໖. ປິຍງ຺ກຣສຸຕ຺ຕວຓ຺ຓນາ

໒໔໐. ຉຏ຺ເຐ ເຊຕວເນຕິ ເຊຕວນສ຺ສ ປຈ຺ຈນ຺ເຕ ໂກສມ຺ພກກຸຏິ ນາມ ອຕ຺ຖິ, ຕຕ຺ຖ ວິຫຣຕິ. ຘມ຺ມປທານີຕິ ອິຘ ປາຏິເຍກ຺ກໍ ສງ຺ຄຫໍ ອາຣຸຬ຺ຫາ ຉພ຺ພີສຕິວຄ຺ຄາ ຕນ຺ຕິ ອຘິປ຺ເປຕາ. ຕຕ຺ຣ ເຖໂຣ ຕສ຺ມິໍ ສມເຍ ອນ຺ໂຕວິຫາເຣ ນິສິນ຺ໂນ ມຘຸຣສ຺ສເຣນ ສຣຠຎ຺ຎໍ ກຕ຺ວາ ອປ຺ປມາທວຄ຺ຄໍ ຠາສຕິ. ເອວໍ ໂຕເສສີຕິ ສາ ກິຣ ປຸຕ຺ຕໍ ປິຍງ຺ກຣໍ ອງ຺ເກນາທາຍ ເຊຕວນສ຺ສ ປຈ຺ຉິມຠາຄໂຕ ປຏ຺ຐາຍ ໂຄຈຣໍ ປຣິເຍສນ຺ຕີ ອນຸປຸພ຺ເພນ ນຄຣາຠິມຸຂີ ຫຸຕ຺ວາ ອຸຈ຺ຈາຣປສ຺ສາວເຂຬສິງ຺ຆາຓິກທຸພ຺ໂຠຊນານິ ປຣິເຍສມານາ ເຖຣສ຺ສ ວສນຏ຺ຐານໍ ປຕ຺ວາ ມຘຸຣສ຺ສຣໍ ອສ຺ໂສສິ. ຕສ຺ສາ ໂສ ສທ຺ໂທ ຉວິອາທີນິ ເຉຕ຺ວາ ອຏ຺ຐິມິຎ຺ຊໍ ອາຫຈ຺ຈ ຫທຍງ຺ຄມນີໂຍ ຫຸຕ຺ວາ ອຏ຺ຐາສິ. ອຖສ຺ສາ ໂຄຈຣປຣິເຍສເນ ຈິຕ຺ຕມ຺ປິ ນ ອຸປ຺ປຊ຺ຊິ, ໂອຫິຕໂສຕາ ຘມ຺ມເມວ ສຸຓນ຺ຕີ ຐິຕາ. ຍກ຺ຂທາຣກສ຺ສ ປນ ທຫຣຕາຍ ຘມ຺ມສ຺ສວເນ ຈິຕ຺ຕໍ ນຕ຺ຖິ. ໂສ ຊິຆຈ຺ຉາຍ ປີຬິຕຕ຺ຕາ, ‘‘ກສ຺ມາ ອມ຺ມາ ຄຕຄຕຏ຺ຐາເນ ຂາຓຸໂກ ວິຍ ຕິຏ຺ຐສິ? ນ ມຍ຺ຫໍ ຂາທນີຍໍ ວາ ໂຠຊນີຍໍ ວາ ປຣິເຍສສີ’’ຕິ ປຸນປ຺ປຸນໍ ມາຕຣໍ ໂຈເທຕິ. ສາ ‘‘ຘມ຺ມສ຺ສວນສ຺ສ ເມ ອນ຺ຕຣາຍໍ ກໂຣຕີ’’ຕິ ປຸຕ຺ຕກໍ ‘‘ມາ ສທ຺ທໍ ກຣິ, ປິຍງ຺ກຣາ’’ຕິ ເອວໍ ໂຕເສສິ. ຕຕ຺ຖ ມາ ສທ຺ທໍ ກຣີຕິ ສທ຺ທໍ ມາ ກຣິ.

ປາເຓສຸ ຈາຕິ ຄາຖາຍ ສາ ອຕ຺ຕໂນ ຘມ຺ມຕາຍ ສມາທິຓ຺ຓໍ ປຎ຺ຈສີລໍ ທສ຺ເສຕິ. ຕຕ຺ຖ ສໍຍມາມເສຕິ ສໍຍມາມ ສໍຍຕາ ໂຫມ. ອິມິນາ ປາຓາຕິປາຕາ ວິຣຕິ ຄຫິຕາ, ທຸຕິຍປເທນ ມຸສາວາທາ ວິຣຕິ, ຕຕິຍປເທນ ເສສາ ຕິສ຺ໂສ ວິຣຕິໂຍ. ອປິ ມຸຈ຺ເຈມ ປິສາຈໂຍນິຍາຕິ ອປິ ນາມ ຍກ຺ຂໂລເກ ອຸປ຺ປນ຺ນານິ ປຎ຺ຈ ເວຣານິ ປຫາຍ, ໂຍນິໂສ ປຏິປຊ຺ຊິຕ຺ວາ ອິມາຍ ຉາຕກທຸພ຺ຠິກ຺ຂາຍ ປິສາຈຍກ຺ຂໂຍນິຍາ ມຸຈ຺ເຈມ, ຕາຕາຕິ ວທຕິ. ຉຏ຺ຐໍ.