໒. ຍມກວຄ຺ໂຄ

໑-໔. ປຐມປຸພ຺ເພສມ຺ໂພຘສຸຕ຺ຕາທິວຓ຺ຓນາ

໑໓-໑໖. ຍມກວຄ຺ຄສ຺ສ ປຐມທຸຕິເຍສຸ ອຊ຺ຌຕ຺ຕິການນ຺ຕິ ອຊ຺ຌຕ຺ຕຊ຺ຌຕ຺ຕວເສນ ອຊ຺ຌຕ຺ຕິການໍ. ໂສ ປນ ເນສໍ ອຊ຺ຌຕ຺ຕິກຠາໂວ ຉນ຺ທຣາຄສ຺ສ ອຘິມຕ຺ຕພລວຕາຍ ເວທິຕພ຺ໂພ. ມນຸສ຺ສານຎ຺ຫິ ອນ຺ໂຕຆຣໍ ວິຍ ຉ ອຊ຺ຌຕ຺ຕິກາຍຕນານິ, ຆຣູປຈາຣໍ ວິຍ ຉ ພາຫິຣາຍຕນານິ. ຍຖາ ເນສໍ ປຸຕ຺ຕທາຣຘນຘຎ຺ຎປຸຓ຺ເຓ ອນ຺ໂຕຆເຣ ຉນ຺ທຣາໂຄ ອຘິມຕ຺ຕພລວາ ໂຫຕິ, ຕຕ຺ຖ ກສ຺ສຈິ ປວິສິຕຸໍ ນ ເທນ຺ຕິ, ອປ຺ປມຕ຺ເຕນ ຠາຊນສທ຺ທມຕ຺ເຕນາປິ ‘‘ກິໍ ເອຕ’’ນ຺ຕິ? ວຕ຺ຕາໂຣ ຠວນ຺ຕິ. ເອວເມວໍ ຉສຸ ອຊ຺ຌຕ຺ຕິເກສຸ ອາຍຕເນສຸ ອຘິມຕ຺ຕພລວຉນ຺ທຣາໂຄຕິ. ອິຕິ ອິມາຍ ຉນ຺ທຣາຄພລວຕາຍ ຕານິ ‘‘ອຊ຺ຌຕ຺ຕິການີ’’ຕິ ວຸຕ຺ຕານິ. ຆຣູປຈາເຣ ປນ ໂນ ຕຖາ ພລວາ ໂຫຕິ, ຕຕ຺ຖ ຈຣນ຺ເຕ ມນຸສ຺ເສປິ ຈຕຸປ຺ປທານິປິ ນ ສຫສາ ນິວາເຣນ຺ຕິ. ກິຎ຺ຈາປິ ນ ນິວາເຣນ຺ຕິ, ອນິຈ຺ຉນ຺ຕາ ປນ ປສຸປຈ຺ຉິມຕ຺ຕມ຺ປິ ຄຫິຕຸໍ ນ ເທນ຺ຕິ. ອິຕິ ເນສໍ ຕຕ຺ຖ ນ ອຘິມຕ຺ຕພລວຉນ຺ທຣາໂຄ ໂຫຕິ. ຣູປາທີສຸປິ ຕເຖວ ນ ອຘິມຕ຺ຕພລວຉນ຺ທຣາໂຄ, ຕສ຺ມາ ຕານິ ‘‘ພາຫິຣານີ’’ຕິ ວຸຕ຺ຕານິ. ວິຕ຺ຖາຣໂຕ ປນ ອຊ຺ຌຕ຺ຕິກພາຫິຣກຖາ ວິສຸທ຺ຘິມຄ຺ເຄ ວຸຕ຺ຕາວ. ເສສໍ ທ຺ວີສຸປິ ສຸຕ຺ເຕສຸ ເຫຏ຺ຐາ ວຸຕ຺ຕນຍເມວ. ຕຖາ ຕຕິຍຈຕຸຕ຺ເຖສຸ.

໕-໖. ປຐມໂນເຈອສ຺ສາທສຸຕ຺ຕາທິວຓ຺ຓນາ

໑໗-໑໘. ປຎ຺ຈເມ ນິສ຺ສຏາຕິ ນິກ຺ຂນ຺ຕາ. ວິສຎ຺ຎຸຕ຺ຕາຕິ ໂນສໍຍຸຕ຺ຕາ. ວິປ຺ປມຸຕ຺ຕາຕິ ໂນ ອຘິມຸຕ຺ຕາ ວິມຣິຍາທີກເຕນ ເຈຕສາຕິ ນິມ຺ມຣິຍາທີກເຕນ ເຈຕສາ. ຍຎ຺ຫິ ກິເລສຊາຕໍ ວາ ວຏ຺ຏໍ ວາ ອປ຺ປຫີນໍ ໂຫຕິ, ເຕນ ເສຂານໍ ຈິຕ຺ຕໍ ສມຣິຍາທີກຕໍ ນາມ. ຍໍ ປຫີນໍ, ເຕນ ວິມຣິຍາທີກຕໍ. ອິຘ ປນ ສພ຺ພໂສ ກິເລສານຎ຺ເຈວ ວຏ຺ຏສ຺ສ ຈ ປຫີນຕ຺ຕາ ວິມຣິຍາທີກເຕນ ກິເລສວຏ຺ຏມຣິຍາທໍ ອຕິກ຺ກນ຺ເຕນ ຈິຕ຺ເຕນ ວິຫຣິໍສູຕິ ອຕ຺ໂຖ. ຉຏ຺ເຐປິ ເອເສວ ນໂຍ. ຉສຸປິ ປເນເຕສຸ ສຸຕ຺ເຕສຸ ຈຕຸສຈ຺ຈເມວ ກຖິຕນ຺ຕິ ເວທິຕພ຺ພໍ.

໗-໑໐. ປຐມາຠິນນ຺ທສຸຕ຺ຕາທິວຓ຺ຓນາ

໑໙-໒໒. ສຕ຺ຕມາທີສຸ ຈຕູສຸ ວຏ຺ຏວິວຏ຺ຏເມວ ກຖິຕໍ. ອນຸປຸພ຺ພກຖາ ປນ ເນສໍ ເຫຏ຺ຐາ ວຸຕ຺ຕນເຍເນວ ເວທິຕພ຺ພາຕິ.

ຍມກວຄ຺ໂຄ ທຸຕິໂຍ.