໑໐. ຠິກ຺ຂຸນຸປສ຺ສຍສຸຕ຺ຕວຓ຺ຓນາ

໓໗໖. ທສເມ ເຕນຸປສງ຺ກມີຕິ ຕສ຺ມິໍ ອຸປສ຺ສເຍ ກມ຺ມຏ຺ຐານກມ຺ມິກາ ຠິກ຺ຂຸນິໂຍ ອຕ຺ຖິ, ຕາສໍ ອຸສ຺ສຸກ຺ກາເປຕ຺ວາ ກມ຺ມຏ຺ຐານໍ ກເຖສ຺ສາມີຕິ ອຸປສງ຺ກມິ. ອຸຬາຣໍ ປຸພ຺ເພນາປຣໍ ວິເສສນ຺ຕິ ປຸພ຺ພວິເສສໂຕ ອປຣໍ ອຸຬາຣວິເສສໍ. ຕຕ຺ຖ ມຫາຠູຕປຣິຄ຺ຄໂຫ ປຸພ຺ພວິເສໂສ, ອຸປາທາຣູປປຣິຄ຺ຄໂຫ ອປຣວິເສໂສ ນາມ. ຕຖາ ສກລຣູປປຣິຄ຺ຄໂຫ ປຸພ຺ພວິເສໂສ, ອຣູປປຣິຄ຺ຄໂຫ ອປຣວິເສໂສ ນາມ. ຣູປາຣູປປຣິຄ຺ຄໂຫ ປຸພ຺ພວິເສໂສ, ປຈ຺ຈຍປຣິຄ຺ຄໂຫ ອປຣວິເສໂສ ນາມ ສປ຺ປຈ຺ຈຍນາມຣູປທສ຺ສນໍ ປຸພ຺ພວິເສໂສ, ຕິລກ຺ຂຓາໂຣປນໍ ອປຣວິເສໂສ ນາມ. ເອວໍ ປຸພ຺ເພນາປຣໍ ອຸຬາຣວິເສສໍ ຊານາຕີຕິ ອຕ຺ໂຖ.

ກາຍາຣມ຺ມໂຓຕິ ຍໍ ກາຍໍ ອນຸປສ຺ສຕິ, ຕເມວ ອາຣມ຺ມຓໍ ກຕ຺ວາ ອຸປ຺ປຊ຺ຊຕິ ກິເລສປຣິຬາໂຫ. ພຫິທ຺ຘາ ວາ ຈິຕ຺ຕໍ ວິກ຺ຂິປຕີຕິ ພຫິທ຺ຘາ ວາ ປຸຖຸຕ຺ຕາຣມ຺ມເຓ ຈິຕ຺ຕຸປ຺ປາໂທ ວິກ຺ຂິປຕິ. ກິສ຺ມິຎ຺ຈິເທວ ປສາທນີເຍ ນິມິຕ຺ເຕ ຈິຕ຺ຕໍ ປຓິທຫິຕພ຺ພນ຺ຕິ ເອວໍ ກິເລສປຣິຬາເຫ ຈ ລີນຕ຺ເຕ ຈ ພຫິທ຺ຘາວິກ຺ເຂເປ ຈ ອຸປ຺ປນ຺ເນ ກິເລສານຸຣຎ຺ຊິເຕນ ນ ວຕ຺ຕິຕພ຺ພໍ, ກິສ຺ມິຎ຺ຈິເທວ ປສາທນີເຍ ປສາທາວເຫ ພຸທ຺ຘາທີສຸ ອຎ຺ຎຕຣສ຺ມິໍ ຐາເນ ກມ຺ມຏ຺ຐານຈິຕ຺ຕໍ ຐເປຕພ຺ພໍ. ຈິຕ຺ຕໍ ສມາຘິຍຕີຕິ ອາຣມ຺ມເຓ ສມ຺ມາ ອາຘິຍຕິ ສຸຏ຺ຐຸ ຐປິຕໍ ຐປິຍຕິ. ປຏິສໍຫຣາມີຕິ ປສາທນີຍຏ຺ຐານໂຕ ປຏິສໍຫຣາມິ, ມູລກມ຺ມຏ຺ຐານາຠິມຸຂໍເຍວ ນໍ ກໂຣມີຕິ ອຕ຺ໂຖ. ໂສ ປຏິສໍຫຣຕິ ເຈວາຕິ ມູລກມ຺ມຏ຺ຐານາຠິມຸຂຎ຺ຈ ເປເສຕິ. ນ ຈ ວິຕກ຺ເກຕິ ນ ຈ ວິຈາເຣຕີຕິ ກິເລສວິຕກ຺ກໍ ນ ວິຕກ຺ເກຕິ, ກິເລສວິຈາຣໍ ນ ວິຈາເຣຕິ. ອວິຕກ຺ໂກມ຺ຫິ ອວິຈາໂຣຕິ ກິເລສວິຕກ຺ກວິຈາເຣຫິ ອວິຕກ຺ກາວິຈາໂຣ. ອຊ຺ຌຕ຺ຕໍ ສຕິມາ ສຸຂມສ຺ມີຕິ ໂຄຈຣຊ຺ຌຕ຺ເຕ ປວຕ຺ຕາຍ ສຕິຍາ ‘‘ສຕິມາຫມສ຺ມິ ສຸຂິໂຕ ຈາ’’ຕິ ປຊານາຕິ.

ເອວໍ ໂຂ, ອານນ຺ທ, ປຓິຘາຍ ຠາວນາ ໂຫຕີຕິ ເອວໍ, ອານນ຺ທ, ຐເປຕ຺ວາ ຠາວນາ ໂຫຕິ. ອິມສ຺ສ ຫິ ຠິກ຺ຂຸໂນ ຍຖາ ນາມ ປຸຣິສສ຺ສ ມຫນ຺ຕໍ ອຸຈ຺ຉຸຠາຣໍ ອຸກ຺ຂິປິຕ຺ວາ ຍນ຺ຕສາລໍ ເນນ຺ຕສ຺ສ ກິລນ຺ຕກິລນ຺ຕກາເລ ຠູມິຍໍ ຐເປຕ຺ວາ ອຸຈ຺ຉຸຂຓ຺ຑໍ ຂາທິຕ຺ວາ ປຸນ ອຸກ຺ຂິປິຕ຺ວາ ຄມນໍ ໂຫຕິ; ເອວເມວ ອຣຫຕ຺ຕໍ ປາປຸຓິຕຸໍ ອຸຄ຺ຄຫິຕກມ຺ມຏ຺ຐານສ຺ສ ກາຍປຣິຬາຫາທີສຸ ອຸປ຺ປນ຺ເນສຸ ຕໍ ກມ຺ມຏ຺ຐານໍ ຐເປຕ຺ວາ ພຸທ຺ຘຄຸຓາທິອນຸສ຺ສຣເຓນ ຈິຕ຺ຕໍ ປສາເທຕ຺ວາ ກມ຺ມນິຍໍ ກຕ຺ວາ ຠາວນາ ປວຕ຺ຕາ, ຕສ຺ມາ ‘‘ປຓິຘາຍ ຠາວນາ ໂຫຕີ’’ຕິ ວຸຕ຺ຕໍ. ຕສ຺ສ ປນ ປຸຣິສສ຺ສ ອຸຈ຺ຉຸຠາຣໍ ຍນ຺ຕສາລໍ ເນຕ຺ວາ ປີເຬຕ຺ວາ ຣສປານໍ ວິຍ ອິມສ຺ສ ຠິກ຺ຂຸໂນ ກມ຺ມຏ຺ຐານໍ ມຕ຺ຖກໍ ປາເປຕ຺ວາ ອຣຫຕ຺ຕໍ ປຕ຺ຕສ຺ສ ຜລສມາປຕ຺ຕິສຸຂານຸຠວນໍ ເວທິຕພ຺ພໍ.

ພຫິທ຺ຘາຕິ ມູລກມ຺ມຏ຺ຐານໍ ປຫາຍ ພຫິ ອຎ຺ຎສ຺ມິໍ ອາຣມ຺ມເຓ. ອປ຺ປຓິຘາຍາຕິ ອຏ຺ຐເປຕ຺ວາ. ອຖ ປຈ຺ຉາ ປຸເຣ ອສໍຂິຕ຺ຕໍ ວິມຸຕ຺ຕໍ ອປ຺ປຓິຫິຕນ຺ຕິ ປຊານາຕີຕິ ເອຕ຺ຖ ກມ຺ມຏ຺ຐານວເສນ ວາ ສຣີຣວເສນ ວາ ເທສນາວເສນ ວາ ອຕ຺ໂຖ ເວທິຕພ຺ໂພ.

ຕຕ຺ຖ ກມ຺ມຏ຺ຐາເນ ຕາວ ກມ຺ມຏ຺ຐານສ຺ສ ອຠິນິເວໂສ ປຸເຣ ນາມ, ອຣຫຕ຺ຕໍ ປຈ຺ຉາ ນາມ. ຕຕ຺ຖ ໂຍ ຠິກ຺ຂຸ ມູລກມ຺ມຏ຺ຐານໍ ຄເຫຕ຺ວາ ກິເລສປຣິຬາຫສ຺ສ ວາ ລີນຕ຺ຕສ຺ສ ວາ ພຫິທ຺ຘາວິກ຺ເຂປສ຺ສ ວາ ອຸປ຺ປຊ຺ຊິຕຸໍ ໂອກາສໍ ອເທນ຺ໂຕ ສຸທນ຺ຕໂຄເຓ ໂຍເຊຕ຺ວາ ສາເຣນ຺ໂຕ ວິຍ ຈຕຸຣສ຺ສຈ຺ຉິທ຺ເທ ສຸຕຈ຺ຉິຕໍ ຈຕຸຣສ຺ສຆຏິກໍ ປກ຺ຂິປນ຺ໂຕ ວິຍ ວິປສ຺ສນໍ ປຏ຺ຐເປຕ຺ວາ ອຕິຏ຺ຐນ຺ໂຕ ອລຄ຺ຄນ຺ໂຕ ອຣຫຕ຺ຕໍ ປາປຸຓາຕິ, ໂສ ປຸເຣສງ຺ຂາຕສ຺ສ ກມ຺ມຏ຺ຐານາຠິນິເວສສ຺ສ ປຈ຺ຉາສງ຺ຂາຕສ຺ສ ອຣຫຕ຺ຕສ຺ສ ຈ ວເສນ ປຈ຺ຉາ ປຸເຣ ອສໍຂິຕ຺ຕໍ ວິມຸຕ຺ຕໍ ອປ຺ປຓິຫິຕນ຺ຕິ ປຊານາຕິ ນາມ.

ສຣີເຣ ປນ ປາທງ຺ຄຸລີນໍ ອຄ຺ຄປພ຺ພານິ ປຸເຣ ນາມ, ສີສກຏາຫໍ ປຈ຺ຉາ ນາມ. ຕຕ຺ຖ ໂຍ ຠິກ຺ຂຸ ປາທງ຺ຄຸລີນໍ ອຄ຺ຄປພ຺ພອຏ຺ຐິເກສຸ ອຠິນິວິສິຕ຺ວາ ພ຺ຍາຠງ຺ຄິຍາ ຍວກລາປໍ ໂມເຈນ຺ໂຕ ວິຍ ວຓ຺ຓສຓ຺ຐານທິໂສກາສປຣິຈ຺ເຉທວເສນ ອຏ຺ຐີນິ ປຣິຄ຺ຄຓ຺ຫນ຺ໂຕ ອນ຺ຕຣາ ກິເລສປຣິຬາຫາທີນໍ ອຸປ຺ປຕ຺ຕິໍ ວາເຣຕ຺ວາ ຍາວ ສີສກຏາຫາ ຠາວນໍ ປາເປຕິ, ໂສ ປຸເຣສງ຺ຂາຕານໍ ອຄ຺ຄປາທງ຺ຄຸລິປພ຺ພານໍ ປຈ຺ຉາສງ຺ຂາຕສ຺ສ ສີສກຏາຫສ຺ສ ຈ ວເສນ ປຈ຺ຉາ ປຸເຣ ອສໍຂິຕ຺ຕໍ ວິມຸຕ຺ຕໍ ອປ຺ປຓິຫິຕນ຺ຕິ ປຊານາຕິ ນາມ.

ເທສນາຍປິ ທ຺ວຕ຺ຕິໍສາກາຣເທສນາຍ ເກສາ ປຸເຣ ນາມ, ມຕ຺ຖລຸງ຺ຄໍ ປຈ຺ຉາ ນາມ. ຕຕ຺ຖ ໂຍ ຠິກ຺ຂຸ ເກເສສຸ ອຠິນິວິສິຕ຺ວາ ວຓ຺ຓສຓ຺ຐານທິໂສກາສວເສນ ເກສາທໂຍ ປຣິຄ຺ຄຓ຺ຫນ຺ໂຕ ອນ຺ຕຣາ ກິເລສປຣິຬາຫາທີນໍ ອຸປ຺ປຕ຺ຕິໍ ວາເຣຕ຺ວາ ຍາວ ມຕ຺ຖລຸງ຺ຄາ ຠາວນໍ ປາເປຕິ. ໂສ ປຸເຣສງ຺ຂາຕານໍ ເກສານໍ ປຈ຺ຉາສງ຺ຂາຕສ຺ສ ມຕ຺ຖລຸງ຺ຄສ຺ສ ຈ ວເສນ ປຈ຺ຉາ ປຸເຣ ອສໍຂິຕ຺ຕໍ ວິມຸຕ຺ຕໍ ອປ຺ປຓິຫິຕນ຺ຕິ ປຊານາຕິ ນາມ.

ເອວໍ ໂຂ, ອານນ຺ທ, ອປ຺ປຓິຘາຍ ຠາວນາ ໂຫຕີຕິ ເອວໍ, ອານນ຺ທ, ອຏ຺ຐເປຕ຺ວາ ຠາວນາ ໂຫຕິ. ອິມສ຺ສ ຫິ ຠິກ຺ຂຸໂນ ຍຖາ ນາມ ປຸຣິສສ຺ສ ຄຸຬຠາຣໍ ລຠິຕ຺ວາ ອຕ຺ຕໂນ ຄາມໍ ອຕິຫຣນ຺ຕສ຺ສ ອນ຺ຕຣາ ອຏ຺ຐເປຕ຺ວາວ ອຸຈ຺ຈງ຺ເຄ ປກ຺ຂິຕ຺ຕານິ ຄຸຬຂຓ຺ຑາທີນິ ຂາທນີຍານິ ຂາທນ຺ຕສ຺ສ ອຕ຺ຕໂນ ຄາເມເຍວ ໂອຕຣຓໍ ໂຫຕິ, ເອວເມວ ອຣຫຕ຺ຕໍ ປາປຸຓິຕຸໍ ອາຣທ຺ຘຠາວນສ຺ສ ກາຍປຣິຬາຫາທີນໍ ອຸປ຺ປຕ຺ຕິໍ ວາເຣຕ຺ວາ ກມ຺ມຏ຺ຐານຠາວນາ ປວຕ຺ຕາ, ຕສ຺ມາ ‘‘ອປ຺ປຓິຘາຍ ຠາວນາ’’ຕິ ວຸຕ຺ຕາ. ຕສ຺ສ ປນ ປຸຣິສສ຺ສ ຕໍ ຄຸຬຠາຣໍ ອຕ຺ຕໂນ ຄາມໍ ເນຕ຺ວາ ຎາຕີຫິ ສທ຺ຘິໍ ປຣິໂຠໂຄ ວິຍ ອິມສ຺ສ ຠິກ຺ຂຸໂນ ກມ຺ມຏ຺ຐານໍ ມຕ຺ຖກໍ ປາເປຕ຺ວາ ອຣຫຕ຺ຕໍ ປຕ຺ຕສ຺ສ ຜລສມາປຕ຺ຕິສຸຂານຸຠວນໍ ເວທິຕພ຺ພໍ. ອິມສ຺ມິໍ ສຸຕ຺ເຕ ປຸພ຺ພຠາຄວິປສ຺ສນາ ກຖິຕາ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ອມ຺ພປາລິວຄ຺ໂຄ ປຐໂມ.