໑໔. ເທວທຫວຄ຺ໂຄ

໑. ເທວທຫສຸຕ຺ຕວຓ຺ຓນາ

໑໓໔. ເທວທຫວຄ຺ຄສ຺ສ ປຐເມ ເທວທຫນ຺ຕິ ນປຸໍສກລິງ຺ເຄນ ລທ຺ຘນາໂມ ນິຄໂມ. ມໂນຣມາຕິ ມນໍ ຣມຍນ຺ຕາ, ມນາປາຕິ ອຕ຺ໂຖ. ອມໂນຣມາຕິ ອມນາປາ.

໒. ຂຓສຸຕ຺ຕວຓ຺ຓນາ

໑໓໕. ທຸຕິເຍ ຉຜສ຺ສາຍຕນິກາ ນາມາຕິ ວິສຸໍ ຉຜສ຺ສາຍຕນິກາ ນາມ ນິຣຍາ ນຕ຺ຖິ. ສພ຺ເພສຸປິ ຫິ ເອກຕິໍສມຫານິຣເຍສຸ ຉທ຺ວາຣຜສ຺ສາຍຕນປຎ຺ຎຕ຺ຕິ ໂຫຕິເຍວ. ອິທໍ ປນ ອວີຈິມຫານິຣຍໍ ສນ຺ຘາຍ ວຸຕ຺ຕໍ. ສຄ຺ຄາຕິ ອິຘາປິ ຕາວຕິໍສປຸຣເມວ ອຘິປ຺ເປຕໍ. ກາມາວຈຣເທວໂລເກ ປນ ເອກສ຺ມິມ຺ປິ ຉຜສ຺ສາຍຕນປຎ຺ຎຕ຺ຕິຍາ ອຠາໂວ ນາມ ນຕ຺ຖິ. ອິມິນາ ກິໍ ທີເປຕິ? ນິຣເຍ ເອກນ຺ຕທຸກ຺ຂສມປ຺ປິຕຠາເວນ, ເທວໂລເກ ຈ ເອກນ຺ຕສຸຂສມປ຺ປິຕຕ຺ຕາ ເອກນ຺ຕຂິຑ຺ຑາຣຕິວເສນ ອຸປ຺ປນ຺ນປມາເທນ ມຄ຺ຄພ຺ຣຫ຺ມຈຣິຍວາສໍ ວສິຕຸໍ ນ ສກ຺ກາ. ມນຸສ຺ສໂລໂກ ປນ ໂວກິຓ຺ຓສຸຂທຸກ຺ໂຂ, ອິເຘວ ອປາໂຍປິ ສຄ຺ໂຄປິ ປຎ຺ຎາຍຕິ. ອຍໍ ມຄ຺ຄພ຺ຣຫ຺ມຈຣິຍສ຺ສ ກມ຺ມຠູມິ ນາມ, ສາ ຕຸມ຺ເຫຫິ ລທ຺ຘາ. ຕສ຺ມາ ເຍ ໂວ ອິເມ ມານຸສ຺ສກາ ຂນ຺ຘາ ລທ຺ຘາ, ເຕ ໂວ ລາຠາ. ຍຎ຺ຈ ໂວ ອິທໍ ມນຸສ຺ສຕ຺ຕໍ ລທ຺ຘໍ, ປຏິລທ຺ໂຘ ໂວ ພ຺ຣຫ຺ມຈຣິຍວາສສ຺ສ ຂໂຓ ສມໂຍຕິ. ວຸຕ຺ຕມ຺ປິ ເຫຕໍ ໂປຣາເຓຫິ –

‘‘ອຍໍ ກມ຺ມຠູມິ ອິຘ ມຄ຺ຄຠາວນາ,

ຐານານິ ສໍເວຊນິຍາ ພຫູ ອິຘ;

ສໍເວຄສໍເວຊນິເຍສຸ ວຕ຺ຖຸສຸ,

ສໍເວຄຊາໂຕວ ປຍຸຎ຺ຈ ໂຍນິໂສ’’ຕິ.

໓. ປຐມຣູປາຣາມສຸຕ຺ຕວຓ຺ຓນາ

໑໓໖. ຕຕິເຍ ຣູປສມ຺ມຸທິຕາຕິ ຣູເປ ສມ຺ມຸທິຕາ ປໂມທິຕາ. ທຸກ຺ຂາຕິ ທຸກ຺ຂິຕາ. ສຸໂຂຕິ ນິພ຺ພານສຸເຂນ ສຸຂິໂຕ. ເກວລາຕິ ສກລາ. ຍາວຕຕ຺ຖີຕິ ວຸຈ຺ຈຕີຕິ ຍຕ຺ຕກາ ອຕ຺ຖີຕິ ວຸຈ຺ຈຕິ. ເອເຕ ໂວຕິ ເອຕ຺ຖ ໂວ-ກາໂຣ ນິປາຕມຕ຺ຕໍ. ປຈ຺ຈນີກມິທໍ ໂຫຕິ, ສພ຺ພໂລເກນ ປສ຺ສຕນ຺ຕິ ຍໍ ອິທໍ ປສ຺ສນ຺ຕານໍ ປຓ຺ຑິຕານໍ ທສ຺ສນໍ, ຕໍ ສພ຺ພໂລເກນ ປຈ຺ຈນີກໍ ໂຫຕິ ວິຣຸທ຺ຘໍ. ໂລໂກ ຫິ ປຎ຺ຈກ຺ຂນ຺ເຘ ນິຈ຺ຈາ ສຸຂາ ອຕ຺ຕາ ສຸຠາຕິ ມຎ຺ຎຕິ, ປຓ຺ຑິຕາ ອນິຈ຺ຈາ ທຸກ຺ຂາ ອນຕ຺ຕາ ອສຸຠາຕິ. ສຸຂໂຕ ອາຫູຕິ ສຸຂນ຺ຕິ ກເຖນ຺ຕິ. ສຸຂໂຕ ວິທູຕິ ສຸຂນ຺ຕິ ຊານນ຺ຕິ. ສພ຺ພເມຕໍ ນິພ຺ພານເມວ ສນ຺ຘາຍ ວຸຕ຺ຕໍ.

ສມ຺ມູຬ຺ເຫຕ຺ຖາຕິ ເອຕ຺ຖ ນິພ຺ພາເນ ສມ຺ມູຬ຺ຫາ. ອວິທ຺ທສູຕິ ພາລາ. ສພ຺ເພປິ ຫິ ຉນ຺ນວຸຕິປາສຓ຺ຑິໂນ ‘‘ນິພ຺ພານໍ ປາປຸຓິສ຺ສາມາ’’ຕິ ສຎ຺ຎິໂນ ໂຫນ຺ຕິ, ເຕ ປນ ‘‘ນິພ຺ພານໍ ນາມ ອິທ’’ນ຺ຕິປິ ນ ຊານນ຺ຕິ. ນິວຸຕານນ຺ຕິ ກິເລສນີວຣເຓນ ນິວຸຕານໍ ປຣິໂຍນທ຺ຘານໍ. ອນ຺ຘກາໂຣ ອປສ຺ສຕນ຺ຕິ ອປສ຺ສນ຺ຕານໍ ອນ຺ຘກາໂຣ ໂຫຕິ. ກິໍ ຕໍ ເອວໍ ໂຫຕິ? ນິພ຺ພານໍ ວາ ນິພ຺ພານທສ຺ສນໍ ວາ ອປສ຺ສນ຺ຕານຎ຺ຫິ ພາລານໍ ນິພ຺ພານມ຺ປິ ນິພ຺ພານທສ຺ສນມ຺ປິ ກາຬເມຆອວຈ຺ຉາທິຕໍ ວິຍ ຈນ຺ທມຓ຺ຑລໍ ກຏາເຫນ ປຏິກຸຊ຺ຊິຕປຕ຺ໂຕ ວິຍ ຈ ນິຈ຺ຈກາລໍ ຕໂມ ເຈວ ອນ຺ຘກາໂຣ ຈ ສມ຺ປຊ຺ຊຕິ.

ສຕຎ຺ຈ ວິວຏໍ ໂຫຕິ, ອາໂລໂກ ປສ຺ສຕາມິວາຕິ ສຕຎ຺ຈ ສປ຺ປຸຣິສານໍ ປຎ຺ຎາທສ຺ສເນນ ປສ຺ສນ຺ຕານໍ ນິພ຺ພານໍ ອາໂລໂກ ວິຍ ວິວຏໍ ໂຫຕິ. ສນ຺ຕິເກ ນ ວິຊານນ຺ຕິ, ມຄາ ຘມ຺ມສ຺ສ ອໂກວິທາຕິ ຍໍ ອຕ຺ຕໂນ ສຣີເຣ ເກເສ ວາ ໂລມາທີສຸ ວາ ອຎ຺ຎຕຣໂກຏ຺ຐາສໍ ປຣິຈ຺ຉິນ຺ທິຕ຺ວາ ອນນ຺ຕຣເມວ ອຘິຄນ຺ຕພ຺ພໂຕ ອຕ຺ຕໂນ ວາ ຂນ຺ຘານໍ ນິໂຣຘມຄ຺ຄໂຕ ສນ຺ຕິເກ ນິພ຺ພານໍ. ຕໍ ເອວໍ ສນ຺ຕິເກ ສມານມ຺ປິ ມຄ຺ຄຠູຕາ ຊນາ ມຄ຺ຄາມຄ຺ຄຘມ຺ມສ຺ສ ຈຕຸສຈ຺ຈຘມ຺ມສ຺ສ ວາ ອໂກວິທາ ນ ຊານນ຺ຕິ.

ມາຣເຘຍ຺ຍານຸປນ຺ເນຫີຕິ ເຕຠູມກວຏ຺ຏໍ ມາຣສ຺ສ ນິວາສຏ຺ຐານໍ ອນຸປນ຺ເນຫິ. ໂກ ນຸ ອຎ຺ຎຕ຺ຣ ອຣິເຍຠີຕິ ຐເປຕ຺ວາ ອຣິເຍ ໂກ ນຸ ອຎ຺ໂຎ ນິພ຺ພານປທໍ ຊານິຕຸໍ ອຣຫຕິ. ສມ຺ມທຎ຺ຎາຍ ປຣິນິພ຺ພນ຺ຕີຕິ ອຣຫຕ຺ຕປຎ຺ຎາຍ ສມ຺ມາ ຊານິຕ຺ວາ ອນນ຺ຕຣເມວ ອນາສວາ ຫຸຕ຺ວາ ກິເລສປຣິນິພ຺ພາເນນ ປຣິນິພ຺ພນ຺ຕິ. ອຖ ວາ ສມ຺ມທຎ຺ຎາຍ ອນາສວາ ຫຸຕ຺ວາ ອນ຺ເຕ ຂນ຺ຘປຣິນິພ຺ພາເນນ ປຣິນິພ຺ພາຍນ຺ຕິ.

໔-໑໒. ທຸຕິຍຣູປາຣາມສຸຕ຺ຕາທິວຓ຺ຓນາ

໑໓໗-໑໔໕. ຈຕຸຕ຺ຖໍ ສຸທ຺ຘິກໍ ກຕ຺ວາ ເທສິຍມາເນ ພຸຊ຺ຌນການໍ ອຊ຺ຌາສເຍນ ວຸຕ຺ຕໍ. ປຎ຺ຈມາທີນິ ຕຖາ ຕຖາ ພຸຊ຺ຌນ຺ຕານໍ ອຊ຺ຌາສເຍນ ວຸຕ຺ຕານິ. ອຕ຺ໂຖ ປນ ເຕສໍ ປາກໂຏເຍວາຕິ.

ເທວທຫວຄ຺ໂຄ ຈຸທ຺ທສໂມ.