໑໐. ສຬວຄ຺ໂຄ

໑. ອທນ຺ຕອຄຸຕ຺ຕວຓ຺ຓນາ

໙໔. ສຬວຄ຺ຄສ຺ສ ປຐເມ ອທນ຺ຕາຕິ ອທມິຕາ. ອຄຸຕ຺ຕາຕິ ອໂຄປິຕາ. ອຣກ຺ຂິຕາຕິ ນ ຣກ຺ຂິຕາ. ອສໍວຸຕາຕິ ອປິຫິຕາ. ທຸກ຺ຂາຘິວາຫາ ໂຫນ຺ຕີຕິ ເນຣຍິກາທິເຠທໍ ອຘິກທຸກ຺ຂໍ ອາວຫນກາ ໂຫນ຺ຕິ. ສຸຂາຘິວາຫາ ໂຫນ຺ຕີຕິ ຌານມຄ຺ຄຜລປເຠທໍ ອຘິກສຸຂໍ ອາວຫນກາ ໂຫນ຺ຕິ. ອຘິວຫາຕິປິ ປາໂຐ, ເອເສວຕ຺ໂຖ.

ສເຬວາຕິ ຉ ເອວ. ອສໍວຸໂຕ ຍຕ຺ຖ ທຸກ຺ຂໍ ນິຄຈ຺ຉຕີຕິ ເຍສຸ ອາຍຕເນສຸ ສໍວຣວິຣຫິໂຕ ທຸກ຺ຂໍ ປາປຸຓາຕິ. ເຕສຎ຺ຈ ເຍ ສໍວຣຓໍ ອເວທິສຸນ຺ຕິ ເຍ ເຕສໍ ອາຍຕນານໍ ສໍວຣໍ ວິນ຺ທິໍສຸ ປຏິລຠິໍສຸ. ວິຫຣນ຺ຕານວສ຺ສຸຕາຕິ ວິຫຣນ຺ຕິ ອນວສ຺ສຸຕາ ອຕິນ຺ຕາ.

ອສາທິຕຎ຺ຈ ສາທຸນ຺ຕິ ອສ຺ສາທວນ຺ຕຎ຺ຈ ມຘຸຣຎ຺ຈ. ຜສ຺ສທ຺ວຍໍ ສຸຂທຸກ຺ເຂ ອຸເປກ຺ເຂຕິ ສຸຂຜສ຺ສຎ຺ຈ ທຸກ຺ຂຜສ຺ສຎ຺ຈາຕິ ອິທໍ ຜສ຺ສທ຺ວຍໍ ອຸເປກ຺ເຂ, ອຸເປກ຺ຂາເມເວຕ຺ຖ ອຸປ຺ປາເທຍ຺ຍາຕິ ອຕ຺ໂຖ. ຜສ຺ສທ຺ວຍໍ ສຸຂທຸກ຺ຂໍ ອຸເປກ຺ໂຂຕິ ວາ ປາໂຐ, ຜສ຺ສເຫຕຸກໍ ສຸຂທຸກ຺ຂໍ ອຸເປກ຺ໂຂ, ສຸເຂ ອນຸໂຣຘໍ ທຸກ຺ເຂ ຈ ວິໂຣຘໍ ອນຸປ຺ປາເທນ຺ໂຕ ອຸເປກ຺ຂໂກ ຠເວຍ຺ຍາຕິປິ ອຕ຺ໂຖ. ອນານຸຣຸທ຺ໂຘ ອວິຣຸທ຺ໂຘ ເກນຈີຕິ ເກນຈິ ສທ຺ຘິໍ ເນວ ອນຸຣຸທ຺ໂຘ ນ ວິຣຸທ຺ໂຘ ຠເວຍ຺ຍ.

ປປຎ຺ຈສຎ຺ຎາຕິ ກິເລສສຎ຺ຎາຍ ປປຎ຺ຈສຎ຺ຎາ ນາມ ຫຸຕ຺ວາ. ອິຕຣີຕຣາ ນຣາຕິ ລາມກສຕ຺ຕາ ປປຎ຺ຈຍນ຺ຕາ ອຸປຍນ຺ຕີຕິ ປປຎ຺ຈຍມານາ ວຏ຺ຏໍ ອຸປຄຈ຺ຉນ຺ຕິ. ສຎ຺ຎິໂນຕິ ສສຎ຺ຎາ ສຕ຺ຕາ. ມໂນມຍໍ ເຄຫສິຕຎ຺ຈ ສພ຺ພນ຺ຕິ ສພ຺ພເມວ ປຎ຺ຈກາມຄຸຓເຄຫນິສ຺ສິຕໍ ມໂນມຍໍ ວິຕກ຺ກໍ. ປນຸຊ຺ຊາຕິ ປນຸທິຕ຺ວາ ນີຫຣິຕ຺ວາ. ເນກ຺ຂມ຺ມສິຕໍ ອິຣີຍຕີຕິ ທພ຺ພຊາຕິໂກ ຠິກ຺ຂຸ ເນກ຺ຂມ຺ມສິຕໍ ອິຣິເຍນ ອິຣີຍຕິ.

ຉສ຺ສຸ ຍທາ ສຸຠາວິໂຕຕິ ຉສຸ ອາຣມ຺ມເຓສຸ ຍທາ ສຸຏ຺ຐຸ ຠາວິໂຕ. ຜຸຏ຺ຐສ຺ສ ຈິຕ຺ຕໍ ນ ວິກມ຺ປເຕ ກ຺ວຈີຕິ ສຸຂຜສ຺ເສນ ວາ ທຸກ຺ຂຜສ຺ເສນ ວາ ຜຸຏ຺ຐສ຺ສ ກິສ຺ມິຎ຺ຈິ ຈິຕ຺ຕໍ ນ ກມ຺ປຕິ ນ ເວຘຕິ. ຠວຕ຺ຖ ຊາຕິມຣຓສ຺ສ ປາຣຄາຕິ ຊາຕິມຣຓານໍ ປາຣໍ ນິພ຺ພານໍ ຄມກາ ໂຫຖ.

໒. ມາລຸກ຺ຍປຸຕ຺ຕສຸຕ຺ຕວຓ຺ຓນາ

໙໕. ທຸຕິເຍ ມາລຸກ຺ຍປຸຕ຺ໂຕຕິ ມາລຸກ຺ຍພ຺ຣາຫ຺ມຓິຍາ ປຸຕ຺ໂຕ. ເອຕ຺ຖາຕິ ເອຕສ຺ມິໍ ຕວ ໂອວາທາຍາຈເນ. ອິມິນາ ເຖຣໍ ອປສາເທຕິປິ ອຸສ຺ສາເທຕິປິ. ກຖໍ? ອຍໍ ກິຣ ທຫຣກາເລ ຣູປາທີສຸ ປມຊ຺ຊິຕ຺ວາ ປຈ຺ຉາ ມຫລ຺ລກກາເລ ອຣຎ຺ຎວາສໍ ປຕ຺ເຖນ຺ໂຕ ກມ຺ມຏ຺ຐານໍ ຍາຈຕິ. ອຖ ຠຄວາ ‘‘ເອຕ຺ຖ ທຫເຣ ກິໍ ວກ຺ຂາມ? ມາລຸກ຺ຍປຸຕ຺ໂຕ ວິຍ ຕຸມ຺ເຫປິ ຕຣຸຓກາເລ ປມຊ຺ຊິຕ຺ວາ ມຫລ຺ລກກາເລ ອຣຎ຺ຎໍ ປວິສິຕ຺ວາ ສມຓຘມ຺ມໍ ກເຣຍ຺ຍາຖາ’’ຕິ ອິມິນາ ອຘິປ຺ປາເຍນ ຠຓນ຺ໂຕ ເຖຣໍ ອປສາເທຕິ ນາມ.

ຍສ຺ມາ ປນ ເຖໂຣ ມຫລ຺ລກກາເລປິ ອຣຎ຺ຎໍ ປວິສິຕ຺ວາ ສມຓຘມ຺ມໍ ກາຕຸກາໂມ, ຕສ຺ມາ ຠຄວາ ‘‘ເອຕ຺ຖ ທຫເຣ ກິໍ ວກ຺ຂາມ? ອຍໍ ອມ຺ຫາກໍ ມາລຸກ຺ຍປຸຕ຺ໂຕ ມຫລ຺ລກກາເລປິ ອຣຎ຺ຎໍ ປວິສິຕ຺ວາ ສມຓຘມ຺ມໍ ກຕ຺ຕຸກາໂມ ກມ຺ມຏ຺ຐານໍ ຍາຈຕິ, ຕຸມ຺ເຫ ນາມ ຕຣຸຓກາເລປິ ວີຣິຍໍ ນ ກໂຣຖາ’’ຕິ ອິມິນາ ອຘິປ຺ປາເຍນ ຠຓນ຺ໂຕ ເຖຣໍ ອຸສ຺ສາເທຕິ ນາມ.

ຍຕ຺ຣ ຫິ ນາມາຕິ ໂຍ ນາມ. ກິຎ຺ຈາປາຫນ຺ຕິ ກິຎ຺ຈາປິ ‘‘ອຫໍ ມຫລ຺ລໂກ’’ຕິ ຎາຕໍ. ຍທິ ອຫໍ ມຫລ຺ລໂກ, ມຫລ຺ລໂກ ສມາໂນປິ ສກ຺ຂິສ຺ສາມິ ສມຓຘມ຺ມໍ ກາຕຸໍ, ເທເສຕຸ ເມ, ຠນ຺ເຕ, ຠຄວາຕິ ອຘິປ຺ປາເຍນ ມຫລ຺ລກຠາວໍ ອນຸຄ຺ຄຓ຺ຫນ຺ໂຕ ໂອວາທຎ຺ຈ ປສໍສນ຺ໂຕ ເອວມາຫ.

ອທິຏ຺ຐາ ອທິຏ຺ຐປຸພ຺ພາຕິ ອິມສ຺ມິໍ ອຕ຺ຕຠາເວ ອທິຏ຺ຐາ ອຕີເຕປິ ອທິຏ຺ຐປຸພ຺ພາ. ນ ຈ ປສ຺ສສີຕິ ເອຕຣຫິປິ ນ ປສ຺ສສິ. ນ ຈ ເຕ ໂຫຕິ ປສ຺ເສຍ຺ຍນ຺ຕິ ເອວໍ ສມນ຺ນາຫາໂຣປິ ເຕ ຍຕ຺ຖ ນຕ຺ຖິ, ອປິ ນຸ ເຕ ຕຕ຺ຖ ຉນ຺ທາທໂຍ ອຸປ຺ປຊ຺ເຊຍ຺ຍຸນ຺ຕິ ປຸຈ຺ຉຕິ.

ທິຏ຺ເຐ ທິຏ຺ຐມຕ຺ຕນ຺ຕິ ຣູປາຍຕເນ ຈກ຺ຂຸວິຎ຺ຎາເຓນ ທິຏ຺ເຐ ທິຏ຺ຐມຕ຺ຕໍ ຠວິສ຺ສຕິ. ຈກ຺ຂຸວິຎ຺ຎາຓຎ຺ຫິ ຣູເປ ຣູປມຕ຺ຕເມວ ປສ຺ສຕິ, ນ ນິຈ຺ຈາທິສຠາວໍ, ອິຕິ ເສສວິຎ຺ຎາເຓຫິປິ ເມ ເອຕ຺ຖ ທິຏ຺ຐມຕ຺ຕເມວ ຈິຕ຺ຕໍ ຠວິສ຺ສຕີຕິ ອຕ຺ໂຖ. ອຖ ວາ ທິຏ຺ເຐ ທິຏ຺ຐໍ ນາມ ຈກ຺ຂຸວິຎ຺ຎາຓໍ, ຣູເປ ຣູປວິຊານນນ຺ຕິ ອຕ຺ໂຖ. ມຕ຺ຕາຕິ ປມາຓໍ, ທິຏ຺ຐໍ ມຕ຺ຕາ ອສ຺ສາຕິ ທິຏ຺ຐມຕ຺ຕໍ, ຈິຕ຺ຕໍ, ຈກ຺ຂຸວິຎ຺ຎາຓມຕ຺ຕເມວ ເມ ຈິຕ຺ຕໍ ຠວິສ຺ສຕີຕິ ອຕ຺ໂຖ. ອິທໍ ວຸຕ຺ຕໍ ໂຫຕິ – ຍຖາ ອາປາຖຄຕຣູເປ ຈກ຺ຂຸວິຎ຺ຎາຓໍ ນ ຣຊ຺ຊຕິ ນ ທຸສ຺ສຕິ ນ ມຸຍ຺ຫຕິ, ເອວໍ ຣາຄາທິວິຣເຫນ ຈກ຺ຂຸວິຎ຺ຎາຓມຕ຺ຕເມວ ຊວນໍ ຠວິສ຺ສຕິ, ຈກ຺ຂຸວິຎ຺ຎາຓປມາເຓເນວ ຊວນໍ ຐເປສ຺ສາມີຕິ. ອຖ ວາ ທິຏ຺ຐໍ ນາມ ຈກ຺ຂຸວິຎ຺ຎາເຓນ ທິຏ຺ຐຣູປໍ, ທິຏ຺ເຐ ທິຏ຺ຐມຕ຺ຕໍ ນາມ ຕຕ຺ເຖວ ອຸປ຺ປນ຺ນໍ ສມ຺ປຏິຈ຺ຉນສນ຺ຕີຣຓໂວຏ຺ຐພ຺ພນສງ຺ຂາຕໍ ຈິຕ຺ຕຕ຺ຕຍໍ. ຍຖາ ຕໍ ນ ຣຊ຺ຊຕິ, ນ ທຸສ຺ສຕິ, ນ ມຸຍ຺ຫຕິ, ເອວໍ ອາປາຖຄເຕ ຣູເປ ເຕເນວ ສມ຺ປຏິຈ຺ຉນາທິປ຺ປມາເຓນ ຊວນໍ ອຸປ຺ປາເທສ຺ສາມິ, ນາຫໍ ຕໍ ປມາຓໍ ອຕິກ຺ກມິຕ຺ວາ ຣຊ຺ຊນາທິວເສນ ອຸປ຺ປຊ຺ຊິຕຸໍ ທສ຺ສາມີຕິ ອຍເມຕ຺ຖ ອຕ຺ໂຖ. ເອເສວ ນໂຍ ສຸຕມຸເຕສຸ.

ວິຎ຺ຎາເຕ ວິຎ຺ຎາຕມຕ຺ຕນ຺ຕິ ເອຕ຺ຖ ປນ ວິຎ຺ຎາຕໍ ນາມ ມໂນທ຺ວາຣາວຊ຺ຊເນນ ວິຎ຺ຎາຕາຣມ຺ມຓໍ, ຕສ຺ມິໍ ວິຎ຺ຎາເຕ ວິຎ຺ຎາຕມຕ຺ຕນ຺ຕິ ອາວຊ຺ຊນປມາຓໍ. ຍຖາ ອາວຊ຺ຊເນນ ນ ຣຊ຺ຊຕິ ນ ທຸສ຺ສຕິ ນ ມຸຍ຺ຫຕິ, ເອວໍ ຣຊ຺ຊນາທິວເສນ ອຸປ຺ປຊ຺ຊິຕຸໍ ອທຕ຺ວາ ອາວຊ຺ຊນປມາເຓເນວ ຈິຕ຺ຕໍ ຐເປສ຺ສາມີຕິ ອຍເມຕ຺ຖ ອຕ຺ໂຖ.

ຍໂຕຕິ ຍທາ. ຕໂຕຕິ ຕທາ. ນ ເຕນາຕິ ເຕນ ຣາເຄນ ວາ ຣຕ຺ໂຕ, ໂທເສນ ວາ ທຸຏ຺ໂຐ, ໂມເຫນ ວາ ມູຬ຺ໂຫ ນ ຠວິສ຺ສຕິ. ຕໂຕ ຕ຺ວໍ ມາລຸກ຺ຍປຸຕ຺ຕ ນ ຕຕ຺ຖາຕິ ຍທາ ຕ຺ວໍ ເຕນ ຣາເຄນ ວາ ໂທສໂມເຫຫິ ວາ ຣຕ຺ໂຕ ວາ ທຸຏ຺ໂຐ ວາ ມູຬ຺ໂຫ ວາ ນ ຠວິສ຺ສສິ, ຕທາ ຕ຺ວໍ ນ ຕຕ຺ຖ ຕສ຺ມິໍ ທິຏ຺ເຐ ວາ ສຸຕມຸຕວິຎ຺ຎາເຕ ວາ ປຏິພທ຺ໂຘ ອລ຺ລີໂນ ປຕິຏ຺ຐິໂຕ ນາມ ຠວິສ຺ສສິ. ເນວິຘາຕິອາທິ ວຸຕ຺ຕຕ຺ຖເມວ.

ສຕິ ມຸຏ຺ຐາຕິ ສຕິ ນຏ຺ຐາ. ຕຎ຺ຈ ອຊ຺ໂຌສາຕິ ຕໍ ອາຣມ຺ມຓໍ ຄິລິຕ຺ວາ. ອຠິຊ຺ຌາ ຈ ວິເຫສາ ຈາຕິ ອຠິຊ຺ຌາຍ ຈ ວິຫິໍສາຍ ຈ. ອຖ ວາ ‘‘ຕສ຺ສ ວຑ຺ຒນ຺ຕີ’’ຕິ ປເທນາປິ ສທ຺ຘິໍ ໂຍເຊຕພ຺ພໍ, ອຠິຊ຺ຌາ ຈ ວິເຫສາ ຈາຕິ ອິເມປິ ທ຺ເວ ຘມ຺ມາ ຕສ຺ສ ວຑ຺ຒນ຺ຕີຕິ ອຕ຺ໂຖ.

ຈິຕ຺ຕມສ຺ສູປຫຎ຺ຎຕີຕິ ອຠິຊ຺ຌາວິເຫສາຫິ ອສ຺ສ ຈິຕ຺ຕໍ ອຸປຫຎ຺ຎຕິ. ອາຈິນໂຕຕິ ອາຈິນນ຺ຕສ຺ສ. ອາຣາ ນິພ຺ພານ ວຸຈ຺ຈຕີຕິ ເອວຣູປສ຺ສ ປຸຄ຺ຄລສ຺ສ ນິພ຺ພານໍ ນາມ ທູເຣ ປວຸຈ຺ຈຕິ. ຆຕ຺ວາຕິ ຆາຍິຕ຺ວາ. ໂຠຕ຺ວາຕິ ຠຸຕ຺ວາ ສາຍິຕ຺ວາ ເລຫິຕ຺ວາ. ຜຸສ຺ສາຕິ ຜຸສິຕ຺ວາ. ປຏິສ຺ສໂຕຕິ ປຏິສ຺ສຕິສງ຺ຂາຕາຍ ສຕິຍາ ຍຸຕ຺ໂຕ. ເສວໂຕ ຈາປິ ເວທນນ຺ຕິ ຈຕຸມຄ຺ຄສມ຺ປຍຸຕ຺ຕໍ ນິພ຺ພຕ຺ຕິຕໂລກຸຕ຺ຕຣເວທນໍ ເສວນ຺ຕສ຺ສ. ຂີຍຕີຕິ ຂຍໍ ຄຈ຺ຉຕິ. ກິໍ ຕໍ? ທຸກ຺ຂມ຺ປິ ກິເລສຊາຕມ຺ປິ. ອຎ຺ຎຕໂຣຕິ ອສີຕິຍາ ມຫາສາວການໍ ອພ຺ຠນ຺ຕໂຣ ເອໂກ. ອິຕິ ອິມສ຺ມິໍ ສຸຕ຺ເຕ ຄາຖາຫິປິ ວຏ຺ຏວິວຏ຺ຏເມວ ກຖິຕໍ.

໓. ປຣິຫານຘມ຺ມສຸຕ຺ຕວຓ຺ຓນາ

໙໖. ຕຕິເຍ ປຣິຫານຘມ຺ມນ຺ຕິ ປຣິຫານສຠາວໍ. ອຠິຠາຍຕນານີຕິ ອຠິຠວິຕານິ ອາຍຕນານິ. ສຣສງ຺ກປ຺ປາຕິ ເອຕ຺ຖ ສຣນ຺ຕີຕິ ສຣາ, ຘາວນ຺ຕີຕິ ອຕ຺ໂຖ. ສຣາ ຈ ເຕ ສງ຺ກປ຺ປາ ຈ ສຣສງ຺ກປ຺ປາ. ສໍໂຍຊນິຍາຕິ ພນ຺ຘນິຍາ ພນ຺ຘນສ຺ສ ປຈ຺ຈຍຠູຕາ. ຕຎ຺ເຈ ຠິກ຺ຂູຕິ ຕໍ ເອວໍ ອຸປ຺ປນ຺ນໍ ກິເລສຊາຕໍ, ຕໍ ວາ ອາຣມ຺ມຓໍ. ອຘິວາເສຕີຕິ ຈິຕ຺ເຕ ອາໂຣເປຕ຺ວາ ວາເສຕິ. ນປ຺ປຊຫຕີຕິ ຉນ຺ທຣາຄປ຺ປຫາເນນ ນ ປຊຫຕິ. ເອວໍ ສພ຺ພປເທຫິ ໂຍເຊຕພ຺ພໍ. ອຠິຠາຍຕນຎ຺ເຫຕໍ ວຸຕ຺ຕໍ ຠຄວຕາຕິ ເອຕໍ ພຸທ຺ເຘນ ຠຄວຕາ ອຠິຠວິຕໍ ອາຍຕນນ຺ຕິ ກຖິຕໍ. ອິຘ ຘມ຺ມໍ ປຸຈ຺ຉິຕ຺ວາ ວິຠຊນ຺ເຕນ ປຸຄ຺ຄເລນ ຘມ຺ໂມ ທສ຺ສິໂຕ.

໔. ປມາທວິຫາຣີສຸຕ຺ຕວຓ຺ຓນາ

໙໗. ຈຕຸຕ຺ເຖ ອສໍວຸຕສ຺ສາຕິ ອປິຫິຕສ຺ສ ນ ປິທຫິຕ຺ວາ ສຎ຺ຉາທິຕ຺ວາ ຐປິຕສ຺ສ. ພ຺ຍາສິຎ຺ຈຕີຕິ ວິອາສິຎ຺ຈຕິ, ກິເລສຕິນ຺ຕໍ ຫຸຕ຺ວາ ວຕ຺ຕຕິ. ປາໂມຊ຺ຊນ຺ຕິ ທຸພ຺ພລປີຕິ. ປີຕີຕິ ພລວປີຕິ. ປສ຺ສທ຺ຘີຕິ ທຣຖປສ຺ສທ຺ຘິ. ຘມ຺ມາ ນ ປາຕຸຠວນ຺ຕີຕິ ສມຖວິປສ຺ສນາຘມ຺ມາ ນ ອຸປ຺ປຊ຺ຊນ຺ຕິ. ອິມສ຺ມິໍ ສຸຕ຺ເຕ ປຸຄ຺ຄລໍ ປຸຈ຺ຉິຕ຺ວາ ວິຠຊນ຺ເຕນ ຘມ຺ເມນ ປຸຄ຺ຄໂລ ທສ຺ສິໂຕ.

໕. ສໍວຣສຸຕ຺ຕວຓ຺ຓນາ

໙໘. ປຎ຺ຈເມ ກຖຎ຺ຈ, ຠິກ຺ຂເວ, ອສໍວໂຣຕິ ອິທໍ ມຄ຺ຄກຸສລສ຺ສ ວາມໍ ມຸຎ຺ຈິຕ຺ວາ ທກ຺ຂິຓໍ ຄຓ຺ເຫຍ຺ຍາສີຕິ ປຐມໍ ປຫາຕພ຺ພມຄ຺ຄກ຺ຂານໍ ວິຍ ອຸທ຺ເທສກ຺ກເມນ ອວຕ຺ວາ ເທສນາກຸສລຕາຍ ປຐມໍ ປຫາຕພ຺ພຘມ຺ມກ຺ຂານວເສນ ວຸຕ຺ຕນ຺ຕິ ເວທິຕພ຺ພໍ. ອິຘ ຘມ຺ມໍ ປຸຈ຺ຉິຕ຺ວາ ຘມ຺ໂມວ ວິຠຕ຺ໂຕ.

໖. ສມາຘິສຸຕ຺ຕວຓ຺ຓນາ

໙໙. ຉຏ຺ເຐ ສມາຘິນ຺ຕິ ຈິຕ຺ເຕກຄ຺ຄຕໍ. ອິທຎ຺ຫິ ສຸຕ຺ຕໍ ຈິຕ຺ເຕກຄ຺ຄຕາຍ ປຣິຫາຍມາເນ ທິສ຺ວາ, ‘‘ອິເມສໍ ຈິຕ຺ເຕກຄ຺ຄຕໍ ລຠນ຺ຕານໍ ກມ຺ມຏ຺ຐານໍ ຜາຕິໍ ຄມິສ຺ສຕີ’’ຕິ ຎຕ຺ວາ ກຖິຕໍ.

໗. ປຏິສລ຺ລານສຸຕ຺ຕວຓ຺ຓນາ

໑໐໐. ສຕ຺ຕເມ ປຏິສລ຺ລານນ຺ຕິ ກາຍວິເວກໍ. ອິທຎ຺ຫິ ສຸຕ຺ຕໍ ກາຍວິເວເກນ ປຣິຫາຍມາເນ ທິສ຺ວາ, ‘‘ອິເມສໍ ກາຍວິເວກໍ ລຠນ຺ຕານໍ ກມ຺ມຏ຺ຐານໍ ຜາຕິໍ ຄມິສ຺ສຕີ’’ຕິ ຎຕ຺ວາ ກຖິຕໍ.

໘-໙. ປຐມນຕຸມ຺ຫາກໍສຸຕ຺ຕາທິວຓ຺ຓນາ

໑໐໑-໑໐໒. ອຏ຺ຐມໍ ອຸປມາຍ ປຣິວາເຣຕ຺ວາ ກຖິເຕ ພຸຊ຺ຌນການໍ, ນວມໍ ສຸທ຺ຘິກວເສເນວ ພຸຊ຺ຌນການໍ ອຊ຺ຌາສຍວເສນ ວຸຕ຺ຕໍ. ອຕ຺ໂຖ ປນ ອຸຠຍຕ຺ຖາປິ ຂນ຺ຘິຍວຄ຺ເຄ ວຸຕ຺ຕນເຍເນວ ເວທິຕພ຺ໂພ.

໑໐. ອຸທກສຸຕ຺ຕວຓ຺ຓນາ

໑໐໓. ທສເມ ອຸທໂກ ສຸທນ຺ຕິ ເອຕ຺ຖ ສຸທນ຺ຕິ ນິປາຕມຕ຺ຕໍ. ອຸທໂກຕິ ຕສ຺ສ ນາມໍ. ອິທໍ ຊາຕຸ ເວທຄູຕິ ເອຕ຺ຖ ອິທນ຺ຕິ ນິປາຕມຕ຺ຕໍ. ອຖ ວາ ອິທໍ ມມ ວຈນໍ ສຸຓາຖາຕິ ທີເປນ຺ໂຕ ເອວມາຫ. ຊາຕຸ ເວທຄູຕິ ອຫໍ ເອກໍເສເນວ ເວທຄູ, ເວທສງ຺ຂາເຕນ ຎາເຓນ ເນຍ຺ເຍສຸ ຄໂຕ, ເວທໍ ວາ ຄໂຕ ອຘິຄໂຕ, ປຓ຺ຑິໂຕຫມສ຺ມີຕິ ອຕ຺ໂຖ. ສພ຺ພຊີຕິ ເອກໍເສນ ສພ຺ພວຏ຺ຏໍ ຊິນິຕ຺ວາ ອຠິຠວິຕ຺ວາ ຐິໂຕສ຺ມີຕິ ວທຕິ. ອປລິຂຕໍ ຄຓ຺ຑມູລນ຺ຕິ ອປລິຂຕໍ ທຸກ຺ຂມູລໍ. ປລິຂຓິນ຺ຕິ ປລິຂຕໍ ມຍາ, ຂນິຕ຺ວາ ຐິໂຕສ຺ມີຕິ ທີເປຕິ.

ມາຕາເປຕ຺ຕິກສມ຺ຠວສ຺ສາຕິ ມາຕິໂຕ ຈ ປິຕິໂຕ ຈ ນິພ຺ພຕ຺ເຕນ ມາຕາເປຕ຺ຕິເກນ ສຸກ຺ກໂສຓິເຕນ ສມ຺ຠູຕສ຺ສ. ໂອທນກຸມ຺ມາສູປຈຍສ຺ສາຕິ ໂອທເນນ ເຈວ ກຸມ຺ມາເສນ ຈ ອຸປຈິຕສ຺ສ ວຑ຺ຒິຕສ຺ສ. ອນິຈ຺ຈຸຈ຺ຉາທນປຣິມທ຺ທນເຠທນວິທ຺ຘໍສນຘມ຺ມສ຺ສາຕິ ເອຕ຺ຖ ອຍໍ ກາໂຍ ຫຸຕ຺ວາ ອຠາວຏ຺ເຐນ ອນິຈ຺ຈຘມ຺ໂມ, ທຸຄ຺ຄນ຺ຘວິຆາຕຕ຺ຖາຍ ຕນຸວິເລປເນນ ອຸຈ຺ຉາທນຘມ຺ໂມ, ອງ຺ຄປຈ຺ຈງ຺ຄາພາຘວິໂນທນຕ຺ຖາຍ ຂຸທ຺ທກສມ຺ພາຫເນນ ປຣິມທ຺ທນຘມ຺ໂມ, ທຫຣກາເລ ວາ ອູຣູສຸ ສຍາເປຕ຺ວາ ຄພ຺ຠວາເສນ ທຸສ຺ສຓ຺ຐິຕານໍ ເຕສໍ ເຕສໍ ອງ຺ຄານໍ ສຓ຺ຐານສມ຺ປາທນຕ຺ຖໍ ອຎ຺ຉນປີຬນາທີນໍ ວເສນ ປຣິມທ຺ທນຘມ຺ໂມ, ເອວໍ ປຣິຫຣິໂຕປິ ຈ ເຠທນວິທ຺ຘໍສນຘມ຺ໂມ ຠິຊ຺ຊຕິ ເຈວ ວິກິຣຕິ ຈ, ເອວໍ ສຠາໂວຕິ ອຕ຺ໂຖ.

ຕຕ຺ຖ ມາຕາເປຕ຺ຕິກສມ຺ຠວໂອທນກຸມ຺ມາສູປຈຍປຣິມທ຺ທນປເທຫິ ວຑ຺ຒິ ກຖິຕາ, ອນິຈ຺ຈເຠທນວິທ຺ຘໍສນປເທຫິ ປຣິຫານິ. ປຸຣິເມຫິ ວາ ຕີຫິ ສມຸທໂຍ, ປຈ຺ຉິເມຫິ ອຕ຺ຖງ຺ຄໂມຕິ. ເອວໍ ຈາຕຸມຫາຠູຕິກສ຺ສ ກາຍສ຺ສ ວຑ຺ຒິປຣິຫານິນິພ຺ພຕ຺ຕິເຠທາ ທສ຺ສິຕາ. ເສສໍ ອຸຕ຺ຕານຕ຺ຖເມວາຕິ.

ສຬວຄ຺ໂຄ ທສໂມ.

ທຸຕິໂຍ ປຓ຺ຓາສໂກ.