໙-໑໐. ປຐມທ຺ວຍສຸຕ຺ຕາທິວຓ຺ຓນາ

໙໒-໙໓. ນວເມ ທ຺ວຍນ຺ຕິ ທ຺ເວ ທ຺ເວ ໂກຏ຺ຐາເສ. ທສເມ ອິຕ຺ເຖຕໍ ທ຺ວຍນ຺ຕິ ເອວເມຕໍ ທ຺ວຍໍ. ຈລຎ຺ເຈວ ພ຺ຍຖຎ຺ຈາຕິ ອຕ຺ຕໂນ ສຠາເວນ ອສຓ຺ຐຫນໂຕ ຈລຕິ ເຈວ ພ຺ຍຖຕິ ຈ. ໂຍປິ ເຫຕຸ ໂຍປິ ປຈ຺ຈໂຍຕິ ຈກ຺ຂຸວິຎ຺ຎາຓສ຺ສ ວຕ຺ຖາຣມ຺ມຓໍ ເຫຕຸ ເຈວ ປຈ຺ຈໂຍ ຈ. ກຸໂຕ ນິຈ຺ຈໍ ຠວິສ຺ສຕີຕິ ເກນ ກາຣເຓນ ນິຈ຺ຈໍ ຠວິສ຺ສຕິ. ຍຖາ ປນ ທາສສ຺ສ ທາສິຍາ ກຸຈ຺ຉິສ຺ມິໍ ຊາໂຕ ປຸຕ຺ໂຕ ປໂຣວ ທາໂສ ໂຫຕິ, ເອວໍ ອນິຈ຺ຈເມວ ໂຫຕີຕິ ອຕ຺ໂຖ. ສງ຺ຄຕີຕິ ສຫຄຕິ. ສນ຺ນິປາໂຕຕິ ເອກໂຕ ສນ຺ນິປຕນໍ. ສມວາໂຍຕິ ເອກໂຕ ສມາຄໂມ. ອຍໍ ວຸຈ຺ຈຕິ ຈກ຺ຂຸສມ຺ຜສ຺ໂສຕິ ອິມິນາ ສງ຺ຄຕິສນ຺ນິປາຕສມວາຍສງ຺ຂາເຕນ ປຈ຺ຈເຍນ ອຸປ຺ປນ຺ນຕ຺ຕາ ປຈ຺ຈຍນາເມເນວ ສງ຺ຄຕິ ສນ຺ນິປາໂຕ ສມວາໂຍຕິ ອຍໍ ວຸຈ຺ຈຕິ ຈກ຺ຂຸສມ຺ຜສ຺ໂສ.

ໂສປິ ເຫຕູຕິ ຜສ຺ສສ຺ສ ວຕ຺ຖຸ ອາຣມ຺ມຓໍ ສຫຊາຕາ ຕໂຍ ຂນ຺ຘາຕິ ອຍໍ ເຫຕຸ. ຜຸຏ຺ໂຐຕິ ອຸປໂຍຄຕ຺ເຖ ປຈ຺ຈຕ຺ຕໍ, ຜສ຺ເສນ ຜຸຏ຺ຐເມວ ໂຄຈຣໍ ເວທນາ ເວເທຕິ, ເຈຕນາ ເຈເຕຕິ, ສຎ຺ຎາ ສຎ຺ຊານາຕີຕິ ອຕ຺ໂຖ. ຜຸຏ຺ໂຐຕິ ວາ ຜສ຺ສສມງ຺ຄີປຸຄ຺ຄໂລ, ຜສ຺ເສນ ຜຸຏ຺ຐາຣມ຺ມຓເມວ ເວທນາທີຫິ ເວເທຕິ ເຈເຕຕິ ສຎ຺ຊານາຕີຕິປິ ວຸຕ຺ຕໍ ໂຫຕິ. ອິຕິ ອິມສ຺ມິໍ ສຸຕ຺ເຕ ສມຕິໍສກ຺ຂນ຺ຘາ ກຖິຕາ ໂຫນ຺ຕິ. ກຖໍ? ຈກ຺ຂຸທ຺ວາເຣ ຕາວ ວຕ຺ຖຸ ເຈວ ອາຣມ຺ມຓຎ຺ຈ ຣູປກ຺ຂນ຺ໂຘ, ຜຸຏ຺ໂຐ ເວເທຕີຕິ ເວທນາກ຺ຂນ຺ໂຘ, ເຈເຕຕີຕິ ສງ຺ຂາຣກ຺ຂນ຺ໂຘ, ສຎ຺ຊານາຕີຕິ ສຎ຺ຎາກ຺ຂນ຺ໂຘ, ວິຊານາຕີຕິ ວິຎ຺ຎາຓກ຺ຂນ຺ໂຘຕິ. ເສສທ຺ວາເຣສຸປິ ເອເສວ ນໂຍ. ມໂນທ຺ວາເຣປິ ຫິ ວຕ຺ຖຸຣູປໍ ເອກນ຺ຕໂຕ ຣູປກ຺ຂນ຺ໂຘ, ຣູເປ ປນ ອາຣມ຺ມເຓ ສຕິ ອາຣມ຺ມຓມ຺ປິ ຣູປກ຺ຂນ຺ໂຘຕິ ຉ ປຎ຺ຈກາຕິໍສ ໂຫນ຺ຕິ. ສງ຺ເຂເປນ ປເນເຕ ຉສຸປິ ທ຺ວາເຣສຸ ປຎ຺ເຈວ ຂນ຺ຘາຕິ ສປຈ຺ຈເຍ ປຎ຺ຈກ຺ຂນ຺ເຘ ອນິຈ຺ຈາຕິ ວິຕ຺ຖາເຣຕ຺ວາ ວຸຈ຺ຈມາເນ ພຸຊ຺ຌນການໍ ອຊ຺ຌາສເຍນ ອິທໍ ສຸຕ຺ຕໍ ເທສິຕນ຺ຕິ.

ຉນ຺ນວຄ຺ໂຄ ນວໂມ.