໑. ປຐມວຄ຺ໂຄ

໑. ປຐມກສ຺ສປສຸຕ຺ຕວຓ຺ຓນາ

໘໒. ເທວປຸຕ຺ຕສໍຍຸຕ຺ຕສ຺ສ ປຐເມ ເທວປຸຕ຺ໂຕຕິ ເທວານຎ຺ຫິ ອງ຺ເກ ນິພ຺ພຕ຺ຕາ ປຸຣິສາ ເທວປຸຕ຺ຕາ ນາມ, ອິຕ຺ຖິໂຍ ເທວຘີຕໂຣ ນາມ ໂຫນ຺ຕິ. ນາມວເສນ ອປາກຏາວ ‘‘ອຎ຺ຎຕຣາ ເທວຕາ’’ຕິ ວຸຈ຺ຈຕິ, ປາກໂຏ ‘‘ອິຕ຺ຖນ຺ນາໂມ ເທວປຸຕ຺ໂຕ’’ຕິ. ຕສ຺ມາ ເຫຏ຺ຐາ ‘‘ອຎ຺ຎຕຣາ ເທວຕາ’’ຕິ ວຕ຺ວາ ອິຘ ‘‘ເທວປຸຕ຺ໂຕ’’ຕິ ວຸຕ຺ຕໍ. ອນຸສາສນ຺ຕິ ອນຸສິຏ຺ຐິໍ. ອຍໍ ກິຣ ເທວປຸຕ຺ໂຕ ຠຄວຕາ ສມ຺ໂພຘິໂຕ ສຕ຺ຕເມ ວສ຺ເສ ຍມກປາຏິຫາຣິຍໍ ກຕ຺ວາ ຕິທສປຸເຣ ວສ຺ສໍ ອຸປຄມ຺ມ ອຠິຘມ຺ມໍ ເທເສນ຺ເຕນ ຌານວິຠງ຺ເຄ – ‘‘ຠິກ຺ຂູຕິ ສມຎ຺ຎາຍ ຠິກ຺ຂຸ, ປຏິຎ຺ຎາຍ ຠິກ຺ຂູ’’ຕິ (ວິຠ. ໕໑໐). ເອວໍ ຠິກ຺ຂຸນິທ຺ເທສໍ ກຖິຍມານໍ ອສ຺ໂສສິ. ‘‘ເອວໍ ວິຕກ຺ເກຖ, ມາ ເອວໍ ວິຕກ຺ກຍິຕ຺ຖ, ເອວໍ ມນສິກໂຣຖ, ມາ ເອວໍ ມນສາກຕ຺ຖ. ອິທໍ ປຊຫຖ, ອິທໍ ອຸປສມ຺ປຊ຺ຊ ວິຫຣຖາ’’ຕິ (ປາຣາ. ໑໙). ເອວຣູປໍ ປນ ຠິກ຺ຂຸໂອວາທໍ ຠິກ຺ຂຸອນຸສາສນໍ ນ ອສ຺ໂສສິ. ໂສ ຕໍ ສນ຺ຘາຍ – ‘‘ຠິກ຺ຂຸໍ ຠຄວາ ປກາເສສິ, ໂນ ຈ ຠິກ຺ຂຸໂນ ອນຸສາສ’’ນ຺ຕິ ອາຫ.

ເຕນ ຫີຕິ ຍສ຺ມາ ມຍາ ຠິກ຺ຂຸໂນ ອນຸສິຏ຺ຐິ ນ ປກາສິຕາຕິ ວທສິ, ຕສ຺ມາ. ຕຎ຺ເຎເວຕ຺ຖ ປຏິຠາຕູຕິ ຕຸຍ຺ເຫເວສາ ອນຸສິຏ຺ຐິປກາສນາ ອຸປຏ຺ຐາຕູຕິ. ໂຍ ຫິ ປຎ຺ຫໍ ກເຖຕຸກາໂມ ໂຫຕິ, ນ ຈ ສກ຺ໂກຕິ ສພ຺ພຎ຺ຎຸຕຎ຺ຎາເຓນ ສທ຺ຘິໍ ສໍສນ຺ທິຕ຺ວາ ກເຖຕຸໍ. ໂຍ ວາ ນ ກເຖຕຸກາໂມ ໂຫຕິ, ສກ຺ໂກຕິ ປນ ກເຖຕຸໍ. ໂຍ ວາ ເນວ ກເຖຕຸກາໂມ ໂຫຕິ, ກເຖຕຸໍ ນ ຈ ສກ຺ໂກຕິ. ສພ຺ເພສມ຺ປິ ເຕສໍ ຠຄວາ ປຎ຺ຫໍ ຠາຣໍ ນ ກໂຣຕິ. ອຍໍ ປນ ເທວປຸຕ຺ໂຕ ກເຖຕຸກາໂມ ເຈວ, ສກ຺ໂກຕິ ຈ ກເຖຕຸໍ. ຕສ຺ມາ ຕສ຺ເສວ ຠາຣໍ ກໂຣນ຺ໂຕ ຠຄວາ ເອວມາຫ. ໂສປິ ປຎ຺ຫໍ ກເຖສິ.

ຕຕ຺ຖ ສຸຠາສິຕສ຺ສ ສິກ຺ເຂຖາຕິ ສຸຠາສິຕໍ ສິກ຺ເຂຍ຺ຍ, ຈຕຸສຈ຺ຈນິສ຺ສິຕໍ ທສກຖາວຕ຺ຖຸນິສ຺ສິຕໍ ສຕ຺ຕຕິໍສໂພຘິປກ຺ຂິຍນິສ຺ສິຕໍ ຈຕຸພ຺ພິຘໍ ວຈີສຸຈຣິຕເມວ ສິກ຺ເຂຍ຺ຍ. ສມຓູປາສນສ຺ສ ຈາຕິ ສມເຓຫິ ອຸປາສິຕພ຺ພໍ ສມຓູປາສນໍ ນາມ ອຏ຺ຐຕິໍສເຠທໍ ກມ຺ມຏ຺ຐານໍ, ຕມ຺ປິ ສິກ຺ເຂຍ຺ຍ ຠາເວຍ຺ຍາຕິ ອຕ຺ໂຖ. ພຫຸສ຺ສຸຕານໍ ວາ ຠິກ຺ຂູນໍ ອຸປາສນມ຺ປິ ສມຓູປາສນໍ. ຕມ຺ປິ ‘ກິໍ, ຠນ຺ເຕ, ກຸສລ’’ນ຺ຕິອາທິນາ ປຎ຺ຫປຸຈ຺ຉເນນ ປຎ຺ຎາວຸທ຺ຘຕ຺ຖໍ ສິກ຺ເຂຍ຺ຍ. ຈິຕ຺ຕວູປສມສ຺ສ ຈາຕິ ອຏ຺ຐສມາປຕ຺ຕິວເສນ ຈິຕ຺ຕວູປສມໍ ສິກ຺ເຂຍ຺ຍ. ອິຕິ ເທວປຸຕ຺ເຕນ ຕິສ຺ໂສ ສິກ຺ຂາ ກຖິຕາ ໂຫນ຺ຕິ. ປຸຣິມປເທນ ຫິ ອຘິສີລສິກ຺ຂາ ກຖິຕາ, ທຸຕິຍປເທນ ອຘິປຎ຺ຎາສິກ຺ຂາ, ຈິຕ຺ຕວູປສເມນ ອຘິຈິຕ຺ຕສິກ຺ຂາຕິ ເອວໍ ອິມາຍ ຄາຖາຍ ສກລມ຺ປິ ສາສນໍ ປກາສິຕເມວ ໂຫຕິ. ປຐມໍ.

໒. ທຸຕິຍກສ຺ສປສຸຕ຺ຕວຓ຺ຓນາ

໘໓. ທຸຕິເຍ ຌາຍີຕິ ທ຺ວີຫິ ຌາເນຫິ ຌາຍີ. ວິມຸຕ຺ຕຈິຕ຺ໂຕຕິ ກມ຺ມຏ຺ຐານວິມຸຕ຺ຕິຍາ ວິມຸຕ຺ຕຈິຕ຺ໂຕ. ຫທຍສ຺ສານຸປຕ຺ຕິນ຺ຕິ ອຣຫຕ຺ຕໍ. ໂລກສ຺ສາຕິ ສງ຺ຂາຣໂລກສ຺ສ. ອນິສ຺ສິໂຕຕິ ຕຓ຺ຫາທິຏ຺ຐີຫິ ອນິສ຺ສິໂຕ, ຕຓ຺ຫາທິຏ຺ຐິໂຍ ວາ ອນິສ຺ສິໂຕ. ຕທານິສໍໂສຕິ ອຣຫຕ຺ຕານິສໍໂສ. ອິທໍ ວຸຕ຺ຕໍ ໂຫຕິ – ອຣຫຕ຺ຕານິສໍໂສ ຠິກ຺ຂຸ ອຣຫຕ຺ຕໍ ປຕ຺ເຖນ຺ໂຕ ຌາຍີ ຠເວຍ຺ຍ, ສຸວິມຸຕ຺ຕຈິຕ຺ໂຕ ຠເວຍ຺ຍ, ໂລກສ຺ສ ອຸທຍພ຺ພຍໍ ຎຕ຺ວາ ອນິສ຺ສິໂຕ ຠເວຍ຺ຍ. ຕນ຺ຕິຘມ຺ໂມ ປນ ອິມສ຺ມິໍ ສາສເນ ປຸພ຺ພຠາໂຄຕິ. ທຸຕິຍໍ.

໓-໔. ມາຆສຸຕ຺ຕາທິວຓ຺ຓນາ

໘໔. ຕຕິເຍ ມາໂຆຕິ ສກ຺ກສ຺ເສຕໍ ນາມໍ. ສ຺ເວວ ວຕ຺ເຕນ ອຎ຺ເຎ ອຠິຠວິຕ຺ວາ ເທວິສ຺ສຣິຍໍ ປຕ຺ໂຕຕິ ວຕ຺ຣຠູ, ວຕ຺ຣນາມກໍ ວາ ອສຸຣໍ ອຠິຠວຕີຕິ ວຕ຺ຣຠູ. ຕຕິຍໍ.

໘໕. ຈຕຸຕ຺ຖໍ ວຸຕ຺ຕຕ຺ຖເມວ. ຈຕຸຕ຺ຖໍ.

໕. ທາມລິສຸຕ຺ຕວຓ຺ຓນາ

໘໖. ປຎ຺ຈເມ ນ ເຕນາສີສເຕ ຠວນ຺ຕິ ເຕນ ກາຣເຓນ ຍໍ ກິຎ຺ຈິ ຠວໍ ນ ປຕ຺ເຖຕິ. ອາຍຕປຄ຺ຄໂຫ ນາເມສ ເທວປຸຕ຺ໂຕ, ຂີຓາສວສ຺ສ ກິຈ຺ຈໂວສານໍ ນຕ຺ຖິ. ຂີຓາສເວນ ຫິ ອາທິໂຕ ອຣຫຕ຺ຕປ຺ປຕ຺ຕິຍາ ວີຣິຍໍ ກຕໍ, ອປຣຠາເຄ ມຍາ ອຣຫຕ຺ຕໍ ປຕ຺ຕນ຺ຕິ ມາ ຕຸຓ຺ຫີ ຠວຕຸ, ຕເຖວ ວີຣິຍໍ ທຬ຺ຫໍ ກໂຣຕຸ ປຣກ຺ກມຕູຕິ ຈິນ຺ເຕຕ຺ວາ ເອວມາຫ.

ອຖ ຠຄວາ ‘‘ອຍໍ ເທວປຸຕ຺ໂຕ ຂີຓາສວສ຺ສ ກິຈ຺ຈໂວສານໍ ອກເຖນ຺ໂຕ ມມ ສາສນໍ ອນິຍ຺ຍານິກໍ ກເຖຕິ, ກິຈ຺ຈໂວສານມສ຺ສ ກເຖສ຺ສາມີ’’ຕິ ຈິນ຺ເຕຕ຺ວາ ນຕ຺ຖິ ກິຈ຺ຈນ຺ຕິອາທິມາຫ. ຕີສຸ ກິຣ ປິຏເກສຸ ອຍໍ ຄາຖາ ອສໍກິຓ຺ຓາ. ຠຄວຕາ ຫິ ອຎ຺ຎຕ຺ຖ ວີຣິຍສ຺ສ ໂທໂສ ນາມ ທສ຺ສິໂຕ ນຕ຺ຖິ. ອິຘ ປນ ອິມໍ ເທວປຸຕ຺ຕໍ ປຏິພາຫິຕ຺ວາ ‘‘ຂີຓາສເວນ ປຸພ຺ພຠາເຄ ອາສວກ຺ຂຍຕ຺ຖາຍ ອຣຎ຺ເຎ ວສນ຺ເຕນ ກມ຺ມຏ຺ຐານໍ ອາທາຍ ວີຣິຍໍ ກຕໍ, ອປຣຠາເຄ ສເຈ ອິຈ຺ຉຕິ, ກໂຣຕຸ, ໂນ ເຈ ອິຈ຺ຉຕິ, ຍຖາສຸຂໍ ວິຫຣຕູ’’ຕິ ຂີຓາສວສ຺ສ ກິຈ຺ຈໂວສານທສ຺ສນຕ຺ຖໍ ເອວມາຫ. ຕຕ຺ຖ ຄາຘນ຺ຕິ ປຕິຏ຺ຐໍ. ປຎ຺ຈມໍ.

໖. ກາມທສຸຕ຺ຕວຓ຺ຓນາ

໘໗. ຉຏ຺ເຐ ທຸກ຺ກຣນ຺ຕິ ອຍໍ ກິຣ ເທວປຸຕ຺ໂຕ ປຸພ຺ພໂຍຄາວຈໂຣ ພຫລກິເລສຕາຍ ສປ຺ປໂຍເຄນ ກິເລເສ ວິກ຺ຂມ຺ເຠນ຺ໂຕ ສມຓຘມ຺ມໍ ກຕ຺ວາ ປຸພ຺ພູປນິສ຺ສຍມນ຺ທຕາຍ ອຣິຍຠູມິໍ ອປ຺ປຕ຺ວາວ ກາລໍ ກຕ຺ວາ ເທວໂລເກ ນິພ຺ພຕ຺ໂຕ. ໂສ ‘‘ຕຖາຄຕສ຺ສ ສນ຺ຕິກໍ ຄນ຺ຕ຺ວາ ທຸກ຺ກຣຠາວໍ ອາໂຣເຈສ຺ສາມີ’’ຕິ ອາຄນ຺ຕ຺ວາ ເອວມາຫ. ຕຕ຺ຖ ທຸກ຺ກຣນ຺ຕິ ທສປິ ວສ຺ສານິ…ເປ… ສຏ຺ຐິປິ ຍເທຕໍ ເອກນ຺ຕປຣິສຸທ຺ຘສ຺ສ ສມຓຘມ຺ມສ຺ສ ກຣຓໍ ນາມ, ຕໍ ທຸກ຺ກຣໍ. ເສຂາຕິ ສຕ຺ຕ ເສຂາ. ສີລສມາຫິຕາຕິ ສີເລນ ສມາຫິຕາ ສມຸເປຕາ. ຐິຕຕ຺ຕາຕິ ປຕິຏ຺ຐິຕສຠາວາ. ເອວໍ ປຸຈ຺ຉິຕປຎ຺ຫໍ ວິສ຺ສຊ຺ເຊຕ຺ວາ ອິທານິ ອຸປຣິປຎ຺ຫສມຸຏ຺ຐາປນຕ຺ຖໍ ອນຄາຣິຍຸເປຕສ຺ສາຕິອາທິມາຫ. ຕຕ຺ຖ ອນຄາຣິຍຸເປຕສ຺ສາຕິ ອນຄາຣິຍໍ ນິຄ຺ເຄຫຠາວໍ ອຸເປຕສ຺ສ. ສຕ຺ຕຠູມິເກປິ ຫິ ປາສາເທ ວສນ຺ໂຕ ຠິກ຺ຂຸ ວຸຑ຺ຒຕເຣນ ອາຄນ຺ຕ຺ວາ ‘‘ມຍ຺ຫໍ ອິທໍ ປາປຸຓາຕີ’’ຕິ ວຸຕ຺ເຕ ປຕ຺ຕຈີວຣໍ ອາທາຍ ນິກ຺ຂມເຕວ. ຕສ຺ມາ ‘‘ອນຄາຣິຍຸເປໂຕ’’ຕິ ວຸຈ຺ຈຕິ. ຕຸຏ຺ຐີຕິ ຈຕຸປຈ຺ຈຍສນ຺ໂຕໂສ. ຠາວນາຍາຕິ ຈິຕ຺ຕວູປສມຠາວນາຍ.

ເຕ ເຉຕ຺ວາ ມຈ຺ຈຸໂນ ຊາລນ຺ຕິ ເຍ ຣຕ຺ຕິນ຺ທິວໍ ອິນ຺ທ຺ຣິຍູປສເມ ຣຕາ, ເຕ ທຸສ຺ສມາທຫໍ ຈິຕ຺ຕໍ ສມາທຫນ຺ຕິ. ເຍ ຈ ສມາຫິຕຈິຕ຺ຕາ, ເຕ ຈຕຸປຈ຺ຈຍສນ຺ໂຕສໍ ປູເຣນ຺ຕາ ນ ກິລມນ຺ຕິ. ເຍ ສນ຺ຕຸຏ຺ຐາ, ເຕ ສີລໍ ປູເຣນ຺ຕາ ນ ກິລມນ຺ຕິ. ເຍ ສີເລ ປຕິຏ຺ຐິຕາ ສຕ຺ຕ ເສຂາ, ເຕ ອຣິຍາ ມຈ຺ຈຸໂນ ຊາລສງ຺ຂາຕໍ ກິເລສຊາລໍ ຉິນ຺ທິຕ຺ວາ ຄຈ຺ຉນ຺ຕິ. ທຸຄ຺ຄໂມຕິ ‘‘ສຈ຺ຈເມຕໍ, ຠນ຺ເຕ, ເຍ ອິນ຺ທ຺ຣິຍູປສເມ ຣຕາ, ເຕ ທຸສ຺ສມາທຫໍ ສມາທຫນ຺ຕິ…ເປ… ເຍ ສີເລ ປຕິຏ຺ຐິຕາ, ເຕ ມຈ຺ຈຸໂນ ຊາລໍ ຉິນ຺ທິຕ຺ວາ ຄຈ຺ຉນ຺ຕິ’’. ກິໍ ນ ຄຈ຺ຉິສ຺ສນ຺ຕິ? ອຍໍ ປນ ທຸຄ຺ຄໂມ ຠຄວາ ວິສໂມ ມຄ຺ໂຄຕິ ອາຫ. ຕຕ຺ຖ ກິຎ຺ຈາປິ ອຣິຍມຄ຺ໂຄ ເນວ ທຸຄ຺ຄໂມ ນ ວິສໂມ, ປຸພ຺ພຠາຄປຏິປທາຍ ປນສ຺ສ ພຫູ ປຣິສ຺ສຍາ ໂຫນ຺ຕິ. ຕສ຺ມາ ເອວໍ ວຸຕ຺ໂຕ. ອວໍສິຣາຕິ ຎາຓສິເຣນ ອໂຘສິຣາ ຫຸຕ຺ວາ ປປຕນ຺ຕິ. ອຣິຍມຄ຺ຄໍ ອາໂຣຫິຕຸໍ ອສມຕ຺ຖຕາເຍວ ຈ ເຕ ອນຣິຍມຄ຺ເຄ ປປຕນ຺ຕີຕິ ຈ ວຸຈ຺ຈນ຺ຕິ. ອຣິຍານໍ ສໂມ ມຄ຺ໂຄຕິ ສ຺ເວວ ມຄ຺ໂຄ ອຣິຍານໍ ສໂມ ໂຫຕິ. ວິສເມ ສມາຕິ ວິສເມປິ ສຕ຺ຕກາເຍ ສມາເຍວ. ຉຏ຺ຐໍ.

໗. ປຎ຺ຈາລຈຓ຺ຑສຸຕ຺ຕວຓ຺ຓນາ

໘໘. ສຕ຺ຕເມ ສມ຺ພາເຘຕິ ນີວຣຓສມ຺ພາຘໍ ກາມຄຸຓສມ຺ພາຘນ຺ຕິ ທ຺ເວ ສມ຺ພາຘາ. ເຕສຸ ອິຘ ນີວຣຓສມ຺ພາຘໍ ອຘິປ຺ເປຕໍ. ໂອກາສນ຺ຕິ ຌານສ຺ເສຕໍ ນາມໍ. ປຏິລີນນິສໂຠຕິ ປຏິລີນເສຏ຺ໂຐ. ປຏິລີໂນ ນາມ ປຫີນມາໂນ ວຸຈ຺ຈຕິ. ຍຖາຫ – ‘‘ກຖຎ຺ຈ, ຠິກ຺ຂເວ, ຠິກ຺ຂຸ ປຏິລີໂນ ໂຫຕິ. ອິຘ, ຠິກ຺ຂເວ, ຠິກ຺ຂຸໂນ ອສ຺ມິມາໂນ ປຫີໂນ ໂຫຕິ ອຸຈ຺ຉິນ຺ນມູໂລ ຕາລາວຕ຺ຖຸກໂຕ ອນຠາວໍກໂຕ ອາຍຕິໍ ອນຸປ຺ປາທຘມ຺ໂມ’’ຕິ (ອ. ນິ. ໔.໓໘; ມຫານິ. ໘໗). ປຈ຺ຈລຕ຺ຖໍສູຕິ ປຏິລຠິໍສຸ. ສມ຺ມາ ເຕຕິ ເຍ ນິພ຺ພານປຕ຺ຕິຍາ ສຕິໍ ປຏິລຠິໍສຸ, ເຕ ໂລກຸຕ຺ຕຣສມາຘິນາປິ ສຸສມາຫິຕາຕິ ມິສ຺ສກຊ຺ຌານໍ ກຖິຕໍ. ສຕ຺ຕມໍ.

໘. ຕາຍນສຸຕ຺ຕວຓ຺ຓນາ

໘໙. ອຏ຺ຐເມ ປຸຣາຓຕິຕ຺ຖກໂຣຕິ ປຸພ຺ເພ ຕິຕ຺ຖກໂຣ. ເອຕ຺ຖ ຈ ຕິຕ຺ຖໍ ນາມ ທ຺ວາສຏ຺ຐິ ທິຏ຺ຐິໂຍ, ຕິຕ຺ຖກໂຣ ນາມ ຕາສໍ ອຸປ຺ປາທໂກ ສຕ຺ຖາ. ເສຍ຺ຍຖິທໍ ນນ຺ໂທ, ວຈ຺ໂຉ, ກິໂສ, ສໍກິຈ຺ໂຈ. ປຸຣາຓາທໂຍ ປນ ຕິຕ຺ຖິຍາ ນາມ. ອຍໍ ປນ ທິຏ຺ຐິໍ ອຸປ຺ປາເທຕ຺ວາ ກຖໍ ສຄ຺ເຄ ນິພ຺ພຕ຺ໂຕຕິ? ກມ຺ມວາທິຕາຍ. ເອສ ກິຣ ອຸໂປສຖຠຕ຺ຕາທີນິ ອທາສິ, ອນາຖານໍ ວຕ຺ຕໍ ປຏ຺ຐເປສິ, ປຕິສ຺ສເຍ ອກາສິ, ໂປກ຺ຂຣຓິໂຍ ຂຓາເປສິ, ອຎ຺ຎມ຺ປິ ພຫຸໍ ກລ຺ຍາຓໍ ອກາສິ. ໂສ ຕສ຺ສ ນິສ຺ສນ຺ເທນ ສຄ຺ເຄ ນິພ຺ພຕ຺ໂຕ, ສາສນສ຺ສ ປນ ນິຍ຺ຍານິກຠາວໍ ຊານາຕິ. ໂສ ຕຖາຄຕສ຺ສ ສນ຺ຕິກໍ ຄນ຺ຕ຺ວາ ສາສນານຸຈ຺ຉວິກາ ວີຣິຍປ຺ປຏິສໍຍຸຕ຺ຕາ ຄາຖາ ວກ຺ຂາມີຕິ ອາຄນ຺ຕ຺ວາ ຉິນ຺ທ ໂສຕນ຺ຕິອາທິມາຫ.

ຕຕ຺ຖ ຉິນ຺ທາຕິ ອນິຍມິຕອາຓຕ຺ຕິ. ໂສຕນ຺ຕິ ຕຓ຺ຫາໂສຕໍ. ປຣກ຺ກມ຺ມາຕິ ປຣກ຺ກມິຕ຺ວາ ວີຣິຍໍ ກຕ຺ວາ. ກາເມຕິ ກິເລສກາເມປິ ວຕ຺ຖຸກາເມປິ. ປນຸທາຕິ ນີຫຣ. ເອກຕ຺ຕນ຺ຕິ ຌານໍ. ອິທໍ ວຸຕ຺ຕໍ ໂຫຕິ – ກາເມ ອຊຫິຕ຺ວາ ມຸນິ ຌານໍ ນ ອຸປປຊ຺ຊຕິ, ນ ປຏິລຠຕີຕິ ອຕ຺ໂຖ. ກຍິຣາ ເຈ ກຍິຣາເຖນນ຺ຕິ ຍທິ ວີຣິຍໍ ກເຣຍ຺ຍ, ກເຣຍ຺ຍາຖ, ຕໍ ວີຣິຍໍ ນ ໂອສກ຺ເກຍ຺ຍ. ທຬ຺ຫເມນໍ ປຣກ຺ກເມຕິ ທຬ຺ຫໍ ເອນໍ ກເຣຍ຺ຍ. ສິຖິໂລ ຫິ ປຣິພ຺ພາໂຊຕິ ສິຖິລຄຫິຕາ ປພ຺ພຊ຺ຊາ. ຠິຍ຺ໂຍ ອາກິຣເຕ ຣຊນ຺ຕິ ອຕິເຣກໍ ອຸປຣິ ກິເລສຣຊໍ ອາກິຣຕິ. ອກຕໍ ທຸກ຺ກຏໍ ເສຍ຺ໂຍຕິ ທຸກ຺ກຏໍ ອກຕເມວ ເສຍ຺ໂຍ. ຍໍ ກິຎ຺ຈີຕິ ນ ເກວລໍ ທຸກ຺ກຏໍ ກຕ຺ວາ ກຕສາມຎ຺ຎເມວ, ອຎ຺ຎມ຺ປິ ຍໍ ກິຎ຺ຈິ ສິຖິລໍ ກຕໍ ເອວຣູປເມວ ໂຫຕິ. ສໍກິລິຏ຺ຐນ຺ຕິ ທຸກ຺ກຣກາຣິກວຕໍ. ອິມສ຺ມິໍ ຫິ ສາສເນ ປຈ຺ຈຍເຫຕຸ ສມາທິນ຺ນຘຸຕງ຺ຄວຕໍ ສໍກິລິຏ຺ຐເມວ. ສງ຺ກສ຺ສຣນ຺ຕິ ສງ຺ກາຍ ສຣິຕໍ, ‘‘ອິທມ຺ປິ ອິມິນາ ກຕໍ ຠວິສ຺ສຕິ, ອິທມ຺ປິ ອິມິນາ’’ຕິ ເອວໍ ອາສງ຺ກິຕປຣິສງ຺ກິຕໍ. ອາທິພ຺ຣຫ຺ມຈຣິຍິກາຕິ ມຄ຺ຄພ຺ຣຫ຺ມຈຣິຍສ຺ສ ອາທິຠູຕາ ປຸພ຺ພປຘານຠູຕາ. ອຏ຺ຐມໍ.

໙. ຈນ຺ທິມສຸຕ຺ຕວຓ຺ຓນາ

໙໐. ນວເມ ຈນ຺ທິມາຕິ ຈນ຺ທວິມານວາສີ ເທວປຸຕ຺ໂຕ. ສພ຺ພຘີຕິ ສພ຺ເພສຸ ຂນ຺ຘອາຍຕນາທີສຸ. ໂລການຸກມ຺ປກາຕິ ຕຸຍ຺ຫມ຺ປິ ເອຕສ຺ສປິ ຕາທິສາ ເອວ. ສນ຺ຕຣມາໂນວາຕິ ຕຸຣິໂຕ ວິຍ. ປມຸຎ຺ຈສີຕິ ອຕີຕຕ຺ເຖ ວຕ຺ຕມານວຈນໍ. ນວມໍ.

໑໐. ສູຣິຍສຸຕ຺ຕວຓ຺ຓນາ

໙໑. ທສເມ ສູຣິໂຍຕິ ສູຣິຍວິມານວາສີ ເທວປຸຕ຺ໂຕ. ອນ຺ຘກາເຣຕິ ຈກ຺ຂຸວິຎ຺ຎາຓຸປ຺ປຕ຺ຕິນິວາຣເຓນ ອນ຺ຘຠາວກຣເຓ. ວິໂຣຈຕີຕິ ເວໂຣຈໂນ. ມຓ຺ຑລີຕິ ມຓ຺ຑລສຓ຺ຐາໂນ. ມາ, ຣາຫຸ, ຄິລີ ຈຣມນ຺ຕລິກ຺ເຂຕິ ອນ຺ຕລິກ຺ເຂ ຈຣໍ ສູຣິຍໍ, ຣາຫຸ, ມາ ຄິລີຕິ ວທຕິ. ກິໍ ປເນສ ຕໍ ຄິລຕີຕິ? ອາມ, ຄິລຕິ. ຣາຫຸສ຺ສ ຫິ ອຕ຺ຕຠາໂວ ມຫາ, ອຸຈ຺ຈຕ຺ຕເນນ ອຏ຺ຐໂຍຊນສຕາຘິການິ ຈຕ຺ຕາຣິ ໂຍຊນສຫສ຺ສານິ, ພາຫນ຺ຕຣມສ຺ສ ທ຺ວາທສໂຍຊນສຕານິ, ພຫລຕ຺ເຕນ ຉ ໂຍຊນສຕານິ, ສີສໍ ນວ ໂຍຊນສຕໍ, ນລາຏໍ ຕິໂຍຊນສຕໍ, ຠມຸກນ຺ຕຣໍ ປຓ຺ຓາສໂຍຊນໍ, ມຸຂໍ ທ຺ວິໂຍຊນສຕໍ, ຆານໍ ຕິໂຍຊນສຕໍ, ມຸຂາຘານໍ ຕິໂຍຊນສຕຄມ຺ຠີຣໍ ຫຕ຺ຖຕລປາທຕລານິ ປຸຖຸລໂຕ ທ຺ວິໂຍຊນສຕານິ. ອງ຺ຄຸລິປພ຺ພານິ ປຓ຺ຓາສ ໂຍຊນານິ. ໂສ ຈນ຺ທິມສູຣິເຍ ວິໂຣຈມາເນ ທິສ຺ວາ ອິສ຺ສາປກໂຕ ເຕສໍ ຄມນວີຖິໍ ໂອຕຣິຕ຺ວາ ມຸຂໍ ວິວຣິຕ຺ວາ ຕິຏ຺ຐຕິ. ຈນ຺ທວິມານໍ ສູຣິຍວິມານໍ ວາ ຕິໂຍຊນສຕິເກ ມຫານຣເກ ປກ຺ຂິຕ຺ຕໍ ວິຍ ໂຫຕິ. ວິມາເນ ອຘິວຕ຺ຖາ ເທວຕາ ມຣຓຠຍຕຊ຺ຊິຕາ ເອກປ຺ປຫາເຣເນວ ວິຣວນ຺ຕິ. ໂສ ປນ ວິມານໍ ກທາຈິ ຫຕ຺ເຖນ ຉາເທຕິ, ກທາຈິ ຫນຸກສ຺ສ ເຫຏ຺ຐາ ປກ຺ຂິປຕິ, ກທາຈິ ຊິວ຺ຫາຍ ປຣິມຊ຺ຊຕິ, ກທາຈິ ອວຄຓ຺ຑກາຣກໍ ຠຸຎ຺ຊນ຺ໂຕ ວິຍ ກໂປລນ຺ຕເຣ ຐເປຕິ. ເວຄໍ ປນ ວາເຣຕຸໍ ນ ສກ຺ໂກຕິ. ສເຈ ວາເຣສ຺ສາມີຕິ ຄຓ຺ຑກໍ ກຕ຺ວາ ຕິຏ຺ເຐຍ຺ຍ, ມຕ຺ຖກໍ ຕສ຺ສ ຠິນ຺ທິຕ຺ວາ ນິກ຺ຂເມຍ຺ຍ, ອາກຑ຺ຒິຕ຺ວາ ວາ ນໍ ໂອນເມຍ຺ຍ. ຕສ຺ມາ ວິມາເນນ ສເຫວ ຄຈ຺ຉຕິ. ປຊໍ ມມນ຺ຕິ ຈນ຺ທິມສູຣິຍາ ກິຣ ທ຺ເວປິ ເທວປຸຕ຺ຕາ ມຫາສມຍສຸຕ຺ຕກຖນທິວເສ ໂສຕາປຕ຺ຕິຜລໍ ປຕ຺ຕາ. ເຕນ ຠຄວາ ‘‘ປຊໍ ມມ’’ນ຺ຕິ ອາຫ, ປຸຕ຺ໂຕ ມມ ເອໂສຕິ ອຕ຺ໂຖ. ທສມໍ.

ປຐໂມ ວຄ຺ໂຄ.