໗. ສຸພ຺ຣຫ຺ມສຸຕ຺ຕວຓ຺ຓນາ

໙໘. ສຕ຺ຕເມ ສຸພ຺ຣຫ຺ມາຕິ ໂສ ກິຣ ເທວປຸຕ຺ໂຕ ອຈ຺ຉຣາສງ຺ຆປຣິວຸໂຕ ນນ຺ທນກີຬິກໍ ຄນ຺ຕ຺ວາ ປາຣິຈ຺ຉຕ຺ຕກມູເລ ປຎ຺ຎຕ຺ຕາສເນ ນິສີທິ. ຕໍ ປຎ຺ຈສຕາ ເທວຘີຕໂຣ ປຣິວາເຣຕ຺ວາ ນິສິນ຺ນາ, ປຎ຺ຈສຕາ ຣຸກ຺ຂໍ ອຠິຣຸຬ຺ຫາ. ນນຸ ຈ ເທວຕານໍ ຈິຕ຺ຕວເສນ ໂຍຊນສຕິໂກປິ ຣຸກ຺ໂຂ ໂອນມິຕ຺ວາ ຫຕ຺ຖໍ ອາຄຈ຺ຉຕິ, ກສ຺ມາ ຕາ ອຠິຣຸຬ຺ຫາຕິ. ຂິຑ຺ຑາປສຸຕຕາຍ. ອຠິຣຸຍ຺ຫ ປນ ມຘຸຣສ຺ສເຣນ ຄາຍິຕ຺ວາ ຄາຍິຕ຺ວາ ປຸປ຺ຜານິ ປາເຕນ຺ຕິ, ຕານິ ຄເຫຕ຺ວາ ອິຕຣາ ເອກໂຕວຓ຺ຏິກມາລາທິວເສນ ຄນ຺ເຖນ຺ຕິ. ອຖ ຣຸກ຺ຂໍ ອຠິຣຸຬ຺ຫາ ອຸປຈ຺ເຉທກກມ຺ມວເສນ ເອກປ຺ປຫາເຣເນວ ກາລໍ ກຕ຺ວາ ອວີຈິມ຺ຫິ ນິພ຺ພຕ຺ຕາ ມຫາທຸກ຺ຂໍ ອນຸຠວນ຺ຕິ.

ອຖ ກາເລ ຄຈ຺ຉນ຺ເຕ ເທວປຸຕ຺ໂຕ ‘‘ອິມາສໍ ເນວ ສທ຺ໂທ ສຸຍ຺ຍຕິ, ນ ປຸປ຺ຜານິ ປາເຕນ຺ຕິ. ກຫໍ ນຸ ໂຂ ຄຕາ’’ຕິ? ອາວຊ຺ເຊນ຺ໂຕ ນິຣເຍ ນິພ຺ພຕ຺ຕຠາວໍ ທິສ຺ວາ ປິຍວຕ຺ຖຸກໂສເກນ ຣຸປ຺ປມາໂນ ຈິນ຺ເຕສິ – ‘‘ເອຕາ ຕາວ ຍຖາກມ຺ເມນ ຄຕາ, ມຍ຺ຫໍ ອາຍຸສງ຺ຂາໂຣ ກິຕ຺ຕໂກ’’ຕິ. ໂສ – ‘‘ສຕ຺ຕເມ ທິວເສ ມຍາປິ ອວເສສາຫິ ປຎ຺ຈສຕາຫິ ສທ຺ຘິໍ ກາລໍ ກຕ຺ວາ ຕຕ຺ເຖວ ນິພ຺ພຕ຺ຕິຕພ຺ພ’’ນ຺ຕິ ທິສ຺ວາ ພລວຕເຣນ ໂສເກນ ຣຸປ຺ປິ. ໂສ – ‘‘ອິມໍ ມຍ຺ຫໍ ໂສກໍ ສເທວເກ ໂລເກ ອຎ຺ຎຕ຺ຣ ຕຖາຄຕາ ນິທ຺ຘມິຕຸໍ ສມຕ຺ໂຖ ນາມ ນຕ຺ຖີ’’ຕິ ຈິນ຺ເຕຕ຺ວາ ສຕ຺ຖຸ ສນ຺ຕິກໍ ຄນ຺ຕ຺ວາ ນິຈ຺ຈໍ ອຸຕ຺ຣສ຺ຕນ຺ຕິ ຄາຖມາຫ.

ຕຕ຺ຖ ອິທນ຺ຕິ ອຕ຺ຕໂນ ຈິຕ຺ຕໍ ທສ຺ເສຕິ. ທຸຕິຍປທໍ ປຸຣິມສ຺ເສວ ເວວຈນໍ. ນິຈ຺ຈນ຺ຕິ ຈ ປທສ຺ສ ເທວໂລເກ ນິພ຺ພຕ຺ຕກາລໂຕ ປຏ຺ຐາຍາຕິ ອຕ຺ໂຖ ນ ຄເຫຕພ຺ໂພ, ໂສກຸປ຺ປຕ຺ຕິກາລໂຕ ປນ ປຏ຺ຐາຍ ນິຈ຺ຈນ຺ຕິ ເວທິຕພ຺ພໍ. ອນຸປ຺ປນ຺ເນສຸ ກິຈ຺ເຉສູຕິ ອິໂຕ ສຕ຺ຕາຫຈ຺ຈເຍນ ຍານິ ທຸກ຺ຂານິ ອຸປ຺ປຊ຺ຊິສ຺ສນ຺ຕິ, ເຕສຸ. ອໂຖ ອຸປ຺ປຕິເຕສຸ ຈາຕິ ຍານິ ປຎ຺ຈສຕານໍ ອຈ຺ຉຣານໍ ນິຣເຍ ນິພ຺ພຕ຺ຕານໍ ທິຏ຺ຐານິ, ເຕສຸ ຈາຕິ ເອວໍ ອິເມສຸ ອຸປ຺ປນ຺ນານຸປ຺ປນ຺ເນສຸ ທຸກ຺ເຂສຸ ນິຈ຺ຈໍ ມມ ອຸຕ຺ຣສ຺ຕໍ ຈິຕ຺ຕໍ, ອພ຺ຠນ຺ຕເຣ ຑຍ຺ຫມາໂນ ວິຍ ໂຫມິ ຠຄວາຕິ ທສ຺ເສຕິ.

ນາຎ຺ຎຕ຺ຣ ໂພຊ຺ຌາ ຕປສາຕິ ໂພຊ຺ຌງ຺ຄຠາວນຎ຺ຈ ຕໂປຄຸຓຎ຺ຈ ອຎ຺ຎຕ຺ຣ ມຸຎ຺ຈິຕ຺ວາ ໂສຕ຺ຖິໍ ນ ປສ຺ສາມີຕິ ອຕ຺ໂຖ. ສພ຺ພນິສ຺ສຄ຺ຄາຕິ ນິພ຺ພານໂຕ. ເອຕ຺ຖ ກິຎ຺ຈາປິ ໂພຊ຺ຌງ຺ຄຠາວນາ ປຐມໍ ຄຫິຕາ, ອິນ຺ທ຺ຣິຍສໍວໂຣ ປຈ຺ຉາ, ອຕ຺ຖໂຕ ປນ ອິນ຺ທ຺ຣິຍສໍວໂຣວ ປຐມໍ ເວທິຕພ຺ໂພ. ອິນ຺ທິຍສໍວເຣ ຫິ ຄຫິເຕ ຈຕຸປາຣິສຸທ຺ຘິສີລໍ ຄຫິຕໍ ໂຫຕິ. ຕສ຺ມິໍ ປຕິຏ຺ຐິໂຕ ຠິກ຺ຂຸ ນິສ຺ສຍມຸຕ຺ຕໂກ ຘຸຕງ຺ຄສງ຺ຂາຕໍ ຕໂປຄຸຓໍ ສມາທາຍ ອຣຎ຺ຎໍ ປວິສິຕ຺ວາ ກມ຺ມຏ຺ຐານໍ ຠາເວນ຺ໂຕ ສຫ ວິປສ຺ສນາຍ ໂພຊ຺ຌງ຺ເຄ ຠາເວຕິ. ຕສ຺ສ ອຣິຍມຄ຺ໂຄ ຍໍ ນິພ຺ພານໍ ອາຣມ຺ມຓໍ ກຕ຺ວາ ອຸປ຺ປຊ຺ຊຕິ, ໂສ ‘‘ສພ຺ພນິສ຺ສຄ຺ໂຄ’’ຕິ ຠຄວາ ຈຕຸສຈ຺ຈວເສນ ເທສນໍ ວິນິວຕ຺ເຕສິ. ເທວປຸຕ຺ໂຕ ເທສນາປຣິໂຍສາເນ ໂສຕາປຕ຺ຕິຜເລ ປຕິຏ຺ຐຫີຕິ. ສຕ຺ຕມໍ.