໖-໗. ກຸຓ຺ຑລິຍສຸຕ຺ຕາທິວຓ຺ຓນາ

໑໘໗-໑໘໘. ຉຏ຺ເຐ ອາຣາມນິສ຺ສຍີຕິ ອາຣາມໍ ນິສ຺ສາຍ ວສນຠາເວນ ອາຣາມນິສ຺ສຍີ. ປຣິສາວຈໂຣຕິ ປຣິສາຍ ອວຈໂຣ. ປຣິສໍ ນາມ ພາລາປິ, ປຓ຺ຑິຕາປິ ໂອສຣນ຺ຕິ, ໂຍ ປນ ປຣປ຺ປວາທໍ ມທ຺ທິຕ຺ວາ ອຕ຺ຕໂນ ວາທໍ ທີເປຕຸໍ ສກ຺ໂກຕິ, ອຍໍ ປຣິສາວຈໂຣ ນາມ. ອາຣາເມນ ອາຣາມນ຺ຕິ ອາຣາເມເນວ ອາຣາມໍ ອນຸຈງ຺ກມາມິ, ນ ພາຫິເຣນາຕິ ອຕ຺ໂຖ. ອຸຍ຺ຍາເນນ ອຸຍ຺ຍານນ຺ຕິ ເອຕ຺ຖາປິ ເອເສວ ນໂຍ. ອຎ຺ເຎນ ວາ ອາຣາເມນ ປວິສິຕ຺ວາ ອຎ຺ຎໍ ອາຣາມໍ, ອຎ຺ເຎນ ອຸຍ຺ຍາເນນ ອຎ຺ຎໍ ອຸຍ຺ຍານນ຺ຕິ ອຍເມຕ຺ຖ ອຕ຺ໂຖ. ອິຕິວາທປ຺ປໂມກ຺ຂານິສໍສນ຺ຕິ ‘‘ເອວໍ ປຸຈ຺ຉາ ໂຫຕິ, ເອວໍ ວິສ຺ສຊ຺ຊນໍ, ເອວໍ ຄຫຓໍ, ເອວໍ ນິພ຺ເພຐນ’’ນ຺ຕິ ອິມິນາ ນເຍນ ອິຕິວາໂທ ໂຫຕິ ອິຕິວາທປ຺ປໂມກ຺ໂຂຕິ ເອຕໍ ອານິສໍສໍ. ອຸປາຣມ຺ຠານິສໍສນ຺ຕິ ‘‘ອຍໍ ປຸຈ຺ຉາຍ ໂທໂສ, ອຍໍ ວິສ຺ສຊ຺ຊເນ’’ຕິ ເອວໍ ວາທໂທສານິສໍສໍ.

ກຖໍ ຠາວິໂຕ ຈ, ກຸຓ຺ຑລິຍ, ອິນ຺ທ຺ຣິຍສໍວໂຣຕິ ສຕ຺ຖາ ‘‘ເອຕ຺ຕກໍ ຐານໍ ປຣິພ຺ພາຊເກນ ປຸຈ຺ຉິຕໍ, ອິທານິ ປຸຈ຺ຉິຕຸໍ ນ ສກ຺ໂກຕີ’’ຕິ ຎຕ຺ວາ ‘‘ນ ຕາວ ອຍໍ ເທສນາ ຍຖານຸສນ຺ຘິໍ ຄຕາ. ອິທານິ ນໍ ຍຖານຸສນ຺ຘິໍ ປາເປສ຺ສາມີ’’ຕິ ສຍເມວ ປຸຈ຺ຉນ຺ໂຕ ອິມໍ ເທສນໍ ອາຣຠິ. ຕຕ຺ຖ ມນາປໍ ນາຠິຊ຺ຌຕີຕິ ອິຏ຺ຐາຣມ຺ມຓໍ ນາຠິຊ຺ຌາຍຕິ. ນາຠິຫໍສຕີຕິ ນ ສາມິສາຍ ຕຸຏ຺ຐິຍາ ອຠິຫໍສຕິ. ຕສ຺ສ ຐິໂຕ ຈ ກາໂຍ ໂຫຕິ, ຐິຕໍ ຈິຕ຺ຕໍ ອຊ຺ຌຕ຺ຕນ຺ຕິ ຕສ຺ສ ນາມກາໂຍ ຈ ຈິຕ຺ຕຎ຺ຈ ໂຄຈຣຊ຺ຌຕ຺ເຕ ຐິຕໍ ໂຫຕິ. ສຸສຓ຺ຐິຕນ຺ຕິ ກມ຺ມຏ຺ຐານວເສນ ສຸຏ຺ຐຸ ສຓ຺ຐິຕໍ. ສຸວິມຸຕ຺ຕນ຺ຕິ ກມ຺ມຏ຺ຐານວິມຸຕ຺ຕິຍາ ສຸວິມຸຕ຺ຕໍ. ອມນາປນ຺ຕິ ອນິຏ຺ຐາຣມ຺ມຓໍ. ນ ມງ຺ກຸ ໂຫຕີຕິ ຕສ຺ມິໍ ນ ມງ຺ກຸ ໂຫຕິ. ອປ຺ປຕິຏ຺ຐິຕຈິຕ຺ໂຕຕິ ກິເລສວເສນ ອຏ຺ຐິຕຈິຕ຺ໂຕ. ອທີນມານໂສຕິ ໂທມນສ຺ສວເສນ ອທີນຈິຕ຺ໂຕ. ອພ຺ຍາປນ຺ນເຈຕໂສຕິ ໂທສວເສນ ອປູຕິຈິຕ຺ໂຕ.

ເອວໍ ຠາວິໂຕ ໂຂ, ກຸຓ຺ຑລິຍ, ອິນ຺ທ຺ຣິຍສໍວໂຣ ເອວໍ ພຫຸລີກໂຕ ຕີຓິ ສຸຈຣິຕານິ ປຣິປູເຣຕີຕິ ເອຕ຺ຖ ເອວໍ ສຸຈຣິຕປູຣຓໍ ເວທິຕພ຺ພໍ – ອິເມສຸ ຕາວ ຉສຸ ທ຺ວາເຣສຸ ອຏ຺ຐາຣສ ທຸຈ຺ຈຣິຕານິ ໂຫນ຺ຕິ. ກຖໍ? ຈກ຺ຂຸທ຺ວາເຣ ຕາວ ອິຏ຺ຐາຣມ຺ມເຓ ອາປາຖຄເຕ ກາຍງ຺ຄວາຈງ຺ຄານິ ອໂຈເປຕ຺ວາ ຕສ຺ມິໍ ອາຣມ຺ມເຓ ໂລຠໍ ອຸປ຺ປາເທນ຺ຕສ຺ສ ມໂນທຸຈ຺ຈຣິຕໍ ໂຫຕິ. ໂລຠສຫຄເຕນ ຈິຕ຺ເຕນ ‘‘ອໂຫ ວຕິທໍ ອິຏ຺ຐໍ ກນ຺ຕໍ ມນາປ’’ນ຺ຕິ ຠຓນ຺ຕສ຺ສ ວຈີທຸຈ຺ຈຣິຕໍ, ຕເທວ ຫຕ຺ເຖນ ປຣາມສນ຺ຕສ຺ສ ກາຍທຸຈ຺ຈຣິຕໍ. ເສສທ຺ວາເຣສຸປິ ເອເສວ ນໂຍ.

ອຍໍ ປນ ວິເສໂສ – ໂສຕທ຺ວາຣສ຺ມິຎ຺ຫິ ສທ຺ທາຣມ຺ມຓສ຺ສ ວຕ຺ຖຸຠູຕໍ ສງ຺ຂປຓວາທິຕູຣິຍຠຓ຺ຑໍ ອນາມາສໍ ອາມສນ຺ຕສ຺ສ, ຆານທ຺ວາເຣ ຄນ຺ຘາຣມ຺ມຓສ຺ສ ວຕ຺ຖຸຠູຕໍ ຄນ຺ຘມາລາທິໍ, ຊິວ຺ຫາທ຺ວາເຣ ຣສາຣມ຺ມຓສ຺ສ ວຕ຺ຖຸຠູຕໍ ມຈ຺ຉມໍສາທິໍ, ກາຍທ຺ວາເຣ ໂຜຏ຺ຐພ຺ພາຣມ຺ມຓສ຺ສ ວຕ຺ຖຸຠູຕໍ ວຕ຺ຖຕູລກປາວາຣາທິໍ, ມໂນທ຺ວາເຣ ປຎ຺ຎຕ຺ຕິວເສນ ຘມ຺ມາຣມ຺ມຓຠູຕໍ ສປ຺ປິເຕລມຘຸຜາຓິຕາທິໍ ອາມສນ຺ຕສ຺ສ ກາຍທຸຈ຺ຈຣິຕໍ ເວທິຕພ຺ພໍ. ສງ຺ເຂປໂຕ ປເນຕ຺ຖ ຉສຸ ທ຺ວາເຣສຸ ກາຍວີຕິກ຺ກໂມ ກາຍທຸຈ຺ຈຣິຕໍ, ວຈີວີຕິກ຺ກໂມ ວຈີທຸຈ຺ຈຣິຕໍ, ມໂນວີຕິກ຺ກໂມ ມໂນທຸຈ຺ຈຣິຕນ຺ຕິ ຕີເຓວ ທຸຈ຺ຈຣິຕານິ ໂຫນ຺ຕິ.

ອຍໍ ປນ ຠິກ຺ຂຸ ອຕ຺ຕໂນ ຠາວນາປຏິສງ຺ຂາເນ ຐິໂຕ ອິມານິ ທຸຈ຺ຈຣິຕານິ ສຸຈຣິຕໍ ກຕ຺ວາ ວິປຣິຓາເມຕິ. ກຖໍ? ຈກ຺ຂຸທ຺ວາເຣ ຕາວ ອິຏ຺ຐາຣມ຺ມເຓ ອາປາຖຄເຕ ກາຍງ຺ຄວາຈງ຺ຄານິ ອຈາເລຕ຺ວາ ຣູປາຣມ຺ມຓໍ ວິປສ຺ສນໍ ປຏ຺ຐາປຍໂຕ ມໂນສຸຈຣິຕໍ ໂຫຕິ, ວິປສ຺ສນາສຫຄເຕນ ຈິຕ຺ເຕນ ຂຍຘມ຺ມໍ ວຍຘມ຺ມນ຺ຕິ ຠຓນ຺ຕສ຺ສ ວຈີສຸຈຣິຕໍ, ‘‘ອນາມາສຠຓ຺ຑໍ ເອຕ’’ນ຺ຕິ ອນາມສນ຺ຕສ຺ສ ກາຍສຸຈຣິຕໍ. ເສສທ຺ວາເຣສຸປິ ເອເສວ ນໂຍ. ເອວໍ ອິມານິ ວິຕ຺ຖາຣໂຕ ອຏ຺ຐາຣສ ສຸຈຣິຕານິ ໂຫນ຺ຕິ. ສງ຺ເຂປໂຕ ປເນຕ຺ຖາປິ ຉສຸ ທ຺ວາເຣສຸ ກາຍສໍວໂຣ ກາຍສຸຈຣິຕໍ, ວຈີສໍວໂຣ ວຈີສຸຈຣິຕໍ, ມໂນສໍວໂຣ ມໂນສຸຈຣິຕນ຺ຕິ ຕີເຓວ ສຸຈຣິຕານິ ໂຫນ຺ຕິ. ເອວໍ ອິນ຺ທ຺ຣິຍສໍວໂຣ ຕີຓິ ສຸຈຣິຕານິ ປຣິປູເຣຕີຕິ ເວທິຕພ຺ໂພ. ເອຕ຺ຕາວຕາ ສີລານຸຣກ຺ຂິຕໍ ອິນ຺ທ຺ຣິຍສໍວຣສີລໍ ກຖິຕໍ.

ກາຍທຸຈ຺ຈຣິຕໍ ປຫາຍາຕິອາທີສຸ ຕິວິຘໍ ກາຍທຸຈ຺ຈຣິຕໍ, ຈຕຸພ຺ພິຘໍ ວຈີທຸຈ຺ຈຣິຕໍ, ຕິວິຘໍ ມໂນທຸຈ຺ຈຣິຕໍ. ຕສ຺ສ ປຏິປກ຺ຂວເສນ ກາຍສຸຈຣິຕາທີນິ ເວທິຕພ຺ພານິ. ເອຕ຺ຕາວຕາ ກາຍສໍວຣວຈີສໍວເຣຫິ ປາຕິໂມກ຺ຂສີລໍ, ມໂນສໍວເຣນ ຕີຓິ ສີລານີຕິ ຈຕຸປາຣິສຸທ຺ຘິສີລໍ ກຖິຕໍ ໂຫຕິ. ສກເລ ປນ ອິມສ຺ມິໍ ສຸຕ຺ເຕ ສຸຈຣິຕມູລກາ ສຕິປຏ຺ຐານາ ໂລກຸຕ຺ຕຣມິສ຺ສກາ, ສຕ຺ຕນ຺ນໍ ໂພຊ຺ຌງ຺ຄານໍ ມູລຠູຕາ ສຕິປຏ຺ຐານາ ປຸພ຺ພຠາຄາ, ເຕປິ ສຕິປຏ຺ຐານມູລກາ ໂພຊ຺ຌງ຺ຄາ ປຸພ຺ພຠາຄາວ. ວິຊ຺ຊາວິມຸຕ຺ຕິມູລກາ ປນ ໂລກຸຕ຺ຕຣາວ ກຖິຕາຕິ ເວທິຕພ຺ພາ. ສຕ຺ຕມໍ ອຸຕ຺ຕານເມວ.