໑໑. ປຎ຺ຈສຕິກກ຺ຂນ຺ຘກໍ

ຂຸທ຺ທານຸຂຸທ຺ທກສິກ຺ຂາປທກຖາ

໔໔໑. ປຎ຺ຈສຕິກກ຺ຂນ຺ຘເກ – ຈຕ຺ຕາຣິ ປາຣາຊິການິ ຐເປຕ຺ວາ ອວເສສານິ ຂຸທ຺ທານຸຂຸທ຺ທການີຕິ ເອວມາທິ ເອກສິກ຺ຂາປທມ຺ປິ ອປຣິຈ຺ຈຊິຕ຺ວາ ສພ຺ເພສໍ ສງ຺ຄເຫຕພ຺ພຠາວທສ຺ສນຕ຺ຖໍ ປຣິຍາເຍນ ວຸຕ຺ຕໍ. ອິທໍ ໂວ ສມຓານນ຺ຕິ ອິທໍ ສມຓານໍ. ປທປູຣຓມຕ຺ເຕ ໂວກາໂຣ.

໔໔໓. ອິທມ຺ປິ ເຕ ອາວຸໂສ ອານນ຺ທ ທຸກ຺ກຏນ຺ຕິ ‘‘ອິທໍ ຕຍາ ທຸຏ຺ຐຸ ກຕ’’ນ຺ຕິ ເກວລໍ ຄຣຫນ຺ເຕຫິ ເຖເຣຫິ ວຸຕ຺ຕໍ, ນ ອາປຕ຺ຕິໍ ສນ຺ຘາຍ ວຸຕ຺ຕໍ. ນ ຫິ ເຕ ອາປຕ຺ຕານາປຕ຺ຕິໍ ນ ຊານນ຺ຕິ. ອິທາເນວ ເຈຕໍ ອນຸສ຺ສາວິຕໍ – ‘‘ສງ຺ໂຆ ອປຎ຺ຎຕ຺ຕໍ ນ ປຎ຺ຎເປຕິ, ປຎ຺ຎຕ຺ຕໍ ນ ສມຸຈ຺ຉິນ຺ທຕີ’’ຕິ. ເທເສຫິ ຕໍ ທຸກ຺ກຏນ຺ຕິ ອິທມ຺ປິ ຈ ‘‘ອາມ, ຠນ຺ເຕ, ທຸຏ຺ຐຸ ມຍາ ກຕ’’ນ຺ຕິ ເອວໍ ປຏິຊານາຫິ, ຕໍ ທຸກ຺ກຏນ຺ຕິ ອິທໍ ສນ຺ຘາຍ ວຸຕ຺ຕໍ, ນ ອາປຕ຺ຕິເທສນໍ. ເຖໂຣ ປນ ຍສ຺ມາ ອສຕິຍາ ນ ປຸຈ຺ຉິ ນ ອນາທເຣນ, ຕສ຺ມາ ຕຕ຺ຖ ທຸຏ຺ຐຸກຕຠາວມ຺ປິ ອສລ຺ລກ຺ເຂນ຺ໂຕ ‘‘ນາຫໍ ຕໍ ທຸກ຺ກຏໍ ປສ຺ສາມີ’’ຕິ ວຕ຺ວາ ເຖເຣສຸ ຄາຣວໍ ທສ຺ເສນ຺ໂຕ ‘‘ອປິຈາຍສ຺ມນ຺ຕານໍ ສນ຺ຘາຍ ເທເສມິ ຕໍ ທຸກ຺ກຏ’’ນ຺ຕິ ອາຫ. ຍຖາ ຕຸມ຺ເຫ ວທຖ, ຕຖາ ປຏິຊານາມີຕິ ວຸຕ຺ຕໍ ໂຫຕິ. ເອເສວ ນໂຍ ອວເສເສສຸ ຈຕູສຸ ຐາເນສຸ. ເສສເມຕ຺ຖ ຍໍ ວຕ຺ຕພ຺ພໍ ສິຍາ, ຕໍ ນິທານວຓ຺ຓນາຍເມວ ວຸຕ຺ຕໍ.

ຂຸທ຺ທານຸຂຸທ຺ທກສິກ຺ຂາປທກຖາ ນິຏ຺ຐິຕາ.

ປຎ຺ຈສຕິກກ຺ຂນ຺ຘກວຓ຺ຓນາ ນິຏ຺ຐິຕາ.