໖. ໂມຄ຺ຄລ຺ລານສໍຍຸຕ຺ຕໍ

໑-໘. ປຐມຌານປຎ຺ຫາສຸຕ຺ຕາທິວຓ຺ຓນາ

໓໓໒-໓໓໙. ໂມຄ຺ຄລ຺ລານສໍຍຸຕ຺ເຕ ກາມສຫຄຕາຕິ ປຎ຺ຈນີວຣຓສຫຄຕາ. ຕສ຺ສ ຫິ ປຐມຊ຺ຌານວຸຏ຺ຐິຕສ຺ສ ປຎ຺ຈ ນີວຣຓານິ ສນ຺ຕໂຕ ອຸປຏ຺ຐຫິໍສຸ. ເຕນສ຺ສ ຕໍ ປຐມຊ຺ຌານໍ ຫານຠາຄິຍໍ ນາມ ອໂຫສິ. ຕໍ ປມາທໍ ຎຕ຺ວາ ສຕ຺ຖາ ‘‘ມາ ປມາໂທ’’ຕິ ໂອວາທໍ ອທາສິ. ທຸຕິຍຊ຺ຌານາທີສຸປິ ອິມິນາວ ນເຍນ ອຕ຺ໂຖ ເວທິຕພ຺ໂພ. ອາຣມ຺ມຓສຫຄຕເມວ ເຫຕ຺ຖ ‘‘ສຫຄຕ’’ນ຺ຕິ ວຸຕ຺ຕໍ.

໙. ອນິມິຕ຺ຕປຎ຺ຫາສຸຕ຺ຕວຓ຺ຓນາ

໓໔໐. ອນິມິຕ຺ຕໍ ເຈໂຕສມາຘິນ຺ຕິ ນິຈ຺ຈນິມິຕ຺ຕາທີນິ ປຫາຍ ປວຕ຺ຕໍ ວິປສ຺ສນາສມາຘິໍເຍວ ສນ຺ຘາເຍຕໍ ວຸຕ຺ຕນ຺ຕິ. ນິມິຕ຺ຕານຸສາຣິ ວິຎ຺ຎາຓໍ ໂຫຕີຕິ ເອວໍ ອິມິນາ ວິປສ຺ສນາສມາຘິວິຫາເຣນ ວິຫຣໂຕ ວິປສ຺ສນາຎາເຓ ຕິກ຺ເຂ ສູເຣ ວຫມາເນ. ຍຖາ ນາມ ປຸຣິສສ຺ສ ຕິຂິເຓນ ຜຣສຸນາ ຣຸກ຺ຂໍ ຉິນ຺ທນ຺ຕສ຺ສ ‘‘ສຸຏ຺ຐຸ ວຕ ເມ ຜຣສຸ ວຫຕີ’’ຕິ ຂເຓ ຂເຓ ຜຣສຸຘາຣໍ ໂອໂລເກນ຺ຕສ຺ສ ເຉຊ຺ຊກິຈ຺ຈໍ ນ ນິປ຺ຜຊ຺ຊຕິ, ເອວໍ ເຖຣສ຺ສາປິ ‘‘ສູຣໍ ວຕ ເມ ຫຸຕ຺ວາ ຎາຓໍ ວຫຕີ’’ຕິ ວິປສ຺ສນໍ ອາຣພ຺ຠ ນິກນ຺ຕິ ອຸປ຺ປຊ຺ຊຕິ. ອຖ ວິປສ຺ສນາກິຈ຺ຈໍ ສາເຘຕຸໍ ນາສກ຺ຂິ. ຕໍ ສນ຺ຘາຍ ວຸຕ຺ຕໍ ‘‘ນິມິຕ຺ຕານຸສາຣິ ວິຎ຺ຎາຓໍ ໂຫຕີ’’ຕິ. ສພ຺ພນິມິຕ຺ຕານໍ ອມນສິກາຣາ ອນິມິຕ຺ຕໍ ເຈໂຕສມາຘິໍ ອຸປສມ຺ປຊ຺ຊ ວິຫາສິນ຺ຕິ ສພ຺ເພສໍ ນິຈ຺ຈສຸຂອຕ຺ຕນິມິຕ຺ຕານໍ ອມນສິກາເຣນ ອນິມິຕ຺ຕໍ ວຸຏ຺ຐານຄາມິນິວິປສ຺ສນາສມ຺ປຍຸຕ຺ຕໍ ເຈໂຕສມາຘິໍ ນິພ຺ພານາຣມ຺ມຓໍ ອຸປຣິມຄ຺ຄຜລສມາຘິໍ ອຸປສມ຺ປຊ຺ຊ ວິຫາສິໍ.

໑໐-໑໑. ສກ຺ກສຸຕ຺ຕາທິວຓ຺ຓນາ

໓໔໑-໓໔໒. ອເວຈ຺ຈປ຺ປສາເທນາຕິ ອຈລປ຺ປສາເທນ. ທສຫິ ຐາເນຫີຕິ ທສຫິ ກາຣເຓຫິ. ອຘິຄຓ຺ຫນ຺ຕີຕິ ອຠິຠວນ຺ຕິ, ອຕິກ຺ກມິຕ຺ວາ ຕິຏ຺ຐນ຺ຕິ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ໂມຄ຺ຄລ຺ລານສໍຍຸຕ຺ຕວຓ຺ຓນາ ນິຏ຺ຐິຕາ.