໘. ຄິລານວຄ຺ໂຄ

໑-໕. ປຐມຄິລານສຸຕ຺ຕາທິວຓ຺ຓນາ

໗໔-໗໘. ຄິລານວຄ຺ຄສ຺ສ ປຐເມ ອມຸກສ຺ມິນ຺ຕິ ອສຸກສ຺ມິໍ. ອຍເມວ ວາ ປາໂຐ. ອປ຺ປຎ຺ຎາໂຕຕິ ອຎ຺ຎາໂຕ ອປາກໂຏ. ນໂວປິ ຫິ ໂກຈິ ປຎ຺ຎາໂຕ ໂຫຕິ ຣາຫຸລຕ຺ເຖໂຣ ວິຍ ສຸມນສາມເຓໂຣ ວິຍ ຈ, ອຍໍ ປນ ນໂວ ເຈວ ອປຎ຺ຎາໂຕ ຈ. ເສສເມຕ຺ຖ ວຸຕ຺ຕນຍເມວາຕິ. ຕຖາ ອິໂຕ ປເຣສຸ ຈຕູສຸ.

໖. ປຐມອວິຊ຺ຊາປຫານສຸຕ຺ຕວຓ຺ຓນາ

໗໙. ຉຏ຺ເຐ ອນິຈ຺ຈໂຕ ຊານໂຕຕິ ທຸກ຺ຂານຕ຺ຕວເສນ ຊານໂຕປິ ປຫີຍຕິເຍວ, ອິທໍ ປນ ອນິຈ຺ຈລກ຺ຂຓໍ ທສ຺ເສຕ຺ວາ ວຸຕ຺ເຕ ພຸຊ຺ຌນກສ຺ສ ອຊ຺ຌາສເຍນ ວຸຕ຺ຕໍ.

໗. ທຸຕິຍອວິຊ຺ຊາປຫານສຸຕ຺ຕວຓ຺ຓນາ

໘໐. ສຕ຺ຕເມ ສພ຺ເພ ຘມ຺ມາຕິ ສພ຺ເພ ເຕຠູມກຘມ຺ມາ. ນາລໍ ອຠິນິເວສາຍາຕິ ອຠິນິເວສປຣາມາສຄ຺ຄາເຫນ ຄຓ຺ຫິຕຸໍ ນ ຍຸຕ຺ຕາ. ສພ຺ພນິມິຕ຺ຕານີຕິ ສພ຺ພານິ ສງ຺ຂາຣນິມິຕ຺ຕານິ. ອຎ຺ຎໂຕ ປສ຺ສຕີຕິ ຍຖາ ອປຣິຎ຺ຎາຕາຠິນິເວໂສ ຊໂນ ປສ຺ສຕິ, ຕໂຕ ອຎ຺ຎໂຕ ປສ຺ສຕິ. ອປຣິຎ຺ຎາຕາຠິນິເວໂສ ຫິ ຊໂນ ສພ຺ພນິມິຕ຺ຕານິປິ ອຕ຺ຕໂຕ ປສ຺ສຕິ. ປຣິຎ຺ຎາຕາຠິນິເວໂສ ປນ ອນຕ຺ຕໂຕ ປສ຺ສຕິ, ໂນ ອຕ຺ຕໂຕຕິ ເອວໍ ອິມສ຺ມິໍ ສຸຕ຺ເຕ ອນຕ຺ຕລກ຺ຂຓເມວ ກຖິຕໍ.

໘. ສມ຺ພຫຸລຠິກ຺ຂຸສຸຕ຺ຕວຓ຺ຓນາ

໘໑. ອຏ຺ຐເມ ອິຘ ໂນຕິ ເອຕ຺ຖ ໂນ-ກາໂຣ ນິປາຕມຕ຺ຕເມວ. ເສສໍ ອຸຕ຺ຕານຕ຺ຖເມວ. ເກວລໍ ອິຘ ທຸກ຺ຂລກ຺ຂຓໍ ກຖິຕນ຺ຕິ ເວທິຕພ຺ພໍ.

໙. ໂລກປຎ຺ຫາສຸຕ຺ຕວຓ຺ຓນາ

໘໒. ນວເມ ລຸຊ຺ຊຕີຕິ ປລຸຊ຺ຊຕິ ຠິຊ຺ຊຕິ. ອິຘ ອນິຈ຺ຈລກ຺ຂຓໍ ກຖິຕໍ.

໑໐. ຜຄ຺ຄຸນປຎ຺ຫາສຸຕ຺ຕວຓ຺ຓນາ

໘໓. ທສເມ ຉິນ຺ນປປຎ຺ເຈຕິ ຕຓ຺ຫາປປຎ຺ຈສ຺ສ ຉິນ຺ນຕ຺ຕາ ຉິນ຺ນປປຎ຺ເຈ. ຉິນ຺ນວຏຸເມຕິ ຕຓ຺ຫາວຏຸມສ຺ເສວ ຉິນ຺ນຕ຺ຕາ ຉິນ຺ນວຏຸເມ. ກິໍ ປຸຈ຺ຉາມີຕິ ປຸຈ຺ຉຕິ? ອຕິກ຺ກນ຺ຕພຸທ຺ເຘຫິ ປຣິຫຣິຕານິ ຈກ຺ຂຸໂສຕາທີນິ ປຸຈ຺ຉາມີຕິ ປຸຈ຺ຉຕິ. ອຖ ວາ ສເຈ ມຄ຺ເຄ ຠາວິເຕປິ ອນາຄເຕ ຈກ຺ຂຸໂສຕາທິວຏ຺ຏໍ ວຑ຺ເຒຍ຺ຍ, ຕໍ ປຸຈ຺ຉາມີຕິ ປຸຈ຺ຉຕີຕິ.

ຄິລານວຄ຺ໂຄ ອຏ຺ຐໂມ.