໒. ປຐມອິສິທຕ຺ຕສຸຕ຺ຕວຓ຺ຓນາ

໓໔໔. ທຸຕິເຍ ອາຍສ຺ມນ຺ຕໍ ເຖຣນ຺ຕິ ເຕສຸ ເຖເຣສຸ ເຊຏ຺ຐກໍ ມຫາເຖຣໍ. ຕຸຓ຺ຫີ ອໂຫສີຕິ ຊານນ຺ໂຕປິ ອວິສາຣທຕ຺ຕາ ນ ກິຎ຺ຈິ ພ຺ຍາຫຣິ. ພ຺ຍາກໂຣມຫໍ ຠນ຺ເຕຕິ ‘‘ອຍໍ ເຖໂຣ ເນວ ອຕ຺ຕນາ ພ຺ຍາກໂຣຕິ, ນ ອຎ຺ເຎ ອຊ຺ເຌສຕິ, ອຸປາສໂກປິ ຠິກ຺ຂຸສງ຺ຆໍ ວິເຫເສຕິ, ອຫເມຕໍ ພ຺ຍາກຣິຕ຺ວາ ຜາສຸວິຫາຣໍ ກຕ຺ວາ ທສ຺ສາມີ’’ຕິ ຈິນ຺ເຕຕ຺ວາ ອາສນໂຕ ວຸຏ຺ຐາຍ ເຖຣສ຺ສ ສນ຺ຕິກໍ ຄນ຺ຕ຺ວາ ເອວໍ ໂອກາສມກາສິ, ກຕາວກາໂສ ປນ ອຕ຺ຕໂນ ອາສເນ ນິສີທິຕ຺ວາ ພ຺ຍາກາສິ.

ສຫຕ຺ຖາຕິ ສຫຕ຺ເຖນ. ສນ຺ຕປ຺ເປສີຕິ ຍາວທິຈ຺ຉກໍ ເທນ຺ໂຕ ສຸຏ຺ຐຸ ຕປ຺ເປສິ. ສມ຺ປວາເຣສີຕິ ‘‘ອລໍ ອລ’’ນ຺ຕິ ຫຕ຺ຖສຎ຺ຎາຍ ເຈວ ວາຈາຍ ຈ ປຏິກ຺ຂິປາເປສິ. ໂອນີຕປຕ຺ຕປາຓິໂນຕິ ປາຓິໂຕ ອປນີຕປຕ຺ຕາ ໂຘວິຕ຺ວາ ຖວິກາຍ ໂອສາເປຕ຺ວາ ອໍເສ ລຄ຺ຄິຕປຕ຺ຕາຕິ ອຕ຺ໂຖ.