໓. ອຸທາຍິວຄ຺ໂຄ

໑-໒. ໂພຘາຍສຸຕ຺ຕາທິວຓ຺ຓນາ

໒໐໒-໒໐໓. ຕຕິຍວຄ຺ຄສ຺ສ ປຐເມ ກິຕ຺ຕາວຕາ ນຸ ໂຂ, ຠນ຺ເຕ, ໂພຊ຺ຌງ຺ຄາຕິ ວຸຈ຺ຈນ຺ຕີຕິ ຠນ຺ເຕ, ກິຕ຺ຕເກນ ນຸ ໂຂ ພຸຊ຺ຌນກອງ຺ຄາ ນາມ ວຸຈ຺ຈນ຺ຕີຕິ ປຸຈ຺ຉຕິ. ໂພຘາຍ ສໍວຕ຺ຕນ຺ຕີຕິ ພຸຊ຺ຌນຕ຺ຖາຍ ສໍວຕ຺ຕນ຺ຕິ. ອິມສ຺ມິໍ ສຸຕ຺ເຕ ມິສ຺ສກໂພຊ຺ຌງ຺ຄາ ກຖິຕາ. ທຸຕິເຍ ຘມ຺ມປຣິຈ຺ເຉໂທ ກຖິໂຕ.

໓-໕. ຐານິຍສຸຕ຺ຕາທິວຓ຺ຓນາ

໒໐໔-໒໐໖. ຕຕິເຍ ກາມຣາຄຏ຺ຐານິຍານນ຺ຕິ ກາມຣາຄສ຺ສ ກາຣຓຠູຕານໍ ອາຣມ຺ມຓຘມ຺ມານໍ. ພ຺ຍາປາທຏ຺ຐານິຍາທີສຸປິ ເອເສວ ນໂຍ. ສກລຎ຺ຫິ ອິທໍ ສຸຕ຺ຕໍ ອາຣມ຺ມເຓເນວ ກຖິຕໍ. ປຐມວຄ຺ຄສ຺ສ ທຸຕິຍສຸຕ຺ເຕ ວຸຕ຺ຕປຣິຈ຺ເຉໂທເປຕ຺ຖ ລພ຺ຠເຕວ. ຈຕຸຕ຺ເຖ ມິສ຺ສກໂພຊ຺ຌງ຺ຄາ ກຖິຕາ. ປຎ຺ຈເມ ອປຣິຫານິເຍ ຘມ຺ເມຕິ ອປຣິຫານິກເຣ ສຠາວຘມ຺ເມ.

໖-໗. ຕຓ຺ຫກ຺ຂຍສຸຕ຺ຕາທິວຓ຺ຓນາ

໒໐໗-໒໐໘. ຉຏ຺ເຐ ເອຕທໂວຈາຕິ ‘‘ອິມິສ຺ສໍ ປຣິສຕິ ນິສິນ຺ໂນ ອຸທາຍິຕ຺ເຖໂຣ ນາມ ອນຸສນ຺ຘິກຸສໂລ ຠິກ຺ຂຸ ອຕ຺ຖິ, ໂສ ມໍ ປຸຈ຺ຉິສ຺ສຕີຕິ ຠຄວຕາ ໂອສາປິຕເທສນໍ ຎຕ຺ວາ ເທສນານຸສນ຺ຘິໍ ຆເຏສ຺ສາມີ’’ຕິ ປຸຈ຺ຉນ຺ໂຕ ເອຕໍ ອໂວຈ. ວິປຸລນ຺ຕິອາທິ ສພ຺ພໍ ສຸຠາວິຕຕ຺ຕໍ ສນ຺ຘາຍ ວຸຕ຺ຕໍ. ສຸຠາວິໂຕ ຫິ ສຕິສມ຺ໂພຊ຺ຌງ຺ໂຄ ວິປຸໂລ ຈ ມຫຄ຺ຄໂຕ ຈ ອປ຺ປມາໂຓ ຈ ອພ຺ຍາປຊ຺ໂຊ ຈ ນາມ ໂຫຕິ. ໂສ ຫິ ປຕ຺ຖຏຕ຺ຕາ ວິປຸໂລ, ມຫນ຺ຕຠາວໍ ຄຕຕ຺ຕາ ມຫຄ຺ຄໂຕ, ວຑ຺ຒິປມາຓຕ຺ຕາ ອປ຺ປມາໂຓ, ນີວຣຓານໍ ທູຣີຠາເວນ ພ຺ຍາປາທຣຫິຕຕ຺ຕາ ອພ຺ຍາປຊ຺ໂຌ ນາມ ໂຫຕິ. ຕຓ຺ຫາຍ ປຫານາ ກມ຺ມໍ ປຫີຍຕີຕິ ຍໍ ຕຓ຺ຫາມູລກໍ ກມ຺ມໍ ອຸປ຺ປຊ຺ເຊຍ຺ຍ, ຕໍ ຕຓ຺ຫາປຫາເນນ ປຫີຍຕິ. ກມ຺ມສ຺ສ ປຫານາ ທຸກ຺ຂນ຺ຕິ ຍມ຺ປິ ກມ຺ມມູລກໍ ວຏ຺ຏທຸກ຺ຂໍ ອຸປ຺ປຊ຺ເຊຍ຺ຍ, ຕໍ ກມ຺ມປຫາເນນ ປຫີຍຕິ. ຕຓ຺ຫກ຺ຂຍາທໂຍ ຕຓ຺ຫາທີນໍເຍວ ຂຍາ, ອຕ຺ຖໂຕ ປເນເຕຫິ ນິພ຺ພານໍ ກຖິຕນ຺ຕິ ເວທິຕພ຺ພໍ. ສຕ຺ຕມໍ ອຸຕ຺ຕານເມວ.

໘. ນິພ຺ເພຘຠາຄິຍສຸຕ຺ຕວຓ຺ຓນາ

໒໐໙. ອຏ຺ຐເມ ນິພ຺ເພຘຠາຄິຍນ຺ຕິ ນິພ຺ພິຊ຺ຌນໂກຏ຺ຐາສິຍໍ. ສຕິສມ຺ໂພຊ຺ຌງ຺ຄໍ ຠາວິເຕນາຕິ ສຕິສມ຺ໂພຊ຺ຌງ຺ເຄນ ຠາວິເຕນ, ສຕິສມ຺ໂພຊ຺ຌງ຺ຄໍ ວາ ຠາເວຕ຺ວາ ຐິເຕນ, ເອວເມຕ຺ຖ ມຄ຺ຄໂພຊ຺ຌງ຺ຄາ ມິສ຺ສກາ. ເຕຫິ ຠາວິຕໍ, ເຕ ວາ ຠາເວຕ຺ວາ ຐິຕໍ ຈິຕ຺ຕໍ ນິພ຺ພຕ຺ຕິຕໂລກຸຕ຺ຕຣເມວ. ຕມ຺ປິ ປນ ມຄ຺ຄນິສ຺ສິຕໍ ກຕ຺ວາ ມິສ຺ສກເມວ ກເຖຕຸໍ ວຏ຺ຏຕິ.

໙. ເອກຘມ຺ມສຸຕ຺ຕວຓ຺ຓນາ

໒໑໐. ນວເມ ສໍໂຍຊນວິນິພນ຺ຘາຕິ ສໍໂຍຊນສງ຺ຂາຕາ ວິນິພນ຺ຘາ. ອຊ຺ໂຌສານາຕິ ປຣິນິຏ຺ຐເປຕ຺ວາ ຄຫຓາ.

໑໐. ອຸທາຍິສຸຕ຺ຕວຓ຺ຓນາ

໒໑໑. ທສເມ ອພຫຸກໂຕຕິ ອກຕພຫຸມາໂນ. ອຸກ຺ກຸຊ຺ຊາວກຸຊ຺ຊນ຺ຕິ ເອຕ຺ຖ ອຸກ຺ກຸຊ຺ຊໍ ວຸຈ຺ຈຕິ ອຸທໂຍ, ອວກຸຊ຺ຊໍ ວໂຍຕິ ອຸທຍພ຺ພຍວເສນ ປຣິວຕ຺ເຕນ຺ໂຕ ສມ຺ມສນ຺ໂຕຕິ ທີເປຕິ. ຘມ຺ໂມ ຈ ເມ, ຠນ຺ເຕ, ອຠິສມິໂຕຕິ ວິປສ຺ສນາຘມ຺ໂມ ອຠິສມາຄໂຕ. ມຄ຺ໂຄຕິ ວິປສ຺ສນາມຄ຺ໂຄວ. ສເຈ ຫິ ເຖໂຣ ຕສ຺ມິໍ ສມເຍ ໂສຕາປນ຺ໂນ, ອຸປຣິ ຕິຓ຺ຓໍ ມຄ຺ຄານໍ ອຕ຺ຖາຍ, ສເຈ ອນາຄາມີ, ອຣຫຕ຺ຕມຄ຺ຄສ຺ສ ອຕ຺ຖາຍ ອຍໍ ວິປສ຺ສນາ ເວທິຕພ຺ພາ. ຕຖາ ຕຖາ ວິຫຣນ຺ຕນ຺ຕິ ເຕນ ເຕນາກາເຣນ ວິຫຣນ຺ຕໍ. ຕຖຕ຺ຕາຍາຕິ ຕຖາຠາວາຍ. ຂີຓາ ຊາຕີຕິອາທີຫິ ຕຖຕ຺ຕາຍາຕິ ອຘິປ຺ເປຕໍ ຕຖາຠາວໍ ທສ຺ເສຕິ. ປຈ຺ຈເວກ຺ຂຓຕ຺ຖາຍ ອຸປນີຍຕີຕິ ຫິ ເອຕ຺ຖ ອຘິປ຺ປາໂຍ, ຕໍ ທສ຺ເສນ຺ໂຕ ເອວມາຫ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ອຸທາຍິວຄ຺ໂຄ.