໕. ຠິກ຺ຂຸນີສໍຍຸຕ຺ຕໍ

໑. ອາຬວິກາສຸຕ຺ຕວຓ຺ຓນາ

໑໖໒. ຠິກ຺ຂຸນີສໍຍຸຕ຺ຕສ຺ສ ປຐເມ ອາຬວິກາຕິ ອາຬວິຍໍ ຊາຕາ ອາຬວິນຄຣໂຕເຍວ ຈ ນິກ຺ຂມ຺ມ ປພ຺ພຊິຕາ. ອນ຺ຘວນນ຺ຕິ ກສ຺ສປສມ຺ມາສມ຺ພຸທ຺ຘສ຺ສ ເຈຕິເຍ ນວກມ຺ມຕ຺ຖາຍ ຘນໍ ສມາທເປຕ຺ວາ ອາຄຈ຺ຉນ຺ຕສ຺ສ ຍໂສຘຣສ຺ສ ນາມ ຘມ຺ມຠາຓກສ຺ສ ອຣິຍປຸຄ຺ຄລສ຺ສ ອກ຺ຂີນິ ອຸປ຺ປາເຏຕ຺ວາ ຕຕ຺ເຖວ ອກ຺ຂິເຠທປ຺ປຕ຺ເຕຫິ ປຎ຺ຈຫິ ໂຈຣສເຕຫິ ນິວຸຕ຺ຖຕ຺ຕາ ຕໂຕ ປຏ຺ຐາຍ ‘‘ອນ຺ຘວນ’’ນ຺ຕິ ສງ຺ຂໍ ຄຕໍ ວນໍ. ຕໍ ກິຣ ສາວຕ຺ຖິໂຕ ທກ຺ຂິຓປສ຺ເສ ຄາວຸຕມຕ຺ເຕ ໂຫຕິ ຣາຊາຣກ຺ຂາຍ ຄຸຕ຺ຕໍ. ຕຕ຺ຖ ປວິເວກກາມາ ຠິກ຺ຂູ ຈ ຠິກ຺ຂຸນິໂຍ ຈ ຄຈ຺ຉນ຺ຕິ. ຕສ຺ມາ ອຍມ຺ປິ ກາຍວິເວກຕ຺ຖິນີ ເຍນ ຕໍ ວນໍ, ເຕນຸປສງ຺ກມິ. ນິສ຺ສຣຓນ຺ຕິ ນິພ຺ພານໍ. ປຎ຺ຎາຍາຕິ ປຈ຺ຈເວກ຺ຂຓຎາເຓນ. ນ ຕ຺ວໍ ຊານາສິ ຕໍ ປທນ຺ຕິ ຕ຺ວໍ ເອຕໍ ນິພ຺ພານປທໍ ວາ ນິພ຺ພານຄາມິມຄ຺ຄປທໍ ວາ ນ ຊານາສິ. ສຕ຺ຕິສູລູປມາຕິ ວິນິວິຊ຺ຌນຕ຺ເຖນ ສຕ຺ຕິສູລສທິສາ. ຂນ຺ຘາສໍ ອຘິກຸຏ຺ຏນາຕິ ຂນ຺ຘາ ເຕສໍ ອຘິກຸຏ຺ຏນຠຓ຺ຑິກາ. ປຐມໍ.

໒. ໂສມາສຸຕ຺ຕວຓ຺ຓນາ

໑໖໓. ທຸຕິເຍ ຐານນ຺ຕິ ອຣຫຕ຺ຕໍ. ທຸຣຠິສມ຺ຠວນ຺ຕິ ທຸປ຺ປສຫໍ. ທ຺ວງ຺ຄຸລປຎ຺ຎາຍາຕິ ປຣິຕ຺ຕປຎ຺ຎາຍ. ຍສ຺ມາ ວາ ທ຺ວີຫິ ອງ຺ຄຸເລຫິ ກປ຺ປາສວຏ຺ຏິໍ ຄເຫຕ຺ວາ ສຸຕ຺ຕໍ ກນ຺ຕນ຺ຕິ, ຕສ຺ມາ ອິຕ຺ຖີ ‘‘ທ຺ວງ຺ຄຸລປຎ຺ຎາ’’ຕິ ວຸຈ຺ຈຕິ. ຎາຓມ຺ຫິ ວຕ຺ຕມານມ຺ຫີຕິ ຜລສມາປຕ຺ຕິຎາເຓ ປວຕ຺ຕມາເນ. ຘມ຺ມໍ ວິປສ຺ສໂຕຕິ ຈຕຸສຈ຺ຈຘມ຺ມໍ ວິປສ຺ສນ຺ຕສ຺ສ, ປຸພ຺ພຠາເຄ ວາ ວິປສ຺ສນາຍ ອາຣມ຺ມຓຠູຕໍ ຂນ຺ຘປຎ຺ຈກເມວ. ກິຎ຺ຈິ ວາ ປນ ອຎ຺ຎສ຺ມີຕິ ອຎ຺ຎໍ ວາ ກິຎ຺ຈິ ‘‘ອຫໍ ອສ຺ມີ’’ຕິ ຕຓ຺ຫາມານທິຏ຺ຐິວເສນ ຍສ຺ສ ສິຍາ. ທຸຕິຍໍ.

໓. ກິສາໂຄຕມີສຸຕ຺ຕວຓ຺ຓນາ

໑໖໔. ຕຕິເຍ ກິສາໂຄຕມີຕິ ອປ຺ປມໍສໂລຫິຕຕາຍ ກິສາ, ໂຄຕມີຕິ ປນສ຺ສາ ນາມໍ. ປຸພ຺ເພ ກິຣ ສາວຕ຺ຖິຍໍ ເອກສ຺ມິໍ ກຸເລ ອສີຕິໂກຏິຘນໍ ສພ຺ພໍ ອງ຺ຄາຣາວ ຊາຕໍ. ກຸຏຸມ຺ພິໂກ ອງ຺ຄາຣຊາຕານິ ອນີຫຣິຕ຺ວາ – ‘‘ອວສ຺ສໍ ໂກຈິ ປຸຎ຺ຎວາ ຠວິສ຺ສຕິ, ຕສ຺ສ ປຸຎ຺ເຎນ ປຸນ ປາກຕິກໍ ຠວິສ຺ສຕີ’’ຕິ ສຸວຓ຺ຓຫິຣຎ຺ຎສ຺ສ ຈາຏິໂຍ ປູເຣຕ຺ວາ ອາປເຓ ຐເປຕ຺ວາ ສມີເປ ນິສີທິ. ອເຖກາ ທຸຄ຺ຄຕກຸລສ຺ສ ຘີຕາ – ‘‘ອຑ຺ຒມາສກໍ ຄເຫຕ຺ວາ ທາຣຸສາກໍ ອາຫຣິສ຺ສາມີ’’ຕິ ວີຖິໍ ຄຕາ ຕໍ ທິສ຺ວາ ກຸຏຸມ຺ພິກໍ ອາຫ – ‘‘ອາປເຓ ຕາວ ຘນໍ ເອຕ຺ຕກໍ, ເຄເຫ ກິຕ຺ຕກໍ ຠວິສ຺ສຕີ’’ຕິ. ກິໍ ທິສ຺ວາ ອມ຺ມ ເອວໍ ກເຖສີຕິ? ອິມໍ ຫິຣຎ຺ຎສຸວຓ຺ຓນ຺ຕິ. ໂສ ‘‘ປຸຎ຺ຎວຕີ ເອສາ ຠວິສ຺ສຕີ’’ຕິ ຕສ຺ສາ ວສນຏ຺ຐານໍ ປຸຈ຺ຉິຕ຺ວາ ອາປເຓ ຠຓ຺ຑໍ ປຏິສາເມຕ຺ວາ ຕສ຺ສາ ມາຕາປິຕໂຣ ອຸປສງ຺ກມິຕ຺ວາ ເອວມາຫ – ‘‘ອມ຺ຫາກໍ ເຄເຫ ວຍປ຺ປຕ຺ໂຕ ທາຣໂກ ອຕ຺ຖິ, ຕສ຺ເສຕໍ ທາຣິກໍ ເທຖາ’’ຕິ. ກິໍ ສາມິ ທຸຄ຺ຄເຕຫິ ສທ຺ຘິໍ ເກຬິໍ ກໂຣສີຕິ? ມິຕ຺ຕສນ຺ຖໂວ ນາມ ທຸຄ຺ຄເຕຫິປິ ສທ຺ຘິໍ ໂຫຕິ, ເທຖ ນໍ, ກຸຏຸມ຺ພສາມິນີ ຠວິສ຺ສຕີຕິ ນໍ ຄເຫຕ຺ວາ ຆຣໍ ອາເນສິ. ສາ ສໍວາສມນ຺ວາຍ ປຸຕ຺ຕໍ ວິຊາຕາ. ປຸຕ຺ໂຕ ປທສາ ອາຫິຓ຺ຑນກາເລ ກາລມກາສິ. ສາ ທຸຄ຺ຄຕກຸເລ ອຸປ຺ປຊ຺ຊິຕ຺ວາ ມຫາກຸລໍ ຄນ຺ຕ຺ວາປິ ‘‘ປຸຕ຺ຕວິນາສໍ ປຕ຺ຕາມ຺ຫີ’’ຕິ ອຸປ຺ປນ຺ນພລວໂສກາ ປຸຕ຺ຕສ຺ສ ສຣີຣກິຈ຺ຈໍ ວາເຣຕ຺ວາ ຕໍ ມຕກເຬວຣໍ ອາທາຍ ນຄເຣ ວິປ຺ປລປນ຺ຕີ ຈຣຕິ.

ເອກທິວສໍ ມຫຕິຍາ ພຸທ຺ຘວີຖິຍາ ທສພລສ຺ສ ສນ຺ຕິກໍ ຄນ຺ຕ຺ວາ – ‘‘ປຸຕ຺ຕສ຺ສ ເມ ອໂຣຄຠາວຕ຺ຖາຍ ເຠສຊ຺ຊໍ ເທຖ ຠຄວາ’’ຕິ ອາຫ. ຄຈ຺ຉ ສາວຕ຺ຖິໍ ອາຫິຓ຺ຑິຕ຺ວາ ຍສ຺ມິໍ ເຄເຫ ມຕປຸພ຺ໂພ ນຕ຺ຖິ, ຕໂຕ ສິທ຺ຘຕ຺ຖກໍ ອາຫຣ, ປຸຕ຺ຕສ຺ສ ເຕ ເຠສຊ຺ຊໍ ຠວິສ຺ສຕີຕິ. ສາ ນຄຣໍ ປວິສິຕ຺ວາ ຘຸຣເຄຫໂຕ ປຏ຺ຐາຍ ຠຄວຕາ ວຸຕ຺ຕນເຍນ ຄນ຺ຕ຺ວາ ສິທ຺ຘຕ຺ຖກໍ ຍາຈນ຺ຕີ ຆເຣ ຆເຣ, ‘‘ກຸໂຕ ຕ຺ວໍ ເອວຣູປໍ ຆຣໍ ປສ຺ສິສ຺ສສີ’’ຕິ ວຸຕ຺ຕາ ກຕິປຍານິ ເຄຫານິ ອາຫິຓ຺ຑິຕ຺ວາ – ‘‘ສພ຺ເພສມ຺ປິ ກິຣາຍໍ ຘມ຺ມຕາ, ນ ມຍ຺ຫໍ ປຸຕ຺ຕສ຺ເສວາ’’ຕິ ສາລາຍໍ ຉວໍ ຉຑ຺ເຑຕ຺ວາ ປພ຺ພຊ຺ຊໍ ຍາຈິ. ສຕ຺ຖາ ‘‘ອິມໍ ປພ຺ພາເຊຕູ’’ຕິ ຠິກ຺ຂຸນິອຸປສ຺ສຍໍ ເປເສສິ. ສາ ຂຸຣຄ຺ເຄເຍວ ອຣຫຕ຺ຕໍ ປາປຸຓິ. ອິມໍ ເຖຣິໍ ສນ຺ຘາຍ ‘‘ອຖ ໂຂ ກິສາໂຄຕມີ’’ຕິ ວຸຕ຺ຕໍ.

ເອກມາສີຕິ ເອກາ ອາສິ. ຣຸທມ຺ມຸຂີຕິ ຣຸທມານມຸຂີ ວິຍ. ອຈ຺ຈນ຺ຕໍ ມຕປຸຕ຺ຕາມ຺ຫີຕິ ເອຕ຺ຖ ອນ຺ຕໍ ອຕີຕໍ ອຈ຺ຈນ຺ຕໍ, ຠາວນປຸໍສກເມຕໍ. ອິທໍ ວຸຕ຺ຕໍ ໂຫຕິ – ຍຖາ ປຸຕ຺ຕມຣຓໍ ອນ຺ຕໍ ອຕີຕໍ ໂຫຕິ, ເອວໍ ມຕປຸຕ຺ຕາ ອຫໍ, ອິທານິ ມມ ປຸນ ປຸຕ຺ຕມຣຓໍ ນາມ ນຕ຺ຖິ. ປຸຣິສາ ເອຕທນ຺ຕິກາຕິ ປຸຣິສາປິ ເມ ເອຕທນ຺ຕິກາວ. ໂຍ ເມ ປຸຕ຺ຕມຣຓສ຺ສ ອນ຺ໂຕ, ປຸຣິສານມ຺ປິ ເມ ເອເສວນ຺ໂຕ, ອຠພ຺ພາ ອຫໍ ອິທານິ ປຸຣິສໍ ຄເວສິຕຸນ຺ຕິ. ສພ຺ພຕ຺ຖ ວິຫຕາ ນນ຺ທີຕິ ສພ຺ເພສຸ ຂນ຺ຘາຍຕນຘາຕຸຠວໂຍນິຄຕິຐິຕິນິວາເສສຸ ມມ ຕຓ຺ຫານນ຺ທີ ວິຫຕາ. ຕໂມກ຺ຂນ຺ໂຘຕິ ອວິຊ຺ຊາກ຺ຂນ຺ໂຘ. ປທາລິໂຕຕິ ຎາເຓນ ຠິນ຺ໂນ. ຕຕິຍໍ.

໔. ວິຊຍາສຸຕ຺ຕວຓ຺ຓນາ

໑໖໕. ຈຕຸຕ຺ເຖ ປຎ຺ຈງ຺ຄິເກນາຕິ ອາຕຕໍ ວິຕຕໍ ອາຕຕວິຕຕໍ ຆນໍ ສຸສິຣນ຺ຕິ ເອວໍ ປຎ຺ຈງ຺ຄສມນ຺ນາຄເຕນ. ນິຍ຺ຍາຕຍາມິ ຕຸຍ຺ເຫວາຕິ ສພ຺ເພ ຕຸຍ຺ຫໍເຍວ ເທມິ. ນາຫໍ ເຕນຕ຺ຖິກາຕິ ນາຫໍ ເຕນ ອຕ຺ຖິກາ. ປູຕິກາເຍນາຕິ ສຸວຓ຺ຓວຓ຺ໂຓປິ ກາໂຍ ນິຈ຺ຈໍ ອຸຄ຺ຆຣິຕປຄ຺ຆຣິຕຏ຺ເຐນ ປູຕິກາໂຍວ, ຕສ຺ມາ ເອວມາຫ. ຠິນ຺ທເນນາຕິ ຠິຊ຺ຊນສຠາເວນ. ປຠງ຺ຄຸນາຕິ ຈຸຓ຺ຓວິຈຸຓ຺ຓໍ ອາປຊ຺ຊນຘມ຺ເມນ. ອຏ຺ຏີຍາມີຕິ ອຏ຺ຏາ ປີຬິຕາ ໂຫມິ. ຫຣາຍາມີຕິ ລຊ຺ຊາມິ. ສນ຺ຕາ ສມາປຕ຺ຕີຕິ ອຏ຺ຐວິຘາ ໂລກິຍສມາປຕ຺ຕິ ອາຣມ຺ມຓສນ຺ຕຕາຍ ອງ຺ຄສນ຺ຕຕາຍ ຈ ສນ຺ຕາຕິ ວຸຕ຺ຕາ. ສພ຺ພຕ຺ຖາຕິ ສພ຺ເພສຸ ຣູປາຣູປຠເວສຸ, ເຕສໍ ທ຺ວິນ຺ນໍ ຠວານໍ ຄຫິຕຕ຺ຕາ ຄຫິເຕ ກາມຠເວ ອຏ຺ຐສຸ ຈ ສມາປຕ຺ຕີສູຕິ ເອເຕສຸ ສພ຺ເພສຸ ຐາເນສຸ ມຍ຺ຫໍ ອວິຊ຺ຊາຕໂມ ວິຫໂຕຕິ ວທຕິ. ຈຕຸຕ຺ຖໍ.

໕. ອຸປ຺ປລວຓ຺ຓາສຸຕ຺ຕວຓ຺ຓນາ

໑໖໖. ປຎ຺ຈເມ ສຸປຸປ຺ຜິຕຄ຺ຄນ຺ຕິ ອຄ຺ຄໂຕ ປຏ຺ຐາຍ ສຸຏ຺ຐຸ ປຸປ຺ຜິຕໍ ສາລຣຸກ຺ຂໍ. ນ ຈຕ຺ຖິ ເຕ ທຸຕິຍາ ວຓ຺ຓຘາຕູຕິ ຕວ ວຓ຺ຓຘາຕຸສທິສາ ທຸຕິຍາ ວຓ຺ຓຘາຕຸ ນຕ຺ຖິ, ຕຍາ ສທິສາ ອຎ຺ຎາ ຠິກ຺ຂຸນີ ນຕ຺ຖີຕິ ວທຕິ. ອິຘາຄຕາ ຕາທິສິກາ ຠເວຍ຺ຍຸນ຺ຕິ ຍຖາ ຕ຺ວໍ ອິຘາຄຕາ ກິຎ຺ຈິ ສນ຺ຖວໍ ວາ ສິເນຫໍ ວາ ນ ລຠສິ, ເອວເມວໍ ເຕປິ ຕຍາວ ສທິສາ ຠເວຍ຺ຍຸໍ. ປຂຸມນ຺ຕຣິກາຍນ຺ຕິ ທ຺ວິນ຺ນໍ ອກ຺ຂີນໍ ມຊ຺ເຌ ນາສວໍເສປິ ຕິຏ຺ຐນ຺ຕິໍ ມໍ ນ ປສ຺ສສິ. ວສີຠູຕມ຺ຫີຕິ ວສີຠູຕາ ອສ຺ມິ. ປຎ຺ຈມໍ.

໖. ຈາລາສຸຕ຺ຕວຓ຺ຓນາ

໑໖໗. ຉຏ຺ເຐ ໂກ ນຸ ຕໍ ອິທມາທປຍີຕິ ໂກ ນຸ ມນ຺ທພຸທ຺ຘິ ພາໂລ ຕໍ ເອວໍ ຄາຫາເປສິ? ປຣິກ຺ເລສນ຺ຕິ ອຎ຺ຎມ຺ປິ ນານປ຺ປກາຣໍ ອຸປທ຺ທວໍ. ອິທານິ ຍໍ ມາໂຣ ອາຫ – ‘‘ໂກ ນຸ ຕໍ ອິທມາທປຍີ’’ຕິ, ຕໍ ມທ຺ທນ຺ຕີ – ‘‘ນ ມໍ ອນ຺ຘພາໂລ ອາທເປສິ, ໂລເກ ປນ ອຄ຺ຄປຸຄ຺ຄໂລ ສຕ຺ຖາ ຘມ຺ມໍ ເທເສສີ’’ຕິ ທສ຺ເສຕຸໍ, ພຸທ຺ໂຘຕິອາທິມາຫ. ຕຕ຺ຖ ສຈ຺ເຈ ນິເວສຍີຕິ ປຣມຕ຺ຖສຈ຺ເຈ ນິພ຺ພາເນ ນິເວເສສິ. ນິໂຣຘໍ ອປ຺ປຊານນ຺ຕາຕິ ນິໂຣຘສຈ຺ຈໍ ອຊານນ຺ຕາ. ຉຏ຺ຐໍ.

໗. ອຸປຈາລາສຸຕ຺ຕວຓ຺ຓນາ

໑໖໘. ສຕ຺ຕເມ ເອນ຺ຕິ ມາຣວສໍ ປຸນາຕິ ປຸນປ຺ປຸນໍ ມຣຓມາຣກິເລສມາຣເທວປຸຕ຺ຕມາຣານໍ ວສໍ ອາຄຈ຺ຉນ຺ຕິ. ປຘູປິໂຕຕິ ສນ຺ຕາປິໂຕ. ອຄຕິ ຍຕ຺ຖ ມາຣສ຺ສາຕິ ຍຕ຺ຖ ຕຸຍ຺ຫໍ ມາຣສ຺ສ ອຄຕິ. ຕຕ຺ຖາຕິ ຕສ຺ມິໍ ນິພ຺ພາເນ. ສຕ຺ຕມໍ.

໘. ສີສຸປຈາລາສຸຕ຺ຕວຓ຺ຓນາ

໑໖໙. ອຏ຺ຐເມ ສມຓີ ວິຍ ທິສ຺ສສີຕິ ສມຓິສທິສາ ທິສ຺ສສິ. ກິມິວ ຈຣສິ ໂມມູຫາຕິ ກິໍ ກາຣຓາ ໂມມູຫາ ວິຍ ຈຣສິ? ອິໂຕ ພຫິທ຺ຘາຕິ ອິມມ຺ຫາ ສາສນາ ພຫິ. ປາສໍ ເຑນ຺ຕີຕິ ປາສຓ຺ຑາ, ສຕ຺ຕານໍ ຈິຕ຺ເຕສຸ ທິຏ຺ຐິປາສໍ ຂິປນ຺ຕີຕິ ອຕ຺ໂຖ. ສາສນໍ ປນ ປາເສ ໂມເຈຕິ, ຕສ຺ມາ ປາສຓ຺ໂຑຕິ ນ ວຸຈ຺ຈຕິ, ອິໂຕ ພຫິທ຺ຘາເຍວ ປາສຓ຺ຑາ ໂຫນ຺ຕິ. ປສີທນ຺ຕີຕິ ສໍສີທນ຺ຕິ ລຄ຺ຄນ຺ຕິ.

ອິທານິ ‘‘ກໍ ນຸ ອຸທ຺ທິສ຺ສ ມຸຓ຺ຑາສີ’’ຕິ ປຎ຺ຫໍ ກເຖນ຺ຕີ ອຕ຺ຖິ ສກ຺ຍກຸເລ ຊາໂຕຕິອາທິມາຫ. ຕຕ຺ຖ ສພ຺ພາຠິຠູຕິ ສພ຺ພານິ ຂນ຺ຘາຍຕນຘາຕຸຠວໂຍນິຄຕິອາທີນິ ອຠິຠວິຕ຺ວາ ຐິໂຕ. ມຣຓມາຣາທໂຍ ນຸທິ ນີຫຣີຕິ ມາຣນຸໂທ. ສພ຺ພຕ຺ຖມປຣາຊິໂຕຕິ ສພ຺ເພສຸ ຣາຄາທີສຸ ວາ ມາຣຍຸທ຺ເຘ ວາ ອຊິໂຕ. ສພ຺ພຕ຺ຖ ມຸຕ຺ໂຕຕິ ສພ຺ເພສຸ ຂນ຺ຘາທີສຸ ມຸຕ຺ໂຕ. ອສິໂຕຕິ ຕຓ຺ຫາທິຏ຺ຐິນິສ຺ສເຍນ ອນິສ຺ສິໂຕ. ສພ຺ພກມ຺ມກ຺ຂຍໍ ປຕ຺ໂຕຕິ ສພ຺ພກມ຺ມກ຺ຂຍສງ຺ຂາຕໍ ອຣຫຕ຺ຕໍ ປຕ຺ໂຕ. ອຸປຘິສງ຺ຂເຍຕິ ອຸປຘິສງ຺ຂຍສງ຺ຂາເຕ ນິພ຺ພາເນ ອາຣມ຺ມຓໂຕ ວິມຸຕ຺ໂຕ. ອຏ຺ຐມໍ.

໙. ເສລາສຸຕ຺ຕວຓ຺ຓນາ

໑໗໐. ນວເມ ເກນິທໍ ປກຕນ຺ຕິ ເກນ ອິທໍ ກຕໍ. ພິມ຺ພນ຺ຕິ ອຕ຺ຕຠາວໍ ສນ຺ຘາຍ ວທຕິ. ອຆນ຺ຕິ ທຸກ຺ຂປຕິຏ຺ຐານຕ຺ຕາ ອຕ຺ຕຠາວເມວ ວທຕິ. ເຫຕຸຠງ຺ຄາຕິ ເຫຕຸນິໂຣເຘນ ປຈ຺ຈຍເວກລ຺ເລນ. ນວມໍ.

໑໐. ວຊິຣາສຸຕ຺ຕວຓ຺ຓນາ

໑໗໑. ທສເມ ນຍິຘ ສຕ຺ຕຸປລພ຺ຠຕີຕິ ອິມສ຺ມິໍ ສຸທ຺ຘສງ຺ຂາຣປຸຎ຺ເຊ ປຣມຕ຺ຖໂຕ ສຕ຺ໂຕ ນາມ ນ ອຸປລພ຺ຠຕິ. ຂນ຺ເຘສຸ ສນ຺ເຕສູຕິ ປຎ຺ຈສຸ ຂນ຺ເຘສຸ ວິຊ຺ຊມາເນສຸ ເຕນ ເຕນາກາເຣນ ວວຕ຺ຖິເຕສຸ. ສມ຺ມຸຕີຕິ ສຕ຺ໂຕຕິ ສມຎ຺ຎາມຕ຺ຕເມວ ໂຫຕິ. ທຸກ຺ຂນ຺ຕິ ປຎ຺ຈກ຺ຂນ຺ຘທຸກ຺ຂໍ. ນາຎ຺ຎຕ຺ຣ ທຸກ຺ຂາຕິ ຐເປຕ຺ວາ ທຸກ຺ຂໍ ອຎ຺ໂຎ ເນວ ສມ຺ໂຠຕິ ນ ນິຣຸຊ຺ຌຕີຕິ. ທສມໍ.

ອິຕິ ສາຣຕ຺ຖປ຺ປກາສິນິຍາ

ສໍຍຸຕ຺ຕນິກາຍ-ອຏ຺ຐກຖາຍ

ຠິກ຺ຂຸນີສໍຍຸຕ຺ຕວຓ຺ຓນາ ນິຏ຺ຐິຕາ.