໔. ອຣຫນ຺ຕສຸຕ຺ຕວຓ຺ຓນາ

໗໖. ຈຕຸຕ຺ເຖ ຍາວຕາ, ຠິກ຺ຂເວ, ສຕ຺ຕາວາສາຕິ, ຠິກ຺ຂເວ, ຍຕ຺ຕກາ ສຕ຺ຕາວາສາ ນາມ ອຕ຺ຖິ. ຍາວຕາ ຠວຄ຺ຄນ຺ຕິ ຍຕ຺ຕກໍ ຠວຄ຺ຄໍ ນາມ ອຕ຺ຖິ. ເອເຕ ອຄ຺ຄາ ເອເຕ ເສຏ຺ຐາຕິ ເອເຕ ອຄ຺ຄຠູຕາ ເຈວ ເສຏ຺ຐຠູຕາ ຈ. ຍທິທໍ ອຣຫນ຺ໂຕຕິ ເຍ ອິເມ ອຣຫນ຺ໂຕ ນາມ. ອິທມ຺ປິ ສຸຕ຺ຕໍ ປຸຣິມນເຍເນວ ອຸສ຺ສທນນ຺ທິຍຎ຺ຈ ປໂລຠນີຍຎ຺ຈາຕິ ເວທິຕພ຺ພໍ.

ອຖາປຣໍ ເອຕທໂວຈາຕິ ຕທຕ຺ຖປຣິທີປນາຫິ ເຈວ ວິເສສຕ຺ຖປຣິທີປນາຫິ ຈ ຄາຖາຫິ ເອຕໍ ‘‘ສຸຂິໂນ ວຕ ອຣຫນ຺ໂຕ’’ຕິອາທິວຈນໍ ອໂວຈ. ຕຕ຺ຖ ສຸຂິໂນຕິ ຌານສຸເຂນ ມຄ຺ຄສຸເຂນ ຜລສຸເຂນ ຈ ສຸຂິຕາ. ຕຓ຺ຫາ ເຕສໍ ນ ວິຊ຺ຊຕີຕິ ເຕສໍ ອປາຍທຸກ຺ຂຊນິກາ ຕຓ຺ຫາ ນ ວຊ຺ຊຕິ. ເອວໍ ເຕ ອິມສ຺ສປິ ຕຓ຺ຫາມູລກສ຺ສ ອຠາເວນ ສຸຂິຕາວ. ອສ຺ມິມາໂນ ສມຸຈ຺ຉິນ຺ໂນຕິ ນວວິໂຘ ອສ຺ມິມາໂນ ອຣຫຕ຺ຕມຄ຺ເຄນ ສມຸຈ຺ຉິນ຺ໂນ. ໂມຫຊາລໍ ປທາລິຕນ຺ຕິ ຎາເຓນ ອວິຊ຺ຊາຊາລໍ ຜາລິຕໍ.

ອເນຊນ຺ຕິ ເອຊາສງ຺ຂາຕາຍ ຕຓ຺ຫາຍ ປຫານຠູຕໍ ອຣຫຕ຺ຕໍ. ອນຸປລິຕ຺ຕາຕິ ຕຓ຺ຫາທິຏ຺ຐິເລເປຫິ ອລິຕ຺ຕາ. ພ຺ຣຫ຺ມຠູຕາຕິ ເສຏ຺ຐຠູຕາ. ປຣິຎ຺ຎາຍາຕິ ຕີຫິ ປຣິຎ຺ຎາຫິ ປຣິຊານິຕ຺ວາ. ສຕ຺ຕສທ຺ຘມ຺ມໂຄຈຣາຕິ ສທ຺ຘາ ຫິຣີ ໂອຕ຺ຕປ຺ປໍ ພາຫຸສຈ຺ຈໍ ອາຣທ຺ຘວີຣິຍຕາ ອຸປຏ຺ຐິຕສ຺ສຕິຕາ ປຎ຺ຎາຕິ ອິເມ ສຕ຺ຕ ສທ຺ຘມ຺ມາ ໂຄຈໂຣ ເອເຕສນ຺ຕິ ສຕ຺ຕສທ຺ຘມ຺ມໂຄຈຣາ.

ສຕ຺ຕຣຕນສມ຺ປນ຺ນາຕິ ສຕ຺ຕຫິ ໂພຊ຺ຌງ຺ຄຣຕເນຫິ ສມນ຺ນາຄຕາ. ອນຸວິຈຣນ຺ຕີຕິ ໂລກິຍມຫາຊນາປິ ອນຸວິຈຣນ຺ຕິເຍວ. ອິຘ ປນ ຂີຓາສວານໍ ນິຣາສງ຺ກຈາໂຣ ນາມ ຄຫິໂຕ. ເຕເນວາຫ ‘‘ປຫີນຠຍເຠຣວາ’’ຕິ. ຕຕ຺ຖ ຠຍໍ ຠຍເມວ, ເຠຣວໍ ພລວຠຍໍ. ທສຫງ຺ເຄຫິ ສມ຺ປນ຺ນາຕິ ອເສກ຺ເຂຫິ ທສຫິ ອງ຺ເຄຫິ ສມນ຺ນາຄຕາ. ມຫານາຄາຕິ ຈຕູຫິ ກາຣເຓຫິ ມຫານາຄາ. ສມາຫິຕາຕິ ອຸປຈາຣປ຺ປນາຫິ ສມາຫິຕາ. ຕຓ຺ຫາ ເຕສໍ ນ ວິຊ຺ຊຕີຕິ ‘‘ອູໂນ ໂລໂກ ອຕິຕ຺ໂຕ ຕຓ຺ຫາທາໂສຕິ ໂຂ, ມຫາຣາຊ, ເຕນ ຠຄວຕາ’’ຕິ (ມ. ນິ. ໒.໓໐໕) ເອວໍ ວຸຕ຺ຕາ ທາສກາຣິກາ ຕຓ຺ຫາປິ ເຕສໍ ນຕ຺ຖິ. ອິມິນາ ຂີຓາສວານໍ ຠຸຊິສ຺ສຠາວໍ ທສ຺ເສຕິ.

ອເສຂຎາຓນ຺ຕິ ອຣຫຕ຺ຕຜລຎາຓໍ. ອນ຺ຕິໂມຍໍ ສມຸສ຺ສໂຍຕິ ປຈ຺ຉິໂມ ອຍໍ ອຕ຺ຕຠາໂວ. ໂຍ ສາໂຣ ພ຺ຣຫ຺ມຈຣິຍສ຺ສາຕິ ສາໂຣ ນາມ ຜລໍ. ຕສ຺ມິໍ ອປຣປຈ຺ຈຍາຕິ ຕສ຺ມິໍ ອຣິຍຜເລ, ນ ອຎ຺ຎໍ ປຕ຺ຕິຍາຍນ຺ຕິ, ປຈ຺ຈກ຺ຂໂຕວ ປຏິວິຊ຺ຌິຕ຺ວາ ຐິຕາ. ວິຘາສຸ ນ ວິກມ຺ປນ຺ຕີຕິ ຕີສຸ ມານໂກຏ຺ຐາເສສຸ ນ ວິກມ຺ປນ຺ຕິ. ທນ຺ຕຠູມິນ຺ຕິ ອຣຫຕ຺ຕໍ. ວິຊິຕາວິໂນຕິ ຣາຄາທໂຍ ວິເຊຕ຺ວາ ຐິຕາ.

ອຸທ຺ຘນ຺ຕິອາທີສຸ ອຸທ຺ຘໍ ວຸຈ຺ຈຕິ ເກສມຕ຺ຖໂກ, ອປາຈີນໍ ປາທຕລໍ, ຕິຣິຍໍ ເວມຊ຺ຌໍ. ອຸທ຺ຘໍ ວາ ອຕີຕໍ, ອປາຈີນໍ ອນາຄຕໍ, ຕິຣິຍໍ ປຈ຺ຈຸປ຺ປນ຺ນໍ. ອຸທ຺ຘໍ ວາ ວຸຈ຺ຈຕິ ເທວໂລໂກ, ອປາຈີນໍ ອປາຍໂລໂກ, ຕິຣິຍໍ ມນຸສ຺ສໂລໂກ. ນນ຺ທີ ເຕສໍ ນ ວິຊ຺ຊຕີຕິ ເອເຕສຸ ຐາເນສຸ ສງ຺ເຂປໂຕ ວາ ອຕີຕານາຄຕປຈ຺ຈຸປ຺ປນ຺ເນສຸ ຂນ຺ເຘສຸ ເຕສໍ ຕຓ຺ຫາ ນຕ຺ຖິ. ອິຘ ວຏ຺ຏມູລກຕຓ຺ຫາຍ ອຠາໂວ ທສ຺ສິໂຕ. ພຸທ຺ຘາຕິ ຈຕຸນ຺ນໍ ສຈ຺ຈານໍ ພຸທ຺ຘຕ຺ຕາ ພຸທ຺ຘາ.

ອິທໍ ປເນຕ຺ຖ ສີຫນາທສໂມຘານໍ – ‘‘ວິມຸຕ຺ຕິສຸເຂນມ຺ຫາ ສຸຂິຕາ, ທຸກ຺ຂຊນິກາ ໂນ ຕຓ຺ຫາ ປຫີນາ, ປຎ຺ຈກ຺ຂນ຺ຘາ ປຣິຎ຺ຎາຕາ, ທາສກາຣິກຕຓ຺ຫາ ເຈວ ວຏ຺ຏມູລິກຕຓ຺ຫາ ຈ ປຫີນາ, ອນຸຕ຺ຕຣມ຺ຫາ ອສທິສາ, ຈຕຸນ຺ນໍ ສຈ຺ຈານໍ ພຸທ຺ຘຕ຺ຕາ ພຸທ຺ຘາ’’ຕິ ຠວປິຏ຺ເຐ ຐຕ຺ວາ ອຠີຕນາທສງ຺ຂາຕໍ ສີຫນາທໍ ນທນ຺ຕິ ຂີຓາສວາຕິ. ຈຕຸຕ຺ຖໍ.