໔. ໂມຄ຺ຄລ຺ລານສຸຕ຺ຕວຓ຺ຓນາ

໘໒໖. ຈຕຸຕ຺ເຖ ອຸທ຺ຘຕາຕິ ອຸທ຺ຘຈ຺ຈປກຕິກາ ວິປ຺ຜນ຺ທມານຈິຕ຺ຕາ. ອຸທ຺ຘຈ຺ເຈນ ຫິ ເອກາຣມ຺ມເຓ ຈິຕ຺ຕໍ ວິປ຺ຜນ຺ທຕິ ຘຊຍຏ຺ຐິຍໍ ວາເຕນ ປຫຕຘໂຊ ວິຍ. ອຸນ຺ນຬາຕິ ອຸຄ຺ຄຕນຬາ, ອຸຏ຺ຐິຕຕຸຈ຺ຉມານາຕິ ວຸຕ຺ຕໍ ໂຫຕິ. ຈປລາຕິ ປຕ຺ຕຈີວຣມຓ຺ຑນາທິຈາປລ຺ເລນ ຍຸຕ຺ຕາ. ມຸຂຣາຕິ ມຸຂຂຣາ, ຂຣວຈນາຕິ ວຸຕ຺ຕໍ ໂຫຕິ. ວິກິຓ຺ຓວາຈາຕິ ອສໍຍຕວຈນາ ທິວສມ຺ປິ ນິຣຕ຺ຖກວຈນປ຺ປລາປິໂນ. ມຸຏ຺ຐສ຺ສຕີຕິ ນຏ຺ຐສ຺ສຕິໂນ. ອສມ຺ປຊານາຕິ ປຎ຺ຎາຣຫິຕາ. ອສມາຫິຕາຕິ ອຸປຈາຣປ຺ປນາສມາຘິວິຣຫິຕາ. ຠນ຺ຕຈິຕ຺ຕາຕິ ອຸພ຺ຠນ຺ຕຈິຕ຺ຕາ ສມາຘິວິຣເຫນ ລທ຺ໂຘກາເສນ ອຸທ຺ຘຈ຺ເຈນ. ປາກຕິນ຺ທ຺ຣິຍາຕິ ອສໍວຸຕິນ຺ທ຺ຣິຍາ. ອິທ຺ຘາຠິສງ຺ຂາຣນ຺ຕິ ອາໂປກສິຓໍ ສມາປຊ຺ຊິຕ຺ວາ ວຸຏ຺ຐາຍ ປາສາທປຕິຏ຺ຐິຕໍ ປຖວິຠາຄໍ ‘‘ອຸທກ’’ນ຺ຕິ ອຘິຏ຺ຐາຍ, ອຸທກປິຏ຺ເຐ ຐິຕປາສາທໍ ເວຫາສໍ ອພ຺ຠຸຄ຺ຄນ຺ຕ຺ວາ ອງ຺ຄຸຏ຺ຐເກນ ປຫຣິ. ຄມ຺ຠີຣເນໂມຕິ ຄມ຺ຠີຣອາວາໂຏ, ຄມ຺ຠີຣຠູມິຠາຄໍ ອນຸປວິຏ຺ໂຐຕິ ອຕ຺ໂຖ. ສຸນິຂາໂຕຕິ ສຸຏ຺ຐຸ ນິຂາໂຕ, ໂກຏ຺ເຏຕ຺ວາ ສຸຏ຺ຐຸ ຐປິໂຕ. ອິຘ ອຠິຎ຺ຎາປາທກິທ຺ຘິ ກຖິຕາ.