໑໕. ນວປຸຣາຓວຄ຺ໂຄ

໑. ກມ຺ມນິໂຣຘສຸຕ຺ຕວຓ຺ຓນາ

໑໔໖. ນວປຸຣາຓວຄ຺ຄສ຺ສ ປຐເມ ນວປຸຣາຓານີຕິ ນວານິ ຈ ປຸຣາຓານິ ຈ. ຈກ຺ຂຸ, ຠິກ຺ຂເວ, ປຸຣາຓກມ຺ມນ຺ຕິ ນ ຈກ຺ຂຸ ປຸຣາຓໍ, ກມ຺ມເມວ ປຸຣາຓໍ, ກມ຺ມໂຕ ປນ ນິພ຺ພຕ຺ຕຕ຺ຕາ ປຈ຺ຈຍນາເມນ ເອວໍ ວຸຕ຺ຕໍ. ອຠິສງ຺ຂຕນ຺ຕິ ປຈ຺ຈເຍຫິ ອຠິສມາຄນ຺ຕ຺ວາ ກຕໍ. ອຠິສຎ຺ເຈຕຍິຕນ຺ຕິ ເຈຕນາຍ ປກປ຺ປິຕໍ. ເວທນິຍໍ ທຏ຺ຐພ຺ພນ຺ຕິ ເວທນາຍ ວຕ຺ຖູຕິ ປສ຺ສິຕພ຺ພໍ. ນິໂຣຘາ ວິມຸຕ຺ຕິໍ ຜຸສຕີຕິ ອິມສ຺ສ ຕິວິຘສ຺ສ ກມ຺ມສ຺ສ ນິໂຣເຘນ ວິມຸຕ຺ຕິໍ ຜຸສຕິ. ອຍໍ ວຸຈ຺ຈຕີຕິ ອຍໍ ຕສ຺ສາ ວິມຸຕ຺ຕິຍາ ອາຣມ຺ມຓຠູໂຕ ນິໂຣໂຘ ກມ຺ມນິໂຣໂຘຕິ ວຸຈ຺ຈຕິ. ອິຕິ ອິມສ຺ມິໍ ສຸຕ຺ເຕ ປຸພ຺ພຠາຄວິປສ຺ສນາ ກຖິຕາ.

໒-໕. ອນິຈ຺ຈນິພ຺ພານສປ຺ປາຍສຸຕ຺ຕາທິວຓ຺ຓນາ

໑໔໗-໑໕໐. ທຸຕິເຍ ນິພ຺ພານສປ຺ປາຍນ຺ຕິ ນິພ຺ພານສ຺ສ ສປ຺ປາຍໍ ອຸປກາຣປຏິປທໍ. ຕຕິຍາທີສຸປິ ເອເສວ ນໂຍ. ປຏິປາຏິຍາ ປນ ຈຕູສຸປິ ເອເຕສຸ ສຸຕ຺ເຕສຸ ສຫ ວິປສ຺ສນາຍ ຈຕ຺ຕາໂຣ ມຄ຺ຄາ ກຖິຕາ.

໖-໗. ອນ຺ເຕວາສິກສຸຕ຺ຕາທິວຓ຺ຓນາ

໑໕໑-໑໕໒. ຉຏ຺ເຐ ອນນ຺ເຕວາສິກນ຺ຕິ ອນ຺ໂຕ ວສນກກິເລສວິຣຫິຕໍ. ອນາຈຣິຍກນ຺ຕິ ອາຈຣຓກກິເລສວິຣຫິຕໍ. ອນ຺ຕສ຺ສ ວສນ຺ຕີຕິ ອນ຺ໂຕ ອສ຺ສ ວສນ຺ຕິ. ເຕ ນໍ ສມຸທາຈຣນ຺ຕີຕິ ເຕ ເອຕໍ ອຘິຠວນ຺ຕິ ອຊ຺ໂຌຕ຺ຖຣນ຺ຕິ ສິກ຺ຂາເປນ຺ຕິ ວາ. ‘‘ເອວໍ ເວຊ຺ຊກມ຺ມໍ ກໂຣຫິ, ເອວໍ ທູຕກມ຺ມ’’ນ຺ຕິ ອິຕິ ສິກ຺ຂາປນສງ຺ຂາເຕນ ສມຸທາຈຣຓຕ຺ເຖນສ຺ສ ເຕ ອາຈຣິຍາ ນາມ ໂຫນ຺ຕິ, ເຕຫິ ອາຈຣິເຍຫິ ສາຈຣິຍໂກຕິ ວຸຈ຺ຈຕິ. ເສສເມຕ຺ຖ ວຸຕ຺ຕນເຍເນວ ເວທິຕພ຺ພໍ. ສຕ຺ຕມໍ ເຫຏ຺ຐາ ກຖິຕນຍເມວ.

໘. ອຕ຺ຖິນຸໂຂປຣິຍາຍສຸຕ຺ຕວຓ຺ຓນາ

໑໕໓. ອຏ຺ຐເມ ຍໍ ປຣິຍາຍໍ ອາຄມ຺ມາຕິ ຍໍ ກາຣຓໍ ອາຄມ຺ມ. ອຎ຺ຎຕ຺ເຣວ ສທ຺ຘາຍາຕິ ວິນາ ສທ຺ຘາຍ ສທ຺ຘໍ ອປເນຕ຺ວາ. ເອຕ຺ຖ ຈ ສທ຺ຘາຕິ ນ ປຈ຺ຈກ຺ຂາ ສທ຺ຘາ. ໂຍ ປນ ປຣສ຺ສ ເອວໍ ກິຣ ເອວໍ ກິຣາຕິ ກເຖນ຺ຕສ຺ສ ສຸຕ຺ວາ ອຸປ຺ປນ຺ໂນ ສທ຺ທຫນາກາໂຣ, ຕໍ ສນ຺ຘາເຍຕໍ ວຸຕ຺ຕໍ. ຣຸຈິອາທີສຸປິ ຣຸຈາເປຕ຺ວາ ຂມາເປຕ຺ວາ ອຕ຺ເຖຕນ຺ຕິ ຄຫຓາກາໂຣ ຣຸຈິ ນາມ, ເອວໍ ກິຣ ຠວິສ຺ສຕີຕິ ອນຸສ຺ສວນໍ ອນຸສ຺ສໂວ, ນິສີທິຕ຺ວາ ເອກໍ ກາຣຓໍ ຈິນ຺ເຕນ຺ຕສ຺ສ ກາຣຓໍ ອຸປຏ຺ຐາຕິ, ເອວໍ ອຸປຏ຺ຐິຕສ຺ສ ອຕ຺ເຖຕນ຺ຕິ ຄຫຓໍ ອາກາຣປຣິວິຕກ຺ໂກ ນາມ, ກາຣຓວິຕກ຺ໂກຕິ ອຕ຺ໂຖ. ກາຣຓໍ ຈິນ຺ເຕນ຺ຕສ຺ສ ປາປິກາ ລທ຺ຘິ ອຸປ຺ປຊ຺ຊຕິ, ຕໍ ອຕ຺ເຖສາຕິ ຄຫຓາກາໂຣ ທິຏ຺ຐິນິຊ຺ຌານກ຺ຂນ຺ຕິ ນາມ. ອຎ຺ຎໍ ພ຺ຍາກເຣຍ຺ຍາຕິ ອິມານິ ປຎ຺ຈ ຐານານິ ມຸຎ຺ຈິຕ຺ວາ ອຣຫຕ຺ຕໍ ພ຺ຍາກເຣຍ຺ຍ. ອິມສ຺ມິໍ ສຸຕ຺ເຕ ເສຂາເສຂານໍ ປຈ຺ຈເວກ຺ຂຓາ ກຖິຕາ.

໙-໑໐. ອິນ຺ທ຺ຣິຍສມ຺ປນ຺ນສຸຕ຺ຕາທິວຓ຺ຓນາ

໑໕໔-໑໕໕. ນວເມ ອິນ຺ທ຺ຣິຍສມ຺ປນ຺ໂນຕິ ປຣິປຸຓ຺ຓິນ຺ທ຺ຣິໂຍ. ຕຕ຺ຖ ເຍນ ຉ ອິນ຺ທ຺ຣິຍານິ ສມ຺ມສິຕ຺ວາ ອຣຫຕ຺ຕໍ ປຕ຺ຕໍ, ໂສ ເຕຫິ ນິພ຺ພິເສວເນຫິ ອິນ຺ທ຺ຣິເຍຫິ ສມນ຺ນາຄຕຕ຺ຕາ, ຈກ຺ຂາທີນິ ວາ ຉ ອິນ຺ທ຺ຣິຍານິ ສມ຺ມສນ຺ຕສ຺ສ ອຸປ຺ປນ຺ເນຫິ ສທ຺ຘາທີຫິ ອິນ຺ທ຺ຣິເຍຫິ ສມນ຺ນາຄຕຕ຺ຕາ ປຣິປຸຓ຺ຓິນ຺ທ຺ຣິໂຍ ນາມ ໂຫຕິ, ຕໍ ສນ຺ຘາຍ ຠຄວາ ຈກ຺ຂຸນ຺ທ຺ຣິເຍ ເຈຕິອາທິນາ ນເຍນ ເທສນໍ ວິຕ຺ຖາເຣຕ຺ວາ ເອຕ຺ຕາວຕາ ໂຂ ຠິກ຺ຂຸ ອິນ຺ທ຺ຣິຍສມ຺ປນ຺ໂນ ໂຫຕີຕິ ອາຫ. ທສມໍ ເຫຏ຺ຐາ ວຸຕ຺ຕນຍເມວາຕິ.

ນວປຸຣາຓວຄ຺ໂຄ ປຎ຺ຈທສໂມ.

ຕຕິໂຍ ປຓ຺ຓາສໂກ.