໘. ຕິມ຺ພຣຸກສຸຕ຺ຕວຓ຺ຓນາ

໑໘. ອຏ຺ຐເມ ສາ ເວທນາຕິອາທິ ‘‘ສຍໍກຕໍ ສຸຂທຸກ຺ຂ’’ນ຺ຕິ ລທ຺ຘິຍາ ນິເສຘນຕ຺ຖໍ ວຸຕ຺ຕໍ. ເອຕ຺ຖາປິ ສໂຕຕິ ຠຸມ຺ມຕ຺ເຖເຍວ ສາມິວຈນໍ. ຕຕ຺ຣາຍໍ ອຕ຺ຖທີປນາ – ‘‘ສາ ເວທນາ, ໂສ ເວທິຍຕີ’’ຕິ ໂຂ, ຕິມ຺ພຣຸກ, ອາທິມ຺ຫິເຍວ ເອວໍ ສຕິ ‘‘ສຍໍກຕໍ ສຸຂທຸກ຺ຂ’’ນ຺ຕິ ອຍໍ ລທ຺ຘິ ໂຫຕິ. ເອວຎ຺ຫິ ສຕິ ເວທນາຍ ເອວ ເວທນາ ກຕາ ໂຫຕິ. ເອວຎ຺ຈ ວທນ຺ໂຕ ອິມິສ຺ສາ ເວທນາຍ ປຸພ຺ເພປິ ອຕ຺ຖິຕໍ ອນຸຊານາຕິ, ສສ຺ສຕໍ ທີເປຕິ ສສ຺ສຕໍ ຄຓ຺ຫາຕິ. ກສ຺ມາ? ຕສ຺ສ ຫິ ຕໍ ທສ຺ສນໍ ເອຕໍ ປເຣຕິ, ເອຕໍ ສສ຺ສຕໍ ອຸປຄຈ຺ຉຕີຕິ ອຕ຺ໂຖ. ປຸຣິມຎ຺ຫິ ອຕ຺ຖໍ ສນ຺ຘາເຍເວຕໍ ຠຄວຕາ ວຸຕ຺ຕໍ ຠວິສ຺ສຕິ, ຕສ຺ມາ ອຏ຺ຐກຖາຍໍ ຕໍ ໂຍເຊຕ຺ວາວສ຺ສ ອຕ຺ໂຖ ທີປິໂຕ. ເອວມ຺ປາຫໍ ນ ວທາມີຕິ ອຫໍ ‘‘ສາ ເວທນາ, ໂສ ເວທິຍຕີ’’ຕິ ເອວມ຺ປິ ນ ວທາມິ. ‘‘ສຍໍກຕໍ ສຸຂທຸກ຺ຂ’’ນ຺ຕິ ເອວມ຺ປິ ນ ວທາມີຕິ ອຕ຺ໂຖ.

ອຎ຺ຎາ ເວທນາຕິອາທິ ‘‘ປຣໍກຕໍ ສຸຂທຸກ຺ຂ’’ນ຺ຕິ ລທ຺ຘິຍາ ປຏິເສຘນຕ຺ຖໍ ວຸຕ຺ຕໍ. ອິຘາປິ ອຍໍ ອຕ຺ຖໂຍຊນາ –‘‘ອຎ຺ຎາ ເວທນາ ອຎ຺ໂຎ ເວທິຍຕີ’’ຕິ ໂຂ, ຕິມ຺ພຣຸກ, ອາທິມ຺ຫິເຍວ ເອວໍ ສຕິ ປຈ຺ຉາ ຍາ ປຸຣິມປກ຺ເຂ ກາຣກເວທນາ, ສາ ອຸຈ຺ຉິນ຺ນາ. ຕາຍ ປນ ກຕໍ ອຎ຺ໂຎ ເວທິຍຕີຕິ ເອວໍ ອຸປ຺ປນ຺ນາຍ ອຸຈ຺ເຉທທິຏ຺ຐິຍາ ສທ຺ຘິໍ ສມ຺ປຍຸຕ຺ຕາຍ ເວທນາຍ ອຠິຕຸນ຺ນສ຺ສ ສໂຕ ‘‘ປຣໍກຕໍ ສຸຂທຸກ຺ຂ’’ນ຺ຕິ ອຍໍ ລທ຺ຘິ ໂຫຕິ. ເອວຎ຺ຈ ວທນ຺ໂຕ ກາຣໂກ ອຸຈ຺ຉິນ຺ໂນ, ອຎ຺ເຎນ ປຏິສນ຺ຘິ ຄຫິຕາຕິ ອຸຈ຺ເຉທໍ ທີເປຕິ, ອຸຈ຺ເຉທໍ ຄຓ຺ຫາຕິ. ກສ຺ມາ? ຕສ຺ສ ຫິ ຕໍ ທສ຺ສນໍ ເອຕໍ ປເຣຕິ, ເອຕໍ ອຸຈ຺ເຉທໍ ອຸປຄຈ຺ຉຕີຕິ ອຕ຺ໂຖ. ອິຘາປິ ຫິ ອິມານິ ປທານິ ອຏ຺ຐກຖາຍໍ ອາຫຣິຕ຺ວາ ໂຍຊິຕາເນວ. ອິມສ຺ມິໍ ສຸຕ຺ເຕ ເວທນາສຸຂທຸກ຺ຂໍ ກຖິຕໍ. ຕຎ຺ຈ ໂຂ ວິປາກສຸຂທຸກ຺ຂເມວ ວຏ຺ຏຕີຕິ ວຸຕ຺ຕໍ. ອຏ຺ຐມໍ.