໑໐. ອພ຺ຍາກຕສໍຍຸຕ຺ຕໍ

໑. ເຂມາສຸຕ຺ຕວຓ຺ຓນາ

໔໑໐. ອພ຺ຍາກຕສໍຍຸຕ຺ຕສ຺ສ ປຐເມ ເຂມາຕິ ຄິຫິກາເລ ພິມ຺ພິສາຣສ຺ສ ອຸປາສິກາ ສທ຺ຘາປພ຺ພຊິຕາ ມຫາເຖຣີ ‘‘ເອຕທຄ຺ຄໍ, ຠິກ຺ຂເວ, ມມ ສາວິການໍ ຠິກ຺ຂຸນີນໍ ມຫາປຎ຺ຎານໍ ຍທິທໍ ເຂມາ’’ຕິ ເອວໍ ຠຄວຕາ ມຫາປຎ຺ຎຕາຍ ເອຕທຄ຺ເຄ ຐປິຕາ. ປຓ຺ຑິຕາຕິ ປຓ຺ຑິຈ຺ເຈນ ສມນ຺ນາຄຕາ. ວິຍຕ຺ຕາຕິ ເວຍ຺ຍຕ຺ຕິເຍນ ສມນ຺ນາຄຕາ. ເມຘາວິນີຕິ ເມຘາຍ ປຎ຺ຎາຍ ສມນ຺ນາຄຕາ. ພຫຸສ຺ສຸຕາຕິ ປຣິຍຕ຺ຕິພາຫຸສຈ຺ເຈນປິ ປຏິເວຘພາຫຸສຈ຺ເຈນປິ ສມນ຺ນາຄຕາ.

ຄຓໂກຕິ ອຈ຺ຉິທ຺ທກຄຓນາຍ ກຸສໂລ. ມຸທ຺ທິໂກຕິ ອງ຺ຄຸລິມຸທ຺ທາຍ ຄຓນາຍ ກຸສໂລ. ສງ຺ຂາຍໂກຕິ ປິຓ຺ຑຄຓນາຍ ກຸສໂລ. ຄມ຺ຠີໂຣຕິ ຈຕຸຣາສີຕິໂຍຊນສຫສ຺ສຄມ຺ຠີໂຣ. ອປ຺ປເມຍ຺ໂຍຕິ ອາຬ຺ຫກຄຓນາຍ ອປ຺ປເມຍ຺ໂຍ. ທຸປ຺ປຣິໂຍຄາໂຫຕິ ອາຬ຺ຫກຄຓນາຍ ປມາຓຄຫຓຕ຺ຖໍ ທຸໂຣຄາໂຫ. ເຍນ ຣູເປນ ຕຖາຄຕນ຺ຕິ ເຍນ ຣູເປນ ທີໂຆ ຣສ຺ໂສ ສາໂມ ໂອທາໂຕຕິ ສຕ຺ຕສງ຺ຂາຕໍ ຕຖາຄຕໍ ປຎ຺ຎເປຍ຺ຍ. ຕໍ ຣູປໍ ຕຖາຄຕສ຺ສ ປຫີນນ຺ຕິ ຕໍ ວຸຕ຺ຕປ຺ປກາຣຣູປໍ ສມຸທຍປ຺ປຫາເນນ ສພ຺ພຎ຺ຎຸຕຖາຄຕສ຺ສ ປຫີນໍ. ຣູປສງ຺ຂາຍ ວິມຸຕ຺ໂຕຕິ ອາຍຕິໍ ຣູປສ຺ສ ອນຸປ຺ປຕ຺ຕິຍາ ຣູປາຣູປໂກຏ຺ຐາເສນປິ ເອວຣູໂປ ນາມ ຠວິສ຺ສຕີຕິ ໂວຫາຣສ຺ສປິ ປຏິປສ຺ສທ຺ຘຕ຺ຕາ ຣູປປຓ຺ຓຕ຺ຕິຍາປິ ວິມຸຕ຺ໂຕ. ຄມ຺ຠີໂຣຕິ ອຊ຺ຌາສຍ ຄມ຺ຠີຣຕາຍ ຈ ຄຸຓຄມ຺ຠີຣຕາຍ ຈ ຄມ຺ຠີໂຣ. ຕສ຺ສ ເອວໍ ຄຸຓຄມ຺ຠີຣສ຺ສ ສໂຕ ສພ຺ພຎ຺ຎຸຕຖາຄຕສ຺ສ ຍໍ ອຸປາທາຍ ສຕ຺ຕສງ຺ຂາໂຕ ຕຖາຄໂຕຕິ ປຎ຺ຎຕ຺ຕິ ໂຫຕິ, ຕທຠາເວນ ຕສ຺ສາ ປຎ຺ຎຕ຺ຕິຍາ ອຠາວໍ ປສ຺ສນ຺ຕສ຺ສ ອຍໍ ສຕ຺ຕສງ຺ຂາໂຕ ໂຫຕິ ຕຖາຄໂຕ ປຣໍ ມຣຓາຕິ ອິທໍ ວຈນໍ ນ ອຸເປຕິ ນ ຍຸຊ຺ຊຕິ, ນ ໂຫຕິ ຕຖາຄໂຕ ປຣໍ ມຣຓາຕິອາທິວຈນມ຺ປິ ນ ອຸເປຕິ ນ ຍຸຊ຺ຊຕີຕິ ອຕ຺ໂຖ.

ສໍສນ຺ທິສ຺ສຕີຕິ ເອກໍ ຠວິສ຺ສຕິ. ສເມສ຺ສຕີຕິ ນິຣນ຺ຕຣໍ ຠວິສ຺ສຕິ. ນ ວິໂຣຘຍິສ຺ສຕີຕິ ນ ວິຣຸທ຺ຘໍ ປທໍ ຠວິສ຺ສຕິ. ອຄ຺ຄປທສ຺ມິນ຺ຕິ ເທສນາຍ. ເທສນາ ຫິ ອິຘ ອຄ຺ຄປທນ຺ຕິ ອຘິປ຺ເປຕາ.

໒. ອນຸຣາຘສຸຕ຺ຕວຓ຺ຓນາ

໔໑໑. ທຸຕິຍໍ ຂນ຺ຘິຍວຄ຺ເຄ ວິຕ຺ຖາຣິຕເມວ, ອພ຺ຍາກຕາຘິກາຣໂຕ ປນ ອິຘ ວຸຕ຺ຕໍ.

໓-໘. ປຐມສາຣິປຸຕ຺ຕໂກຏ຺ຐິກສຸຕ຺ຕາທິວຓ຺ຓນາ

໔໑໒-໔໑໗. ຕຕິເຍ ຣູປຄຕເມຕນ຺ຕິ ຣູປມຕ຺ຕເມຕໍ. ເອຕ຺ຖ ຣູປໂຕ ອຎ຺ໂຎ ໂກຈິ ສຕ຺ໂຕ ນາມ ນ ອຸປລພ຺ຠຕິ, ຣູເປ ປນ ສຕິ ນາມມຕ຺ຕໍ ເອຕໍ ໂຫຕີຕິ ທສ຺ເສຕິ. ເວທນາຄຕເມຕນ຺ຕິອາທີສຸປິ ເອເສວ ນໂຍ. ອຍໍ ໂຂ ອາວຸໂສ ເຫຕູຕິ ອຍໍ ຣູປາທີນິ ມຸຎ຺ຈິຕ຺ວາ ອນຸປລພ຺ຠິຍສຠາໂວ ເຫຕຸ, ເຍເນຕໍ ອພ຺ຍາກຕໍ ຠຄວຕາຕິ. ຈຕຸຕ຺ຖາທີນິ ອຸຕ຺ຕານຕ຺ຖາເນວ.

໙. ກຸຕູຫລສາລາສຸຕ຺ຕວຓ຺ຓນາ

໔໑໘. ນວເມ ກຸຕູຫລສາລາຍນ຺ຕິ ກຸຕູຫລສາລາ ນາມ ປຈ຺ເຈກສາລາ ນຕ຺ຖິ, ຍຕ຺ຖ ປນ ນານາຕິຕ຺ຖິຍາ ສມຓພ຺ຣາຫ຺ມຓາ ນານາວິຘໍ ກຖໍ ປວຕ຺ເຕນ຺ຕິ, ສາ ພຫູນໍ ‘‘ອຍໍ ກິໍ ວທຕິ, ອຍໍ ກິໍ ວທຕີ’’ຕິ ກຸຕູຫລຸປ຺ປວຕ຺ຕິຏ຺ຐານໂຕ ກຸຕູຫລສາລາຕິ ວຸຈ຺ຈຕິ. ທູຣມ຺ປິ ຄຈ຺ຉຕີຕິ ຍາວ ອາຠສ຺ສຣພ຺ຣຫ຺ມໂລກາ ຄຈ຺ຉຕິ. ອິມຎ຺ຈ ກາຍໍ ນິກ຺ຂິປຕີຕິ ຈຸຕິຈິຕ຺ເຕນ ນິກ຺ຂິປຕິ. ອນຸປປນ຺ໂນ ໂຫຕີຕິ ຈຸຕິກ຺ຂເຓເຍວ ປຏິສນ຺ຘິຈິຕ຺ຕສ຺ສ ອນຸປ຺ປນ຺ນຕ຺ຕາ ອນຸປປນ຺ໂນ ໂຫຕິ.

໑໐. ອານນ຺ທສຸຕ຺ຕວຓ຺ຓນາ

໔໑໙. ທສເມ ເຕສເມຕໍ ສທ຺ຘິໍ ອຠວິສ຺ສາຕິ ເຕສໍ ລທ຺ຘິຍາ ສທ຺ຘິໍ ເອຕໍ ອຠວິສ຺ສ. ອນຸໂລມໍ ອຠວິສ຺ສ ຎາຓສ຺ສ ອຸປ຺ປາທາຍ ສພ຺ເພ ຘມ຺ມາ ອນຕ຺ຕາຕິ ຍໍ ເອຕໍ ‘‘ສພ຺ເພ ຘມ຺ມາ ອນຕ຺ຕາ’’ຕິ ວິປສ຺ສນາຎາຓໍ ອຸປ຺ປຊ຺ຊຕິ, ອປິ ນຸ ເມ ຕສ຺ສ ອນຸໂລມໍ ອຠວິສ຺ສາຕິ ອຕ຺ໂຖ.

໑໑. ສຠິຍກຈ຺ຈານສຸຕ຺ຕວຓ຺ຓນາ

໔໒໐. ເອກາທສເມ ເອຕເມຕ຺ຕເກນ ເອຕ຺ຕກເມວາຕິ ອາວຸໂສ ຍສ຺ສາປິ ເອຕໍ ເອຕ຺ຕເກນ ກາເລນ ‘‘ເຫຕຸມ຺ຫິ ສຕິ ຣູປີຕິອາທິ ປຎ຺ຎາປນາ ໂຫຕິ, ອສຕິ ນ ໂຫຕີ’’ຕິ ພ຺ຍາກຣຓໍ ຠເວຍ຺ຍ, ຕສ຺ສ ເອຕ຺ຕກເມວ ພຫຸ. ໂກ ປນ ວາໂທ ອຕິກ຺ກນ຺ເຕຕິ ອຕິກ຺ກນ຺ເຕ ປນ ອຕິມນາເປ ຘມ຺ມເທສນານເຍ ວາໂທເຍວ ໂກ, ນຕ຺ຖິ ວາໂທ, ຉິນ຺ນາ ກຖາຕິ.

ອພ຺ຍາກຕສໍຍຸຕ຺ຕວຓ຺ຓນາ ນິຏ຺ຐິຕາ.