໙. ອສງ຺ຂຕສໍຍຸຕ຺ຕໍ

໑. ປຐມວຄ຺ໂຄ

໑-໑໑. ກາຍຄຕາສຕິສຸຕ຺ຕາທິວຓ຺ຓນາ

໓໖໖-໓໗໖. ອສງ຺ຂຕສໍຍຸຕ຺ເຕ ອສງ຺ຂຕນ຺ຕິ ອກຕໍ. ຫິເຕສິນາຕິ ຫິຕໍ ເອສນ຺ເຕນ. ອນຸກມ຺ປເກນາຕິ ອນຸກມ຺ປມາເນນ. ອນຸກມ຺ປໍ ອຸປາທາຍາຕິ ອນຸກມ຺ປໍ ຈິຕ຺ເຕນ ປຣິຄ຺ຄເຫຕ຺ວາ, ປຏິຈ຺ຈາຕິປິ ວຸຕ຺ຕໍ ໂຫຕິ. ກຕໍ ໂວ ຕໍ ມຍາຕິ ຕໍ ມຍາ ອິມໍ ອສງ຺ຂຕຎ຺ຈ ອສງ຺ຂຕມຄ຺ຄຎ຺ຈ ເທເສນ຺ເຕນ ຕຸມ຺ຫາກໍ ກຕໍ. ເອຕ຺ຕກເມວ ຫິ ອນຸກມ຺ປກສ຺ສ ສຕ຺ຖຸ ກິຈ຺ຈໍ, ຍທິທໍ ອວິປຣີຕຘມ຺ມເທສນາ. ອິໂຕ ປຣໍ ປນ ປຏິປຕ຺ຕິ ນາມ ສາວການໍ ກິຈ຺ຈໍ. ເຕນາຫ ເອຕານິ, ຠິກ຺ຂເວ, ຣຸກ຺ຂມູລານິ…ເປ… ອມ຺ຫາກໍ ອນຸສາສນີຕິ ອິມິນາ ຣຸກ຺ຂມູລເສນາສນໍ ທສ຺ເສຕິ. ສຸຎ຺ຎາຄາຣານີຕິ ອິມິນາ ຊນວິວິຕ຺ຕໍ ຐານໍ. ອຸຠເຍນ ຈ ໂຍຄານຸຣູປໍ ເສນາສນໍ ອາຈິກ຺ຂຕິ, ທາຍຊ຺ຊໍ ນິຍ຺ຍາເຕຕິ.

ຌາຍຖາຕິ ອາຣມ຺ມຓູປນິຊ຺ຌາເນນ ອຏ຺ຐຕິໍສາຣມ຺ມຓານິ, ລກ຺ຂຓູປນິຊ຺ຌາເນນ ຈ ອນິຈ຺ຈາທິໂຕ ຂນ຺ຘາຍຕນາທີນິ ອຸປນິຊ຺ຌາຍຖ, ສມຖຎ຺ຈ ວິປສ຺ສນຎ຺ຈ ວຑ຺ເຒຖາຕິ ວຸຕ຺ຕໍ ໂຫຕິ. ມາ ປມາທຕ຺ຖາຕິ ມາ ປມຊ຺ຊິຕ຺ຖ. ມາ ປຈ຺ຉາ ວິປ຺ປຏິສາຣິໂນ ອຫຸວຕ຺ຖາຕິ ເຍ ຫິ ປຸພ຺ເພ ທຫຣກາເລ ອໂຣຄກາເລ ສຕ຺ຕສປ຺ປາຍາທິສມ຺ປຕ຺ຕິກາເລ ສຕ຺ຖຸ ສມ຺ມຸຂີຠາວກາເລ ຈ ໂຍນິໂສມນສິກາຣຣຫິຕາ ຣຕ຺ຕິນ຺ທິວໍ ມງ຺ກຸລຠຕ຺ຕໍ ຫຸຕ຺ວາ ເສຍ຺ຍສຸຂໍ ມິທ຺ຘສຸຂໍ ອນຸໂຠນ຺ຕາ ປມຊ຺ຊນ຺ຕິ, ເຕ ປຈ຺ຉາ ຊຣາກາເລ ໂຣຄກາເລ ມຣຓກາເລ ວິປຕ຺ຕິກາເລ ສຕ຺ຖຸ ປຣິນິພ຺ພຸຕກາເລ ຈ ຕໍ ປຸພ຺ເພ ປມາທວິຫາຣໍ ອນຸສ຺ສຣນ຺ຕາ ສປ຺ປຏິສນ຺ຘິກາລກິຣິຍຎ຺ຈ ຠາຣິຍໍ ສມ຺ປສ຺ສມານາ ວິປ຺ປຏິສາຣິໂນ ໂຫນ຺ຕິ. ຕຸມ຺ເຫ ປນ ຕາທິສາ ມາ ອຫຸວຕ຺ຖາຕິ ທສ຺ເສນ຺ໂຕ ອາຫ ‘‘ມາ ປຈ຺ຉາ ວິປ຺ປຏິສາຣິໂນ ອຫຸວຕ຺ຖາ’’ຕິ.

ອຍໍ ໂວ ອມ຺ຫາກໍ ອນຸສາສນີຕິ ອຍໍ ອມ຺ຫາກໍ ສນ຺ຕິກາ ‘‘ຌາຍຖ ມາ ປມາທຕ຺ຖາ’’ຕິ ຕຸມ຺ຫາກໍ ອນຸສາສນີ, ໂອວາໂທຕິ ວຸຕ຺ຕໍ ໂຫຕິ.

໒. ທຸຕິຍວຄ຺ໂຄ

໑-໓໓. ອສງ຺ຂຕສຸຕ຺ຕາທິວຓ຺ຓນາ

໓໗໗-໔໐໙. ກາເຍ ກາຍານຸປສ຺ສີຕິອາທີສຸ ຍໍ ວຕ຺ຕພ຺ພໍ, ຕໍ ປຣໂຕ ວກ຺ຂາມ.

ອນຕນ຺ຕິອາທີສຸ ຕຓ຺ຫານຕິຍາ ອຠາເວນ ອນຕໍ. ຈຕຸນ຺ນໍ ອາສວານໍ ອຠາເວນ ອນາສວໍ. ປຣມຕ຺ຖສຈ຺ຈຕາຍ ສຈ຺ຈໍ. ວຏ຺ຏສ຺ສ ປຣຠາຄຏ຺ເຐນ ປາຣໍ. ສຓ຺ຫຏ຺ເຐນ ນິປຸຓໍ. ສຸຏ຺ຐຸ ທຸທ຺ທສຕາຍ ສຸທຸທ຺ທສໍ. ຊຣາຍ ອຊຣິຕຕ຺ຕາ ອຊຊ຺ຊຣໍ. ຖິຣຏ຺ເຐນ ຘຸວໍ. ອປລຸຊ຺ຊນຕາຍ ອປໂລກິຕໍ. ຈກ຺ຂຸວິຎ຺ຎາເຓນ ອປສ຺ສິຕພ຺ພຕ຺ຕາ ອນິທສ຺ສນໍ. ຕຓ຺ຫາມານທິຏ຺ຐິປປຎ຺ຈານໍ ອຠາເວນ ນິປ຺ປປຎ຺ຈໍ.

ສນ຺ຕຠາວຏ຺ເຐນ ສນ຺ຕໍ. ມຣຓາຠາເວນ ອມຕໍ. ອຸຕ຺ຕມຏ຺ເຐນ ປຓີຕໍ. ສສ຺ສິຣິກຏ຺ເຐນ ສິວໍ. ນິຣຸປທ຺ທວຕາຍ ເຂມໍ. ຕຓ຺ຫາກ຺ຂຍສ຺ສ ປຈ຺ຈຍຕ຺ຕາ ຕຓ຺ຫກ຺ຂຍໍ.

ວິມ຺ຫາປນີຍຏ຺ເຐນ ອຈ຺ຉຣໍ ປຫຣິຕພ຺ພຍຸຕ຺ຕກນ຺ຕິ ອຈ຺ຉຣິຍໍ. ອຠູຕເມວ ຠູຕໍ ອຊາຕໍ ຫຸຕ຺ວາ ອຕ຺ຖີຕິ ວາ ອພ຺ຠຸຕໍ. ນິທ຺ທຸກ຺ຂຕ຺ຕາ ອນີຕິກໍ. ນິທ຺ທຸກ຺ຂສຠາວຕ຺ຕາ ອນີຕິກຘມ຺ມໍ. ວານາຠາເວນ ນິພ຺ພານໍ. ພ຺ຍາພຊ຺ຌາຠາເວເນວ ອພ຺ຍາພຊ຺ຌໍ. ວິຣາຄາຘິຄມສ຺ສ ປຈ຺ຈຍໂຕ ວິຣາຄໍ. ປຣມຕ຺ຖສຸທ຺ຘິຕາຍ ສຸທ຺ຘິ. ຕີຫິ ຠເວຫິ ມຸຕ຺ຕຕາຍ ມຸຕ຺ຕິ. ກາມາລຍານໍ ອຠາເວນ ອນາລຍໍ. ປຕິຏ຺ຐຏ຺ເຐນ ທີປໍ. ອລ຺ລີຍິຕພ຺ພຍຸຕ຺ຕຏ຺ເຐນ ເລຓໍ. ຕາຍນຏ຺ເຐນ ຕາຓໍ. ຠຍສຣຓຏ຺ເຐນ ສຣຓໍ, ຠຍນາສນນ຺ຕິ ອຕ຺ໂຖ. ປຣໍ ອຍນໍ ຄຕິ ປຕິຏ຺ຐາຕິ ປຣາຍຓໍ. ເສສເມຕ຺ຖ ວຸຕ຺ຕນຍເມວາຕິ.

ອສງ຺ຂຕສໍຍຸຕ຺ຕວຓ຺ຓນາ ນິຏ຺ຐິຕາ.