໕. ທາມລິສຸຕ຺ຕວຓ຺ຓນາ

໘໖. ປຎ຺ຈເມ ນ ເຕນາສີສເຕ ຠວນ຺ຕິ ເຕນ ກາຣເຓນ ຍໍ ກິຎ຺ຈິ ຠວໍ ນ ປຕ຺ເຖຕິ. ອາຍຕປຄ຺ຄໂຫ ນາເມສ ເທວປຸຕ຺ໂຕ, ຂີຓາສວສ຺ສ ກິຈ຺ຈໂວສານໍ ນຕ຺ຖິ. ຂີຓາສເວນ ຫິ ອາທິໂຕ ອຣຫຕ຺ຕປ຺ປຕ຺ຕິຍາ ວີຣິຍໍ ກຕໍ, ອປຣຠາເຄ ມຍາ ອຣຫຕ຺ຕໍ ປຕ຺ຕນ຺ຕິ ມາ ຕຸຓ຺ຫີ ຠວຕຸ, ຕເຖວ ວີຣິຍໍ ທຬ຺ຫໍ ກໂຣຕຸ ປຣກ຺ກມຕູຕິ ຈິນ຺ເຕຕ຺ວາ ເອວມາຫ.

ອຖ ຠຄວາ ‘‘ອຍໍ ເທວປຸຕ຺ໂຕ ຂີຓາສວສ຺ສ ກິຈ຺ຈໂວສານໍ ອກເຖນ຺ໂຕ ມມ ສາສນໍ ອນິຍ຺ຍານິກໍ ກເຖຕິ, ກິຈ຺ຈໂວສານມສ຺ສ ກເຖສ຺ສາມີ’’ຕິ ຈິນ຺ເຕຕ຺ວາ ນຕ຺ຖິ ກິຈ຺ຈນ຺ຕິອາທິມາຫ. ຕີສຸ ກິຣ ປິຏເກສຸ ອຍໍ ຄາຖາ ອສໍກິຓ຺ຓາ. ຠຄວຕາ ຫິ ອຎ຺ຎຕ຺ຖ ວີຣິຍສ຺ສ ໂທໂສ ນາມ ທສ຺ສິໂຕ ນຕ຺ຖິ. ອິຘ ປນ ອິມໍ ເທວປຸຕ຺ຕໍ ປຏິພາຫິຕ຺ວາ ‘‘ຂີຓາສເວນ ປຸພ຺ພຠາເຄ ອາສວກ຺ຂຍຕ຺ຖາຍ ອຣຎ຺ເຎ ວສນ຺ເຕນ ກມ຺ມຏ຺ຐານໍ ອາທາຍ ວີຣິຍໍ ກຕໍ, ອປຣຠາເຄ ສເຈ ອິຈ຺ຉຕິ, ກໂຣຕຸ, ໂນ ເຈ ອິຈ຺ຉຕິ, ຍຖາສຸຂໍ ວິຫຣຕູ’’ຕິ ຂີຓາສວສ຺ສ ກິຈ຺ຈໂວສານທສ຺ສນຕ຺ຖໍ ເອວມາຫ. ຕຕ຺ຖ ຄາຘນ຺ຕິ ປຕິຏ຺ຐໍ. ປຎ຺ຈມໍ.