໑໐. ນິຣຸຕ຺ຕິປຖສຸຕ຺ຕວຓ຺ຓນາ

໖໒. ທສເມ ນິຣຸຕ຺ຕິໂຍວ ນິຣຸຕ຺ຕິປຖາ, ອຖ ວາ ນິຣຸຕ຺ຕິໂຍ ຈ ຕາ ນິຣຸຕ຺ຕິວເສນ ວິຎ຺ຎາຕພ຺ພານໍ ອຕ຺ຖານໍ ປຖຕ຺ຕາ ປຖາ ຈາຕິ ນິຣຸຕ຺ຕິປຖາ. ເສສປທທ຺ວເຍປິ ເອເສວ ນໂຍ. ຕີຓິປິ ເຈຕານິ ອຎ຺ຎມຎ຺ຎເວວຈນາເນວາຕິ ເວທິຕພ຺ພານິ. ອສໍກິຓ຺ຓາຕິ ອວິຊຫິຕາ, ‘‘ໂກ ອິເມຫິ ອຕ຺ໂຖ’’ຕິ ວຕ຺ວາ ອຉຑ຺ຑິຕາ. ອສໍກິຓ຺ຓປຸພ຺ພາຕິ ອຕີເຕປິ ນ ຊຫິຕປຸພ຺ພາ. ນ ສໍກີຍນ຺ຕີຕິ ເອຕຣຫິປິ ‘‘ກິເມເຕຫີ’’ຕິ ນ ຉຑ຺ຑີຍນ຺ຕິ. ນ ສໍກີຍິສ຺ສນ຺ຕີຕິ ອນາຄເຕປິ ນ ຉຑ຺ຑີຍິສ຺ສນ຺ຕິ. ອປ຺ປຏິກຸຏ຺ຐາຕິ ອປ຺ປຏິພາຫິຕາ. ອຕີຕນ຺ຕິ ອຕ຺ຕໂນ ສຠາວໍ ຠງ຺ຄເມວ ວາ ອຕິກ຺ກນ຺ຕໍ. ນິຣຸທ຺ຘນ຺ຕິ ເທສນ຺ຕຣໍ ອສງ຺ກມິຕ຺ວາ ຕຕ຺ເຖວ ນິຣຸທ຺ຘໍ ວູປສນ຺ຕໍ. ວິປຣິຓຕນ຺ຕິ ວິປຣິຓາມໍ ຄຕໍ ນຏ຺ຐໍ. ອຊາຕນ຺ຕິ ອນຸປ຺ປນ຺ນໍ. ອປາຕຸຠູຕນ຺ຕິ ອປາກຏີຠູຕໍ.

ອຸກ຺ກລາຕິ ອຸກ຺ກລຊນປທວາສິໂນ. ວສ຺ສຠຎ຺ຎາຕິ ວສ຺ໂສ ຈ ຠຎ຺ໂຎ ຈ. ທ຺ເວປິ ຫິ ເຕ ມູລທິຏ຺ຐິຄຕິກາ. ອເຫຕຸກວາທາຕິອາທີສຸ ‘‘ນຕ຺ຖິ ເຫຕຸ ນຕ຺ຖິ ປຈ຺ຈໂຍ’’ຕິ ຄຫິຕຕ຺ຕາ ອເຫຕຸກວາທາ. ‘‘ກໂຣໂຕ ນ ກຣີຍຕິ ປາປ’’ນ຺ຕິ ຄຫິຕຕ຺ຕາ ອກິຣິຍວາທາ. ‘‘ນຕ຺ຖິ ທິນ຺ນ’’ນ຺ຕິອາທິຄຫຓໂຕ ນຕ຺ຖິກວາທາ. ຕຕ຺ຖ ອິເມ ທ຺ເວ ຊນາ, ຕິສ຺ໂສ ທິຏ຺ຐິໂຍ, ກິໍ ເອເກກສ຺ສ ທິຍຑ຺ຒາ ໂຫຕີຕິ? ນ ຕຖາ, ຍຖາ ປນ ເອໂກ ຠິກ຺ຂຸ ປຏິປາຏິຍາ ຈຕ຺ຕາຣິປິ ຌານານິ ນິພ຺ພຕ຺ເຕຕິ, ເອວເມຕ຺ຖ ເອເກໂກ ຕິສ຺ໂສປິ ທິຏ຺ຐິໂຍ ນິພ຺ພຕ຺ເຕສີຕິ ເວທິຕພ຺ໂພ. ‘‘ນຕ຺ຖິ ເຫຕຸ ນຕ຺ຖິ ປຈ຺ຈໂຍ’’ຕິ ປຸນປ຺ປຸນໍ ອາວຊ຺ເຊນ຺ຕສ຺ສ ອາຫຣນ຺ຕສ຺ສ ອຠິນນ຺ທນ຺ຕສ຺ສ ອສ຺ສາເທນ຺ຕສ຺ສ ມຄ຺ຄທສ຺ສນໍ ວິຍ ໂຫຕິ. ໂສ ມິຈ຺ຉຕ຺ຕນິຍາມໍ ໂອກ຺ກມຕິ, ໂສ ເອກນ຺ຕກາຬໂກຕິ ວຸຈ຺ຈຕິ. ຍຖາ ປນ ອເຫຕຸກທິຏ຺ຐິຍໍ, ເອວໍ ‘‘ກໂຣໂຕ ນ ກຣີຍຕິ ປາປໍ, ນຕ຺ຖິ ທິນ຺ນ’’ນ຺ຕິ ອິເມສຸປິ ຐາເນສຸ ມິຈ຺ຉຕ຺ຕນິຍາມໍ ໂອກ຺ກມຕິ.

ນ ຄຣຫິຕພ຺ພໍ ນປ຺ປຏິກ຺ໂກສິຕພ຺ພໍ ອມຎ຺ຎິໍສູຕິ ເອຕ຺ຖ ‘‘ຍເທຕໍ ອຕີຕໍ ນາມ, ນຍິທໍ ອຕີຕໍ, ອິທມສ຺ສ ອນາຄຕໍ ວາ ປຈ຺ຈຸປ຺ປນ຺ນໍ ວາ’’ຕິ ວທນ຺ໂຕ ຄຣຫຕິ ນາມ. ຕຕ຺ຖ ໂທສໍ ທສ຺ເສຕ຺ວາ ‘‘ກິໍ ອິມິນາ ຄຣຫິເຕນາ’’ຕິ? ວທນ຺ໂຕ ປຏິກ຺ໂກສຕິ ນາມ. ອິເມ ປນ ນິຣຸຕ຺ຕິປເຖ ເຕປິ ອຈ຺ຈນ຺ຕກາຬກາ ທິຏ຺ຐິຄຕິກາ ນ ຄຣຫິຕພ຺ເພ ນ ປຏິກ຺ໂກສິຕພ຺ເພ ມຎ຺ຎິໍສຸ. ອຕີຕໍ ປນ ອຕີຕເມວ, ອນາຄຕໍ ອນາຄຕເມວ, ປຈ຺ຈຸປ຺ປນ຺ນໍ ປຈ຺ຈຸປ຺ປນ຺ນເມວ ກຖຍິໍສຸ. ນິນ຺ທາຆຏ຺ຏນພ຺ຍາໂຣສອຸປາຣມ຺ຠຠຍາຕິ ວິຎ຺ຎູນໍ ສນ຺ຕິກາ ນິນ຺ທາຠເຍນ ຈ ຆຏ຺ຏນຠເຍນ ຈ ໂທສາໂຣປນຠເຍນ ຈ ອຸປາຣມ຺ຠຠເຍນ ຈ. ອິຕິ ອິມສ຺ມິໍ ສຸຕ຺ເຕ ຈຕຸຠູມິກຂນ຺ຘານໍ ປຓ຺ຓຕ຺ຕິ ກຖິຕາຕິ. ທສມໍ.

ອຸປຍວຄ຺ໂຄ ຉຏ຺ໂຐ.