໑. ນານຕ຺ຕວຄ຺ໂຄ

໑.ຘາຕຸນານຕ຺ຕສຸຕ຺ຕວຓ຺ຓນາ

໘໕. ຘາຕຸສໍຍຸຕ຺ຕສ຺ສ ປຐເມ ນິສ຺ສຕ຺ຕຏ຺ຐສຸຎ຺ຎຕຏ຺ຐສງ຺ຂາເຕນ ສຠາວຏ຺ເຐນ ຘາຕູຕິ ລທ຺ຘນາມານໍ ຘມ຺ມານໍ ນານາສຠາໂວ ຘາຕຸນານຕ຺ຕໍ. ຈກ຺ຂຸຘາຕູຕິອາທີສຸ ຈກ຺ຂຸປສາໂທ ຈກ຺ຂຸຘາຕຸ, ຣູປາຣມ຺ມຓໍ ຣູປຘາຕຸ, ຈກ຺ຂຸປສາທວຕ຺ຖຸກໍ ຈິຕ຺ຕໍ ຈກ຺ຂຸວິຎ຺ຎາຓຘາຕຸ. ໂສຕປສາໂທ ໂສຕຘາຕຸ, ສທ຺ທາຣມ຺ມຓໍ ສທ຺ທຘາຕຸ, ໂສຕປສາທວຕ຺ຖຸກໍ ຈິຕ຺ຕໍ ໂສຕວິຎ຺ຎາຓຘາຕຸ. ຆານປສາໂທ ຆານຘາຕຸ, ຄນ຺ຘາຣມ຺ມຓໍ ຄນ຺ຘຘາຕຸ, ຆານປສາທວຕ຺ຖຸກໍ ຈິຕ຺ຕໍ ຆານວິຎ຺ຎາຓຘາຕຸ. ຊິວ຺ຫາປສາໂທ ຊິວ຺ຫາຘາຕຸ, ຣສາຣມ຺ມຓໍ ຣສຘາຕຸ, ຊິວ຺ຫາປສາທວຕ຺ຖຸກໍ ຈິຕ຺ຕໍ ຊິວ຺ຫາວິຎ຺ຎາຓຘາຕຸ. ກາຍປສາໂທ ກາຍຘາຕຸ, ໂຜຏ຺ຐພ຺ພາຣມ຺ມຓໍ ໂຜຏ຺ຐພ຺ພຘາຕຸ, ກາຍປສາທວຕ຺ຖຸກໍ ຈິຕ຺ຕໍ ກາຍວິຎ຺ຎາຓຘາຕຸ. ຕິສ຺ໂສ ມໂນຘາຕຸໂຍ ມໂນຘາຕຸ, ເວທນາທໂຍ ຕໂຍ ຂນ຺ຘາ ສຸຂຸມຣູປານິ ນິພ຺ພານຎ຺ຈ ຘມ຺ມຘາຕຸ, ສພ຺ພມ຺ປິ ມໂນວິຎ຺ຎາຓໍ ມໂນວິຎ຺ຎາຓຘາຕູຕິ. ເອຕ຺ຖ ຈ ໂສຬສ ຘາຕຸໂຍ ກາມາວຈຣາ, ອວສາເນ ທ຺ເວ ຈຕຸຠູມິກາຕິ. ປຐມໍ.

໒. ຜສ຺ສນານຕ຺ຕສຸຕ຺ຕວຓ຺ຓນາ

໘໖. ທຸຕິເຍ ອຸປ຺ປຊ຺ຊຕິ ຜສ຺ສນານຕ຺ຕນ຺ຕິ ນານາສຠາໂວ ຜສ຺ໂສ ອຸປ຺ປຊ຺ຊຕິ. ຕຕ຺ຖ ຈກ຺ຂຸສມ຺ຜສ຺ສາທໂຍ ຈກ຺ຂຸວິຎ຺ຎາຓາທິສມ຺ປຍຸຕ຺ຕາ, ມໂນສມ຺ຜສ຺ໂສ ມໂນທ຺ວາເຣ ປຐມຊວນສມ຺ປຍຸຕ຺ໂຕ, ຕສ຺ມາ. ມໂນຘາຕຸໍ ປຏິຈ຺ຈາຕິ ມໂນທ຺ວາຣາວຊ຺ຊນໍ ກິຣິຍາມໂນວິຎ຺ຎາຓຘາຕຸໍ ປຏິຈ຺ຈ ປຐມຊວນສມ຺ຜສ຺ໂສ ອຸປ຺ປຊ຺ຊຕີຕິ ອຍເມຕ຺ຖ ອຕ຺ໂຖ. ທຸຕິຍໍ.

໓. ໂນຜສ຺ສນານຕ຺ຕສຸຕ຺ຕວຓ຺ຓນາ

໘໗. ຕຕິເຍ ໂນ ມໂນສມ຺ຜສ຺ສໍ ປຏິຈ຺ຈ ອຸປ຺ປຊ຺ຊຕິ ມໂນຘາຕູຕິ ມໂນທ຺ວາເຣ ປຐມຊວນສມ຺ປຍຸຕ຺ຕໍ ຜສ຺ສໍ ປຏິຈ຺ຈ ອາວຊ຺ຊນກິຣິຍາມໂນວິຎ຺ຎາຓຘາຕຸ ໂນ ອຸປ຺ປຊ຺ຊຕີຕິ ເອວມຕ຺ໂຖ ທຏ຺ຐພ຺ໂພ. ຕຕິຍໍ.

໔. ເວທນານານຕ຺ຕສຸຕ຺ຕວຓ຺ຓນາ

໘໘. ຈຕຸຕ຺ເຖ ຈກ຺ຂຸສມ຺ຜສ຺ສຊາ ເວທນາຕິ ສມ຺ປຏິຈ຺ຉນມໂນຘາຕຸໂຕ ປຏ຺ຐາຍ ສພ຺ພາປິ ຕສ຺ມິໍ ທ຺ວາເຣ ເວທນາ ວຕ຺ເຕຍ຺ຍຸໍ, ນິພ຺ພຕ຺ຕິຜາສຸກຕ຺ຖໍ ປນ ອນນ຺ຕຣໍ ສມ຺ປຏິຈ຺ຉນເວທນເມວ ຄເຫຕຸໍ ວຏ຺ຏຕີຕິ ວຸຕ຺ຕໍ. ມໂນສມ຺ຜສ຺ສໍ ປຏິຈ຺ຈາຕິ ມໂນທ຺ວາເຣ ອາວຊ຺ຊນສມ຺ຜສ຺ສໍ ປຏິຈ຺ຈ ປຐມຊວນເວທນາ, ປຐມຊວນສມ຺ຜສ຺ສໍ ປຏິຈ຺ຈ ທຸຕິຍຊວນເວທນາຕິ ອຍມຘິປ຺ປາໂຍ. ຈຕຸຕ຺ຖໍ.

໕. ທຸຕິຍເວທນານານຕ຺ຕສຸຕ຺ຕວຓ຺ຓນາ

໘໙. ປຎ຺ຈເມ ຕຕິຍຈຕຸຕ຺ເຖສຸ ວຸຕ຺ຕນຍາວ ເອກໂຕ ກຕ຺ວາ ເທສິຕາຕິ. ອິຕິ ທຸຕິຍາທີສຸ ຈຕູສຸ ສຸຕ຺ເຕສຸ ມໂນຘາຕຸໍ ມໂນຘາຕູຕິ ອຄເຫຕ຺ວາ ມໂນທ຺ວາຣາວຊ຺ຊນໍ ມໂນຘາຕູຕິ ຄຫິຕໍ. ສພ຺ພານິ ເຈຕານິ ຕຖາ ຕຖາ ກຖິເຕ ພຸຊ຺ຌນການໍ ອຊ຺ຌາສເຍນ ເທສິຕານິ. ອິໂຕ ປເຣສຸປິ ເອເສວ ນໂຍ. ປຎ຺ຈມໍ.

໖. ພາຫິຣຘາຕຸນານຕ຺ຕສຸຕ຺ຕວຓ຺ຓນາ

໙໐. ຉຏ຺ເຐ ປນ ປຎ຺ຈ ຘາຕຸໂຍ ກາມາວຈຣາ, ຘມ຺ມຘາຕຸ ຈຕຸຠູມິກາຕິ. ຉຏ຺ຐໍ.

໗. ສຎ຺ຎານານຕ຺ຕສຸຕ຺ຕວຓ຺ຓນາ

໙໑. ສຕ຺ຕເມ ຣູປຘາຕູຕິ ອາປາເຖ ປຕິຕໍ ອຕ຺ຕໂນ ວາ ປຣສ຺ສ ວາ ສາຏກເວຐນາທິວຕ຺ຖຸກໍ ຣູປາຣມ຺ມຓໍ. ຣູປສຎ຺ຎາຕິ ຈກ຺ຂຸວິຎ຺ຎາຓສມ຺ປຍຸຕ຺ຕາ ສຎ຺ຎາ. ຣູປສງ຺ກປ຺ໂປຕິ ສມ຺ປຏິຈ຺ຉນາທີຫິ ຕີຫິ ຈິຕ຺ເຕຫິ ສມ຺ປຍຸຕ຺ໂຕ ສງ຺ກປ຺ໂປ. ຣູປຈ຺ຉນ຺ໂທຕິ ຣູເປ ຉນ຺ທິກຕຏ຺ເຐນ ຉນ຺ໂທ. ຣູປປຣິຬາໂຫຕິ ຣູເປ ອນຸຑຫນຏ຺ເຐນ ປຣິຬາໂຫ. ຣູປປຣິເຍສນາຕິ ປຣິຬາເຫ ອຸປ຺ປນ຺ເນ ສນ຺ທິຏ຺ຐສມ຺ຠຕ຺ເຕ ຄເຫຕ຺ວາ ຕສ຺ສ ຣູປສ຺ສ ປຏິລາຠຕ຺ຖາຍ ປຣິເຍສນາ. ເອຕ຺ຖ ຈ ສຎ຺ຎາສງ຺ກປ຺ປຉນ຺ທາ ເອກຊວນວາເຣປິ ນານາຊວນວາເຣປິ ລພ຺ຠນ຺ຕິ, ປຣິຬາຫປຣິເຍສນາ ປນ ນານາຊວນວາເຣເຍວ ລພ຺ຠນ຺ຕີຕິ. ເອວໍ ໂຂ, ຠິກ຺ຂເວ, ຘາຕຸນານຕ຺ຕນ຺ຕິ ເອຕ຺ຖ ຈ ເອວໍ ຣູປາທິນານາສຠາວໍ ຘາຕຸໍ ປຏິຈ຺ຈ ຣູປສຎ຺ຎາທິນານາສຠາວສຎ຺ຎາ ອຸປ຺ປຊ຺ຊຕີຕິ ອິມິນາ ນເຍນ ອຕ຺ໂຖ ເວທິຕພ຺ໂພ. ສຕ຺ຕມໍ.

໘. ໂນປຣິເຍສນານານຕ຺ຕສຸຕ຺ຕວຓ຺ຓນາ

໙໒. ອຏ຺ຐເມ ໂນ ຘມ຺ມປຣິເຍສນໍ ປຏິຈ຺ຈ ອຸປ຺ປຊ຺ຊຕິ ຘມ຺ມປຣິຬາໂຫຕິ ເອວໍ ອາຄຕໍ ປຏິເສຘມຕ຺ຕເມວ ນານໍ. ອຏ຺ຐມໍ.

໙. ພາຫິຣຜສ຺ສນານຕ຺ຕສຸຕ຺ຕາທິວຓ຺ຓນາ

໙໓-໙໔. ນວເມ ອຸປ຺ປຊ຺ຊຕິ ຣູປສຎ຺ຎາຕິ ວຸຕ຺ຕປ຺ປກາເຣ ອາຣມ຺ມເຓ ອຸປ຺ປຊ຺ຊຕິ ສຎ຺ຎາ. ຣູປສງ຺ກປ຺ໂປຕິ ຕສ຺ມິໍເຍວ ອາຣມ຺ມເຓ ຕີຫິ ຈິຕ຺ເຕຫິ ສມ຺ປຍຸຕ຺ຕສງ຺ກປ຺ໂປ. ຣູປສມ຺ຜສ຺ໂສຕິ ຕເທວາຣມ຺ມຓໍ ຜຸສມາໂນ ຜສ຺ໂສ. ເວທນາຕິ ຕເທວ ອາຣມ຺ມຓໍ ອນຸຠວມານາ ເວທນາ. ຉນ຺ທາທໂຍ ວຸຕ຺ຕນຍາວ. ຣູປລາໂຠຕິ ປຣິເຍສິຕ຺ວາ ລທ຺ຘໍ ສຫ ຕຓ຺ຫາຍ ອາຣມ຺ມຓໍ ‘‘ຣູປລາໂຠ’’ຕິ ວຸຕ຺ຕໍ. ອຍໍ ຕາວ ສພ຺ພສງ຺ຄາຫິກນໂຍ ເອກສ຺ມິໍ ເຍວາຣມ຺ມເຓ ສພ຺ພຘມ຺ມານໍ ອຸປ຺ປຕ຺ຕິວເສນ ວຸຕ຺ໂຕ. ອປໂຣ ອາຄນ຺ຕຸກາຣມ຺ມຓມິສ຺ສໂກ ໂຫຕິ – ຣູປສຎ຺ຎາ ຣູປສງ຺ກປ຺ໂປ ຜສ຺ໂສ ເວທນາຕິ ອິເມ ຕາວ ຈຕ຺ຕາໂຣ ຘມ຺ມາ ຘຸວປຣິໂຠເຄ ນິພທ຺ຘາຣມ຺ມເຓ ໂຫນ຺ຕິ. ນິພທ຺ຘາຣມ຺ມຓຎ຺ຫິ ອິຏ຺ຐໍ ກນ຺ຕໍ ມນາປໍ ປິຍໍ ຍໍກິຎ຺ຈິ ວິຍ ອຸປຏ຺ຐາຕິ, ອາຄນ຺ຕຸກາຣມ຺ມຓໍ ປນ ຍໍກິຎ຺ຈິ ສມານມ຺ປິ ໂຂເຠຕ຺ວາ ຕິຏ຺ຐຕິ.

ຕຕ຺ຣິທໍ ວຕ຺ຖຸ – ເອໂກ ກິຣ ອມຈ຺ຈປຸຕ຺ໂຕ ຄາມິເຍຫິ ປຣິວາຣິໂຕ ຄາມມຊ຺ເຌ ຐຕ຺ວາ ກມ຺ມໍ ກໂຣຕິ. ຕສ຺ມິຎ຺ຈສ຺ສ ສມເຍ ອຸປາສິກາ ນທິໍ ຄນ຺ຕ຺ວາ ນ຺ຫຕ຺ວາ ອລງ຺ກຕປຏິຍຕ຺ຕາ ຘາຕິຄຓປຣິວຸຕາ ເຄຫໍ ຄຈ຺ຉຕິ. ໂສ ທູຣໂຕ ທິສ຺ວາ ‘‘ອາຄນ຺ຕຸກມາຕຸຄາໂມ ຠວິສ຺ສຕີ’’ຕິ ສຎ຺ຎໍ ອຸປ຺ປາເທຕ຺ວາ ‘‘ຄຈ຺ຉ, ຠເຓ ຊານາຫິ, ກາ ເອສາ’’ຕິ ປຸຣິສໍ ເປເສສິ. ໂສ ຄນ຺ຕ຺ວາ ຕໍ ທິສ຺ວາ ປຈ຺ຈາຄໂຕ, ‘‘ກາ ເອສາ’’ຕິ ປຸຏ຺ໂຐ ຍຖາສຠາວໍ ອາໂຣເຈສິ. ເອວໍ ອາຄນ຺ຕຸກາຣມ຺ມຓໍ ໂຂເຠຕິ. ຕສ຺ມິໍ ອຸປ຺ປນ຺ໂນ ຉນ຺ໂທ ຣູປຉນ຺ໂທ ນາມ, ຕເທວ ອາຣມ຺ມຓໍ ກຕ຺ວາ ອຸປ຺ປນ຺ໂນ ປຣິຬາໂຫ ຣູປປຣິຬາໂຫ ນາມ, ສຫາເຍ ຄຓ຺ຫິຕ຺ວາ ຕສ຺ສ ປຣິເຍສນໍ ຣູປປຣິເຍສນາ ນາມ, ປຣິເຍສິຕ຺ວາ ລທ຺ຘໍ ສຫ ຕຓ຺ຫາຍ ອາຣມ຺ມຓໍ ຣູປລາໂຠ ນາມ.

ອຸຣຸວລ຺ລິຍວາສີ ຈູຬຕິສ຺ສຕ຺ເຖໂຣ ປນາຫ – ‘‘ກິຎ຺ຈາປິ ຠຄວຕາ ຜສ຺ສເວທນາ ປາຬິຍາ ມຊ຺ເຌ ຄຫິຕາ, ປາຬິໍ ປນ ປຣິວຏ຺ເຏຕ຺ວາ ວຸຕ຺ຕປ຺ປກາເຣ ອາຣມ຺ມເຓ ອຸປ຺ປນ຺ນາ ສຎ຺ຎາ ຣູປສຎ຺ຎາ, ຕສ຺ມິໍເຍວ ສງ຺ກປ຺ໂປ ຣູປສງ຺ກປ຺ໂປ ຕສ຺ມິໍ ຉນ຺ໂທ ຣູປຈ຺ຉນ຺ໂທ, ຕສ຺ມິໍ ປຣິຬາໂຫ ຣູປປຣິຬາໂຫ, ຕສ຺ມິໍ ປຣິເຍສນາ ຣູປປຣິເຍສນາ, ປຣິເຍສິຕ຺ວາ ລທ຺ຘໍ ສຫ ຕຓ຺ຫາຍ ອາຣມ຺ມຓໍ ຣູປລາໂຠ. ເອວໍ ລທ຺ຘາຣມ຺ມເຓ ປນ ຜຸສນໍ ຜສ຺ໂສ, ອນຸຠວນໍ ເວທນາ. ຣູປສມ຺ຜສ຺ໂສ ຣູປສມ຺ຜສ຺ສຊາ ເວທນາຕິ ອິທໍ ທ຺ວຍໍ ລພ຺ຠຕີ’’ຕິ. ອປຣມ຺ປິ ອວິຠູຕວາຣໍ ນາມ ຄຓ຺ຫນ຺ຕິ. ອາຣມ຺ມຓຎ຺ຫິ ສາຓິປາກາເຣຫິ ວາ ປຣິກ຺ຂິຕ຺ຕໍ ຕິຓປຓ຺ຓາທີຫິ ວາ ປຏິຈ຺ຉນ຺ນໍ ໂຫຕິ, ຕໍ ‘‘ອຸປຑ຺ຒໍ ທິຏ຺ຐໍ ເມ ອາຣມ຺ມຓໍ, ສຸຏ຺ຐຸ ນໍ ປສ຺ສິສ຺ສາມີ’’ຕິ ໂອໂລກຍໂຕ ຕສ຺ມິໍ ອາຣມ຺ມເຓ ອຸປ຺ປນ຺ນາ ສຎ຺ຎາ ຣູປສຎ຺ຎາ ນາມ. ຕສ຺ມິໍເຍວ ອຸປ຺ປນ຺ນາ ສງ຺ກປ຺ປາທໂຍ ຣູປສງ຺ກປ຺ປາທໂຍ ນາມາຕິ ເວທິຕພ຺ພາ. ເອຕ຺ຖາປິ ຈ ສຎ຺ຎາສງ຺ກປ຺ປຜສ຺ສເວທນາຉນ຺ທາ ເອກຊວນວາເຣປິ ນານາຊວນວາເຣປິ ລພ຺ຠນ຺ຕິ, ປຣິຬາຫປຣິເຍສນາລາຠາ ນານາຊວນວາເຣເຍວາຕິ. ທສມໍ ອຸຕ຺ຕານເມວາຕິ. ນວມທສມານິ.

ນານຕ຺ຕວຄ຺ໂຄ ປຐໂມ.