໓. ວິຕ຺ຕສຸຕ຺ຕວຓ຺ຓນາ

໗໓. ຕຕິເຍ ສທ຺ຘີຘ ວິຕ຺ຕນ຺ຕິ ຍສ຺ມາ ສທ຺ໂຘ ສທ຺ຘາຍ ມຸຕ຺ຕມຓິອາທີນິປິ ວິຕ຺ຕານິ ລຠຕິ, ຕິສ຺ໂສປິ ກຸລສມ຺ປທາ, ຉ ກາມສຄ຺ຄານິ, ນວ ພ຺ຣຫ຺ມໂລເກ ປຕ຺ວາ ປຣິໂຍສາເນ ອມຕມຫານິພ຺ພານທສ຺ສນມ຺ປິ ລຠຕິ, ຕສ຺ມາ ມຓິມຸຕ຺ຕາທີຫິ ວິຕ຺ເຕຫິ ສທ຺ຘາວິຕ຺ຕເມວ ເສຏ຺ຐໍ. ຘມ຺ໂມຕິ ທສກຸສລກມ຺ມປໂຖ. ສຸຂມາວຫຕີຕິ ສພ຺ພມ຺ປິ ສາສວານາສວໍ ອສໍກິລິຏ຺ຐສຸຂໍ ອາວຫຕິ. ສາທຸຕຣນ຺ຕິ ໂລກສ຺ມິໍ ໂລຓມ຺ພິລາທີນໍ ສພ຺ພຣສານໍ ສຈ຺ຈເມວ ມຘຸຣຕຣໍ. ສຈ຺ຈສ຺ມິໍ ຫິ ຐິຕາ ສີຆເວຄໍ ນທິມ຺ປິ ນິວຕ຺ເຕນ຺ຕິ, ວິສມ຺ປິ ນິມ຺ມທ຺ເທນ຺ຕິ, ອຄ຺ຄິມ຺ປິ ປຏິພາຫນ຺ຕິ, ເທວມ຺ປິ ວສ຺ສາເປນ຺ຕິ, ຕສ຺ມາ ຕໍ ສພ຺ພຣສານໍ ມຘຸຣຕຣນ຺ຕິ ວຸຕ຺ຕໍ. ປຎ຺ຎາຊີວິໍ ຊີວິຕມາຫຸ ເສຏ຺ຐນ຺ຕິ ໂຍ ປຎ຺ຎາຊີວີ ຄຫຏ຺ໂຐ ສມາໂນ ປຎ຺ຈສຸ ສີເລສຸ ປຕິຏ຺ຐາຍ ສລາກຠຕ຺ຕາທີນິ ປຏ຺ຐເປຕ຺ວາ ປຎ຺ຎາຍ ຊີວຕິ, ປພ຺ພຊິໂຕ ວາ ປນ ຘມ຺ເມນ ອຸປ຺ປນ຺ເນ ປຈ຺ຈເຍ ‘‘ອິທມຕ຺ຖ’’ນ຺ຕິ ປຈ຺ຈເວກ຺ຂິຕ຺ວາ ປຣິຠຸຎ຺ຊນ຺ໂຕ ກມ຺ມຏ຺ຐານໍ ອາທາຍ ວິປສ຺ສນໍ ປຏ຺ຐເປຕ຺ວາ ອຣິຍຜລາຘິຄມວເສນ ປຎ຺ຎາຍ ຊີວຕິ, ຕໍ ປຎ຺ຎາຊີວິໍ ປຸຄ຺ຄລໍ ເສຏ຺ຐໍ ຊີວິຕໍ ຊີວຕີຕິ ອາຫຸ. ຕຕິຍໍ.