໓. ປຏິປທາສຸຕ຺ຕວຓ຺ຓນາ

໓. ຕຕິເຍ ມິຈ຺ຉາປຏິປທນ຺ຕິ ອຍໍ ຕາວ ອນິຍ຺ຍານິກປຏິປທາ. ນນຸ ຈ ອວິຊ຺ຊາປຈ຺ຈຍາ ປຸຎ຺ຎາຠິສງ຺ຂາໂຣປິ ອຕ຺ຖິ ອາເນຎ຺ຊາຠິສງ຺ຂາໂຣປິ, ໂສ ກຖໍ ມິຈ຺ຉາປຏິປທາ ໂຫຕີຕິ. ວຏ຺ຏສີສຕ຺ຕາ. ຍຎ຺ຫິ ກິຎ຺ຈິ ຠວຕ຺ຕຍສງ຺ຂາຕໍ ວຏ຺ຏໍ ປຕ຺ເຖຕ຺ວາ ປວຕ຺ຕິຕໍ, ອນ຺ຕມໂສ ປຎ຺ຈາຠິຎ຺ຎາ ອຏ຺ຐ ວາ ປນ ສມາປຕ຺ຕິໂຍ, ສພ຺ພໍ ຕໍ ວຏ຺ຏປກ຺ຂິຍໍ ວຏ຺ຏສີສນ຺ຕິ ວຏ຺ຏສີສຕ຺ຕາ ມິຈ຺ຉາປຏິປທາວ ໂຫຕິ. ຍໍ ປນ ກິຎ຺ຈິ ວິວຏ຺ຏໍ ນິພ຺ພານໍ ປຕ຺ເຖຕ຺ວາ ປວຕ຺ຕິຕໍ, ອນ຺ຕມໂສ ອຸຬຸງ຺ກຍາຄຸມຕ຺ຕທານມ຺ປິ ປຓ຺ຓມຸຏ຺ຐິທານມຕ຺ຕມ຺ປິ, ສພ຺ພໍ ຕໍ ວິວຏ຺ຏປກ຺ຂິຍໍ ວິວຏ຺ຏນິສ຺ສິຕໍ, ວິວຏ຺ຏປກ຺ຂິກຕ຺ຕາ ສມ຺ມາປຏິປທາວ ໂຫຕິ. ອປ຺ປມຕ຺ຕກມ຺ປິ ຫິ ປຓ຺ຓມຸຏ຺ຐິມຕ຺ຕທານກຸສລໍ ວາ ໂຫຕຸ ມຫນ຺ຕໍ ເວລາມທານາທິກຸສລໍ ວາ, ສເຈ ວຏ຺ຏສມ຺ປຕ຺ຕິໍ ປຕ຺ເຖຕ຺ວາ ວຏ຺ຏນິສ຺ສິຕວເສນ ມິຈ຺ຉາ ຐປິຕໍ ໂຫຕິ, ວຏ຺ຏເມວ ອາຫຣິຕຸໍ ສກ຺ໂກຕິ, ໂນ ວິວຏ຺ຏໍ. ‘‘ອິທໍ ເມ ທານໍ ອາສວກ຺ຂຍາວຫໍ ໂຫຕູ’’ຕິ ເອວໍ ປນ ວິວຏ຺ຏໍ ປຕ຺ເຖນ຺ເຕນ ວິວຏ຺ຏວເສນ ສມ຺ມາ ຐປິຕໍ ອຣຫຕ຺ຕມ຺ປິ ປຈ຺ເຈກໂພຘິຎາຓມ຺ປິ ສພ຺ພຎ຺ຎຸຕຎ຺ຎາຓມ຺ປິ ທາຕຸໍ ສກ຺ໂກຕິເຍວ, ນ ອຣຫຕ຺ຕໍ ອປ຺ປຕ຺ວາ ປຣິໂຍສານໍ ຄຈ຺ຉຕິ. ອິຕິ ອນຸໂລມວເສນ ມິຈ຺ຉາປຏິປທາ, ປຏິໂລມວເສນ ສມ຺ມາປຏິປທາ ເທສິຕາຕິ ເວທິຕພ຺ພາ. ນນຸ ເຈຕ຺ຖ ປຏິປທາ ປຸຈ຺ຉິຕາ, ນິພ຺ພານໍ ຠາຊິຕໍ, ນິຍ຺ຍາຕເນປິ ປຏິປທາວ ນິຍ຺ຍາຕິຕາ. ນ ຈ ນິພ຺ພານສ຺ສ ປຏິປທາຕິ ນາມໍ, ສວິປສ຺ສນານໍ ປນ ຈຕຸນ຺ນໍ ມຄ຺ຄານເມຕໍ ນາມໍ, ຕສ຺ມາ ປຸຈ຺ຉານິຍ຺ຍາຕເນຫິ ປທຠາຊນໍ ນ ສເມຕີຕິ. ໂນ ນ ສເມຕິ, ກສ຺ມາ? ຜເລນ ປຏິປທາຍ ທສ຺ສິຕຕ຺ຕາ. ຜເລນ ເຫຕ຺ຖ ປຏິປທາ ທສ຺ສິຕາ. ‘‘ອວິຊ຺ຊາຍ ຕ຺ເວວ ອເສສວິຣາຄນິໂຣຘາ ສງ຺ຂາຣນິໂຣໂຘ’’ຕິ ເອຕໍ ນິໂຣຘສງ຺ຂາຕໍ ນິພ຺ພານໍ ຍສ຺ສາ ປຏິປທາຍ ຜລໍ, ອຍໍ ວຸຈ຺ຈຕິ, ຠິກ຺ຂເວ, ສມ຺ມາປຏິປທາຕິ ອຍເມຕ຺ຖ ອຕ຺ໂຖ. ອິມສ຺ມິຎ຺ຈ ອຕ຺ເຖ ອເສສວິຣາຄນິໂຣຘາຕິ ເອຕ຺ຖ ວິຣາໂຄ ນິໂຣຘສ຺ເສວ ເວວຈນໍ, ອເສສວິຣາຄາ ອເສສນິໂຣຘາຕິ ອຍຎ຺ເຫຕ຺ຖ ອຘິປ຺ປາໂຍ. ເຍນ ວາ ວິຣາຄສງ຺ຂາເຕນ ມຄ຺ເຄນ ອເສສນິໂຣໂຘ ໂຫຕິ, ຕໍ ທສ຺ເສຕຸໍ ເອຕໍ ປທຠາຊນໍ ວຸຕ຺ຕໍ. ເອວຎ຺ຫິ ສຕິ ສານຸຠາວາ ປຏິປທາ ວິຠຕ຺ຕາ ໂຫຕິ. ອິຕິ ອິມສ຺ມິມ຺ປິ ສຸຕ຺ເຕ ວຏ຺ຏວິວຏ຺ຏເມວ ກຖິຕນ຺ຕິ. ຕຕິຍໍ.