໗. ມິຄຊາລວຄ຺ໂຄ

໑. ປຐມມິຄຊາລສຸຕ຺ຕວຓ຺ຓນາ

໖໓. ມິຄຊາລວຄ຺ຄສ຺ສ ປຐເມ ຈກ຺ຂຸວິຎ຺ເຎຍ຺ຍາຕິ ຈກ຺ຂຸວິຎ຺ຎາເຓນ ປສ຺ສິຕພ຺ພາ. ໂສຕວິຎ຺ເຎຍ຺ຍາທີສຸປິ ເອເສວ ນໂຍ. ອິຏ຺ຐາຕິ ປຣິຍິຏ຺ຐາ ວາ ໂຫນ຺ຕຸ ມາ ວາ, ອິຏ຺ຐາຣມ຺ມຓຠູຕາຕິ ອຕ຺ໂຖ. ກນ຺ຕາຕິ ກມນີຍາ. ມນາປາຕິ ມນວຑ຺ຒນກາ. ປິຍຣູປາຕິ ປິຍຊາຕິກາ. ກາມູປສໍຫິຕາຕິ ອາຣມ຺ມຓໍ ກຕ຺ວາ ອຸປ຺ປຊ຺ຊມາເນນ ກາເມນ ອຸປສໍຫິຕາ ຣຊນີຍາຕິ ຣຎ຺ຊນີຍາ, ຣາຄຸປ຺ປຕ຺ຕິກາຣຓຠູຕາຕິ ອຕ຺ໂຖ. ນນ຺ທີຕິ ຕຓ຺ຫານນ຺ທີ. ສໍໂຍໂຄຕິ ສໍໂຍຊນໍ. ນນ຺ທິສໍໂຍຊນສໍຍຸຕ຺ໂຕຕິ ນນ຺ທີພນ຺ຘເນນ ພທ຺ໂຘ. ອຣຎ຺ຎວນປຕ຺ຖານີຕິ ອຣຎ຺ຎານິ ຈ ວນປຕ຺ຖານິ ຈ. ຕຕ຺ຖ ກິຎ຺ຈາປິ ອຠິຘມ຺ເມ ນິປ຺ປຣິຍາເຍນ ‘‘ນິກ຺ຂມິຕ຺ວາ ພຫິ ອິນ຺ທຂີລາ ສພ຺ພເມຕໍ ອຣຎ຺ຎ’’ນ຺ຕິ (ວິຠ. ໕໒໙) ວຸຕ຺ຕໍ, ຕຖາປິ ຍໍ ຕໍ ‘‘ປຎ຺ຈຘນຸສຕິກໍ ປຈ຺ຉິມ’’ນ຺ຕິ (ປາຣາ. ໖໕໔) ອຣຎ຺ຎກງ຺ຄນິປ຺ຜາທກໍ ເສນາສນໍ ວຸຕ຺ຕໍ, ຕເທວ ອຘິປ຺ເປຕນ຺ຕິ ເວທິຕພ຺ພໍ. ວນປຕ຺ຖນ຺ຕິ ຄາມນ຺ຕໍ ອຕິກ຺ກມິຕ຺ວາ ມນຸສ຺ສານໍ ອນຸປຈາຣຏ຺ຐານໍ, ຍຕ຺ຖ ນ ກສີຍຕິ ນ ວປີຍຕິ. ວຸຕ຺ຕມ຺ປິ ເຈຕໍ –

‘‘ວນປຕ຺ຖນ຺ຕິ ທູຣານເມຕໍ ເສນາສນານໍ ອຘິວຈນໍ. ວນປຕ຺ຖນ຺ຕິ ວນສຓ຺ຑານເມຕໍ, ວນປຕ຺ຖນ຺ຕິ ຠິໍສນການເມຕໍ, ວນປຕ຺ຖນ຺ຕິ ສໂລມຫໍສານເມຕໍ, ວນປຕ຺ຖນ຺ຕິ ປຣິຍນ຺ຕານເມຕໍ, ວນປຕ຺ຖນ຺ຕິ ອມນຸສ຺ສູປຈາຣານໍ ເສນາສນານເມຕໍ ອຘິວຈນ’’ນ຺ຕິ (ວິຠ. ໕໓໑).

ເອຕ຺ຖ ຈ ປຣິຍນ຺ຕານນ຺ຕິ ອິມໍ ເອກໍ ປຣິຍາຍໍ ຐເປຕ຺ວາ ເສສປຣິຍາເຍຫິ ວນປຕ຺ຖານິ ເວທິຕພ຺ພານິ. ປນ຺ຕານີຕິ ປຣິຍນ຺ຕານິ ອຕິທູຣານິ. ອປ຺ປສທ຺ທານີຕິ ອຸທຸກ຺ຂລມຸສລທາຣກສທ຺ທາທີນໍ ອຠາເວນ ອປ຺ປສທ຺ທານິ. ອປ຺ປນິຄ຺ໂຆສານີຕິ ເຕສໍ ເຕສໍ ນິນ຺ນາທມຫານິຄ຺ໂຆສສ຺ສ ອຠາເວນ ອປ຺ປນິຄ຺ໂຆສານິ. ວິຊນວາຕານີຕິ ສຎ຺ຈຣຓຊນສ຺ສ ສຣີຣວາຕວິຣຫິຕານິ. ມນຸສ຺ສຣາຫສ຺ເສຍ຺ຍການີຕິ ມນຸສ຺ສານໍ ຣໂຫກມ຺ມສ຺ສ ອນຸຈ຺ຉວິການິ. ປຏິສລ຺ລານສາຣຸປ຺ປານີຕິ ນິລີຍນສາຣຸປ຺ປານິ.

໒. ທຸຕິຍມິຄຊາລສຸຕ຺ຕວຓ຺ຓນາ

໖໔. ທຸຕິເຍ ນນ຺ທິນິໂຣຘາ ທຸກ຺ຂນິໂຣໂຘຕິ ຕຓ຺ຫານນ຺ທິຍາ ນິໂຣເຘນ ວຏ຺ຏທຸກ຺ຂສ຺ສ ນິໂຣໂຘ.

໓-໕. ປຐມສມິທ຺ຘິມາຣປຎ຺ຫາສຸຕ຺ຕາທິວຓ຺ຓນາ

໖໕-໖໗. ຕຕິເຍ ສມິທ຺ຘີຕິ ອຕ຺ຕຠາວສ຺ສ ສມິທ຺ຘຕາຍ ເອວໍ ລທ຺ຘນາໂມ. ຕສ຺ສ ກິຣ ເຖຣສ຺ສ ອຕ຺ຕຠາໂວ ອຠິຣູໂປ ອໂຫສິ ປາສາທິໂກ, ອຸກ຺ຂິຕ຺ຕມາລາປຸໂຏ ວິຍ ອລງ຺ກຕມາລາຄພ຺ໂຠ ວິຍ ຈ ສພ຺ພາກາຣປາຣິປູຣິຍາ ສມິທ຺ໂຘ. ຕສ຺ມາ ສມິທ຺ຘິຕ຺ເວວ ສງ຺ຂໍ ຄໂຕ. ມາໂຣຕິ ມຣຓໍ ປຸຈ຺ຉຕິ. ມາຣປຎ຺ຎຕ຺ຕີຕິ ມາໂຣຕິ ປຎ຺ຎຕ຺ຕິ ນາມໍ ນາມເຘຍ຺ຍໍ. ອຕ຺ຖິ ຕຕ຺ຖ ມາໂຣ ວາ ມາຣປຎ຺ຎຕ຺ຕິ ວາຕິ ຕຕ຺ຖ ມຣຓໍ ວາ ມຣຓນ຺ຕິ ອິທໍ ນາມໍ ວາ ອຕ຺ຖີຕິ ທສ຺ເສຕິ. ຈຕຸຕ຺ຖໍ ອຸຕ຺ຕານເມວ, ຕຖາ ປຎ຺ຈມໍ.

໖. ສມິທ຺ຘິໂລກປຎ຺ຫາສຸຕ຺ຕວຓ຺ຓນາ

໖໘. ຉຏ຺ເຐ ໂລໂກຕິ ລຸຊ຺ຊນປລຸຊ຺ຊນຏ຺ເຐນ ໂລໂກ. ອິຕິ ມິຄຊາລຕ຺ເຖຣສ຺ສ ອາຍາຈນສຸຕ຺ຕໂຕ ປຏ຺ຐາຍ ປຎ຺ຈສຸປິ ສຸຕ຺ເຕສຸ ວຏ຺ຏວິວຏ຺ຏເມວ ກຖິຕໍ.

໗. ອຸປເສນອາສີວິສສຸຕ຺ຕວຓ຺ຓນາ

໖໙. ສຕ຺ຕເມ ສີຕວເນຕິ ເອວໍນາມເກ ສຸສານວເນ. ສປ຺ປໂສຓ຺ຑິກປພ຺ຠາເຣຕິ ສປ຺ປຜຓສທິສຕາຍ ເອວໍລທ຺ຘນາເມ ປພ຺ຠາເຣ. ອຸປເສນສ຺ສາຕິ ຘມ຺ມເສນາປຕິໂນ ກນິຏ຺ຐຠາຕິກອຸປເສນຕ຺ເຖຣສ຺ສ. ອາສີວິໂສ ປຕິໂຕ ໂຫຕີຕິ ເຖໂຣ ກິຣ ກຕຠຕ຺ຕກິຈ຺ໂຈ ມຫາຈີວຣໍ ຄເຫຕ຺ວາ ເລຓຈ຺ຉາຍາຍ ມນ຺ທມນ຺ເທນ ວາຕປານວາເຕນ ພີຊິຍມາໂນ ນິສີທິຕ຺ວາ ທຸປຏ຺ຏນິວາສເນ ສູຈິກມ຺ມໍ ກໂຣຕິ. ຕສ຺ມິໍ ຂເຓ ເລຓຈ຺ຉທເນ ທ຺ເວ ອາສີວິສໂປຕກາ ກີຬນ຺ຕິ. ເຕສຸ ເອໂກ ປຕິຕ຺ວາ ເຖຣສ຺ສ ອໍສກູເຏ ອວຕ຺ຖາສິ. ໂສ ຈ ຜຸຏ຺ຐວິໂສ ໂຫຕິ. ຕສ຺ມາ ປຕິຕຏ຺ຐານໂຕ ປຏ຺ຐາຍ ເຖຣສ຺ສ ກາເຍ ທີປສິຂາ ວິຍ ວຏ຺ຏິໍ ປຣິຍາທິຍມານເມວສ຺ສ ວິສໍ ໂອຕິຓ຺ຓໍ. ເຖໂຣ ວິສສ຺ສ ຕຖາຄມນໍ ທິສ຺ວາ ກິຎ຺ຈາປິ ຕໍ ປຕິຕມຕ຺ຕເມວ ຍຖາປຣິຈ຺ເຉເທນ ຄຕໍ, ອຕ຺ຕໂນ ປນ ອິທ຺ຘິພເລນ ‘‘ອຍໍ ອຕ຺ຕຠາໂວ ເລເຓ ມາ ວິນສ຺ສຕູ’’ຕິ ອຘິຏ຺ຐຫິຕ຺ວາ ຠິກ຺ຂູ ອາມນ຺ເຕສິ. ປຸຣາຍໍ ກາໂຍ ອິເຘວ ວິກິຣຕີຕິ ຍາວ ນ ວິກິຣຕິ, ຕາວ ນໍ ພຫິທ຺ຘາ ນີຫຣຖາຕິ ອຕ຺ໂຖ. ອຎ຺ຎຖຕ຺ຕນ຺ຕິ ອຎ຺ຎຖາຠາວໍ. ອິນ຺ທ຺ຣິຍານໍ ວາ ວິປຣິຓາມນ຺ຕິ ຈກ຺ຂຸໂສຕາທີນໍ ອິນ຺ທ຺ຣິຍານໍ ປກຕິວິຊຫນຠາວໍ. ຕຕ຺ເຖວ ວິກິຣີຕິ ພຫິ ນີຫຣິຕ຺ວາ ຐປິຕຏ຺ຐາເນ ມຎ຺ຈກສ຺ມິໍເຍວ ວິກິຣິ.

໘. ອຸປວາຓສນ຺ທິຏ຺ຐິກສຸຕ຺ຕວຓ຺ຓນາ

໗໐. ອຏ຺ຐເມ ຣູປປ຺ປຏິສໍເວທີຕິ ນີລປີຕາທິເຠທໍ ອາຣມ຺ມຓໍ ວວຕ຺ຖາເປນ຺ໂຕ ຣູປໍ ປຏິສໍວິທິຕໍ ກໂຣຕິ, ຕສ຺ມາ ຣູປປ຺ປຏິສໍເວທີ ນາມ ໂຫຕິ. ຣູປຣາຄປ຺ປຏິສໍເວທີຕິ ກິເລສສ຺ສ ອຕ຺ຖິຠາເວເນວ ປນ ຣູປຣາຄໍ ປຏິສໍວິທິຕໍ ກໂຣຕິ ນາມ, ຕສ຺ມາ ຣູປຣາຄປ຺ປຏິສໍເວທີຕິ ວຸຈ຺ຈຕິ. ສນ຺ທິຏ຺ຐິໂກຕິອາທີນິ ວິສຸທ຺ຘິມຄ຺ເຄ ວຸຕ຺ຕຕ຺ຖາເນວ. ໂນ ຈ ຣູປຣາຄປ຺ປຏິສໍເວທີຕິ ກິເລສສ຺ສ ນຕ຺ຖິຠາເວເນວ ນ ຣູປຣາຄໍ ປຏິສໍວິທິຕໍ ກໂຣຕິ ນາມ, ຕສ຺ມາ ‘‘ໂນ ຈ ຣູປຣາຄປ຺ປຏິສໍເວທີ’’ຕິ ວຸຈ຺ຈຕິ. ອິມສ຺ມິໍ ສຸຕ຺ເຕ ເສຂາເສຂານໍ ປຈ຺ຈເວກ຺ຂຓາ ກຖິຕາ.

໙. ປຐມຉຜສ຺ສາຍຕນສຸຕ຺ຕວຓ຺ຓນາ

໗໑. ນວເມ ຜສ຺ສາຍຕນານນ຺ຕິ ຜສ຺ສາກຣານໍ. ອວຸສິຕນ຺ຕິ ອວຸຏ຺ຐໍ. ອາຣກາຕິ ທູເຣ. ເອຕ຺ຖາຫໍ, ຠນ຺ເຕ, ອນສ຺ສສນ຺ຕິ, ຠນ຺ເຕ, ອຫໍ ເອຕ຺ຖ ອນສ຺ສສິໍ, ນຏ຺ໂຐ ນາມ ອຫນ຺ຕິ ວທຕິ. ຠຄວາ – ‘‘ອຍໍ ຠິກ຺ຂຸ ‘ອຫໍ ນາມ ອິມສ຺ມິໍ ສາສເນ ນຏ຺ໂຐ’ຕິ ວທຕິ, ກິນ຺ນຸ ຂ຺ວສ຺ສ ອຎ຺ເຎສຸ ຘາຕຸກມ຺ມຏ຺ຐານ-ກສິຓກມ຺ມຏ຺ຐານາທີສຸ ອຠິໂຍໂຄ ອຕ຺ຖີ’’ຕິ ຈິນ຺ເຕຕ຺ວາ, ຕມ຺ປິ ອປສ຺ສນ຺ໂຕ – ‘‘ກຕຣໍ ນຸ ໂຂ ກມ຺ມຏ຺ຐານໍ ອິມສ຺ສ ສປ຺ປາຍໍ ຠວິສ຺ສຕີ’’ຕິ ຈິນ຺ເຕສິ. ຕໂຕ ‘‘ອາຍຕນກມ຺ມຏ຺ຐານເມວ ສປ຺ປາຍ’’ນ຺ຕິ ທິສ຺ວາ ຕໍ ກເຖນ຺ໂຕ ຕໍ ກິໍ ມຎ຺ຎສິ ຠິກ຺ຂູຕິອາທິມາຫ. ສາຘູຕິ ຕສ຺ສ ພ຺ຍາກຣເຓ ສມ຺ປຫໍສນໍ. ເອເສວນ຺ໂຕ ທຸກ຺ຂສ຺ສາຕິ ອຍເມວ ວຏ຺ຏທຸກ຺ຂສ຺ສນ຺ໂຕ ປຣິຈ຺ເຉໂທ, ນິພ຺ພານນ຺ຕິ ອຕ຺ໂຖ.

໑໐. ທຸຕິຍຉຜສ຺ສາຍຕນສຸຕ຺ຕວຓ຺ຓນາ

໗໒. ທສເມ ອນສ຺ສສນ຺ຕິ ນສ຺ສສິໍ, ນຏ຺ໂຐ ນາມມ຺ຫິ ອິຈ຺ເຈວ ອຕ຺ໂຖ. ອາຍຕິໍ ອປຸນພ຺ຠວາຍາຕິ ເອຕ຺ຖ ອາຍຕິໍ ອປຸນພ຺ຠໂວ ນາມ ນິພ຺ພານໍ, ນິພ຺ພານຕ຺ຖາຍ ປຫີນໍ ຠວິສ຺ສຕີຕິ ອຕ຺ໂຖ.

໑໑. ຕຕິຍຉຜສ຺ສາຍຕນສຸຕ຺ຕວຓ຺ຓນາ

໗໓. ເອກາທສເມ ອນສ຺ສສນ຺ຕິ ນຏ຺ໂຐ, ປນສ຺ສສນ຺ຕິ ອຕິນຏ຺ໂຐ. ເສສໍ ວຸຕ຺ຕນເຍເນວ ເວທິຕພ຺ພນ຺ຕິ.

ມິຄຊາລວຄ຺ໂຄ ສຕ຺ຕໂມ.