺ຣາຫ຺ມຓປາຣຸຕໍ ປາຬິກາຣກປາຣຸຕນ຺ຕິ ເອວມາທິ ປຣິມຓ຺ຑລລກ຺ຂຓໂຕ ອຎ຺ຎຖາ ປາຣຸຕໍ, ສພ຺ພເມຕໍ ຄິຫິປາຣຸຕໍ ນາມ. ຕສ຺ມາ ຍຖາ ເສຕປຏາ ອຑ຺ຒປາລກນິຄຓ຺ຐາ ປາຣຸປນ຺ຕິ, ຍຖາ ຈ ເອກຈ຺ເຈ ປຣິພ຺ພາຊກາ ອຸຣໍ ວິວຣິຕ຺ວາ ທ຺ວີສຸ ອໍສກູເຏສຸ ປາວຸຣຓໍ ຐເປນ຺ຕິ, ຍຖາ ຈ ເອກສາຏກາ ມນຸສ຺ສາ ນິວຕ຺ຖສາຏກສ຺ສ ເອເກນນ຺ເຕນ ປິຏ຺ຐິໍ ປາຣຸປິຕ຺ວາ ອຸໂຠ ກຓ຺ເຓ ອຸໂຠສຸ ອໍສກູເຏສຸ ຐເປນ຺ຕິ, ຍຖາ ຈ ສຸຣາໂສຓ຺ຑາທໂຍ ສາຏເກນ ຄີວໍ ປຣິກ຺ຂິປນ຺ຕາ ອຸໂຠ ອນ຺ເຕ ອຸທເຣ ວາ ໂອລມ຺ເພນ຺ຕິ; ປິຏ຺ຐິຍໍ ວາ ຂິປນ຺ຕິ, ຍຖາ ຈ ອນ຺ເຕປຸຣິກາໂຍ ອກ຺ຂິຕາຣກມຕ຺ຕໍ ທສ຺ເສຕ຺ວາ ໂອຄຸຓ຺ຐິກໍ ປາຣຸປນ຺ຕິ, ຍຖາ ຈ ມຫາເຊຏ຺ຐາ ທີຆສາຏກໍ ນິວາເສຕ຺ວາ ຕສ຺ເສວ ເອເກນນ຺ເຕນ ສກລສຣີຣໍ ປາຣຸປນ຺ຕິ, ຍຖາ ຈ ກສ຺ສກາ ເຂຕ຺ຕກຸຏິໍ ປວິສນ຺ຕາ ສາຏກໍ ປລິເວເຐຕ຺ວາ ອຸປກຈ຺ຉເກ ປກ຺ຂິປິຕ຺ວາ ຕສ຺ເສວ ເອເກນນ຺ເຕນ ສຣີຣໍ ປາຣຸປນ຺ຕິ, ຍຖາ ຈ ພ຺ຣາຫ຺ມຓາ ອຸຠິນ຺ນໍ ອຸປກຈ຺ຉການໍ ອນ຺ຕເຣນ ສາຏກໍ ປເວເສຕ຺ວາ ອໍສກູເຏສຸ ປກ຺ຂິປນ຺ຕິ, ຍຖາ ຈ ປາຬິກາຣໂກ ຠິກ຺ຂຸ ເອກໍສປາຣຸປເນນ ປາຣຸຕໍ ວາມພາຫຸໍ ວິວຣິຕ຺ວາ ຈີວຣໍ ອໍສກູຏໍ ອາໂຣເປຕິ; ເອວໍ ອປາຣຸປິຕ຺ວາ ສພ຺ເພປິ ເອເຕ ອຎ຺ເຎ ຈ ເອວຣູເປ ປາຣຸປນໂທເສ ວຊ຺ເຊຕ຺ວາ ນິພ຺ພິກາຣໍ ປຣິມຓ຺ຑລໍ ປາຣຸປິຕພ຺ພໍ. ຕຖາ ອປາຣຸປິຕ຺ວາ ອາຣາເມ ວາ ອນ຺ຕຣຆເຣ ວາ ອນາທເຣນ ຍໍກິຎ຺ຈິ ວິກາຣໍ ກໂຣນ຺ຕສ຺ສ ທຸກ຺ກຏໍ.

໒໘໑. ມຸຓ຺ຑວຏ຺ຏີຕິ ຍຖາ ຣຎ຺ໂຎ ກຸຫິຎ຺ຈິ ຄຈ຺ຉໂຕ ປຣິກ຺ຂາຣຠຓ຺ຑວຫນມນຸສ຺ສາຕິ ອຘິປ຺ປາໂຍ. ອນ຺ຕຣາກາຊນ຺ຕິ ມຊ຺ເຌ ລຄ຺ເຄຕ຺ວາ ທ຺ວີຫິ ວຫິຕພ຺ພຠາຣໍ.

໒໘໒. ອຈກ຺ຂຸສ຺ສນ຺ຕິ ຈກ຺ຂູນໍ ຫິຕໍ ນ ໂຫຕິ; ປຣິຫານິໍ ຊເນຕິ. ນຈ຺ຉາເທຕີຕິ ນ ຣຸຈ຺ຈຕິ. ອຏ຺ຐງ຺ຄຸລປຣມນ຺ຕິ ມນຸສ຺ສານໍ ປມາຓງ຺ຄຸເລນ ອຏ຺ຐງ຺ຄຸລປຣມໍ. ອຕິມຏາຫກນ຺ຕິ ອຕິຂຸທ຺ທກໍ.

໒໘໓. ທາຍໍ ອາລິມ຺ເປນ຺ຕີຕິ ຕິຓວນາທີສຸ ອຄ຺ຄິໍ ເທນ຺ຕິ. ປຏຄ຺ຄິນ຺ຕິ ປຏິອຄ຺ຄິໍ. ປຣິຕ຺ຕນ຺ຕິ ອປ຺ປຫຣິຕກຣເຓນ ວາ ປຣິຂາຂຓເນນ ວາ ປຣິຕ຺ຕາຓໍ. ເອຕ຺ຖ ປນ ອນຸປສມ຺ປນ຺ເນ ສຕິ ສຍໍ ອຄ຺ຄິໍ ທາຕຸໍ ນ ລຠຕິ, ອສຕິ ອຄ຺ຄິມ຺ປິ ທາຕຸໍ ລຠຕິ, ຠູມິໍ ຕຈ຺ເຉຕ຺ວາ ຕິຓານິປິ ຫຣິຕຸໍ, ປຣິຂມ຺ປິ ຂຓິຕຸໍ, ອລ຺ລສາຂໍ ຠຎ຺ຊິຕ຺ວາປິ ອຄ຺ຄິໍ ນິພ຺ພາເປຕຸໍ ລຠຕິ, ເສນາສນໍ ປຕ຺ຕໍ ວາ ອປ຺ປຕ຺ຕໍ ວາ ຕຖາ ນິພ຺ພາເປຕຸໍ ລຠຕິເຍວ. ອຸທເກນ ປນ ກປ຺ປິເຍເນວ ລຠຕິ, ນ ອິຕເຣນ.

໒໘໔. ສຕິ ກຣຓີເຍຕິ ສຸກ຺ຂກຏ຺ຐາທິຄ຺ຄຫຓກິຈ຺ເຈ ສຕິ. ໂປຣິສິຍນ຺ຕິ ປຸຣິສປ຺ປມາຓໍ. ອາປທາສູຕິ ວາຬມິຄາທໂຍ ວາ ທິສ຺ວາ ມຄ຺ຄມູຬ຺ໂຫ ວາ ທິສາ ໂອໂລເກຕຸກາໂມ ຫຸຕ຺ວາ ທວຑາຫໍ ວາ ອຸທໂກຆໍ ວາ ອາຄຈ຺ຉນ຺ຕໍ ທິສ຺ວາ ເອວຣູປາສຸ ອາປທາສຸ ອຕິອຸຈ຺ຈມ຺ປິ ຣຸກ຺ຂໍ ອາໂຣຫິຕຸໍ ວຏ຺ຏຕິ.

໒໘໕. ກລ຺ຍາຓວາກ຺ກຣຓາຕິ ມຘຸຣສທ຺ທາ. ຉນ຺ທໂສ ອາໂຣເປມາຕິ ເວທໍ ວິຍ ສກ຺ກຕຠາສາຍ ວາຈນາມຄ຺ຄໍ ອາໂຣເປມ. ສກາຍ ນິຣຸຕ຺ຕິຍາຕິ ເອຕ຺ຖ ສກາ ນິຣຸຕ຺ຕິ ນາມ ສມ຺ມາສມ຺ພຸທ຺ເຘນ ວຸຕ຺ຕປ຺ປກາໂຣ ມາຄຘິໂກ ໂວຫາໂຣ.

໒໘໖. ໂລກາຍຕໍ ນາມ ສພ຺ພໍ ອຸຈ຺ຉິຏ຺ຐໍ, ສພ຺ພໍ ອນຸຈ຺ຉິຏ຺ຐໍ, ເສໂຕ ກາໂກ, ກາໂຬ ພໂກ; ອິມິນາ ຈ ອິມິນາ ຈ ກາຣເຓນາຕິ ເອວມາທິນິຣຕ຺ຖກກາຣຓປຏິສໍຍຸຕ຺ຕໍ ຕິຕ຺ຖິຍສຕ຺ຖໍ.

໒໘໘. ອນ຺ຕຣາ ອໂຫສີຕິ ອນ຺ຕຣິຕາ ອໂຫສິ ປຏິຈ຺ຉນ຺ນາ.

໒໘໙. ອາພາຘປ຺ປຈ຺ຈຍາຕິ ຍສ຺ສ ອາພາຘສ຺ສ ລສຸຓໍ ເຠສຊ຺ຊໍ; ຕປ຺ປຈ຺ຈຍາຕິ ອຕ຺ໂຖ.

໒໙໐. ປສ຺ສາວປາທຸກນ຺ຕິ ເອຕ຺ຖ ປາທຸກາ ອິຏ຺ຐກາຫິປິ ສິລາຫິປິ ທາຣູຫິປິ ກາຕຸໍ ວຏ຺ຏຕິ. ວຈ຺ຈປາທຸກາຍປິ ເອເສວ ນໂຍ. ປຣິເວຓນ຺ຕິ ວຈ຺ຈກຸຏິປຣິກ຺ເຂປພ຺ຠນ຺ຕຣໍ.

໒໙໓. ຍຖາຘມ຺ໂມ ກາເຣຕພ຺ໂພຕິ ທຸກ຺ກຏວຕ຺ຖຸມ຺ຫິ ທຸກ຺ກເຏນ ປາຈິຕ຺ຕິຍວຕ຺ຖຸມ຺ຫິ ປາຈິຕ຺ຕິເຍນ ກາເຣຕພ຺ໂພ. ປຫຣຓຕ຺ຖໍ ກຕໍ ປຫຣຓີຕິ ວຸຈ຺ຈຕິ, ຍສ຺ສ ກສ຺ສຈິ ອາວຸຘສງ຺ຂາຕສ຺ເສຕໍ ອຘິວຈນໍ, ຕໍ ຐເປຕ຺ວາ ອຎ຺ຎໍ ສພ຺ພໍ ໂລຫຠຓ຺ຑໍ ອນຸຊານາມີຕິ ອຕ຺ໂຖ. ກຕກຎ຺ຈ ກຸມ຺ຠກາຣິກຎ຺ຈາຕິ ເອຕ຺ຖ ກຕກໍ ວຸຕ຺ຕເມວ. ກຸມ຺ຠກາຣິກຎ຺ຈາຕິ ຘນິຍສ຺ເສວ ສພ຺ພມຕ຺ຕິກາມຍກຸຏິ ວຸຈ຺ຈຕິ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ຂຸທ຺ທກວຕ຺ຖຸກຖາ ນິຏ຺ຐິຕາ.

ຂຸທ຺ທກວຕ຺ຖຸກ຺ຂນ຺ຘກວຓ຺ຓນາ ນິຏ຺ຐິຕາ.