໘. ກຏ຺ຐຫາຣສຸຕ຺ຕວຓ຺ຓນາ

໒໐໔. ອຏ຺ຐເມ ອນ຺ເຕວາສິກາຕິ ເວຍ຺ຍາວຈ຺ຈໍ ກຕ຺ວາ ສິປ຺ປຸຄ຺ຄຓ຺ຫນກາ ຘມ຺ມນ຺ເຕວາສິກາ. ນິສິນ຺ນນ຺ຕິ ຉພ຺ພຓ຺ຓຣສ຺ມິໂຍ ວິສ຺ສຊ຺ເຊຕ຺ວາ ນິສິນ຺ນໍ. ຄມ຺ຠີຣຣູເປຕິ ຄມ຺ຠີຣສຠາເວ.

ພຫຸເຠຣເວຕິ ຕຕ຺ຣຏ຺ຐກສວິຎ຺ຎາຓກອວິຎ຺ຎາຓກເຠຣເວຫິ ພຫຸເຠຣເວ. ວິຄາຫິຍາຕິ ອນຸປວິສິຕ຺ວາ. ອນິຎ຺ຊມາເນນາຕິອາທີນິ ກາຍວິເສສນານິ, ເອວຣູເປນ ກາເຍນາຕິ ອຕ຺ໂຖ. ສຸຈາຣຸຣູປໍ ວຕາຕິ ອຕິສຸນ຺ທຣໍ ວຕ ຌານໍ ຌາຍສີຕິ ວທຕິ.

ວນວສ຺ສິໂຕ ມຸນີຕິ ວນໍ ອວສ຺ສິໂຕ ພຸທ຺ຘມຸນິ. ອິທນ຺ຕິ ອິທໍ ຕຸມ຺ຫາກໍ ເອວໍ ວເນ ນິສິນ຺ນກາຣຓໍ ມຍ຺ຫໍ ອຈ຺ເຉຣຣູປໍ ປຏິຠາຕິ. ປີຕິມໂນຕິ ຕຸຏ຺ຐຈິຕ຺ໂຕ. ວເນ ວເສຕິ ວນມ຺ຫິ ວສິ.

ມຎ຺ຎາມຫນ຺ຕິ ມຎ຺ຎາມິ ອຫໍ. ໂລກາຘິປຕິສຫພ຺ຍຕນ຺ຕິ ໂລກາຘິປຕິມຫາພ຺ຣຫ຺ມຸນາ ສຫຠາວໍ. ອາກງ຺ຂມາໂນຕິ ອິຈ຺ຉມາໂນ. ຕິທິວໍ ອນຸຕ຺ຕຣນ຺ຕິ ອິທໍ ພ຺ຣຫ຺ມໂລກເມວ ສນ຺ຘາຍາຫ. ກສ຺ມາ ຠວໍ ວິຊນມຣຎ຺ຎມສ຺ສິໂຕຕິ ອຫໍ ຕາວ ພ຺ຣຫ຺ມໂລກໍ ອາກງ຺ຂມາໂນຕິ ມຎ຺ຎາມິ. ຍທິ ເອວໍ ນ ໂຫຕິ, ອຖ ເມ ອາຈິກ຺ຂ, ກສ຺ມາ ຠວນ຺ຕິ? ປຸຈ຺ຉຕິ. ພ຺ຣຫ຺ມປຕ຺ຕິຍາຕິ ເສຏ຺ຐປຕ຺ຕິຍາ. ອິຘ ອິທໍ ຕໂປ ກສ຺ມາ ກໂຣສີຕິ ອປເຣນປິ ອາກາເຣນ ປຸຈ຺ຉຕິ.

ກງ຺ຂາຕິ ຕຓ຺ຫາ. ອຠິນນ຺ທນາຕິ ອຠິນນ຺ທນວເສນ ຕຓ຺ຫາວ ວຸຕ຺ຕາ. ອເນກຘາຕູສູຕິ ອເນກສຠາເວສຸ ອາຣມ຺ມເຓສຸ. ປຸຖູຕິ ນານປ຺ປກາຣາ ຕຓ຺ຫາ ເສສກິເລສາ ວາ. ສທາສິຕາຕິ ນິຈ຺ຈກາລໍ ອວສ຺ສິຕາ. ອຎ຺ຎາຓມູລປ຺ປຠວາຕິ ອວິຊ຺ຊາມູລາ ຫຸຕ຺ວາ ຊາຕາ. ປຊປ຺ປິຕາຕິ ຕຓ຺ຫາວ ‘‘ອິທມ຺ປິ ມຍ຺ຫໍ, ອິທມ຺ປິ ມຍ຺ຫ’’ນ຺ຕິ ປຊປ຺ປາປນວເສນ ປຊປ຺ປິຕາ ນາມາຕິ ວຸຕ຺ຕາ. ສພ຺ພາ ມຍາ ພ຺ຍນ຺ຕິກຕາຕິ ສພ຺ພາ ຕຓ຺ຫາ ມຍາ ອຄ຺ຄມຄ຺ເຄນ ວິຄຕນ຺ຕາ ນິຣນ຺ຕາ ກຕາ. ສມູລິກາຕິ ສທ຺ຘິໍ ອຎ຺ຎາຓມູເລນ.

ອນູປໂຍຕິ ອນຸປຄມໂນ. ສພ຺ເພສຸ ຘມ຺ເມສຸ ວິສຸທ຺ຘທສ຺ສໂນຕິ ອິມິນາ ສພ຺ພຎ຺ຎຸຕຎ຺ຎາຓໍ ທີເປຕິ. ສມ຺ໂພຘິມນຸຕ຺ຕຣນ຺ຕິ ອຣຫຕ຺ຕໍ ສນ຺ຘາຍາຫ. ສິວນ຺ຕິ ເສຏ຺ຐໍ. ຌາຍາມີຕິ ທ຺ວີຫິ ຌາເນຫິ ຌາຍາມິ. ວິສາຣໂທຕິ ວິຄຕສາຣຊ຺ໂຊ. ອຏ຺ຐມໍ.