໗. ອສ຺ສທ຺ຘສໍສນ຺ທນສຸຕ຺ຕວຓ຺ຓນາ

໑໐໑. ສຕ຺ຕເມ ອສ຺ສທ຺ຘາ ອສ຺ສທ຺ເຘຫີຕິອາທີສຸ ພຸທ຺ເຘ ວາ ຘມ຺ເມ ວາ ສງ຺ເຆ ວາ ສທ຺ຘາວິຣຫິຕາ ນິໂຣຊາ ນິຣສາ ປຸຄ຺ຄລາ ສມຸທ຺ທສ຺ສ ໂອຣິມຕີເຣ ຐິຕາ ປາຣິມຕີເຣປິ ຐິເຕຫິ ອສ຺ສທ຺ເຘຫິ ສທ຺ຘິໍ ຕາຍ ອສ຺ສທ຺ຘຕາຍ ເອກສທິສາ ນິຣນ຺ຕຣາ ໂຫນ຺ຕິ. ຕຖາ ອຫິຣິກາ ຠິນ຺ນມຣິຍາທາ ອລຊ຺ຊິປຸຄ຺ຄລາ ອຫິຣິເກຫິ, ອໂນຕ຺ຕປ຺ປິໂນ ປາປກິຣິຍາຍ ອຠາຍມານາ ອໂນຕ຺ຕປ຺ປີຫິ, ອປ຺ປສ຺ສຸຕາ ສຸຕວິຣຫິຕາ ອປ຺ປສ຺ສຸເຕຫິ, ກຸສີຕາ ອາລສິຍປຸຄ຺ຄລາ ກຸສີເຕຫິ, ມຸຏ຺ຐສ຺ສຕິໂນ ຠຕ຺ຕນິກ຺ຂິຕ຺ຕກາກມໍສນິກ຺ຂິຕ຺ຕສິງ຺ຄາລສທິສາ ມຸຏ຺ຐສ຺ສຕີຫິ, ທຸປ຺ປຎ຺ຎາ ຂນ຺ຘາທິປຣິຈ຺ເຉທິກາຍ ປຎ຺ຎາຍ ອຠາເວນ ນິປ຺ປຎ຺ຎາ ຕາທິເສເຫວ ທຸປ຺ປຎ຺ເຎຫິ, ສທ຺ຘາສມ຺ປນ຺ນາ ເຈຕິຍວນ຺ທນາທິກິຈ຺ຈປສຸຕາ ສທ຺ເຘຫິ, ຫິຣິມນາ ລຊ຺ຊິປຸຄ຺ຄລາ ຫິຣິມເນຫິ, ໂອຕ຺ຕປ຺ປິໂນ ປາປຠີຣຸກາ ໂອຕ຺ຕປ຺ປີຫິ, ພຫຸສ຺ສຸຕາ ສຸຕຘຣາ ອາຄມຘຣາ ຕນ຺ຕິປາລກາ ວໍສານຸຣກ຺ຂກາ ພຫຸສ຺ສຸເຕຫິ, ອາຣທ຺ຘວີຣິຍາ ປຣິປຸຓ຺ຓປຣກ຺ກມາ ອາຣທ຺ຘວີຣິເຍຫິ, ອຸປຏ຺ຐິຕສ຺ສຕີ ສພ຺ພກິຈ຺ຈປຣິຄ຺ຄາຫິກາຍ ສຕິຍາ ສມນ຺ນາຄຕາ ອຸປຏ຺ຐິຕສ຺ສຕີຫິ, ປຎ຺ຎວນ຺ໂຕ ມຫາປຎ຺ເຎຫິ ວຊິຣູປມຎາເຓຫິ ປຎ຺ຎວນ຺ເຕຫິ ສທ຺ຘິໍ ທູເຣ ຐິຕາປິ ຕາຍ ປຎ຺ຎາສມ຺ປຕ຺ຕິຍາ ສໍສນ຺ທນ຺ຕິ ສເມນ຺ຕິ. ສຕ຺ຕມໍ.