໓. ຄິຎ຺ຊກາວສຖສຸຕ຺ຕວຓ຺ຓນາ

໙໗. ຕຕິເຍ ຘາຕຸໍ, ຠິກ຺ຂເວຕິ ອິໂຕ ປຏ຺ຐາຍ ອຊ຺ຌາສຍໍ ຘາຕູຕິ ທີເປຕິ. ອຸປ຺ປຊ຺ຊຕິ ສຎ຺ຎາຕິ ອຊ຺ຌາສຍໍ ປຏິຈ຺ຈ ສຎ຺ຎາ ອຸປ຺ປຊ຺ຊຕິ, ທິຏ຺ຐິ ອຸປ຺ປຊ຺ຊຕິ, ວິຕກ຺ໂກ ອຸປ຺ປຊ຺ຊຕີຕິ. ອິຘາປິ ‘‘ກຈ຺ຈາໂນ ປຎ຺ຫໍ ປຸຈ຺ຉິສ຺ສຕີ’’ຕິ ຕສ຺ສ ໂອກາສທານຕ຺ຖໍ ເອຕ຺ຕາວຕາວ ເທສນໍ ນິຏ຺ຐາເປສິ. ອສມ຺ມາສມ຺ພຸທ຺ເຘສູຕິ ຉສຸ ສຕ຺ຖາເຣສຸ. ສມ຺ມາສມ຺ພຸທ຺ຘາຕິ ມຍມສ຺ມ ສມ຺ມາສມ຺ພຸທ຺ຘາຕິ. ກິໍ ປຏິຈ຺ຈ ປຎ຺ຎາຍຕີຕິ ກິສ຺ມິໍ ສຕິ ໂຫຕີຕິ? ສຕ຺ຖາຣານໍ ອຸປ຺ປນ຺ນໍ ທິຏ຺ຐິໍ ປຸຈ຺ຉຕິ. ອສມ຺ມາສມ຺ພຸທ຺ເຘສຸ ເຕສຸ ສມ຺ມາສມ຺ພຸທ຺ຘາ ເອເຕຕິ ເອວໍ ອຸປ຺ປນ຺ນໍ ຕິຕ຺ຖິຍສາວການມ຺ປິ ທິຏ຺ຐິໍ ປຸຈ຺ຉຕິເຍວ.

ອິທານິ ຍສ຺ມາ ເຕສໍ ອວິຊ຺ຊາຘາຕຸໍ ປຏິຈ຺ຈ ສາ ທິຏ຺ຐິ ໂຫຕິ, ອວິຊ຺ຊາຘາຕຸ ຈ ນາມ ມຫຕີ ຘາຕຸ, ຕສ຺ມາ ມຫຕິໍ ຘາຕຸໍ ປຏິຈ຺ຈ ຕສ຺ສາ ອຸປ຺ປຕ຺ຕິໍ ທີເປນ຺ໂຕ ມຫຕີ ໂຂ ເອສາຕິອາທິມາຫ. ຫີນໍ, ກຈ຺ຈານ, ຘາຕຸໍ ປຏິຈ຺ຈາຕິ ຫີນໍ ອຊ຺ຌາສຍໍ ປຏິຈ຺ຈ. ປຓິຘີຕິ ຈິຕ຺ຕຏ຺ຐປນໍ. ສາ ປເນສາ ອິຕ຺ຖິຠາວໍ ວາ ມກ຺ກຏາທິຕິຣຈ຺ຉານຠາວໍ ວາ ປຕ຺ເຖນ຺ຕສ຺ສ ອຸປ຺ປຊ຺ຊຕິ. ຫີໂນ ປຸຄ຺ຄໂລຕິ ຍສ຺ເສເຕ ຫີນາ ຘມ຺ມາ ອຸປ຺ປຊ຺ຊນ຺ຕິ, ສພ຺ໂພ ໂສ ປຸຄ຺ຄໂລປິ ຫີໂນ ນາມ. ຫີນາ ວາຈາຕິ ຍາ ຕສ຺ສ ວາຈາ, ສາປິ ຫີນາ. ຫີນໍ ອາຈິກ຺ຂຕີຕິ ໂສ ອາຈິກ຺ຂນ຺ໂຕປິ ຫີນເມວ ອາຈິກ຺ຂຕິ, ເທເສນ຺ໂຕປິ ຫີນເມວ ເທເສຕີຕິ ສພ຺ພປທານິ ໂຍເຊຕພ຺ພານິ. ອຸປປຕ຺ຕີຕິ ທ຺ເວ ອຸປປຕ຺ຕິໂຍ ປຏິລາໂຠ ຈ ນິພ຺ພຕ຺ຕິ ຈ. ນິພ຺ພຕ຺ຕິ ຫີນກຸລາທິວເສນ ເວທິຕພ຺ພາ, ປຏິລາໂຠ ຈິຕ຺ຕຸປ຺ປາທກ຺ຂເຓ ຫີນຕ຺ຕິກວເສນ. ກຖໍ? ຕສ຺ສ ຫິ ປຎ຺ຈສຸ ນີຈກຸເລສຸ ອຸປ຺ປຊ຺ຊນໂຕ ຫີນາ ນິພ຺ພຕ຺ຕິ, ເວສ຺ສສຸທ຺ທກຸເລສຸ ອຸປ຺ປຊ຺ຊນໂຕ ມຊ຺ຌິມາ, ຂຕ຺ຕິຍພ຺ຣາຫ຺ມຓກຸເລສຸ ອຸປ຺ປຊ຺ຊນໂຕ ປຓີຕາ. ທ຺ວາທສາກຸສລຈິຕ຺ຕຸປ຺ປາທານໍ ປນ ປຏິລາຠໂຕ ຫີໂນ ປຏິລາໂຠ, ເຕຠູມກຘມ຺ມານໍ ປຏິລາຠໂຕ ມຊ຺ຌິໂມ, ນວໂລກຸຕ຺ຕຣຘມ຺ມານໍ ປຏິລາຠໂຕ ປຓີໂຕ. ອິມສ຺ມິໍ ປນ ຐາເນ ນິພ຺ພຕ຺ຕິເຍວ ອຘິປ຺ເປຕາຕິ. ຕຕິຍໍ.