໑໒. ໂລກກາມຄຸຓວຄ຺ໂຄ

໑-໒. ປຐມມາຣປາສສຸຕ຺ຕາທິວຓ຺ຓນາ

໑໑໔-໑໑໕. ໂລກກາມຄຸຓວຄ຺ຄສ຺ສ ປຐເມ ອາວາສຄໂຕຕິ ວສນຏ຺ຐານໍ ຄໂຕ. ມາຣສ຺ສ ວສໍ ຄໂຕຕິ ຕິວິຘສ຺ສາປິ ມາຣສ຺ສ ວສໍ ຄໂຕ. ປຏິມຸກ຺ກ’ສ຺ສ ມາຣປາໂສຕິ ອສ຺ສ ຄີວາຍ ມາຣປາໂສ ປຏິມຸກ຺ໂກ ປເວສິໂຕ. ທຸຕິຍໍ ອຸຕ຺ຕານເມວ.

໓. ໂລກນ຺ຕຄມນສຸຕ຺ຕວຓ຺ຓນາ

໑໑໖. ຕຕິເຍ ໂລກສ຺ສາຕິ ຈກ຺ກວາຬໂລກສ຺ສ. ໂລກສ຺ສ ອນ຺ຕນ຺ຕິ ສງ຺ຂາຣໂລກສ຺ສ ອນ຺ຕໍ. ວິຫາຣໍ ປາວິສີຕິ ‘‘ມຍິ ວິຫາຣໍ ປວິຏ຺ເຐ ອິເມ ຠິກ຺ຂູ, ອິມໍ ອຸທ຺ເທສໍ ອານນ຺ທໍ ປຸຈ຺ຉິສ຺ສນ຺ຕິ, ໂສ ຈ ເຕສໍ ມມ ສພ຺ພຎ຺ຎຸຕຎ຺ຎາເຓນ ສໍສນ຺ທິຕ຺ວາ ກເຖສ຺ສຕິ. ຕໂຕ ນໍ ໂຖເມສ຺ສາມິ, ມມ ໂຖມນໍ ສຸຕ຺ວາ ຠິກ຺ຂູ ອານນ຺ທໍ ອຸປສງ຺ກມິຕພ຺ພໍ, ວຈນຎ຺ຈສ຺ສ ໂສຕພ຺ພໍ ສທ຺ຘາຕພ຺ພໍ ມຎ຺ຎິສ຺ສນ຺ຕິ, ຕໍ ເນສໍ ຠວິສ຺ສຕິ ທີຆຣຕ຺ຕໍ ຫິຕາຍ ສຸຂາຍາ’’ຕິ ຈິນ຺ເຕຕ຺ວາ ສໍຂິຕ຺ເຕນ ຠາສິຕສ຺ສ ວິຕ຺ຖາເຣນ ອຕ຺ຖໍ ອວິຠຊິຕ຺ວາວ ນິສິນ຺ນາສເນ ອນ຺ຕຣຫິໂຕ ຄນ຺ຘກຸຏິຍໍ ປາຕຸຣໂຫສິ. ເຕນ ວຸຕ຺ຕໍ ‘‘ອຸຏ຺ຐາຍາສນາ ວິຫາຣໍ ປາວິສີ’’ຕິ.

ສຕ຺ຖຸ ເຈວ ສໍວຓ຺ຓິໂຕຕິ ສຕ຺ຖາຣາ ຈ ປສຕ຺ໂຖ. ວິຎ຺ຎູນນ຺ຕິ ອິທມ຺ປິ ກຣຓຕ຺ເຖ ສາມິວຈນໍ, ປຓ຺ຑິເຕຫິ ສພ຺ຣຫ຺ມຈາຣີຫິ ຈ ສມ຺ຠາວິໂຕຕິ ອຕ຺ໂຖ. ປໂຫຕີຕິ ສກ຺ໂກຕິ. ອຕິກ຺ກມ຺ເມວ ມູລໍ ອຕິກ຺ກມ຺ເມວ ຂນ຺ຘນ຺ຕິ ສາໂຣ ນາມ ມູເລ ວາ ຂນ຺ເຘ ວາ ຠເວຍ຺ຍ, ຕມ຺ປິ ອຕິກ຺ກມິຕ຺ວາຕິ ອຕ຺ໂຖ. ເອວໍສມ຺ປທມິທນ຺ຕິ ເອວໍສມ຺ປຕ຺ຕິກໍ, ອີທິສນ຺ຕິ ອຕ຺ໂຖ. ອຕິສິຕ຺ວາຕິ ອຕິກ຺ກມິຕ຺ວາ. ຊານໍ ຊານາຕີຕິ ຊານິຕພ຺ພເມວ ຊານາຕິ. ປສ຺ສໍ ປສ຺ສຕີຕິ ປສ຺ສິຕພ຺ພເມວ ປສ຺ສຕິ. ຍຖາ ວາ ເອກຈ຺ໂຈ ວິປຣີຕໍ ຄຓ຺ຫນ຺ໂຕ ຊານນ຺ໂຕປິ ນ ຊານາຕິ, ປສ຺ສນ຺ໂຕປິ ນ ປສ຺ສຕິ, ນ ເອວໍ ຠຄວາ. ຠຄວາ ປນ ຊານນ຺ໂຕ ຊານາຕິ, ປສ຺ສນ຺ໂຕ ປສ຺ສຕິເຍວ. ສ຺ວາຍໍ ທສ຺ສນປຣິຓາຍກຏ຺ເຐນ ຈກ຺ຂຸຠູໂຕ. ວິທິຕກຣຓຏ຺ເຐນ ຎາຓຠູໂຕ. ອວິປຣີຕສຠາວຏ຺ເຐນ ປຣິຍຕ຺ຕິຘມ຺ມປວຕ຺ຕນໂຕ ວາ ຫທເຍນ ຈິນ຺ເຕຕ຺ວາ ວາຈາຍ ນິຈ຺ຉາຣິຕຘມ຺ມມໂຍຕິ ຘມ຺ມຠູໂຕ. ເສຏ຺ຐຏ຺ເຐນ ພ຺ຣຫ຺ມຠູໂຕ. ອຖ ວາ ຈກ຺ຂຸ ວິຍ ຠູໂຕຕິ ຈກ຺ຂຸຠູໂຕ. ເອວເມເຕສຸ ປເທສຸ ອຕ຺ໂຖ ເວທິຕພ຺ໂພ. ສ຺ວາຍໍ ຘມ຺ມສ຺ສ ວຕ຺ຕນໂຕ ວຕ຺ຕາ. ປວຕ຺ຕນໂຕ ປວຕ຺ຕາ. ອຕ຺ຖໍ ນີຫຣິຕ຺ວາ ນີຫຣິຕ຺ວາ ທສ຺ສນສມຕ຺ຖຕາຍ ອຕ຺ຖສ຺ສ ນິນ຺ເນຕາ. ອມຕາຘິຄມາຍ ປຏິປຕ຺ຕິໍ ເທເສຕີຕິ ອມຕສ຺ສ ທາຕາ.

ອຄຣຸໍ ກຣິຕ຺ວາຕິ ປຸນປ຺ປຸນໍ ຍາຈາເປນ຺ໂຕປິ ຫິ ຄຣຸໍ ກໂຣຕິ ນາມ. ອຕ຺ຕໂນ ເສກ຺ຂປຏິສມ຺ຠິທາຎາເຓ ຐຕ຺ວາ ສິເນຣຸປາທໂຕ ວາລິກໍ ອຸທ຺ຘຣມາໂນ ວິຍ ທຸພ຺ພິຎ຺ເຎຍ຺ຍໍ ກຕ຺ວາ ກເຖນ຺ໂຕປິ ຄຣຸໍ ກໂຣຕິເຍວ ນາມ. ເອວໍ ອກຕ຺ວາ ອມ຺ເຫ ປຸນປ຺ປຸນໍ ອຍາຈາເປຕ຺ວາ ສຸວິຎ຺ເຎຍ຺ຍມ຺ປິ ໂນ ກຕ຺ວາ ກເຖຫີຕິ ວຸຕ຺ຕໍ ໂຫຕິ.

ຍໍ ໂຂ ໂວຕິ ຍໍ ໂຂ ຕຸມ຺ຫາກໍ. ຈກ຺ຂຸນາ ໂຂ, ອາວຸໂສ, ໂລກສ຺ມິໍ ໂລກສຎ຺ຎີ ໂຫຕິ ໂລກມານີຕິ ຈກ຺ຂຸຎ຺ຫິ ໂລເກ ອປ຺ປຫີນທິຏ຺ຐິ ປຸຖຸຊ຺ຊໂນ ສຕ຺ຕໂລກວເສນ ໂລໂກຕິ ສຎ຺ຊານາຕິ ເຈວ ມຎ຺ຎຕິ ຈ, ຕຖາ ຈກ຺ກວາຬໂລກວເສນ. ນ ຫິ ອຎ຺ຎຕ຺ຣ ຈກ຺ຂາທີຫິ ທ຺ວາທສາຍຕເນຫິ ຕສ຺ສ ສາ ສຎ຺ຎາ ວາ ມາໂນ ວາ ອຸປ຺ປຊ຺ຊຕິ. ເຕນ ວຸຕ຺ຕໍ, ‘‘ຈກ຺ຂຸນາ ໂຂ, ອາວຸໂສ, ໂລກສ຺ມິໍ ໂລກສຎ຺ຎີ ໂຫຕິ ໂລກມານີ’’ຕິ. ອິມສ຺ສ ຈ ໂລກສ຺ສ ຄມເນນ ອນ຺ໂຕ ນາມ ຎາຕຸໍ ວາ ທຏ຺ຐຸໍ ວາ ປຕ຺ຕຸໍ ວາ ນ ສກ຺ກາ. ລຸຊ຺ຊນຏ຺ເຐນ ປນ ຕສ຺ເສວ ຈກ຺ຂາທິເຠທສ຺ສ ໂລກສ຺ສ ນິພ຺ພານສງ຺ຂາຕໍ ອນ຺ຕໍ ອປ຺ປຕ຺ວາ ວຏ຺ຏທຸກ຺ຂສ຺ສ ອນ຺ຕກິຣິຍາ ນາມ ນຕ຺ຖີຕິ ເວທິຕພ຺ພາ.

ເອວໍ ປຎ຺ຫໍ ວິສ຺ສຊ຺ເຊຕ຺ວາ ອິທານິ ‘‘ສາວເກນ ປຎ຺ໂຫ ກຖິໂຕຕິ ມາ ນິກ຺ກງ຺ຂາ ອຫຸວຕ຺ຖ, ອຍໍ ຠຄວາ ສພ຺ພຎ຺ຎຸຕຎ຺ຎາຓຕຸລໍ ຄເຫຕ຺ວາ ນິສິນ຺ໂນ. ອິຈ຺ຉມານາ ຕເມວ ອຸປສງ຺ກມິຕ຺ວາ ນິກ຺ກງ຺ຂາ ໂຫຖາ’’ຕິ ອຸຍ຺ໂຍເຊນ຺ໂຕ ອາກງ຺ຂມານາ ປນາຕິອາທິມາຫ.

ອິເມຫິ ອາກາເຣຫີຕິ ອິເມຫິ ກາຣເຓຫິ ຈກ຺ກວາຬໂລກສ຺ສ ອນ຺ຕາຠາວກາຣເຓຫິ ເຈວ ສງ຺ຂາຣໂລກສ຺ສ ອນ຺ຕາປຕ຺ຕິກາຣເຓຫິ ຈ. ອິເມຫິ ປເທຫີຕິ ອິເມຫິ ອກ຺ຂຣສມ຺ປິຓ຺ຑເນຫິ. ພ຺ຍຎ຺ຊເນຫີຕິ ປາຏິເຍກ຺ກອກ຺ຂເຣຫິ.

ປຓ຺ຑິໂຕຕິ ປຓ຺ຑິຈ຺ເຈນ ສມນ຺ນາຄໂຕ. ຈຕູຫິ ກາຣເຓຫິ ປຓ຺ຑິໂຕ ຘາຕຸກຸສໂລ ອາຍຕນກຸສໂລ ປຈ຺ຈຍາກາຣກຸສໂລ ກາຣຓາກາຣຓກຸສໂລຕິ. ມຫາປຎ຺ໂຎຕິ ມຫນ຺ເຕ ອຕ຺ເຖ ມຫນ຺ເຕ ຘມ຺ເມ ມຫນ຺ຕາ ນິຣຸຕ຺ຕິໂຍ ມຫນ຺ຕານິ ປຏິຠານານິ ປຏິຄ຺ຄຓ຺ຫນສມຕ຺ຖຕາຍ ມຫາປຎ຺ຎາຍ ສມນ຺ນາຄໂຕ. ຍຖາ ຕໍ ອານນ຺ເທນາຕິ ຍຖາ ອານນ຺ເທນ ພ຺ຍາກຕໍ, ຕໍ ສນ຺ຘາຍ ວຸຕ຺ຕໍ. ຍຖາ ອານນ຺ເທນ ຕໍ ພ຺ຍາກຕໍ, ອຫມ຺ປິ ຕໍ ເອວເມວ ພ຺ຍາກເຣຍ຺ຍນ຺ຕິ ອຕ຺ໂຖ.

໔. ກາມຄຸຓສຸຕ຺ຕວຓ຺ຓນາ

໑໑໗. ຈຕຸຕ຺ເຖ ເຍ ເມຕິ ເຍ ມມ. ເຈຕໂສ ສມ຺ຜຸຏ຺ຐປຸພ຺ພາຕິ ຈິຕ຺ເຕນ ອນຸຠູຕປຸພ຺ພາ. ຕຕ຺ຣ ເມ ຈິຕ຺ຕໍ ພຫຸລໍ ຄຈ຺ຉມານໍ ຄຈ຺ເຉຍ຺ຍາຕິ ເຕສຸ ປາສາທຕ຺ຕຍຕິວິຘນາຏກາທິເຠທສມ຺ປຕ຺ຕິວເສນ ອນຸຠູຕປຸພ຺ເພສຸ ປຎ຺ຈສຸ ກາມຄຸເຓສຸ ພຫູສຸ ວາເຣສຸ ອຸປ຺ປຊ຺ຊມານໍ ອຸປ຺ປຊ຺ເຊຍ຺ຍາຕິ ທີເປຕິ. ປຈ຺ຈຸປ຺ປນ຺ເນສຸ ວາຕິ ອິຘ ປຘານຈຣິຍກາເລ ຉພ຺ພສ຺ສານິ ສຸປຸປ຺ຜິຕວນສຓ຺ຑຊາຕານໍ ທິຊຄຓາທີນໍ ວເສນ ທິຏ຺ຐສຸຕາທິເຠທໍ ມໂນຣມາຣມ຺ມຓໍ ກາມຄຸຓໍ ກຕ຺ວາ ທສ຺ເສນ຺ໂຕ ‘‘ເອວຣູເປສຸ ປຈ຺ຈຸປ຺ປນ຺ເນສຸ ວາ ພຫຸລໍ ອຸປ຺ປຊ຺ເຊຍ຺ຍາ’’ຕິ ທສ຺ເສຕິ. ອປ຺ປໍ ວາ ອນາຄເຕສູຕິ ອນາຄເຕ ‘‘ເມຕ຺ເຕຍ຺ໂຍ ນາມ ພຸທ຺ໂຘ ຠວິສ຺ສຕິ, ສງ຺ໂຂ ນາມ ຣາຊາ, ເກຕຸມຕີ ນາມ ຣາຊຘານີ’’ຕິອາທິວເສນ (ທີ. ນິ. ໓.໑໐໖) ປຣິຕ຺ຕກເມວ ອນາຄເຕສຸ ກາມຄຸເຓສຸ ອຸປ຺ປຊ຺ເຊຍ຺ຍາຕິ ທສ຺ເສຕິ. ຕຕ຺ຣ ເມ ອຕ຺ຕຣູເປນາຕິ ຕຕ຺ຣ ມຍາ ອຕ຺ຕໂນ ຫິຕກາມຊາຕິເກນ. ອປ຺ປມາໂທຕິ ສາຕຈ຺ຈກິຣິຍາ ປຎ຺ຈສຸ ກາມຄຸເຓສຸ ຈິຕ຺ຕສ຺ສ ອໂວສ຺ສຄ຺ໂຄ. ສຕີຕິ ອາຣມ຺ມຓປຣິຄ຺ຄຫິຕສຕິ. ອາຣກ຺ໂຂຕິ ອຍໍ ອປ຺ປມາໂທ ຈ ສຕິ ຈ ເຈຕໂສ ອາຣກ຺ໂຂ ກຣຓີໂຍ, ເອວໍ ເມ ອໂຫສີຕິ ທສ຺ເສຕິ, ອາຣກ຺ຂຕ຺ຖາຍ ອິເມ ທ຺ເວ ຘມ຺ມາ ກາຕພ຺ພາຕິ ວຸຕ຺ຕໍ ໂຫຕິ.

ຕສ຺ມາຕິຫ, ຠິກ຺ຂເວ, ເສ ອາຍຕເນ ເວທິຕພ຺ເພຕິ ຍສ຺ມາ ເຈຕໂສ ອາຣກ຺ຂຕ຺ຖາຍ ອປ຺ປມາໂທ ຈ ສຕິ ຈ ກາຕພ຺ພາ, ຍສ຺ມາ ຕສ຺ມິໍ ອາຍຕເນ ວິທິເຕ ອປ຺ປມາເທນ ວາ ສຕິຍາ ວາ ກາຕພ຺ພໍ ນຕ຺ຖິ, ຕສ຺ມາ ເສ ອາຍຕເນ ເວທິຕພ຺ເພ, ຕໍ ກາຣຓໍ ຊານິຕພ຺ພນ຺ຕິ ອຕ຺ໂຖ. ສຬາຍຕນນິໂຣຘນ຺ຕິ ສຬາຍຕນນິໂຣໂຘ ວຸຈ຺ຈຕິ ນິພ຺ພານໍ, ຕໍ ສນ຺ຘາຍ ຠາສິຕນ຺ຕິ ອຕ຺ໂຖ. ນິພ຺ພານສ຺ມິຎ຺ຫິ ຈກ຺ຂຸອາທີນິ ເຈວ ນິຣຸຊ຺ຌນ຺ຕິ ຣູປສຎ຺ຎາທໂຍ ຈ ນິຣຸຊ຺ຌນ຺ຕີຕິ. ເສສໍ ວຸຕ຺ຕນຍເມວ.

໕-໖. ສກ຺ກປຎ຺ຫສຸຕ຺ຕາທິວຓ຺ຓນາ

໑໑໘-໑໑໙. ປຎ຺ຈເມ ທິຏ຺ເຐວ ຘມ຺ເມຕິ ອິມສ຺ມິໍເຍວ ອຕ຺ຕຠາເວ. ປຣິນິພ຺ພາຍນ຺ຕີຕິ ກິເລສປຣິນິພ຺ພາເນນ ປຣິນິພ຺ພາຍນ຺ຕິ. ຕນ຺ນິສ຺ສິຕໍ ວິຎ຺ຎາຓໍ ໂຫຕີຕິ ຕຓ຺ຫານິສ຺ສິຕໍ ກມ຺ມວິຎ຺ຎາຓໍ ໂຫຕິ. ຕທຸປາທານນ຺ຕິ ຕໍຄຫຓໍ, ຕຓ຺ຫາຄຫເຓນ ສຫຄຕໍ ວິຎ຺ຎາຓໍ ໂຫຕີຕິ ອຕ຺ໂຖ. ຉຏ຺ຐໍ ອຸຕ຺ຕານເມວ.

໗. ສາຣິປຸຕ຺ຕສທ຺ຘິວິຫາຣິກສຸຕ຺ຕວຓ຺ຓນາ

໑໒໐. ສຕ຺ຕເມ ສນ຺ຕາເນສ຺ສຕີຕິ ຆເຏສ຺ສຕິ, ໂຍຄວິຈ຺ເຉທມສ຺ສ ປາປຸຓິຕຸໍ ນ ທສ຺ສຕິ.

໘. ຣາຫຸໂລວາທສຸຕ຺ຕວຓ຺ຓນາ

໑໒໑. ອຏ຺ຐເມ ວິມຸຕ຺ຕິປຣິປາຈນິຍາຕິ ວິມຸຕ຺ຕິໍ ປຣິປາເຈນ຺ຕີຕິ ວິມຸຕ຺ຕິປຣິປາຈນິຍາ. ຘມ຺ມາຕິ ປນ຺ນຣສ ຘມ຺ມາ, ເຕ ສທ຺ຘິນ຺ທ຺ຣິຍາທີນໍ ວິສຸທ຺ຘິກຣຓວເສນ ເວທິຕພ຺ພາ. ວຸຕ຺ຕຎ຺ເຫຕໍ –

‘‘ອສ຺ສທ຺ເຘ ປຸຄ຺ຄເລ ປຣິວຊ຺ຊຍໂຕ, ສທ຺ເຘ ປຸຄ຺ຄເລ ເສວໂຕ ຠຊໂຕ ປຍິຣຸປາສໂຕ, ປສາທນີເຍ ສຸຕ຺ຕນ຺ເຕ ປຈ຺ຈເວກ຺ຂໂຕ, ອິເມຫິ ຕີຫາກາເຣຫິ ສທ຺ຘິນ຺ທ຺ຣິຍໍ ວິສຸຊ຺ຌຕິ. ກຸສີເຕ ປຸຄ຺ຄເລ ປຣິວຊ຺ຊຍໂຕ, ອາຣທ຺ຘວີຣິເຍ ປຸຄ຺ຄເລ ເສວໂຕ ຠຊໂຕ ປຍິຣຸປາສໂຕ, ສມ຺ມປ຺ປຘາເນ ປຈ຺ຈເວກ຺ຂໂຕ, ອິເມຫິ ຕີຫາກາເຣຫິ ວີຣິຍິນ຺ທ຺ຣິຍໍ ວິສຸຊ຺ຌຕິ. ມຸຏ຺ຐສ຺ສຕີ ປຸຄ຺ຄເລ ປຣິວຊ຺ຊຍໂຕ, ອຸປຏ຺ຐິຕສ຺ສຕີ ປຸຄ຺ຄເລ ເສວໂຕ ຠຊໂຕ ປຍິຣຸປາສໂຕ, ສຕິປຏ຺ຐາເນ ປຈ຺ຈເວກ຺ຂໂຕ, ອິເມຫິ ຕີຫາກາເຣຫິ ສຕິນ຺ທ຺ຣິຍໍ ວິສຸຊ຺ຌຕິ. ອສມາຫິເຕ ປຸຄ຺ຄເລ ປຣິວຊ຺ຊຍໂຕ, ສມາຫິເຕ ປຸຄ຺ຄເລ ເສວໂຕ ຠຊໂຕ ປຍິຣຸປາສໂຕ, ຌານວິໂມກ຺ເຂ ປຈ຺ຈເວກ຺ຂໂຕ, ອິເມຫິ ຕີຫາກາເຣຫິ ສມາຘິນ຺ທ຺ຣິຍໍ ວິສຸຊ຺ຌຕິ. ທຸປ຺ປຎ຺ເຎ ປຸຄ຺ຄເລ ປຣິວຊ຺ຊຍໂຕ, ປຎ຺ຎວນ຺ເຕ ປຸຄ຺ຄເລ ເສວໂຕ ຠຊໂຕ ປຍິຣຸປາສໂຕ, ຄມ຺ຠີຣຎາຓຈຣິຍໍ ປຈ຺ຈເວກ຺ຂໂຕ, ອິເມຫິ ຕີຫາກາເຣຫິ ປຎ຺ຎິນ຺ທ຺ຣິຍໍ ວິສຸຊ຺ຌຕິ. ອິຕິ ອິເມ ປຎ຺ຈ ປຸຄ຺ຄເລ ປຣິວຊ຺ຊຍໂຕ, ປຎ຺ຈ ປຸຄ຺ຄເລ ເສວໂຕ ຠຊໂຕ ປຍິຣຸປາສໂຕ, ປຎ຺ຈ ສຸຕ຺ຕນ຺ເຕ ປຈ຺ຈເວກ຺ຂໂຕ, ອິເມຫິ ປນ຺ນຣສຫິ ອາກາເຣຫິ ອິມານິ ປຎ຺ຈິນ຺ທ຺ຣິຍານິ ວິສຸຊ຺ຌນ຺ຕີ’’ຕິ (ປຏິ. ມ. ໑.໑໘໔).

ອປເຣປິ ປນ຺ນຣສ ຘມ຺ມາ ວິມຸຕ຺ຕິປຣິປາຈນິຍາ – ສທ຺ຘາປຎ຺ຈມານິ ອິນ຺ທ຺ຣິຍານິ, ອນິຈ຺ຈສຎ຺ຎາ, ອນິຈ຺ເຈ ທຸກ຺ຂສຎ຺ຎາ, ທຸກ຺ເຂ ອນຕ຺ຕສຎ຺ຎາ, ປຫານສຎ຺ຎາ, ວິຣາຄສຎ຺ຎາຕິ ອິມາ ປຎ຺ຈ ນິພ຺ເພຘຠາຄິຍາ ສຎ຺ຎາ, ເມຆິຍຕ຺ເຖຣສ຺ສ ກຖິຕາ ກລ຺ຍາຓມິຕ຺ຕຕາທໂຍ ປຎ຺ຈ ຘມ຺ມາຕິ (ອຸທາ. ໓໑). ກາຍ ປນ ເວລາຍ ຠຄວໂຕ ເອຕທໂຫສີຕິ? ປຈ຺ຈູສສມເຍ ໂລກໍ ໂວໂລເກນ຺ຕສ຺ສ.

ອເນການິ ເທວຕາສຫສ຺ສານີຕິ ອາຍສ຺ມຕາ ຣາຫຸເລນ ປທຸມຸຕ຺ຕຣສ຺ສ ຠຄວໂຕ ປາທມູເລ ປາລິຕນາຄຣາຊກາເລ ປຕ຺ຖນໍ ປຏ຺ຐເປນ຺ເຕນ ສທ຺ຘິໍ ປຕ຺ຖນໍ ປຏ຺ຐປິຕເທວຕາສຸ ປນ ກາຈິ ຠູມຏ຺ຐກາ ເທວຕາ, ກາຈິ ອນ຺ຕລິກ຺ຂຏ຺ຐກາ, ກາຈິ ຈາຕຸມຫາຣາຊິກາ, ກາຈິ ເທວໂລເກ, ກາຈິ ພ຺ຣຫ຺ມໂລເກ ນິພ຺ພຕ຺ຕາ. ອິມສ຺ມິໍ ປນ ທິວເສ ສພ຺ພາປິ ຕາ ເອກຏ຺ຐາເນ ອນ຺ຘວນສ຺ມິໍເຍວ ສນ຺ນິປຕິຕາ, ຕາ ສນ຺ຘາຍາຫ – ‘‘ອເນການິ ເທວຕາສຫສ຺ສານີ’’ຕິ. ຘມ຺ມຈກ຺ຂຸນ຺ຕິ ອິມສ຺ມິໍ ສຸຕ຺ເຕ ຈຕ຺ຕາໂຣ ຈ ມຄ຺ຄາ ຈຕ຺ຕາຣິ ຈ ຜລານິ ຘມ຺ມຈກ຺ຂຸນ຺ຕິ ເວທິຕພ຺ພານິ. ຕຕ຺ຖ ຫິ ກາຈິ ເທວຕາ ໂສຕາປນ຺ນາ ອເຫສຸໍ, ກາຈິ ສກທາຄາມີ, ອນາຄາມີ, ຂີຓາສວາ. ຕາສຎ຺ຈ ປນ ເທວຕານໍ ເອຕ຺ຕກາຕິ ຄຓນວເສນ ປຣິຈ຺ເຉໂທ ນຕ຺ຖິ. ເສສໍ ສພ຺ພຕ຺ຖ ອຸຕ຺ຕານເມວ.

໙-໑໐. ສໍໂຍຊນິຍຘມ຺ມສຸຕ຺ຕາທິວຓ຺ຓນາ

໑໒໒-໑໒໓. ນວມທສມານິ ອິຏ຺ຐາຣມ຺ມຓວເສນ ກຖິຍມາເນ ພຸຊ຺ຌນການໍ ວເສນ ວຸຕ຺ຕານີຕິ.

ໂລກກາມຄຸຓວຄ຺ໂຄ ທ຺ວາທສໂມ.