໙. ພາລປຓ຺ຑິຕສຸຕ຺ຕວຓ຺ຓນາ

໑໙. ນວເມ ອວິຊ຺ຊານີວຣຓສ຺ສາຕິ ອວິຊ຺ຊາຍ ນິວາຣິຕສ຺ສ. ເອວມຍໍ ກາໂຍ ສມຸທາຄໂຕຕິ ເອວໍ ອວິຊ຺ຊາຍ ນິວາຣິຕຕ຺ຕາ ຕຓ຺ຫາຍ ຈ ສມ຺ປຍຸຕ຺ຕຕ຺ຕາເຍວ ອຍໍ ກາໂຍ ນິພ຺ພຕ຺ໂຕ. ອຍຎ຺ເຈວ ກາໂຍຕິ ອຍຎ຺ຈສ຺ສ ອຕ຺ຕໂນ ສວິຎ຺ຎາຓໂກ ກາໂຍ. ພຫິທ຺ຘາ ຈ ນາມຣູປນ຺ຕິ ພຫິທ຺ຘາ ຈ ປເຣສໍ ສວິຎ຺ຎາຓໂກ ກາໂຍ. ອຕ຺ຕໂນ ຈ ປຣສ຺ສ ຈ ປຎ຺ຈຫິ ຂນ຺ເຘຫິ ຉຫິ ອາຍຕເນຫິ ຈາປິ ອຍໍ ອຕ຺ໂຖ ທີເປຕພ຺ໂພວ. ອິຕ຺ເຖຕໍ ທ຺ວຍນ຺ຕິ ເອວເມຕໍ ທ຺ວຍໍ. ທ຺ວຍໍ ປຏິຈ຺ຈ ຜສ຺ໂສຕິ ອຎ຺ຎຕ຺ຖ ຈກ຺ຂຸຣູປາທີນິ ທ຺ວຍານິ ປຏິຈ຺ຈ ຈກ຺ຂຸສມ຺ຜສ຺ສາທໂຍ ວຸຕ຺ຕາ, ອິຘ ປນ ອຊ຺ຌຕ຺ຕິກພາຫິຣານິ ອາຍຕນານິ. ມຫາທ຺ວຍໍ ນາມ ກິເຣຕໍ. ສເຬວາຍຕນານີຕິ ສເຬວ ຜສ຺ສາຍຕນານິ ຜສ຺ສກາຣຓານິ. ເຍຫິ ຜຸຏ຺ໂຐຕິ ເຍຫິ ກາຣຓຠູເຕຫິ ອາຍຕເນຫິ ອຸປ຺ປນ຺ເນນ ຜສ຺ເສນ ຜຸຏ຺ໂຐ. ອຎ຺ຎຕເຣນາຕິ ເອຕ຺ຖ ປຣິປຸຓ຺ຓວເສນ ອຎ຺ຎຕຣຕາ ເວທິຕພ຺ພາ. ຕຕ຺ຣາຕິ ຕສ຺ມິໍ ພາລປຓ຺ຑິຕານໍ ກາຍນິພ຺ພຕ຺ຕນາທິມ຺ຫິ. ໂກ ອຘິປ຺ປຍາໂສຕິ ໂກ ອຘິກປໂຍໂຄ.

ຠຄວໍມູລກາຕິ ຠຄວາ ມູລໍ ເອເຕສນ຺ຕິ ຠຄວໍມູລກາ. ອິທໍ ວຸຕ຺ຕໍ ໂຫຕິ – ອິເມ, ຠນ຺ເຕ, ອມ຺ຫາກໍ ຘມ຺ມາ ປຸພ຺ເພ ກສ຺ສປສມ຺ມາສມ຺ພຸທ຺ເຘນ ອຸປ຺ປາທິຕາ, ຕສ຺ມິໍ ປຣິນິພ຺ພຸເຕ ເອກໍ ພຸທ຺ຘນ຺ຕຣໍ ອຎ຺ໂຎ ສມໂຓ ວາ ພ຺ຣາຫ຺ມໂຓ ວາ ອິເມ ຘມ຺ເມ ອຸປ຺ປາເທຕຸໍ ສມຕ຺ໂຖ ນາມ ນາໂຫສິ, ຠຄວຕາ ປນ ໂນ ອິເມ ຘມ຺ມາ ອຸປ຺ປາທິຕາ. ຠຄວນ຺ຕຎ຺ຫິ ນິສ຺ສາຍ ມຍໍ ອິເມ ຘມ຺ເມ ອາຊານາມ ປຏິວິຊ຺ຌາມາຕິ ເອວໍ ຠຄວໍມູລກາ ໂນ, ຠນ຺ເຕ, ຘມ຺ມາຕິ. ຠຄວໍເນຕ຺ຕິກາຕິ ຠຄວາ ຫິ ຘມ຺ມານໍ ເນຕາ ວິເນຕາ ອນຸເນຕາ, ຍຖາສຠາວໂຕ ປາຏິເຍກ຺ກໍ ປາຏິເຍກ຺ກໍ ນາມໍ ຄເຫຕ຺ວາ ທສ຺ເສຕາຕິ ຘມ຺ມາ ຠຄວໍເນຕ຺ຕິກາ ນາມ ໂຫນ຺ຕິ. ຠຄວໍປຏິສຣຓາຕິ ຈຕຸຠູມກຘມ຺ມາ ສພ຺ພຎ຺ຎຸຕຎ຺ຎາຓສ຺ສ ອາປາຖໍ ອາຄຈ຺ຉມານາ ຠຄວຕິ ປຏິສຣນ຺ຕິ ນາມາຕິ ຠຄວໍປຏິສຣຓາ. ປຏິສຣນ຺ຕີຕິ ສໂມສຣນ຺ຕິ. ອປິຈ ມຫາໂພຘິມຓ຺ເຑ ນິສິນ຺ນສ຺ສ ຠຄວໂຕ ປຏິເວຘວເສນ ຜສ຺ໂສ ອາຄຈ຺ຉຕິ ‘‘ອຫໍ ຠຄວາ ກິນ຺ນາໂມ’’ຕິ? ຕ຺ວໍ ຜຸສນຏ຺ເຐນ ຜສ຺ໂສ ນາມ. ເວທນາ, ສຎ຺ຎາ, ສງ຺ຂາຣາ, ວິຎ຺ຎາຓໍ ອາຄຈ຺ຉຕິ ‘‘ອຫໍ ຠຄວາ ກິນ຺ນາມ’’ນ຺ຕິ, ຕ຺ວໍ ວິຊານນຏ຺ເຐນ ວິຎ຺ຎາຓໍ ນາມາຕິ ເອວໍ ຈຕຸຠູມກຘມ຺ມານໍ ຍຖາສຠາວໂຕ ປາຏິເຍກ຺ກໍ ປາຏິເຍກ຺ກໍ ນາມໍ ຄຓ຺ຫນ຺ໂຕ ຠຄວາ ຘມ຺ເມ ປຏິສຣຕີຕິ ຠຄວໍປຏິສຣຓາ. ຠຄວນ຺ຕໍເຍວ ປຏິຠາຕູຕິ ຠຄວໂຕວ ເອຕສ຺ສ ຠາສິຕສ຺ສ ອຕ຺ໂຖ ອຸປຏ຺ຐາຕຸ, ຕຸມ຺ເຫເຍວ ໂນ ກເຖຕ຺ວາ ເທຖາຕິ ອຕ຺ໂຖ.

ສາ ເຈວ ອວິຊ຺ຊາຕິ ເອຕ຺ຖ ກິຎ຺ຈາປິ ສາ ອວິຊ຺ຊາ ຈ ຕຓ຺ຫາ ຈ ກມ຺ມໍ ຊວາເປຕ຺ວາ ປຏິສນ຺ຘິໍ ອາກຑ຺ຒິຕ຺ວາ ນິຣຸທ຺ຘາ, ຍຖາ ປນ ອຊ຺ຊາປິ ຍໍ ຫິຍ຺ໂຍ ເຠສຊ຺ຊໍ ປີຕໍ, ຕເທວ ໂຠຊນໍ ຠຸຎ຺ຊາຕິ ສຣິກ຺ຂກຕ຺ເຕນ ຕເທວາຕິ ວຸຈ຺ຈຕິ, ເອວມິຘາປິ ສາ ເຈວ ອວິຊ຺ຊາ ສາ ຈ ຕຓ຺ຫາຕິ ອິທມ຺ປິ ສຣິກ຺ຂກຕ຺ເຕນ ວຸຕ຺ຕໍ. ພ຺ຣຫ຺ມຈຣິຍນ຺ຕິ ມຄ຺ຄພ຺ຣຫ຺ມຈຣິຍໍ. ທຸກ຺ຂກ຺ຂຍາຍາຕິ ວຏ຺ຏທຸກ຺ຂສ຺ສ ຂຍຕ຺ຖາຍ. ກາຍູປໂຄ ໂຫຕີຕິ ອຎ຺ຎໍ ປຏິສນ຺ຘິກາຍໍ ອຸປຄນ຺ຕາ ໂຫຕິ. ຍທິທໍ ພ຺ຣຫ຺ມຈຣິຍວາໂສຕິ ໂຍ ອຍໍ ມຄ຺ຄພ຺ຣຫ຺ມຈຣິຍວາໂສ, ອຍໍ ພາລໂຕ ປຓ຺ຑິຕສ຺ສ ວິເສໂສຕິ ທສ຺ເສຕິ. ອິຕິ ອິມສ຺ມິໍ ສຸຕ຺ເຕ ສພ຺ໂພປິ ສປຏິສນ຺ຘິໂກ ປຸຖຸຊ຺ຊໂນ ‘‘ພາໂລ’’ຕິ, ອປ຺ປຏິສນ຺ຘິໂກ ຂີຓາສໂວ ‘‘ປຓ຺ຑິໂຕ’’ຕິ ວຸຕ຺ໂຕ. ໂສຕາປນ຺ນສກທາຄາມິອນາຄາມິໂນ ປນ ‘‘ປຓ຺ຑິຕາ’’ຕິ ວາ ‘‘ພາລາ’’ຕິ ວາ ນ ວຕ຺ຕພ຺ພາ, ຠຊມານາ ປນ ປຓ຺ຑິຕປກ຺ຂໍ ຠຊນ຺ຕິ. ນວມໍ.