໓. ໂລກນ຺ຕຄມນສຸຕ຺ຕວຓ຺ຓນາ

໑໑໖. ຕຕິເຍ ໂລກສ຺ສາຕິ ຈກ຺ກວາຬໂລກສ຺ສ. ໂລກສ຺ສ ອນ຺ຕນ຺ຕິ ສງ຺ຂາຣໂລກສ຺ສ ອນ຺ຕໍ. ວິຫາຣໍ ປາວິສີຕິ ‘‘ມຍິ ວິຫາຣໍ ປວິຏ຺ເຐ ອິເມ ຠິກ຺ຂູ, ອິມໍ ອຸທ຺ເທສໍ ອານນ຺ທໍ ປຸຈ຺ຉິສ຺ສນ຺ຕິ, ໂສ ຈ ເຕສໍ ມມ ສພ຺ພຎ຺ຎຸຕຎ຺ຎາເຓນ ສໍສນ຺ທິຕ຺ວາ ກເຖສ຺ສຕິ. ຕໂຕ ນໍ ໂຖເມສ຺ສາມິ, ມມ ໂຖມນໍ ສຸຕ຺ວາ ຠິກ຺ຂູ ອານນ຺ທໍ ອຸປສງ຺ກມິຕພ຺ພໍ, ວຈນຎ຺ຈສ຺ສ ໂສຕພ຺ພໍ ສທ຺ຘາຕພ຺ພໍ ມຎ຺ຎິສ຺ສນ຺ຕິ, ຕໍ ເນສໍ ຠວິສ຺ສຕິ ທີຆຣຕ຺ຕໍ ຫິຕາຍ ສຸຂາຍາ’’ຕິ ຈິນ຺ເຕຕ຺ວາ ສໍຂິຕ຺ເຕນ ຠາສິຕສ຺ສ ວິຕ຺ຖາເຣນ ອຕ຺ຖໍ ອວິຠຊິຕ຺ວາວ ນິສິນ຺ນາສເນ ອນ຺ຕຣຫິໂຕ ຄນ຺ຘກຸຏິຍໍ ປາຕຸຣໂຫສິ. ເຕນ ວຸຕ຺ຕໍ ‘‘ອຸຏ຺ຐາຍາສນາ ວິຫາຣໍ ປາວິສີ’’ຕິ.

ສຕ຺ຖຸ ເຈວ ສໍວຓ຺ຓິໂຕຕິ ສຕ຺ຖາຣາ ຈ ປສຕ຺ໂຖ. ວິຎ຺ຎູນນ຺ຕິ ອິທມ຺ປິ ກຣຓຕ຺ເຖ ສາມິວຈນໍ, ປຓ຺ຑິເຕຫິ ສພ຺ຣຫ຺ມຈາຣີຫິ ຈ ສມ຺ຠາວິໂຕຕິ ອຕ຺ໂຖ. ປໂຫຕີຕິ ສກ຺ໂກຕິ. ອຕິກ຺ກມ຺ເມວ ມູລໍ ອຕິກ຺ກມ຺ເມວ ຂນ຺ຘນ຺ຕິ ສາໂຣ ນາມ ມູເລ ວາ ຂນ຺ເຘ ວາ ຠເວຍ຺ຍ, ຕມ຺ປິ ອຕິກ຺ກມິຕ຺ວາຕິ ອຕ຺ໂຖ. ເອວໍສມ຺ປທມິທນ຺ຕິ ເອວໍສມ຺ປຕ຺ຕິກໍ, ອີທິສນ຺ຕິ ອຕ຺ໂຖ. ອຕິສິຕ຺ວາຕິ ອຕິກ຺ກມິຕ຺ວາ. ຊານໍ ຊານາຕີຕິ ຊານິຕພ຺ພເມວ ຊານາຕິ. ປສ຺ສໍ ປສ຺ສຕີຕິ ປສ຺ສິຕພ຺ພເມວ ປສ຺ສຕິ. ຍຖາ ວາ ເອກຈ຺ໂຈ ວິປຣີຕໍ ຄຓ຺ຫນ຺ໂຕ ຊານນ຺ໂຕປິ ນ ຊານາຕິ, ປສ຺ສນ຺ໂຕປິ ນ ປສ຺ສຕິ, ນ ເອວໍ ຠຄວາ. ຠຄວາ ປນ ຊານນ຺ໂຕ ຊານາຕິ, ປສ຺ສນ຺ໂຕ ປສ຺ສຕິເຍວ. ສ຺ວາຍໍ ທສ຺ສນປຣິຓາຍກຏ຺ເຐນ ຈກ຺ຂຸຠູໂຕ. ວິທິຕກຣຓຏ຺ເຐນ ຎາຓຠູໂຕ. ອວິປຣີຕສຠາວຏ຺ເຐນ ປຣິຍຕ຺ຕິຘມ຺ມປວຕ຺ຕນໂຕ ວາ ຫທເຍນ ຈິນ຺ເຕຕ຺ວາ ວາຈາຍ ນິຈ຺ຉາຣິຕຘມ຺ມມໂຍຕິ ຘມ຺ມຠູໂຕ. ເສຏ຺ຐຏ຺ເຐນ ພ຺ຣຫ຺ມຠູໂຕ. ອຖ ວາ ຈກ຺ຂຸ ວິຍ ຠູໂຕຕິ ຈກ຺ຂຸຠູໂຕ. ເອວເມເຕສຸ ປເທສຸ ອຕ຺ໂຖ ເວທິຕພ຺ໂພ. ສ຺ວາຍໍ ຘມ຺ມສ຺ສ ວຕ຺ຕນໂຕ ວຕ຺ຕາ. ປວຕ຺ຕນໂຕ ປວຕ຺ຕາ. ອຕ຺ຖໍ ນີຫຣິຕ຺ວາ ນີຫຣິຕ຺ວາ ທສ຺ສນສມຕ຺ຖຕາຍ ອຕ຺ຖສ຺ສ ນິນ຺ເນຕາ. ອມຕາຘິຄມາຍ ປຏິປຕ຺ຕິໍ ເທເສຕີຕິ ອມຕສ຺ສ ທາຕາ.

ອຄຣຸໍ ກຣິຕ຺ວາຕິ ປຸນປ຺ປຸນໍ ຍາຈາເປນ຺ໂຕປິ ຫິ ຄຣຸໍ ກໂຣຕິ ນາມ. ອຕ຺ຕໂນ ເສກ຺ຂປຏິສມ຺ຠິທາຎາເຓ ຐຕ຺ວາ ສິເນຣຸປາທໂຕ ວາລິກໍ ອຸທ຺ຘຣມາໂນ ວິຍ ທຸພ຺ພິຎ຺ເຎຍ຺ຍໍ ກຕ຺ວາ ກເຖນ຺ໂຕປິ ຄຣຸໍ ກໂຣຕິເຍວ ນາມ. ເອວໍ ອກຕ຺ວາ ອມ຺ເຫ ປຸນປ຺ປຸນໍ ອຍາຈາເປຕ຺ວາ ສຸວິຎ຺ເຎຍ຺ຍມ຺ປິ ໂນ ກຕ຺ວາ ກເຖຫີຕິ ວຸຕ຺ຕໍ ໂຫຕິ.

ຍໍ ໂຂ ໂວຕິ ຍໍ ໂຂ ຕຸມ຺ຫາກໍ. ຈກ຺ຂຸນາ ໂຂ, ອາວຸໂສ, ໂລກສ຺ມິໍ ໂລກສຎ຺ຎີ ໂຫຕິ ໂລກມານີຕິ ຈກ຺ຂຸຎ຺ຫິ ໂລເກ ອປ຺ປຫີນທິຏ຺ຐິ ປຸຖຸຊ຺ຊໂນ ສຕ຺ຕໂລກວເສນ ໂລໂກຕິ ສຎ຺ຊານາຕິ ເຈວ ມຎ຺ຎຕິ ຈ, ຕຖາ ຈກ຺ກວາຬໂລກວເສນ. ນ ຫິ ອຎ຺ຎຕ຺ຣ ຈກ຺ຂາທີຫິ ທ຺ວາທສາຍຕເນຫິ ຕສ຺ສ ສາ ສຎ຺ຎາ ວາ ມາໂນ ວາ ອຸປ຺ປຊ຺ຊຕິ. ເຕນ ວຸຕ຺ຕໍ, ‘‘ຈກ຺ຂຸນາ ໂຂ, ອາວຸໂສ, ໂລກສ຺ມິໍ ໂລກສຎ຺ຎີ ໂຫຕິ ໂລກມານີ’’ຕິ. ອິມສ຺ສ ຈ ໂລກສ຺ສ ຄມເນນ ອນ຺ໂຕ ນາມ ຎາຕຸໍ ວາ ທຏ຺ຐຸໍ ວາ ປຕ຺ຕຸໍ ວາ ນ ສກ຺ກາ. ລຸຊ຺ຊນຏ຺ເຐນ ປນ ຕສ຺ເສວ ຈກ຺ຂາທິເຠທສ຺ສ ໂລກສ຺ສ ນິພ຺ພານສງ຺ຂາຕໍ ອນ຺ຕໍ ອປ຺ປຕ຺ວາ ວຏ຺ຏທຸກ຺ຂສ຺ສ ອນ຺ຕກິຣິຍາ ນາມ ນຕ຺ຖີຕິ ເວທິຕພ຺ພາ.

ເອວໍ ປຎ຺ຫໍ ວິສ຺ສຊ຺ເຊຕ຺ວາ ອິທານິ ‘‘ສາວເກນ ປຎ຺ໂຫ ກຖິໂຕຕິ ມາ ນິກ຺ກງ຺ຂາ ອຫຸວຕ຺ຖ, ອຍໍ ຠຄວາ ສພ຺ພຎ຺ຎຸຕຎ຺ຎາຓຕຸລໍ ຄເຫຕ຺ວາ ນິສິນ຺ໂນ. ອິຈ຺ຉມານາ ຕເມວ ອຸປສງ຺ກມິຕ຺ວາ ນິກ຺ກງ຺ຂາ ໂຫຖາ’’ຕິ ອຸຍ຺ໂຍເຊນ຺ໂຕ ອາກງ຺ຂມານາ ປນາຕິອາທິມາຫ.

ອິເມຫິ ອາກາເຣຫີຕິ ອິເມຫິ ກາຣເຓຫິ ຈກ຺ກວາຬໂລກສ຺ສ ອນ຺ຕາຠາວກາຣເຓຫິ ເຈວ ສງ຺ຂາຣໂລກສ຺ສ ອນ຺ຕາປຕ຺ຕິກາຣເຓຫິ ຈ. ອິເມຫິ ປເທຫີຕິ ອິເມຫິ ອກ຺ຂຣສມ຺ປິຓ຺ຑເນຫິ. ພ຺ຍຎ຺ຊເນຫີຕິ ປາຏິເຍກ຺ກອກ຺ຂເຣຫິ.

ປຓ຺ຑິໂຕຕິ ປຓ຺ຑິຈ຺ເຈນ ສມນ຺ນາຄໂຕ. ຈຕູຫິ ກາຣເຓຫິ ປຓ຺ຑິໂຕ ຘາຕຸກຸສໂລ ອາຍຕນກຸສໂລ ປຈ຺ຈຍາກາຣກຸສໂລ ກາຣຓາກາຣຓກຸສໂລຕິ. ມຫາປຎ຺ໂຎຕິ ມຫນ຺ເຕ ອຕ຺ເຖ ມຫນ຺ເຕ ຘມ຺ເມ ມຫນ຺ຕາ ນິຣຸຕ຺ຕິໂຍ ມຫນ຺ຕານິ ປຏິຠານານິ ປຏິຄ຺ຄຓ຺ຫນສມຕ຺ຖຕາຍ ມຫາປຎ຺ຎາຍ ສມນ຺ນາຄໂຕ. ຍຖາ ຕໍ ອານນ຺ເທນາຕິ ຍຖາ ອານນ຺ເທນ ພ຺ຍາກຕໍ, ຕໍ ສນ຺ຘາຍ ວຸຕ຺ຕໍ. ຍຖາ ອານນ຺ເທນ ຕໍ ພ຺ຍາກຕໍ, ອຫມ຺ປິ ຕໍ ເອວເມວ ພ຺ຍາກເຣຍ຺ຍນ຺ຕິ ອຕ຺ໂຖ.