໓. ສກລິກສຸຕ຺ຕວຓ຺ຓນາ

໑໔໙. ຕຕິເຍ ມນ຺ທິຍາ ນູຕິ ມນ຺ທຠາເວນ ໂມມູຫຠາເວນ. ອຸທາຫຸ ກາເວຍ຺ຍມຕ຺ໂຕຕິ ອຸທາຫຸ ຍຖາ ກວິ ກພ຺ພໍ ຈິນ຺ເຕນ຺ໂຕ ເຕນ ກພ຺ພກຣເຓນ ມຕ຺ໂຕ ສຍຕິ, ເອວໍ ສຍສິ. ສມ຺ປຈຸຣາຕິ ພຫໂວ. ກິມິທໍ ໂສປ຺ປເສ ວາຕິ ກສ຺ມາ ອິທໍ ໂສປ຺ປໍ ໂສປ຺ປສິເຍວ? ອຕ຺ຖໍ ສເມຈ຺ຈາຕິ ອຕ຺ຖໍ ສມາຄນ຺ຕ຺ວາ ປາປຸຓິຕ຺ວາ. ມຍ຺ຫໍ ຫິ ອສງ຺ຄໂຫ ນາມ ສງ຺ຄຫວິປນ຺ໂນ ວາ ອຕ຺ໂຖ ນຕ຺ຖິ. ສລ຺ລນ຺ຕິ ຕິຂິຓໍ ສຕ຺ຕິສລ຺ລໍ. ຊຄ຺ຄໍ ນ ສງ຺ເກຕິ ຍຖາ ເອກຈ຺ໂຈ ສີຫປຖາທີສຸ ຊຄ຺ຄນ຺ໂຕ ສງ຺ກຕິ, ຕຖາ ອຫໍ ຊຄ຺ຄນ຺ໂຕປິ ນ ສງ຺ກາມິ. ນປິ ເຠມິ ໂສຕ຺ຕຸນ຺ຕິ ຍຖາ ເອກຈ຺ໂຈ ສີຫປຖາທີສຸເຍວ ສຸປິຕຸໍ ຠາຍຕິ, ເອວໍ ອຫໍ ສຸປິຕຸມ຺ປິ ນ ຠາຍາມິ. ນານຸຕປນ຺ຕິ ມາມນ຺ຕິ ຍຖາ ອາຈຣິຍສ຺ສ ວາ ອນ຺ເຕວາສິກສ຺ສ ວາ ອຜາສຸເກ ຊາເຕ ອຸທ຺ເທສປຣິປຸຈ຺ຉາຍ ຐິຕຕ຺ຕາ ອນ຺ເຕວາສິໍ ຣຕ຺ຕິນ຺ທິວາ ອຕິກ຺ກມນ຺ຕາ ອນຸຕປນ຺ຕິ, ເອວໍ ມໍ ນານຸຕປນ຺ຕິ. ນ ຫິ ມຍ຺ຫໍ ກິຎ຺ຈິ ອປຣິນິຏ຺ຐິຕກມ຺ມໍ ນາມ ອຕ຺ຖິ. ເຕເນວາຫ ຫານິໍ ນ ປສ຺ສາມິ ກຸຫິຎ຺ຈິ ໂລເກຕິ. ຕຕິຍໍ.