໒. ຄິລານວຄ຺ໂຄ

໑-໓. ປາຓສຸຕ຺ຕາທິວຓ຺ຓນາ

໑໙໒-໑໙໔. ທຸຕິຍວຄ຺ຄສ຺ສ ປຐເມ ຈຕ຺ຕາໂຣ ອິຣິຍາປເຖ ກປ຺ເປນ຺ຕີຕິ ເຍສໍ ຈຕ຺ຕາໂຣ ອິຣິຍາປຖາ ອຕ຺ຖິ, ເຕສໍເຍວ ວເສເນຕໍ ວຸຕ຺ຕໍ. ສີລໍ ນິສ຺ສາຍາຕິ ຈຕຸປາຣິສຸທ຺ຘິສີລໍ ນິສ຺ສຍໍ ກຕ຺ວາ. ສຕ຺ຕ ໂພຊ຺ຌງ຺ເຄຕິ ສຫວິປສ຺ສນເກ ມຄ຺ຄໂພຊ຺ຌງ຺ເຄ. ທຸຕິຍຕຕິຍານິ ອຸຕ຺ຕານຕ຺ຖາເນວ.

໔-໑໐. ປຐມຄິລານສຸຕ຺ຕາທິວຓ຺ຓນາ

໑໙໕-໒໐໑. ຈຕຸຕ຺ເຖ ຕຖາ ປຫີໂນ ຈາຍສ຺ມໂຕ ມຫາກສ຺ສປສ຺ສ ໂສ ອາພາໂຘ ອໂຫສີຕິ ເຖຣສ຺ສ ກິຣ ອິມໍ ໂພຊ຺ຌງ຺ຄຠາວນໍ ສາຘຸກໍ ສຸຓນ຺ຕສ຺ສ ເອຕທໂຫສິ ‘‘ມຍ຺ຫໍ ປພ຺ພຊິຕທິວສໂຕ ສຕ຺ຕເມ ທິວເສ ສຈ຺ຈານິ ປຏິວິຊ຺ຌນ຺ຕສ຺ສ ອິເມ ໂພຊ຺ຌງ຺ຄາ ປາຕຸຠູຕາ’’ຕິ. ອຖສ຺ສ ‘‘ນິຍ຺ຍານິກໍ ວຕ ສຕ຺ຖຸສາສນ’’ນ຺ຕິ ຈິນ຺ຕຍໂຕ ໂລຫິຕໍ ປສີທິ, ອຸປາທາຣູປໍ ວິສຸທ຺ຘໍ ອໂຫສິ, ໂປກ຺ຂຣປຕ຺ເຕ ປຕິຕອຸທກພິນ຺ທຸ ວິຍ ສຣີຣໂຕ ໂຣໂຄ ວິນິວຕ຺ຕິຕ຺ວາ ຄໂຕ. ເຕນ ວຸຕ຺ຕໍ ‘‘ຕຖາ ປຫີໂນ ຈາຍສ຺ມໂຕ ມຫາກສ຺ສປສ຺ສ ໂສ ອາພາໂຘ ອໂຫສີ’’ຕິ. ປຎ຺ຈມຉຏ຺ເຐສຸປິ ເອເສວ ນໂຍ. ອິເມສໍ ປນ ຕິຓ຺ຓມ຺ປິ ຊນານໍ ປພ຺ພຕປາເທ ປຸປ຺ຜິຕວິສຣຸກ຺ຂວາຕສມ຺ຜສ຺ເສນ ອຸປ຺ປນ຺ໂນ ມນ຺ທສີຕຊໂຣ ອາພາໂຘຕິ ເວທິຕພ຺ໂພ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ຄິລານວຄ຺ໂຄ.