໒. ອນາຖປິຓ຺ຑິກວຄ຺ໂຄ

໑. ຈນ຺ທິມສສຸຕ຺ຕວຓ຺ຓນາ

໙໒. ທຸຕິຍວຄ຺ຄສ຺ສ ປຐເມ ກຈ຺ເຉວາຕິ ກຈ຺ເຉ ວິຍ. ກຈ຺ເຉຕິ ປພ຺ພຕກຈ຺ເຉປິ ນທີກຈ຺ເຉປິ. ເອໂກທິ ນິປກາຕິ ເອກຄ຺ຄຈິຕ຺ຕາ ເຈວ ປຎ຺ຎາເນປກ຺ເກນ ຈ ສມນ຺ນາຄຕາ. ສຕາຕິ ສຕິມນ຺ໂຕ. ອິທໍ ວຸຕ຺ຕໍ ໂຫຕິ – ເຍ ຌານານິ ລຠິຕ຺ວາ ເອໂກທີ ນິປກາ ສຕາ ວິຫຣນ຺ຕິ, ເຕ ອມກເສ ປພ຺ພຕກຈ຺ເຉ ວາ ນທີກຈ຺ເຉ ວາ ມຄາ ວິຍ ໂສຕ຺ຖິໍ ຄມິສ຺ສນ຺ຕີຕິ. ປາຣນ຺ຕິ ນິພ຺ພານໍ. ອມ຺ພຸໂຊຕິ ມຈ຺ໂຉ. ຣຓຎ຺ຊຫາຕິ ກິເລສຎ຺ຊຫາ. ເຍປິ ຌານານິ ລຠິຕ຺ວາ ອປ຺ປມຕ຺ຕາ ກິເລເສ ຊຫນ຺ຕິ, ເຕ ສຸຕ຺ຕຊາລໍ ຠິນ຺ທິຕ຺ວາ ມຈ຺ຉາ ວິຍ ນິພ຺ພານໍ ຄມິສ຺ສນ຺ຕີຕິ ວຸຕ຺ຕໍ ໂຫຕິ. ປຐມໍ.

໒. ເວຓ຺ຑຸສຸຕ຺ຕວຓ຺ຓນາ

໙໓. ທຸຕິເຍ ເວຓ຺ຑູຕິ ຕສ຺ສ ເທວປຸຕ຺ຕສ຺ສ ນາມໍ. ປຍິຣຸປາສິຍາຕິ ປຣິຣຸປາສິຕ຺ວາ. ອນຸສິກ຺ຂເຣຕິ ສິກ຺ຂນ຺ຕິ. ສິຏ຺ຐິປເທຕິ ອນຸສິຏ຺ຐິປເທ. ກາເລ ເຕ ອປ຺ປມຊ຺ຊນ຺ຕາຕິ ກາເລ ເຕ ອປ຺ປມາທໍ ກໂຣນ຺ຕາ. ທຸຕິຍໍ.

໓. ທີຆລຏ຺ຐິສຸຕ຺ຕວຓ຺ຓນາ

໙໔. ຕຕິເຍ ທີຆລຏ຺ຐີຕິ ເທວໂລເກ ສພ຺ເພ ສມປ຺ປມາຓາ ຕິຄາວຸຕິກາວ ໂຫນ຺ຕິ, ມນຸສ຺ສໂລເກ ປນສ຺ສ ທີຆຕ຺ຕຠາວຕາຍ ເອວໍນາມໍ ອໂຫສິ. ໂສ ປຸຎ຺ຎານິ ກຕ຺ວາ ເທວໂລເກ ນິພ຺ພຕ຺ໂຕປິ ຕເຖວ ປຎ຺ຎາຍິ. ຕຕິຍໍ.

໔. ນນ຺ທນສຸຕ຺ຕວຓ຺ຓນາ

໙໕. ຈຕຸຕ຺ເຖ ໂຄຕມາຕິ ຠຄວນ຺ຕໍ ໂຄຕ຺ເຕນ ອາລປຕິ. ອນາວຏນ຺ຕິ ຕຖາຄຕສ຺ສ ຫິ ສພ຺ພຎ຺ຎຸຕຎ຺ຎາຓໍ ເປເສນ຺ຕສ຺ສ ຣຸກ຺ໂຂ ວາ ປພ຺ພໂຕ ວາ ອາວຣິຕຸໍ ສມຕ຺ໂຖ ນາມ ນຕ຺ຖິ. ເຕນາຫ ‘‘ອນາວຏ’’ນ຺ຕິ. ອິຕິ ຕຖາຄຕໍ ໂຖເມຕ຺ວາ ເທວໂລເກ ອຠິສງ຺ຂຕປຎ຺ຫໍ ປຸຈ຺ຉນ຺ໂຕ ກຖໍວິຘນ຺ຕິອາທິມາຫ. ຕຕ຺ຖ ທຸກ຺ຂມຕິຈ຺ຈ ອິຣິຍຕີຕິ ທຸກ຺ຂໍ ອຕິກ຺ກມິຕ຺ວາ ວິຫຣຕິ. ສີລວາຕິ ໂລກິຍໂລກຸຕ຺ຕເຣນ ສີເລນ ສມນ຺ນາຄໂຕ ຂີຓາສໂວ. ປຎ຺ຎາທໂຍປິ ມິສ຺ສກາເຍວ ເວທິຕພ຺ພາ. ປູຊຍນ຺ຕີຕິ ຄນ຺ຘປຸປ຺ຜາທີຫິ ປູເຊນ຺ຕິ. ຈຕຸຕ຺ຖໍ.

໕-໖. ຈນ຺ທນສຸຕ຺ຕາທິວຓ຺ຓນາ

໙໖. ປຎ຺ຈເມ ອປ຺ປຕິຏ຺ເຐ ອນາລມ຺ເພຕິ ເຫຏ຺ຐາ ອປຕິຏ຺ເຐ ອຸປຣິ ອນາລມ຺ພເນ. ສຸສມາຫິໂຕຕິ ອປ຺ປນາຍປິ ອຸປຈາເຣນປິ ສຸຏ຺ຐຸ ສມາຫິໂຕ. ປຫິຕຕ຺ໂຕຕິ ເປສິຕຕ຺ໂຕ. ນນ຺ທີຣາຄປຣິກ຺ຂີໂຓຕິ ປຣິກ຺ຂີຓນນ຺ທີຣາໂຄ. ນນ຺ທີຣາໂຄ ນາມ ຕໂຍ ກມ຺ມາຠິສງ຺ຂາຣາ. ອິຕິ ອິມາຍ ຄາຖາຍ ກາມສຎ຺ຎາຄຫເຓນ ປຎ຺ໂຈຣມ຺ຠາຄິຍສໍໂຍຊນານິ, ຣູປສໍໂຍຊນຄຫເຓນ ປຎ຺ຈ ອຸທ຺ຘມ຺ຠາຄິຍສໍໂຍຊນານິ, ນນ຺ທີຣາເຄນ ຕໂຍ ກມ຺ມາຠິສງ຺ຂາຣາ ຄຫິຕາ. ເອວໍ ຍສ຺ສ ທສ ສໍໂຍຊນານິ ຕໂຍ ຈ ກມ຺ມາຠິສງ຺ຂາຣາ ປຫີນາ, ໂສ ຄມ຺ຠີເຣ ມໂຫເຆ ນ ສີທຕີຕິ. ກາມສຎ຺ຎາຍ ວາ ກາມຠໂວ, ຣູປສໍໂຍຊເນນ ຣູປຠໂວ ຄຫິໂຕ, ເຕສໍ ຄຫເຓນ ອຣູປຠໂວ ຄຫິໂຕວ, ນນ຺ທີຣາເຄນ ຕໂຍ ກມ຺ມາຠິສງ຺ຂາຣາ ຄຫິຕາຕິ ເອວໍ ຍສ຺ສ ຕີສຸ ຠເວສຸ ຕໂຍ ສງ຺ຂາຣາ ນຕ຺ຖິ, ໂສ ຄມ຺ຠີເຣ ນ ສີທຕີຕິປິ ທສ຺ເສຕິ. ປຎ຺ຈມໍ.

໙໗. ຉຏ຺ຐໍ ວຸຕ຺ຕຕ຺ຖເມວ. ຉຏ຺ຐໍ.

໗. ສຸພ຺ຣຫ຺ມສຸຕ຺ຕວຓ຺ຓນາ

໙໘. ສຕ຺ຕເມ ສຸພ຺ຣຫ຺ມາຕິ ໂສ ກິຣ ເທວປຸຕ຺ໂຕ ອຈ຺ຉຣາສງ຺ຆປຣິວຸໂຕ ນນ຺ທນກີຬິກໍ ຄນ຺ຕ຺ວາ ປາຣິຈ຺ຉຕ຺ຕກມູເລ ປຎ຺ຎຕ຺ຕາສເນ ນິສີທິ. ຕໍ ປຎ຺ຈສຕາ ເທວຘີຕໂຣ ປຣິວາເຣຕ຺ວາ ນິສິນ຺ນາ, ປຎ຺ຈສຕາ ຣຸກ຺ຂໍ ອຠິຣຸຬ຺ຫາ. ນນຸ ຈ ເທວຕານໍ ຈິຕ຺ຕວເສນ ໂຍຊນສຕິໂກປິ ຣຸກ຺ໂຂ ໂອນມິຕ຺ວາ ຫຕ຺ຖໍ ອາຄຈ຺ຉຕິ, ກສ຺ມາ ຕາ ອຠິຣຸຬ຺ຫາຕິ. ຂິຑ຺ຑາປສຸຕຕາຍ. ອຠິຣຸຍ຺ຫ ປນ ມຘຸຣສ຺ສເຣນ ຄາຍິຕ຺ວາ ຄາຍິຕ຺ວາ ປຸປ຺ຜານິ ປາເຕນ຺ຕິ, ຕານິ ຄເຫຕ຺ວາ ອິຕຣາ ເອກໂຕວຓ຺ຏິກມາລາທິວເສນ ຄນ຺ເຖນ຺ຕິ. ອຖ ຣຸກ຺ຂໍ ອຠິຣຸຬ຺ຫາ ອຸປຈ຺ເຉທກກມ຺ມວເສນ ເອກປ຺ປຫາເຣເນວ ກາລໍ ກຕ຺ວາ ອວີຈິມ຺ຫິ ນິພ຺ພຕ຺ຕາ ມຫາທຸກ຺ຂໍ ອນຸຠວນ຺ຕິ.

ອຖ ກາເລ ຄຈ຺ຉນ຺ເຕ ເທວປຸຕ຺ໂຕ ‘‘ອິມາສໍ ເນວ ສທ຺ໂທ ສຸຍ຺ຍຕິ, ນ ປຸປ຺ຜານິ ປາເຕນ຺ຕິ. ກຫໍ ນຸ ໂຂ ຄຕາ’’ຕິ? ອາວຊ຺ເຊນ຺ໂຕ ນິຣເຍ ນິພ຺ພຕ຺ຕຠາວໍ ທິສ຺ວາ ປິຍວຕ຺ຖຸກໂສເກນ ຣຸປ຺ປມາໂນ ຈິນ຺ເຕສິ – ‘‘ເອຕາ ຕາວ ຍຖາກມ຺ເມນ ຄຕາ, ມຍ຺ຫໍ ອາຍຸສງ຺ຂາໂຣ ກິຕ຺ຕໂກ’’ຕິ. ໂສ – ‘‘ສຕ຺ຕເມ ທິວເສ ມຍາປິ ອວເສສາຫິ ປຎ຺ຈສຕາຫິ ສທ຺ຘິໍ ກາລໍ ກຕ຺ວາ ຕຕ຺ເຖວ ນິພ຺ພຕ຺ຕິຕພ຺ພ’’ນ຺ຕິ ທິສ຺ວາ ພລວຕເຣນ ໂສເກນ ຣຸປ຺ປິ. ໂສ – ‘‘ອິມໍ ມຍ຺ຫໍ ໂສກໍ ສເທວເກ ໂລເກ ອຎ຺ຎຕ຺ຣ ຕຖາຄຕາ ນິທ຺ຘມິຕຸໍ ສມຕ຺ໂຖ ນາມ ນຕ຺ຖີ’’ຕິ ຈິນ຺ເຕຕ຺ວາ ສຕ຺ຖຸ ສນ຺ຕິກໍ ຄນ຺ຕ຺ວາ ນິຈ຺ຈໍ ອຸຕ຺ຣສ຺ຕນ຺ຕິ ຄາຖມາຫ.

ຕຕ຺ຖ ອິທນ຺ຕິ ອຕ຺ຕໂນ ຈິຕ຺ຕໍ ທສ຺ເສຕິ. ທຸຕິຍປທໍ ປຸຣິມສ຺ເສວ ເວວຈນໍ. ນິຈ຺ຈນ຺ຕິ ຈ ປທສ຺ສ ເທວໂລເກ ນິພ຺ພຕ຺ຕກາລໂຕ ປຏ຺ຐາຍາຕິ ອຕ຺ໂຖ ນ ຄເຫຕພ຺ໂພ, ໂສກຸປ຺ປຕ຺ຕິກາລໂຕ ປນ ປຏ຺ຐາຍ ນິຈ຺ຈນ຺ຕິ ເວທິຕພ຺ພໍ. ອນຸປ຺ປນ຺ເນສຸ ກິຈ຺ເຉສູຕິ ອິໂຕ ສຕ຺ຕາຫຈ຺ຈເຍນ ຍານິ ທຸກ຺ຂານິ ອຸປ຺ປຊ຺ຊິສ຺ສນ຺ຕິ, ເຕສຸ. ອໂຖ ອຸປ຺ປຕິເຕສຸ ຈາຕິ ຍານິ ປຎ຺ຈສຕານໍ ອຈ຺ຉຣານໍ ນິຣເຍ ນິພ຺ພຕ຺ຕານໍ ທິຏ຺ຐານິ, ເຕສຸ ຈາຕິ ເອວໍ ອິເມສຸ ອຸປ຺ປນ຺ນານຸປ຺ປນ຺ເນສຸ ທຸກ຺ເຂສຸ ນິຈ຺ຈໍ ມມ ອຸຕ຺ຣສ຺ຕໍ ຈິຕ຺ຕໍ, ອພ຺ຠນ຺ຕເຣ ຑຍ຺ຫມາໂນ ວິຍ ໂຫມິ ຠຄວາຕິ ທສ຺ເສຕິ.

ນາຎ຺ຎຕ຺ຣ ໂພຊ຺ຌາ ຕປສາຕິ ໂພຊ຺ຌງ຺ຄຠາວນຎ຺ຈ ຕໂປຄຸຓຎ຺ຈ ອຎ຺ຎຕ຺ຣ ມຸຎ຺ຈິຕ຺ວາ ໂສຕ຺ຖິໍ ນ ປສ຺ສາມີຕິ ອຕ຺ໂຖ. ສພ຺ພນິສ຺ສຄ຺ຄາຕິ ນິພ຺ພານໂຕ. ເອຕ຺ຖ ກິຎ຺ຈາປິ ໂພຊ຺ຌງ຺ຄຠາວນາ ປຐມໍ ຄຫິຕາ, ອິນ຺ທ຺ຣິຍສໍວໂຣ ປຈ຺ຉາ, ອຕ຺ຖໂຕ ປນ ອິນ຺ທ຺ຣິຍສໍວໂຣວ ປຐມໍ ເວທິຕພ຺ໂພ. ອິນ຺ທິຍສໍວເຣ ຫິ ຄຫິເຕ ຈຕຸປາຣິສຸທ຺ຘິສີລໍ ຄຫິຕໍ ໂຫຕິ. ຕສ຺ມິໍ ປຕິຏ຺ຐິໂຕ ຠິກ຺ຂຸ ນິສ຺ສຍມຸຕ຺ຕໂກ ຘຸຕງ຺ຄສງ຺ຂາຕໍ ຕໂປຄຸຓໍ ສມາທາຍ ອຣຎ຺ຎໍ ປວິສິຕ຺ວາ ກມ຺ມຏ຺ຐານໍ ຠາເວນ຺ໂຕ ສຫ ວິປສ຺ສນາຍ ໂພຊ຺ຌງ຺ເຄ ຠາເວຕິ. ຕສ຺ສ ອຣິຍມຄ຺ໂຄ ຍໍ ນິພ຺ພານໍ ອາຣມ຺ມຓໍ ກຕ຺ວາ ອຸປ຺ປຊ຺ຊຕິ, ໂສ ‘‘ສພ຺ພນິສ຺ສຄ຺ໂຄ’’ຕິ ຠຄວາ ຈຕຸສຈ຺ຈວເສນ ເທສນໍ ວິນິວຕ຺ເຕສິ. ເທວປຸຕ຺ໂຕ ເທສນາປຣິໂຍສາເນ ໂສຕາປຕ຺ຕິຜເລ ປຕິຏ຺ຐຫີຕິ. ສຕ຺ຕມໍ.

໘-໑໐. ກກຸຘສຸຕ຺ຕາທິວຓ຺ຓນາ

໙໙. ອຏ຺ຐເມ ກກຸໂຘ ເທວປຸຕ຺ໂຕຕິ ອຍໍ ກິຣ ໂກລນຄເຣ ມຫາໂມຄ຺ຄລ຺ລານຕ຺ເຖຣສ຺ສ ອຸປຏ຺ຐາກປຸຕ຺ໂຕ ທຫຣກາເລເຍວ ເຖຣສ຺ສ ສນ຺ຕິເກ ວສນ຺ໂຕ ຌານໍ ນິພ຺ພຕ຺ເຕຕ຺ວາ ກາລງ຺ກໂຕ, ພ຺ຣຫ຺ມໂລເກ ອຸປ຺ປຊ຺ຊິ. ຕຕ຺ຣາປິ ນໍ ກກຸໂຘ ພ຺ຣຫ຺ມາຕ຺ເວວ ສຎ຺ຊານນ຺ຕິ. ນນ຺ທສີຕິ ຕຸສ຺ສສິ. ກິໍ ລທ຺ຘາຕິ ຕຸຏ຺ຐິ ນາມ ກິຎ຺ຈິ ມນາປໍ ລຠິຕ຺ວາ ໂຫຕິ, ຕສ຺ມາ ເອວມາຫ. ກິໍ ຊີຍິຕ຺ຖາຕິ ຍສ຺ສ ຫິ ກິຎ຺ຈິ ມນາປໍ ຈີວຣາທິວຕ຺ຖຸ ຊິຓ຺ຓໍ ໂຫຕິ, ໂສ ໂສຈຕິ, ຕສ຺ມາ ເອວມາຫ. ອຣຕີ ນາຠິກີຣຕີຕິ ອຸກ຺ກຓ຺ຐິຕາ ນາຠິຠວຕິ. ອຆຊາຕສ຺ສາຕິ ທຸກ຺ຂຊາຕສ຺ສ, ວຏ຺ຏທຸກ຺ເຂ ຐິຕສ຺ສາຕິ ອຕ຺ໂຖ. ນນ຺ທີຊາຕສ຺ສາຕິ ຊາຕຕຓ຺ຫສ຺ສ. ອຆນ຺ຕິ ເອວຣູປສ຺ສ ຫິ ວຏ຺ຏທຸກ຺ຂໍ ອາຄຕເມວ ໂຫຕິ. ‘‘ທຸກ຺ຂີ ສຸຂໍ ປຕ຺ຖຍຕີ’’ຕິ ຫິ ວຸຕ຺ຕໍ. ອິຕິ ອຆຊາຕສ຺ສ ນນ຺ທີ ໂຫຕິ, ສຸຂວິປຣິຓາເມນ ທຸກ຺ຂໍ ອາຄຕເມວາຕິ ນນ຺ທີຊາຕສ຺ສ ອຆໍ ໂຫຕິ. ອຏ຺ຐມໍ.

໑໐໐. ນວມໍ ວຸຕ຺ຕຕ຺ຖເມວ. ນວມໍ.

໑໐໑. ທສເມ ອານນ຺ທຕ຺ເຖຣສ຺ສ ອນຸມານພຸທ຺ຘິຍາ ອານຸຠາວປ຺ປກາສນຕ຺ຖໍ ອຎ຺ຎຕໂຣຕິ ອາຫ. ທສມໍ.

ທຸຕິໂຍ ວຄ຺ໂຄ.