໗. ປຸນພ຺ພສຸສຸຕ຺ຕວຓ຺ຓນາ

໒໔໑. ສຕ຺ຕເມ ເຕນ ໂຂ ປນ ສມເຍນາຕິ ກຕຣສມເຍນ? ສູຣິຍສ຺ສ ອຕ຺ຖງ຺ຄມນສມເຍນ. ຕທາ ກິຣ ຠຄວາ ປຈ຺ຉາຠຕ຺ເຕ ມຫາຊນສ຺ສ ຘມ຺ມໍ ເທເສຕ຺ວາ ມຫາຊນໍ ອຸຍ຺ໂຍເຊຕ຺ວາ ນ຺ຫານໂກຏ຺ຐເກ ນ຺ຫຕ຺ວາ ຄນ຺ຘກຸຏິປຣິເວເຓ ປຎ຺ຎຕ຺ຕວຣພຸທ຺ຘາສເນ ປຸຣຕ຺ຖິມໂລກຘາຕຸໍ ໂອໂລກຍມາໂນ ນິສີທິ. ອເຖກຈາຣິກທ຺ວິຈາຣິກາທໂຍ ປໍສຸກູລິກປິຓ຺ຑປາຕິກຠິກ຺ຂູ ອຕ຺ຕໂນ ອຕ຺ຕໂນ ວສນຏ຺ຐາເນຫິ ນິກ຺ຂມິຕ຺ວາ ອາຄມ຺ມ ທສພລໍ ວນ຺ທິຕ຺ວາ ຣຕ຺ຕສາຓິຍາ ປຣິກ຺ຂິປມານາ ວິຍ ນິສີທິໍສຸ. ອຖ ເນສໍ ອຊ຺ຌາສຍໍ ວິທິຕ຺ວາ ສຕ຺ຖາ ນິພ຺ພານປຏິສໍຍຸຕ຺ຕໍ ຘມ຺ມກຖໍ ກເຖສິ.

ເອວໍ ໂຕເສສີຕິ ສາ ກິຣ ຘີຕຣໍ ອງ຺ເກນາທາຍ ປຸຕ຺ຕໍ ອງ຺ຄຸລິຍາ ຄເຫຕ຺ວາ ເຊຕວນປິຏ຺ຐິຍໍ ປາກາຣປຣິກ຺ເຂປສມີເປ ອຸຈ຺ຈາຣປສ຺ສາວເຂຬສິງ຺ຆາຓິກໍ ປຣິເຍສມານາ ອນຸປຸພ຺ເພນ ເຊຕວນທ຺ວາຣໂກຏ຺ຐກໍ ສມ຺ປຕ຺ຕາ. ຠຄວໂຕ ຈ, ‘‘ອານນ຺ທ, ປຕ຺ຕໍ ອາຫຣ, ຈີວຣໍ ອາຫຣ, ວິຆາສາທານໍ ທານໍ ເທຫີ’’ຕິ ກເຖນ຺ຕສ຺ສ ສທ຺ໂທ ສມນ຺ຕາ ທ຺ວາທສຫຕ຺ຖມຕ຺ຕເມວ ຄຓ຺ຫາຕິ. ຘມ຺ມໍ ເທເສນ຺ຕສ຺ສ ສເຈປິ ຈກ຺ກວາຬປຣິຍນ຺ຕໍ ກຕ຺ວາ ປຣິສາ ນິສີທຕິ, ຍຖາ ປຣິສໍ ຄຈ຺ຉຕິ, ພຫິປຣິສາຍ ເອກງ຺ຄຸລິມຕ຺ຕມ຺ປິ ນ ນິຄ຺ຄຈ຺ຉຕິ, ‘‘ມາ ອກາຣຓາ ມຘຸຣສທ຺ໂທ ນສ຺ສີ’’ຕິ. ຕຕ຺ຣາຍໍ ຍກ຺ຂິນີ ພຫິປຣິສາຍ ຐິຕາ ສທ຺ທໍ ນ ສຸຓາຕິ, ທ຺ວາຣໂກຏ຺ຐເກ ຐິຕາຍ ປນສ຺ສາ ມຫຕິຍາ ພຸທ຺ຘວີຖິຍາ ອຠິມຸເຂ ຐິຕາ ຄນ຺ຘກຸຏິ ປຎ຺ຎາຍິ. ສາ ນິວາເຕ ທີປສິຂາ ວິຍ ພຸທ຺ຘຄາຣເວນ ຫຕ຺ຖກຸກ຺ກຸຈ຺ຈາທິຣຫິຕໍ ນິຈ຺ຈລໍ ປຣິສໍ ທິສ຺ວາ – ‘‘ນູນ ເມຕ຺ຖ ກິຎ຺ຈິ ຠາຊນີຍຠຓ຺ຑໍ ຠວິສ຺ສຕິ, ຍໂຕ ອຫໍ ສປ຺ປິເຕລມຘຸຜາຓິຕາທີສຸ ກິຎ຺ຈິເທວ ປຕ຺ຕໂຕ ວາ ຫຕ຺ຖໂຕ ວາ ປຄ຺ຆຣນ຺ຕໍ ຠູມິຍໍ ວາ ປນ ປຕິຕໍ ລຠິສ຺ສາມີ’’ຕິ ອນ຺ໂຕວິຫາຣໍ ປາວິສິ. ທ຺ວາຣໂກຏ຺ຐເກ ອວຣຸທ຺ຘການໍ ນິວາຣຓຕ຺ຖາຍ ຐິຕາ ອາຣກ຺ຂເທວຕາ ຍກ຺ຂິນິຍາ ອຸປນິສ຺ສຍໍ ທິສ຺ວາ ນ ນິວາເຣສິ. ຕສ຺ສາ ສຫ ປຣິສາຍ ເອກີຠາວຄມເນນ ມຘຸຣສ຺ສໂຣ ຉວິອາທີນິ ຉິນ຺ທິຕ຺ວາ ອຏ຺ຐິມິຎ຺ຊໍ ອາຫຈ຺ຈ ອຏ຺ຐາສິ. ຕໍ ຘມ຺ມສ຺ສວນຕ຺ຖາຍ ນິຈ຺ຈລໍ ຐິຕໍ ປຸຣິມນເຍເນວ ປຸຕ຺ຕກາ ໂຈທຍິໍສຸ. ສາ ‘‘ຘມ຺ມສ຺ສວນສ຺ສ ເມ ອນ຺ຕຣາຍໍ ກໂຣນ຺ຕີ’’ຕິ ປຸຕ຺ຕເກ ຕຸຓ຺ຫີ ອຸຕ຺ຕຣິເກ ໂຫຫີຕິ ເອວໍ ໂຕເສສິ.

ຕຕ຺ຖ ຍາວາຕິ ຍາວ ຘມ຺ມໍ ສຸຓາມິ, ຕາວ ຕຸຓ຺ຫີ ໂຫຫີຕິ ອຕ຺ໂຖ. ສພ຺ພຄນ຺ຖປ຺ປໂມຈນນ຺ຕິ ນິພ຺ພານໍ ອາຄມ຺ມ ສພ຺ເພ ຄນ຺ຖາ ປມຸຈ຺ຈນ຺ຕິ, ຕສ຺ມາ ຕໍ ສພ຺ພຄນ຺ຖປ຺ປໂມຈນນ຺ຕິ ວຸຈ຺ຈຕິ. ອຕິເວລາຕິ ເວລາຕິກ຺ກນ຺ຕາ ປມາຓາຕິກ຺ກນ຺ຕາ. ປິຍາຍນາຕິ ມຄ຺ຄນາ ປຕ຺ຖນາ. ຕໂຕ ປິຍຕຣນ຺ຕິ ຍາ ອຍໍ ອສ຺ສ ຘມ຺ມສ຺ສ ມຄ຺ຄນາ ປຕ຺ຖນາ, ອິທໍ ມຍ຺ຫໍ ຕໂຕ ປິຍຕຣນ຺ຕິ ອຕ຺ໂຖ. ປິຍຕຣາຕິ ວາ ປາໂຐ. ປາຓິນນ຺ຕິ ຍຖາ ປາຓີນໍ ທຸກ຺ຂາ ໂມເຈຕິ. ເກ ໂມເຈຕີຕິ? ປາຓິເນຕິ ອາຫຣິຕ຺ວາ ວຕ຺ຕພ຺ພໍ. ຍໍ ຘມ຺ມໍ ອຠິສມ຺ພຸທ຺ຘນ຺ຕິ, ຍໍ ຘມ຺ມໍ ຠຄວາ ອຠິສມ຺ພຸທ຺ໂຘ. ຕຸຓ຺ຫີຠູຕາຍມຸຕ຺ຕຣາຕິ ນ ເກວລໍ ອຫເມວ, ອຍໍ ເມ ຠຄິນີ ອຸຕ຺ຕຣາປິ ຕຸຓ຺ຫີຠູຕາຕິ ວທຕິ. ສທ຺ຘມ຺ມສ຺ສ ອນຎ຺ຎາຍາຕິ, ອມ຺ມ, ມຍໍ ປຸພ຺ເພປິ ອິມໍ ສທ຺ຘມ຺ມເມວ ອຊານິຕ຺ວາ ອິທານິ ອິທໍ ຂຸປ຺ປິປາສາທິທຸກ຺ຂໍ ອນຸຠວນ຺ຕາ ທຸກ຺ຂໍ ຈຣາມ ວິຫຣາມ.

ຈກ຺ຂຸມາຕິ ປຎ຺ຈຫິ ຈກ຺ຂູຫິ ຈກ຺ຂຸມາ. ຘມ຺ມໍ ເທເສນ຺ໂຕເຍວ ຠຄວາ ປຣິສໍ ສລ຺ລກ຺ຂຍມາໂນ ຕສ຺ສາ ຍກ຺ຂິນິຍາ ເຈວ ຍກ຺ຂທາຣກສ຺ສ ຈ ໂສຕາປຕ຺ຕິຜລສ຺ສ ອຸປນິສ຺ສຍໍ ທິສ຺ວາ ເທສນໍ ວິນິວຏ຺ເຏຕ຺ວາ ຈຕຸສຈ຺ຈກຖໍ ທີເປຕິ, ຕໍ ສຸຕ຺ວາ ຕສ຺ມິໍເຍວ ເທເສ ຐິຕາ ຍກ຺ຂິນີ ສທ຺ຘິໍ ປຸຕ຺ເຕນ ໂສຕາປຕ຺ຕິຜເລ ປຕິຏ຺ຐິຕາ. ຘີຕຸຍາປິ ປນສ຺ສາ ອຸປນິສ຺ສໂຍ ອຕ຺ຖິ, ອຕິທຫຣຕ຺ຕາ ປນ ເທສນໍ ສມ຺ປຏິຈ຺ຉິຕຸໍ ນາສກ຺ຂິ.

ອິທານິ ສາ ຍກ຺ຂິນີ ປຸຕ຺ຕສ຺ສ ອນຸໂມທນໍ ກໂຣນ຺ຕີ ສາຘຸ ໂຂ ປຓ຺ຑິໂຕ ນາມາຕິອາທິມາຫ. ອຊ຺ຊາຫມ຺ຫິ ສມຸຄ຺ຄຕາຕິ ອຫມ຺ຫິ ອຊ຺ຊ ວຏ຺ຏໂຕ ອຸຄ຺ຄຕາ ສມຸຄ຺ຄຕາ ສາສເນ ວາ ອຸຄ຺ຄຕາ ສມຸຄ຺ຄຕາ, ຕ຺ວມ຺ປິ ສຸຂີ ໂຫຫີຕິ. ທິຏ຺ຐານີຕິ ມຍາ ຈ ຕຍາ ຈ ທິຏ຺ຐານິ. ອຸຕ຺ຕຣາປິ ສຸຓາຕຸ ເມຕິ, ‘‘ອມ຺ຫາກໍ ຈຕຸສຈ຺ຈປຏິເວຘຠາວໍ, ຘີຕາ ເມ ອຸຕ຺ຕຣາປິ, ສຸຓາຕູ’’ຕິ ວທຕິ. ສຫ ສຈ຺ຈປຏິເວເຘເນວ ສາປິ ສູຈິໂລໂມ ວິຍ ສພ຺ພໍ ເສຕກຓ຺ຑຸກຈ຺ຉຸອາທິຠາວໍ ປຫາຍ ທິພ຺ພສມ຺ປຕ຺ຕິໍ ປຏິລຠຕິ ສທ຺ຘິໍ ປຸຕ຺ເຕນ. ຘີຕາ ປນສ຺ສາ ຍຖາ ນາມ ໂລເກ ມາຕາປິຕູຫິ ອິສ຺ສຣິເຍ ລທ຺ເຘ ປຸຕ຺ຕານມ຺ປິ ຕໍ ໂຫຕິ, ເອວໍ ມາຕຸ-ອານຸຠາເວເນວ ສມ຺ປຕ຺ຕິໍ ລຠິ. ຕໂຕ ປຏ຺ຐາຍ ຈ ສາ ສທ຺ຘິໍ ປຸຕ຺ຕເກຫິ ຄນ຺ຘກຸຏິສມີປຣຸກ຺ເຂເຍວ ນິວາສຣຸກ຺ຂໍ ລຠິຕ຺ວາ ສາຍໍ ປາຕໍ ພຸທ຺ຘທສ຺ສນໍ ລຠມານາ ຘມ຺ມໍ ສຸຓມານາ ທີຆຣຕ຺ຕໍ ຕຕ຺ເຖວ ວສິ. ສຕ຺ຕມໍ.