໘. ທຸຕິຍຄທ຺ທຸລພທ຺ຘສຸຕ຺ຕວຓ຺ຓນາ

໑໐໐. ອຏ຺ຐເມ ຕສ຺ມາຕິ ຍສ຺ມາ ທິຏ຺ຐິຄທ຺ທຸລນິສ຺ສິຕາຍ ຕຓ຺ຫາຣຊ຺ຊຸຍາ ສກ຺ກາຍຖມ຺ເຠ ອຸປນິພທ຺ໂຘ ວຏ຺ຏນິສ຺ສິໂຕ ພາລປຸຖຸຊ຺ຊໂນ ສພ຺ພິຣິຍາປເຖສຸ ຂນ຺ຘປຎ຺ຈກໍ ນິສ຺ສາເຍວ ປວຕ຺ຕຕິ, ຍສ຺ມາ ວາ ທີຆຣຕ຺ຕມິທໍ ຈິຕ຺ຕໍ ສໍກິລິຏ຺ຐໍ ຣາເຄນ ໂທເສນ ໂມເຫນ, ຕສ຺ມາ. ຈິຕ຺ຕສໍກິເລສາຕິ ສຸນ຺ຫາຕາປິ ຫິ ສຕ຺ຕາ ຈິຕ຺ຕສໍກິເລເສເນວ ສໍກິລິສ຺ສນ຺ຕິ, ມລຄ຺ຄຫິຕສຣີຣາປິ ຈິຕ຺ຕສ຺ສ ໂວທານຕ຺ຕາ ວິສຸຊ຺ຌນ຺ຕິ. ເຕນາຫຸ ໂປຣາຓາ –

‘‘ຣູປມ຺ຫິ ສໍກິລິຏ຺ຐມ຺ຫິ, ສໍກິລິສ຺ສນ຺ຕິ ມາຓວາ;

ຣູເປ ສຸທ຺ເຘ ວິສຸຊ຺ຌນ຺ຕິ, ອນກ຺ຂາຕໍ ມເຫສິນາ.

‘‘ຈິຕ຺ຕມ຺ຫິ ສໍກິລິຏ຺ຐມ຺ຫິ, ສໍກິລິສ຺ສນ຺ຕິ ມາຓວາ;

ຈິຕ຺ເຕ ສຸທ຺ເຘ ວິສຸຊ຺ຌນ຺ຕິ, ອິຕິ ວຸຕ຺ຕໍ ມເຫສິນາ’’ຕິ.

ຈຣຓໍ ນາມ ຈິຕ຺ຕນ຺ຕິ ວິຈຣຓຈິຕ຺ຕໍ. ສງ຺ຂາ ນາມ ພ຺ຣາຫ຺ມຓປາສຓ຺ຑິກາ ໂຫນ຺ຕິ, ເຕ ປຏໂກຏ຺ຐກໍ ກຕ຺ວາ ຕຕ຺ຖ ນານປ຺ປກາຣາ ສຸຄຕິທຸຄ຺ຄຕິວເສນ ສມ຺ປຕ຺ຕິວິປຕ຺ຕິໂຍ ເລຂາເປຕ຺ວາ, ‘‘ອິມໍ ກມ຺ມໍ ກຕ຺ວາ ອິທໍ ປຏິລຠຕິ, ອິທໍ ກຕ຺ວາ ອິທ’’ນ຺ຕິ ທສ຺ເສນ຺ຕາ ຕໍ ຈິຕ຺ຕໍ ຄເຫຕ຺ວາ ວິຈຣນ຺ຕິ. ຈິຕ຺ເຕເນວ ຈິຕ຺ຕິຕນ຺ຕິ ຈິຕ຺ຕກາເຣນ ຈິນ຺ເຕຕ຺ວາ ກຕຕ຺ຕາ ຈິຕ຺ເຕນ ຈິນ຺ຕິຕໍ ນາມ. ຈິຕ຺ຕຎ຺ເຎວ ຈິຕ຺ຕຕຣນ຺ຕິ ຕສ຺ສ ຈິຕ຺ຕສ຺ສ ອຸປາຍປຣິເຍສນຈິຕ຺ຕໍ ຕໂຕປິ ຈິຕ຺ຕຕຣໍ. ຕິຣຈ຺ຉານຄຕາ ປາຓາ ຈິຕ຺ເຕເນວ ຈິຕ຺ຕິຕາຕິ ກມ຺ມຈິຕ຺ເຕເນວ ຈິຕ຺ຕິຕາ. ຕໍ ປນ ກມ຺ມຈິຕ຺ຕໍ ອິເມ ວຏ຺ຏກຕິຕ຺ຕິຣາທໂຍ ‘‘ເອວໍ ຈິຕ຺ຕາ ຠວິສ຺ສາມາ’’ຕິ ອາຍູຫນ຺ຕາ ນາມ ນຕ຺ຖິ. ກມ຺ມໍ ປນ ໂຍນິໍ ອຸປເນຕິ, ໂຍນິມູລໂກ ເຕສໍ ຈິຕ຺ຕຠາໂວ. ໂຍນິອຸປຄຕາ ຫິ ສຕ຺ຕາ ຕໍຕໍໂຍນິເກຫິ ສທິສຈິຕ຺ຕາວ ໂຫນ຺ຕິ. ອິຕິ ໂຍນິສິທ຺ໂຘ ຈິຕ຺ຕຠາໂວ, ກມ຺ມສິທ຺ຘາ ໂຍນີຕິ ເວທິຕພ຺ພາ.

ອປິຈ ຈິຕ຺ຕໍ ນາເມຕໍ ສຫຊາຕໍ ສຫຊາຕຘມ຺ມຈິຕ຺ຕຕາຍ ຠູມິຈິຕ຺ຕຕາຍ ວຕ຺ຖຸຈິຕ຺ຕຕາຍ ທ຺ວາຣຈິຕ຺ຕຕາຍ ອາຣມ຺ມຓຈິຕ຺ຕຕາຍ ກມ຺ມນານຕ຺ຕມູລການໍ ລິງ຺ຄນານຕ຺ຕສຎ຺ຎານານຕ຺ຕໂວຫາຣນານຕ຺ຕາທີນໍ ອເນກວິຘານໍ ຈິຕ຺ຕານໍ ນິປ຺ຜາທນຕາຍປິ ຕິຣຈ຺ຉານຄຕຈິຕ຺ຕໂຕ ຈິຕ຺ຕຕຣເມວ ເວທິຕພ຺ພໍ.

ຣຊໂກຕິ ວຕ຺ເຖສຸ ຣງ຺ເຄນ ຣູປສມຸຏ຺ຐາປນໂກ. ໂສ ປນ ອເຉໂກ ອມນາປໍ ຣູປໍ ກໂຣຕິ, ເຉໂກ ມນາປໍ ທສ຺ສນີຍໍ, ເອວເມວ ປຸຖຸຊ຺ຊໂນ ອກຸສລຈິຕ຺ເຕນ ວາ ຎາຓວິປ຺ປຍຸຕ຺ຕກຸສເລນ ວາ ຈກ຺ຂຸສມ຺ປທາທິວິຣຫິຕໍ ວິຣູປໍ ສມຸຏ຺ຐາເປຕິ, ຎາຓສມ຺ປຍຸຕ຺ຕກຸສເລນ ຈກ຺ຂຸສມ຺ປທາທິສມ຺ປນ຺ນໍ ອຠິຣູປໍ. ອຏ຺ຐມໍ.